Ài súi ê Chháu-kâu

e̍k Chin chá í-chêng, tı̄ chı̍t ê sió-sió ê chhiū-nâ lāi, ū chı̍t chiah ka-kı̄ lia̍h choè i sı̄ choân sè-kài tē it súi ê chháu-kâu; i ta̍k jı̍t tı̄ chhiū-nâ lāi chin tek-ı̀ teh kè jı̍t. M̄-kú ū chı̍t hāng sū hō͘ i kám-kak tio̍h chin siong-sim; chiū-sı̄ in-ūi chhiū-nâ lāi ê chhiū-hio̍h lóng sı̄ chhiⁿ-sek--ê, kap i ê seng-khu sio-siāng, só͘-í lâng lóng chin khùn-lân khoàⁿ chhut i ê súi, soà o-ló i. Só͘-í ū chı̍t jı̍t, chit chiah chháu-kâu sió-chiá kóng, “Goá bô ài toà tı̄ chit ê chhiⁿ-chhùi ê chhiū-nâ lāi, goá siūⁿ pe lâi-khı̀ lō͘-piⁿ hit keng pe̍h-sek chhù-hiā ê chhù-téng thit-thô. Án-ni pa̍t lâng chiah oē khoàⁿ chhut goá ê bí-lē.” Chit chiah chháu-kâu sió-chiá ê ma-ma kiaⁿ chı̍t-ē, kóng, “Lán tio̍h hoaⁿ-hí tiàm tı̄ chit ê chhiⁿ-chhùi ê chhiū-nâ chiàⁿ tio̍h, nā bô, lán oē chin iông-ı̄ⁿ hō͘ khong-tiong ê pe-chiáu khoàⁿ tio̍h. Lí pe khı̀ pe̍h-sek ê chhù-téng, m̄ kiaⁿ chhù-kak chiáu-á pe lâi kā lí thóng khı̀ sı̄--bô? M̄-thang khı̀.” Chit chiah chháu-kâu sió-chiá chin sit-bāng, chiū cháu jı̍p pâng-keng lāi háu, jı̍t tiong-tàu iā m̄ chia̍h-pn̄g. Kàu hit ē-po͘, tú-tn̄g i ê ma-ma chhut-khı̀ bô tı̄-teh ê sı̂, i tùi āu-bé-mn̂g-á thau cháu chhut-khı̀, pe khı̀ i só͘ ài khı̀ ê pe̍h-sek ê chhù-téng. Tú-tn̄g i chin tek-ı̀, tı̄ chhù-téng teh kiâⁿ-lâi kiâⁿ-khı̀ ê sı̂, ū chı̍t chiah koe-kak-á khoàⁿ tio̍h, soà lâu chhùi-noā, kóng, “Chháu-kâu sió-chiá, lí sı̍t-chāi sı̄ choân sè-kài tē it súi--ê, lí nā thang pe lo̍h lâi hō͘ goá khoàⁿ khah chim-chiok leh, m̄-chai beh joā-nih hó leh.” Chit chiah chháu-kâu sió-chiá, chı̍t-ē hō͘ lâng o-ló, sim-lāi chiū chin hoaⁿ-hí tek-ı̀, soà boē kı̀-tit ka-kı̄ ê gûi-hiám. Chiū án-ni tùi chhù-téng pe lo̍h--lâi, lı̄ koe-kak-á iok-lio̍k chı̍t tn̄g ê só͘-chāi, chiū thêng-kha. Koe-kak-á khoàⁿ tio̍h án-ni, chhùi-noā chha̍p-chha̍p-tin, koh kóng, “Oh! Jú kūn khoàⁿ jú súi, lí nā koh pe lâi goá ê seng-khu-piⁿ, goá siūⁿ lí it-tēng koh-khah súi.” Chháu-kâu sió-chiá hō͘ lâng jú po, bé jú khiàu, chin-chiàⁿ pe oá-lâi koe-kak-á ê sin-piⁿ, tú-tú kha khiā chāi ê sı̂, koe-kak-á chhun chhut i chiam koh lāi ê chhùi, chiong chháu-kâu thóng khí-lâi, chia̍h tùi pak-tó͘-lāi lo̍h-khı̀. Hit àm, chháu-kâu ê ma-ma tńg-lâi, khoàⁿ chháu-kâu sió-chiá bô tı̄-teh, chai-iáⁿ it-tēng sı̄ m̄ thiaⁿ oē thau cháu chhut-khı̀, hō͘ lâng chia̍h--khı̀, só͘-í chiū kiò i só͘ chhun ê kiáⁿ lâi, kā in kóng, “Lín m̄-thang kan-ta ài súi, iā koh-khah m̄-thang in-ūi lâng ê o-ló, soà boē kı̀-tit sı̀ⁿ-miā ê gûi-hiám; chhin-chhiūⁿ lín a-chí!” （Lú-soan Ge̍h-khan Tē 73 kı̂, 1966 nı̂ 1 ge̍h)