Âng Bêng-lí pia̍t-sè

Âng Bêng-lí chiū-sı̄ Liōng-á, tùi tı̄ 1893 nı̂ jı̍p-kàu. I tùi chhut-sı̀ í-lâi seng-khu siông-siông bat ū phoà-pı̄ⁿ; kàu chiūⁿ 10 hoè í-lâi chiū khah hán-tit phoà-pı̄ⁿ. Lūn-kàu i-ê chò lâng phoh-sı̍t khiām-séng; i chò lâng ê kiáⁿ-jı̂ ū hàu, ū gı̄, m̄-bián hō͘ in sı̄-toā-lâng siū-khı̀ lâi hiâm i; i sı̄ put-chí gâu pang-chān sı̄-toā-lâng. Tùi kúi-nā nı̂ í-lâi ē hiáu kı̀-siàu, bé-bē put-chí ū chhù-sū. I kap chhù-piⁿ hiuⁿ-siā ê gín-ná chò-hoé, i m̄ bat kap lâng oan-ke, ia̍h m̄ bat kap lâng saⁿ-phah saⁿ-mē, chit-hō ê sū lóng m̄-bat. Goá lâi Tang-káng, i ia̍h bat chiâⁿ nı̂ kú lâi kap goá tha̍k-chheh; tı̄ o̍h--nı̍h i ia̍h sı̄ hián-bêng hó ê khoán-sit. I bat kā goán kóng i chin ài tha̍k-chheh, bat kiû in lāu-pē kàu lâu ba̍k-sái. Lūn i thiaⁿ tō-lí ū put-chí tı̀-ı̀, i-ê sim chēng, só͘ thiaⁿ siông-siông ē kı̀-tit. Lūn i ài jı̍p-kàu, nn̄g pái lâi hō͘ Bo̍k-su mn̄g, i éng sı̄ khah chò chêng lâi, nā ū pí i khah toā ê lâng tı̄-teh, i chiū ài niū lâng tāi-seng. Tùi i jı̍p-kàu liáu-āu, thiaⁿ-kı̀ⁿ Hú-siâⁿ ū sin khí chı̍t-keng Tiong-o̍h-tn̂g, i chin toā him-bō͘ ài khı̀ hia tha̍k-chheh, chiū ko͘-chiâⁿ in lāu-pē lāu-bó i-ê hiaⁿ. I-ê pē ū khoà-lū i-ê sin-thé, kiaⁿ-liáu bē kham, chóng-sı̄ i chin chhiat-ı̀ kiû i-ê pē hiaⁿ, in nā kóng hó, i-ê sim chiū pêng-an, in nā kóng m̄ hō͘ i khı̀, i-ê sim iu-būn kan-khó͘ bē pêng-an. I-ê lāu-pē tiāⁿ-tio̍h ín i hó, i chiū chiong i pún-sin tùi sè-hàn ê sı̂ só͘ lia̍p-chek ê chı̂ⁿ hoaⁿ-hí the̍h chhut lâi, ū gō͘-kho͘ gı̂n, thiap o̍h--nı̍h ê hoé-sı̍t ê só͘-hùi, iáu ū tām-po̍h chò chū-kí ê só͘-hùi. Chiaⁿ goe̍h cha̍p-sı̀ jı̍t chiū tùi Tang-káng khí-sin; chı̍t-lō͘ goá mn̄g i kúi-nā pái, khoàⁿ i kiâⁿ-lō͘ kha ē sng á-bē, beh chē kiō á-m̄, i kóng kha bô sím-mı̍h sng, ē kiâⁿ lō͘ m̄-bián chē kiō. Cha̍p-la̍k kàu Hú-siâⁿ sin-thé pêng-an. Cha̍p-chhit khui o̍h tha̍k-chheh; kàu jı̄-sı̀ jı̍t ū tām-po̍h jia̍t, jı̄-gō͘ jı̍t ia̍h iáu ū tām-po̍h jia̍t.Āu-lâi i-ê jia̍t ū sı̂ khah-hó,ū sı̂ ū tām-po̍h khah-jia̍t, chóng-sı̄ i-ê me̍h ū put-chí khah-kín. Kim i-seng chiū phài lâng teh chiàu-kò͘ i , i-seng ū pı̄-pān put-chí hó-sè ê só͘-chāi hō͘ i thang khùn. In-ūi i phoà-pı̄ⁿ ê sı̂ chin gâu thun-lún, bô chhan bô kiò, i ka-tı̄ ê sim siông-siông ài kap Chú kau-poê, ta̍uh-ta̍uh ū ka-tı̄ teh kı̂-tó. I só͘ chia̍h ê io̍h lóng bô sím-mı̍h èng-hāu. Kàu jı̄-goe̍h chhe gō͘ ē-pō͘ gō͘-tiám-goā cheng, Chú tiàu i an-jiân koè-óng. Ai-ah! Ū chit-hō siàu-liân lâng chı̄n-tiong-hō͘ ê lâng koè-óng lah. Taⁿ tı̄ sè-kan bô thang koh kı̀ⁿ-tio̍h i lah, i ún-tàng hō͘ Chú chiap-la̍p, éng-éng kap Chú Iâ-so͘ saⁿ-kap tı̄-teh, tı̄ hia ū thang hióng-siū Chú Iâ-so͘ só͘ èng-ún ê chun-kùi êng-kng toā hok-khı̀.

Cha̍p-jı̄ jı̍t sı̄ lé-pài-jı̍t, thoân Chú Iâ-so͘ ê tō-lí, bē bián-tit tio̍h lio̍h-lio̍h-á kóng Liōng-á ê tāi-chı̀; só͘-í chı̍t-ē thiaⁿ-kı̀ⁿ hiaⁿ-tı̄ chí-moāi bô m̄ siong-sim lâu ba̍k-sái, i-ê pē-bó siong-sim iu-būn éng bē-bián-tit. Tùi án-ni soà lâi bián-lē hiaⁿ-tı̄ chí-moāi.

1.Lán thang iu-būn i bô toà tı̄ sè-kan thang lâi chò Chú ê kang, in-ūi i pún-sin só͘ him-bō͘ tāi-seng jı̍p Tiong-o̍h, ǹg-bāng āu-lâi ē jı̍p Toā-o̍h, ha̍k-sı̍p tō-lí, ài chò Chú ê kang, ài kui êng-kng Chú ê miâ.

2.Lán tāi-ke chiū kā i hoaⁿ-hí, in-ūi i hō͘ Chú tiàu i kàu thian-tông, lóng bē thang giâu-gı̂, i sı̄ tùi chèng-lâng ê tiông-ng thâi-iâⁿ, i ū chı̄n i-ê khùi-la̍t lâi pháu-cháu kàu tit-tio̍h kiù, tit-tio̍h pò-siúⁿ ê hok-khı̀. Thiaⁿ-kı̀ⁿ i koè-óng m̄-nā kàu-hoē-lāi ê lâng siong-sim, chiū hoē-goā ê lâng ia̍h ū siong-sim lâu ba̍k-sái. Chit-ê tāi-chı̀ thang bián-lē lán tāi-ke tio̍h chò hó lâng. In-ūi lán ê sı̀ⁿ-miā bô tiāⁿ-tio̍h; siàu-liân ê lâng ē koè-óng, hô-hòng lán khah ū hoè ê lâng mah? Kiám m̄ tio̍h kéng-séng pı̄-pān? Chú nā lâi beh kiò lán tò-khı̀, lán chiū hoaⁿ-hí thiaⁿ. Kiù-chú tiàu lán lı̄-khui sè-kan tò-khı̀ Pē ê ke, chiū hoaⁿ-hí kàu bē-kò͘--tit.

(Tâi-oân-hú-siâⁿ Kàu-hoē-pò tē 108 koàn,1894 nı̂ 4 ge̍h)