Âng Khu--sı̄ A-lē ê Sió-toān

Âng Khu--sı̄ A-lē chhut-sı̀ tı̄ Bêng-tı̄ 21 nı̂ 9 ge̍h 26 jı̍t. I sı̄ Toā-kho͘-hām lâng, i ê pē-bú lóng bô thiaⁿ tō-lí. Chóng-sı̄ A-lē chin ài khı̀ pài-tn̂g thiaⁿ lâng kóng Iâ-so͘ ê lâi-le̍k, pài-tn̂g ê sian-siⁿ chiū kà i tha̍k Lô-má-jı̄. Āu-lâi soà kā i kú-chiàn kè hō͘ hoē-iú Âng Hián-lí choè hū-jı̂n-lâng; tiōng-hu hit-sı̂ teh tha̍k Sı̂n-ha̍k-hāu. Kiat-hun liáu chiū kap tiōng-hu khı̀ toà pài-tn̂g kúi-nā nı̂ kú. Liáu-āu tiōng-hu pàng-soah thoân-tō ê kang, i chiū ka-kı̄ kà kong-ha̍k-hāu lâi pang-chān ka-têng ê seng-oa̍h. I ū keng-kè kong-ha̍k-hāu, tē-jı̄ hù-sio̍k, chō͘-sán hū káng-sı̍p-hoē, lóng-chóng ū kàu chut-gia̍p. Che thang kóng sı̄ i ê te̍k-sek; in-ūi i m̄-sı̄ chhut-sı̀ tı̄ bûn-bêng ū kàu-io̍k ê ka-têng, che choan-choan sı̄ tùi i ê hò͘ⁿ-ha̍k khûn-bián lâi tit-tio̍h ê. Āu-lâi ū siū chiok-thok choè Koan-se ê chng-ia̍h-tiûⁿ ê chō͘-sán-hū, tiàm chia keng-kè 5 nı̂ kú put-chí hó sêng-chek, hō͘ chng-bı̂n tāi-ke put-chí o-ló siàu-liām. Khó-sioh i ê seng-khu chiām-chiām soe-jio̍k, chia̍h-io̍h ia̍h bô-hāu, chiū tı̄ 7 ge̍h 26 jı̍t ū hō͘ Chú kéng-tiàu i ê lêng-hûn, hióng siū 42 hè. I tı̄ lı̂m-chiong ê sı̂ chhùi ia̍h tiāⁿ-tiāⁿ teh liām Chú ê Kı̂-tó-bûn. Taⁿ lūn chit ê chí-bē ū kúi-nā hāng ê khó-chhú thang hō͘ chèng chí-bē choè bô͘-hoān. Chiū-sı̄ put-chí tı̀-ı̀ ín-chhoā kiáⁿ-jı̂ jia̍t-sim ha̍k-sāi Siōng-tè, siông-siông tı̀-ı̀ in tio̍h siū lé-pài, koh khûn-khûn kà-sı̄ in bat Sèng-keng. I chāi-seng ū him-bō͘ thiⁿ-kok khah kè-thâu tı̄ Sè-kan, só͘-í Siōng-tè tek-khak oē chiàu i ê hó só͘ kiâⁿ lâi khoán-thāi i. Chhiáⁿ lia̍t-ūi khoàⁿ Pò ê hiaⁿ-chí oē-hiáu o̍h i gâu ín-chhoā kiáⁿ-jı̂ ho̍k-sāi Chú. Sı̄ sim só͘ goān. (Tâi-oân Kàu-hoē-pò tē 535 koàn, 1929 nı̂ 10 goe̍h)