Tē cha̍p Chiuⁿ
Lí sian-siⁿ bô tāi-chı̀ tı̄ pún hiuⁿ-siā kóng tō-lí; tú-gū him-bō͘ tō-lí ê chhù-piⁿ kàu lé-pài-jı̍t chiū chhiáⁿ in kàu i-ê ke-lāi thiaⁿ i kóng Sèng-chheh, i kà-sı̄ lâng bô ià-lán.
In-ūi chhù sè-keng lâng thài chē, siông-siông tı̄ hiuⁿ-siā ê tiong-kan toā tē-tiûⁿ teh kóng tō-lí. Ta̍k lâng ka-kı̄ giâ í-liâu lâi chē teh thiaⁿ i kóng; hiuⁿ-siā ê lâng lóng chai i chāi-chá án-cháiⁿ-iūⁿ put-siàu; āu--lâi án-cháiⁿ-iūⁿ hoán-hoé ké-pı̀ⁿ. Só͘-í bô beh thiaⁿ i ê lâng sı̄ chió-chió. I ê tō-lí sui-jiân kap sè-sio̍k bô saⁿ-tâng, tàu-tí kap lâng óng-lâi, sı̄ ēng lé-māu sio khoán-thāi. Iū-koh i kóng tō-lí ê sı̂ chèng-chong hô-pêng, só͘-í bē tı̀-kàu kap lâng oan-ke, to̍k-to̍k hō͘ lâng hoaⁿ-hí hâng-ho̍k. I boē kóng í-chêng tāi-seng khó͘-khǹg lâng chēng-chēng thiaⁿ, kı̀-jiân kóng-liáu hoaⁿ-hí hō͘ lâng siông-sè mn̄g. Thiaⁿ i kóng ê lâng sim-koaⁿ bô siāng-khoán. Ū-ê kóng,“Chin-chiàⁿ-sı̄ hó ê tō-lí khó-kham kiù lâng;”ū-ê kóng,“Che m̄-chai sı̄ sím-mı̍h tō-lí, lán Tiong-kok tùi kó͘-chá í-lâi lóng bô, thiaⁿ i beh siáⁿ-thāi? Lóng sı̄ chit hō ê oē kóng bē-tit chı̄n.”
Tiong-kan ū chı̍t-ê lāu-lâng kóng,“Nā-sı̄ tō-lí, chiū tio̍h chı̀n-chêng, m̄-sı̄ tō-lí, chiū tio̍h thè-āu,”chiū tùi Lí sian-siⁿ kóng, “Thang mn̄g tō-lí á m̄-thang?”Lí sian-siⁿ kóng,“Thang thang.”
Lāu-lâng chiū mn̄g i kóng,“Thiⁿ-tē hiah toā beh thài-ē bô sı̂n, chiàu sian-siⁿ ê oē, kiám m̄-sı̄ ín-chhoā lâng bô kèng sı̂n-mah?”
Lí sian-siⁿ ı̀n i kóng,“Goá m̄-sı̄ kóng bô sı̂n; nā bô sı̂n beh thài ū thiⁿ-tē bān-mı̍h? Goá ia̍h m̄-sı̄ ín-chhoā lâng bô kèng sı̂n; goá só͘ kóng ê tō-lí chò iàu-kín-ê chiū-sı̄ kèng sı̂n. Chóng-sı̄ sı̂n ū chin ū ké; hō-chò chin-sı̂n chiū-sı̄ to̍k-it bû-jı̄, toā Chú-cháiⁿ ê Siōng-tè, lâng lóng eng-kai tio̍h sêng-sim lâi ài kèng I. Che chiàⁿ-sı̄ lâng ê toā ê toā pún-hūn, chhin-chhiūⁿ kóng thiⁿ-tē bô nn̄g ê jı̍t, peh-sı̀ⁿ bô nn̄g ê ông; m̄-sı̄ kóng bô jı̍t, bô ông; sı̄ kóng ū chı̍t-ê bô nn̄g ê niā-niā. Goá kóng Siōng-tè to̍k-it bû-jı̄ ia̍h sı̄ án-ni.”
Lāu-lâng mn̄g,“Sian-siⁿ án-cháiⁿ-iūⁿ chai sè-sio̍k só͘ kèng ê sı̂n lóng sı̄ ké--ê mah?”
Ìn-kóng,“Sè-sio̍k só͘ kèng ê sı̂n hoān ē khoàⁿ-kı̀ⁿ--ê chiū-sı̄ thô͘ chō, chhâ tiau lâng ê chhiú só͘ chò ê siōng sı̄ gâi mı̍h. Chiong ke̍k lêng-lāi ê lâng khı̀ pài hit-hō bô lêng-khı̀ ê mı̍h, sı̄ hā-chiān kàu ke̍k. Hoān bē khoàⁿ-kı̀ⁿ ê, chiū-sı̄ chêng tāi sí-liáu ê lâng; chhin-chhiūⁿ Tiuⁿ Gı̂ chheng-ho͘ chò Gio̍k-tè; Lâu Tiông-seng chheng-ho͘ chò Chin-hú; Bûn Thài-su chheng-ho͘ chò Lûi-chó͘; N̂g Hui-hó͘ chheng-ho͘ chò Tong-ga̍k; Koan-kong chheng-ho͘ chò Hia̍p-thian Tāi-tè; Tiō Kong-bêng chheng-ho͘ chò Châi-sı̂n. Chhin-chhiūⁿ chit chı̍t lūi lóng sı̄ lâng, lia̍h i chò sı̂n, chò Siōng-tè, lâi kèng-pài-i, m̄-nā ka-tı̄ hián-chhut gû-gōng o͘-àm, koh toā-toā tek-choē--tio̍h chin Sı̂n Siōng-tè.”
Lāu-lâng mn̄g,“Ngó͘-tè, Gio̍k-tè, Goâu-thiān, Chí-bı̂, hiah ê kiám thang kóng lóng m̄-sı̄ Siōng-tè mah?”
Ìn kóng,“Lóng m̄-sı̄, sı̄ lâng só͘ phah-sǹg só͘ chhòng-chō; he̍k-sı̄ jı̂n-kun só͘ thek-hong, he̍k-sı̄ hit kàu-hoē ka-tı̄ hong--ê, chheng i chò Siōng-tè, sı̄ lām-sám chheng-tio̍h Siōng-tè ê miâ.”
Lāu-lâng mn̄g,“Pu̍t kap chiòng Pho͘-sat sı̄ lâng á-sı̄ sı̂n?”
Ìn kóng,“Lóng sı̄ lâng, m̄-sı̄ Tiong-kok lâng, sı̄ Se-kok lâng. ”
Lāu-lâng mn̄g,“Hiah-ê Pho͘-sat í-keng siū thek-hong, kiám thang kóng m̄-sı̄ sı̂n mah?”
Ìn-kóng,“Hong-sı̂n hit hō sè-sio̍k kài bô iáⁿ, kài siâ, kài pháiⁿ. Taⁿ Siōng-tè sı̄ chò thiⁿ-tē lâng mı̍h ê toā Chú-cháiⁿ, bô só͘ bē-ē, bô só͘ m̄-chai, sǹg-sı̄ to̍k-it ê chin Sı̂n. Hō͘ Siōng-tè chhòng-chō ê sió-khoá lâng beh thài-ē hong lâng chò Siōng-tè leh? Beh thài-ē hō͘ lâng hong-chò Siōng-tè leh?”
Lāu-lâng mn̄g,“Hō͘ lâng hong chò sı̂n ê, tāi-khài lóng-sı̄ ū kong-lô tı̄ kok-nı̍h, ū iu-tek tı̄ lâng tau, nià thang khı̀-choa̍t pàng-sak--i?”
Ìn kóng,“Goá m̄-sı̄ kóng i bô kong-lô, bô in-tek; ia̍h m̄-sı̄ kà lâng tio̍h khı̀-choa̍t i. Nā-ū hó ê kà-sı̄ tio̍h sūn-thàn, nā-ū hó ê tek-hēng tio̍h o̍h--i. I-ê kong-lô in-tek m̄-thang bē-kı̀-tit; siáⁿ-sū khı̀-choa̍t pàng-sak i leh? Goá to̍k-to̍k kóng i m̄-sı̄ Siōng-tè, m̄-sı̄ sı̂n, sı̄ Siōng-tè só͘ chhòng-chō ê lâng. Lia̍h i chò sı̂n, lâi chò i, pài--i, kiû--i sı̄ hoān-tio̍h Siōng-tè ê hoat-tō͘, jiá-tio̍h Siōng-tè ê siū-khı̀.”
Phı̀-lūn ū tiong-sı̂n tı̄-chia kèng i chò tiong-sı̂n chiū thang, chun i chò hông-tè chiū m̄-thang; hô-hòng chun lâng chò Siōng-tè án-cháiⁿ-iūⁿ thang leh? Lâng sí sin kui-thô͘, lêng-hûn kui Siōng-tè sím-phoàⁿ. Nā-sı̄ hó--ê, siúⁿ i jı̍p Thian-tông, pháiⁿ--ê, hoa̍t--i lo̍h tē-ge̍k. Kı̀-jiân lı̄-khui chit sè-kan kap lâng bô kan-sia̍p; kiù lâng hāi lâng ê koân-lêng lóng m̄-sı̄ i só͘ ū; só͘-í chè--í kiû--i bû ek, hō-hok ê koân sı̄ Siōng-tè teh chiáng. Nā-ū beh kiû choan-choan tio̍h kiû--i; nā-ū tit-tio̍h, chhim-chhim tio̍h kám-siā i, éng bē ké-oāⁿ-tit ê chêng-lí.”
Lāu-lâng mn̄g, “Thiⁿ-tē jı̍t goe̍h hiah-ê án-cháiⁿ-iūⁿ m̄-thang pài?”
Ìn kóng,“Chit-ê sı̄ Siōng-tè só͘ chhòng-chō ê mı̍h, chò beh hō͘ lâng ēng--ê, m̄-sı̄ beh hō͘ lâng kèng-pài--ê. Ēng ê lâng chiū tio̍h kám-siā chō mı̍h Chú Siōng-tè ê toā in-tián. Lia̍h mı̍h chò Siōng-tè toàn-toàn m̄-thang. Koh ēng Siōng-tè ê êng-kng kui I chhòng-chō ê mı̍h, ia̍h bān-bān m̄-thang. Ū chı̍t-ê u-khu ê tha̍k-chheh lâng, chiaⁿ-goe̍h chhe-it, i-koan chéng-chê, hoān-nā mn̂g, thang, chíⁿ, chàu, chhn̂g-tiùⁿ, í-toh, lóng tio̍h ip-jiā. Lâng mn̄g i, i kóng, Bô mn̂g, bē chhut-jı̍p; bô thang, bē kng-bêng; bô chíⁿ, bē-tit-tháng lim sé; bô chàu, bē-tit-thang chú-chia̍h; bô chhn̂g-tiùⁿ, bô tàng thang khùn; bô í-toh, bô tàng thang chē. Chı̍t nı̂ ê tiong-kan siū i ê toā in, só͘-í tio̍h pài i.”
Hāiⁿ ah! Thiⁿ-ē thái-thó ē hiah chē u-khu ê tha̍k-chheh lâng leh? Pàng-sak khí-chhù hak-mı̍h ê Chú m̄-chai thang kám-siā i, khı̀ kā chhù chham mı̍h ip-jiā, kiám m̄-sı̄ toā chhò-gō͘? Siōng-tè chò thiⁿ khàm lâng, chò tē chài lâng, chò jı̍t goe̍h chiò lâng, chò bān-mı̍h iúⁿ-chhı̄ lâng. Lâng m̄-chai chiah-ê lóng-sı̄ Chú pho͘-pâi pò͘-tı̀ ê, beh hō͘ lâng thang ēng; hoán-tńg khı̀ kèng-pài i, kap hit-hō pài chhù, pài mı̍h u-khu ê tha̍k-chheh lâng bô koh-iūⁿ.”
Lāu-lâng thiaⁿ-kı̀ⁿ chiām-chiām bêng-pe̍k chin-lí, chēng-chēng siūⁿ loā-kú, chiah koh-chài mn̄g i kóng,“Goá só͘ léng-kàu--ê goá lio̍h-á chai, to̍k-to̍k lín kùi-kàu bô kèng-pài chó͘-kong chı̄n put-kai.”
Ìn kóng,“Hó-tit lí mn̄g hit kù. Goán ê kàu m̄-sı̄ kı̀m lâng kèng-pài chó͘-kong; sı̄ kı̀m lâng ho̍k-sāi chó͘-kong. Chó͘-kong lı̂m-chiong ê sı̂, kiáⁿ-sun tio̍h chı̄n sim chiàu-kò͘ hû-chhı̂, lâi chō͘ i-ê siān-chiong. Āu--lâi iū tio̍h chı̄n la̍t liōng-chá pı̄-pān koan-kok i-khim kā i an-chòng, siông-siông siàu-liām chó͘-kong ê in-chêng, m̄-káⁿ bē-kı̀-tit. Sūn-thàn i só͘ lâu ê hó kà-sı̄, m̄-káⁿ ûi-ke̍h; hûn-bōng nā ū pháiⁿ tio̍h siu-lí. Che chiàⁿ sı̍t-chāi sı̄ teh kèng chó͘-kong.
Lūn-kàu ho̍k-sāi khí sû-tn̂g,chhāi sı̂n-ūi, siat bo̍k-chú, hiah-ê sū lóng sı̄ khang-hi lām-sám. Lâng sí seng-khu hiú-noā tı̄ thò͘--nı̍h, hó--ê, lêng-hûn kui thian-tông, pháiⁿ--ê, lêng-hûn kui tē-ge̍k, bē koh lâi hióng-siū chè-hiàn ê mı̍h. Seng-lé, chhài-pn̄g, chiú-se̍k, pâi moá toh-téng, iû-goân sı̄ oa̍h lâng teh chia̍h, kāng sí lâng lóng bô tı̄-tāi. Nā-sı̄ chó͘-kong tio̍h chia̍h, siáⁿ-sū chè-hiàn kı̄n--ê, bô chè-hiàn hn̄g--ê? Kiám m̄-sı̄ hn̄g ê chó͘-kong eng-kai iau-gō mah? Iū-koh chı̍t nı̂ chè-hiàn kúi-koè niā-niā, nā-sı̄ chin-chiàⁿ tio̍h chia̍h, chó͘-kong kiám bô gō-sí mah?
Iū-koh tio̍h sio choá-chı̂ⁿ, bô siūⁿ lâng tı̄ sè-kan ū he̍k-sin ê hêng, chia̍h ēng ū hêng ê mı̍h. Só͘-í tio̍h chı̂ⁿ-gı̂n bé chia̍h, bé chhēng, bé khı̀-khū, lâi iúⁿ-chhı̄. Lâng sí liáu-āu he̍k-sin kui thô͘ bô khiàm-ēng mı̍h, lêng-hûn sı̄ bô hêng ê mı̍h, bē-sái-tit ēng ū hêng ê chia̍h chhēng. Nā kóng tio̍h khiàm-ēng chı̂ⁿ-gı̂n, eng-kai ēng chin--ê hō͘ i, siáⁿ-sū ēng choá-hu lâi phiàn--i? Choá sı̄ tek lâi chò-chiâⁿ--ê, kı̀-jiân sio-liáu sı̄ bô lō͘-ēng ê choá-hu, beh thài-ē pı̀ⁿ-chò chin-chiàⁿ ê chı̂ⁿ-gı̂n mah?
Iū-koh chè-sū sı̄ kó͘-chá kèng Siōng-tè ê lé, m̄-thang lām-sám kūi tı̄ lâng. Chóng-sı̄ kèng chó͘-kong sı̄ thiⁿ-ē thong-hêng ê toā-lō͘; ho̍k-sāi chó͘-kong sı̄ lâng ka-tı̄ khui ê phian-phiah lō͘; m̄-nā bô-iáⁿ ê tāi-chı̀, koh toā ûi-ke̍h Siōng-tè ê bēng-lēng. Bêng-pe̍k chin-lí ê lâng tek-khak m̄ án-ni chò.”
Lāu-lâng kóng,“Che chin-chiàⁿ sı̄ tō-lí ê oē. Chiông-chêng goá m̄-bat thiaⁿ-kı̀ⁿ, kin-á-jı̍t kai-chài lâi léng-kàu, ē hiáu-gō͘ lah, lūn chun-kèng chham ho̍k-sāi ū hun-pia̍t. Sian-siⁿ khui-thiah chêng-lí siông-sè, thong lâng ê sim-khiàu bē chió.”
Iáu ū chı̍t-kù-oē beh chhéng-kàu. Goá taⁿ chai ngó͘-siōng í-kı̍p it-khài sè-sio̍k só͘ kèng ê sı̂n-bêng lóng sı̄ tùi lâng ê ı̀-sù chhut--lâi; ia̍h chai thiⁿ-tē jı̍t-goe̍h hiah-ê sı̄ Siōng-tè só͘ chhòng-chō ê, kèng-pài i bô lı̄-ek, koh ū toā choē; ia̍h chai Siōng-tè sı̄ to̍k-it ê chin Chú, bān sè bān kok só͘ eng-kai tio̍h chun-chông kèng-pài i. Nā-sı̄ lūn-kàu Iâ-so͘, goá lāu-gōng ê lâng iáu-boē hiáu-tit kàu thiat-té, goān sian-siⁿ bêng-bêng kà-sı̄ goá.”
Lí sian-siⁿ kóng,“Kiù-chú Iâ-so͘ it-giân-lân-chı̄n, ke-lāi ū ‘Sin-iok ê choân-su,’kap‘thian-tō sok-goân,’chham‘Thian-lō͘ chí-bêng,’ ‘Tek-hūi jı̍p-bûn’,‘Sèng-kàu būn-tap’, hiah-ê chheh; iông goá lēng jı̍t toà--lâi chioh lāu-peh ka-tı̄ khı̀ khoàⁿ, chiū bêng-pe̍k thàu-thiat.
Taⁿ chhiáⁿ iok-lio̍k kóng hō͘ lí thiaⁿ, Siōng-tè to̍k-to̍k chı̍t-ê, nā-sı̄ it-thé ê tiong-kan ū saⁿ-ūi; chiū-sı̄ Sèng-pē, Sèng-kiáⁿ, Sèng-sı̂n. Iâ-so͘ chiū-sı̄ saⁿ-ūi-lāi tē-jı̄-ūi ê Sèng-kiáⁿ, tùi chı̍t-chheng peh-pah peh-cha̍p-jı̄ nı̂ chêng Sèng-kiáⁿ chhut-sı̀ chò lâng lâi kiù-sè. Iâ-so͘ sı̄ Se-kok ê im-gí, hoan-e̍k chiū-sı̄ kiù-sè ê ı̀-sù, chhin-chhiūⁿ án-ni Iâ-so͘ ū nn̄g-ê sèng, chı̍t-ê Siōng-tè ê sèng, chı̍t-ê lâng ê sèng. Chit nn̄g-ê sèng ha̍p chò-hoé lâi chiâⁿ chı̍t-ê Kiù-chú.
Lâng lı̄-khui Siōng-tè tek-hēng í-keng soe-bı̂, Iâ-so͘ lâi tı̄ i ka-tı̄ ê seng-khu chiong Siōng-tè hián-chhut hō͘ lâng khoàⁿ; hō͘ lâng koh-chài kap Siōng-tè chhin-kı̄n, lâi heng-khí in ê tek-hēng. Sè-kan lóng o͘-àm m̄-bat Siōng-tè ê chin-lí, khı̀ kiâⁿ siâ-lō͘. Iâ-so͘ ēng thiⁿ-téng ê kng lâi chiò--in, hō͘ in khı̀-siâ kui-chèng. Sè-kan lâng lóng ū choē, eng-kai siū éng-oán ê hêng-hoa̍t, Iâ-so͘ chò Siōng-tè ê Kiáⁿ, chı̀-chun chı̀-kùi, tı̄ sı̍p-jı̄-kè téng thè lâng sí, sio̍k chèng-lâng ê choē-ok, hō͘ lâng ē bián-tit tı̂m-lûn ê kan-khó͘, lâi tit-tio̍h éng-oán ê hok-khı̀.
Chú sí liáu-āu saⁿ jı̍t koh-oa̍h, sı̀-cha̍p jı̍t seng-thian, chē tı̄ Siōng-tè ê iū-pêng, chiáng thiⁿ-tē bān-mı̍h ê koân; siúⁿ-sù Sèng-sı̂n lı̂m-kàu lâi kám-tōng lâng ê sim, lâi ín lâng kui chèng-tō. Thong sè ê chin-kng, to̍k-to̍k chı̍t-ê Kiù-chú Iâ-so͘ niā-niā, hoān-nā sı̀n-khò i tek-khak ē tit-tio̍h kiù. Nā mn̄g che oē ū sím-mı̍h pı̂n-kù, goá chiū-sı̄ pı̂n-kù. Iâ-so͘ í-keng kiù goá thoat-lı̄ choē-ok, hiuⁿ-lí chhù-piⁿ chiâu chai.”
Thiaⁿ Lí sian-siⁿ chit-kù-oē, bô chı̍t-ê m̄ tı̀m-thâu kóng ū-iáⁿ. Lāu-lâng koh mn̄g,“Sèng-sı̂n sím-mı̍h ı̀-sù?”
Ìn-kóng,“Sèng-sı̂n chiū-sı̄ Siōng-tè sam-ūi it-thé ê tē-saⁿ-ūi; i-ê lō͘-ēng chiū-sı̄ ē chiò-kng an-ùi kám-tōng lâng ê sim, hō͘ lâng chai choē, chō͘ lâng hoán-hoé ké-pı̀ⁿ, sı̀n Iâ-so͘ lâi tit-tio̍h éng-oa̍h. Nā oá-khò ka-tı̄ ê khùi-la̍t lâi ké-pı̀ⁿ chò hó, koat-toàn bē-ē; tek-khak tio̍h oá-khò Sèng-sı̂n sé-chheng i-ê sim, toan-chiàⁿ i-ê sim, chiah ē-tit tû-khı̀ kū-té só͘ bak ê lâ-sâm, lâi chiâⁿ chò sèng chò hó.”
Koh mn̄g sian-siⁿ kóng,“It-thé sam-ūi, kiám m̄-sı̄ kóng ū saⁿ-ê Siōng-tè mah?”
Ìn kóng,“M̄-sı̄ lah. Sui-jiân ū saⁿ-ūi put-kò sı̄ chı̍t-thé, phı̀-jū chı̍t-ê lâng ê tiong-kan ū lêng-hûn, ia̍h ū he̍k-sin, ha̍p lâi chò chı̍t-ê lâng. Che kiám m̄-sı̄ nn̄g-ūi it-thé mah? Kiù-sı̍t sı̄ chı̍t lâng, m̄-sı̄ nn̄g lâng. Goá ēng chit-ê chò phı̀-jū, m̄-sı̄ kóng Siōng-tè kap lâng sio-siāng. Siōng-tè pún-thé sı̄ sı̂n bô hêng, bô chhin-chhiūⁿ lâng ū he̍k-sin; put-kò sı̄ chioh lâi piáu-bêng it-thé, bô tek-khak chı̍t-ê, he̍k-sı̄ nn̄g-ê saⁿ-ê lóng thang. Che sı̄ ke̍k ò-biāu ê chêng-lí, ke̍k chin-sı̍t ê tāi-chı̀, nā chhim-chhim sı̀n kiám-chhài thang lio̍h-á chai.”
Koh mn̄g kóng,“Chit-ê tō-lí kiám m̄-sı̄ tùi Sai-iûⁿ lâi mah?”
Ìn kóng,“Chit-ê tō-lí ê pún-goân sı̄ chhut tı̄ Thiⁿ--nı̍h, chiū-sı̄ tùi Siōng-tè hia lâi ê. Taⁿ lâi thoân-kàu ê lâng Au-lô-pa chiu kap A-bí-lı̄-ka chiu ê lâng khah chē, nā-sı̄ Iâ-so͘ chhut-sı̀ ê só͘-chāi, sı̄ chāi tı̄ A-se-á chiu ê Iû-thài kok, kap Tiong-kok siāng chı̍t chiu. Sai-kok ê lâng sı̀n che tō-lí, m̄-sı̄ in-ūi chhut tı̄ pún kok, ia̍h bô beh mn̄g tùi tó chı̍t kok lâi; to̍k-to̍k séng-chhat chit-ê tō-lí, siông-sè chhâ-khó, bêng-bêng chai chit-ê tō-lí chin-sı̍t bô lām-sám, pí sè-kan ê kàu iâⁿ-koè bān-bān poē. Goá kiám m̄-sı̄ Tiong-kok lâng mah? Chit-ê tō-lí nā-sı̄ Siōng-tè ê tō-lí, goá án-cháiⁿ-iūⁿ ē sı̀n?”
Lāu-lâng koh mn̄g,“Lâng kiò jı̍p-kàu--ê chò chia̍h-iūⁿ-kàu, sı̄ sím-mı̍h ı̀-sù?”
Ìn kóng,“Che sı̄ húi-pòng lâng ê pe̍h-chha̍t oē, m̄-thang sı̀n. Jı̍p-kàu--ê m̄-nā bô tit-tio̍h chı̂ⁿ, chia̍h-kàu ê sū, koh tio̍h tê chı̂ⁿ chhut--lâi, pang-chān kàu-hoē thoân-tō ê lō͘-ēng. Iâ-so͘ Sèng-kàu sı̄ ēng tō-gı̄ kau-chiap, m̄-sı̄ ēng chı̂ⁿ-gı̂n lâi-óng.”
Lí sian-siⁿ kap lâng mn̄g-tap ê oē kóng bē-tit chı̄n, kan-ta chiong khah iàu-kín ê oē khioh--khí-lâi kā lâng kóng.
Lí sian-siⁿ nā tú-tio̍h lé-pài, tek-khak tio̍h kóng Sèng-chheh hō͘ lâng thiaⁿ. Ta̍k jı̍t êng ê sı̂ tı̄ po͘--nı̍h, kap lâng lūn tō-lí. I-ê bó͘ ia̍h ài chiong chit-ê tō-lí khó͘-khǹg kà-sı̄ hū-jı̂n-lâng, cha-bó͘ gín-ná, in-ūi i lâi bat tō-lí--ê chin chē, siū i kám-hoà ia̍h bē chió. Ū-ê siū i kám-hoà ké a-phiàn-hun, ū-ê siū i kám-hoà kài sek, kài chiú, kài tó͘, í-kı̍p it-khài hāi ka-tı̄, hāi lâng ê sū, tio̍h lóng kéng-kài saⁿ-kap lâi jı̍p-kàu.
Lí sian-siⁿ ê chhù chin sè keng, ài siat-lı̍p hit-ê hoē-tn̂g, hō͘ chèng-lâng lâi lé-pài khah lı̄-piān; oē chı̍t-ē kóng-chhut, ū-ê chān i-ê chı̂ⁿ, ū-ê chān i-ê la̍t, tāi-chı̀ khoài-khoài chiâⁿ.
Bô loā-kú pài-tn̂g khí-hó, chū-chı̍p ê lâng siông-siông moá tn̂g. Che sı̄ tùi chı̍t lâng sı̀n Iâ-so͘, lâi siū kám-tōng tı̀-kàu án-ni. Nā lâng-lâng lóng chhin-chhiūⁿ Lí sian-siⁿ, m̄-sái loā-kú Siōng-tè ê chí-ı̀ chiū ē kiâⁿ tı̄ chit sè-kan; lâng-lâng saⁿ chhin saⁿ thiàⁿ, saⁿ chān saⁿ kiù. Chı̄n bān pang-kok lóng hia̍p-hô, chiâⁿ chò Siōng-tè chı̍t-ê toā Thian-kok, hok-khı̀ jı̍t-jı̍t kàu lah.
Tē cha̍p-it Chiuⁿ
Lí sian-siⁿ ê bó͘ sı̀n tō-lí liáu-āu, chu-sū an-sim, to̍k-to̍k chhù-the̍h teh-beh tó-hoāi, chhin-chhiūⁿ kū-sı̂, mı̍h-kiāⁿ khoeh-khiàm chhin-chhiūⁿ kū-sı̂. Ū chı̍t-jı̍t mn̄g i-ê tiōng-hu kóng,“Chhù pháiⁿ m̄-hó khoàⁿ, mı̍h pháiⁿ bô kàu ēng, sian-siⁿ nā ū chhun koá chı̂ⁿ káⁿ--tio̍h siu-lí pó͘-chiok hó mah?”
Lí sian-siⁿ ı̀n kóng,“Chhiáⁿ thèng-hāu, bān-chiah, hiān-sı̂ nā ū chhun chı̂ⁿ tio̍h hêng-chè, chheng-chhó liáu-āu chiah koh-chài hak, bô iàu-kín.”
I-ê bó͘ kóng,“Hêng kū-siàu khiok ia̍h-tio̍h, thài m̄ tùi chhù-piⁿ pêng-iú chioh sin siàu lâi chhòng?”Lí sian-siⁿ kóng,“Khiàm chè m̄-sı̄ hó-tāi, ia̍h bô hó miâ. Goá boē jı̍p-kàu ê sı̂ m̄-bat, lām-sám chò, taⁿ ū hoán-hoé. Hiān-sı̂ í-keng jı̍p-kàu, koat-toàn m̄-thang koh-chài khiàm lâng ê chè; koh hiān-kim teh thoân-tō, thiaⁿ-kı̀ⁿ chē-chē lâi sı̀n-ho̍k in-ūi bô phāng thang hō͘ lâng hiâm; nā khiàm lâng chè chiū ū phāng lah, bē-bián-tit kiáu-jiáu hō͘ lâng gí-gí phêng-séng, án-ni lâi thoân-tō, kiám m̄ tāi-seng that-ba̍t ka-tı̄ ê chhùi mah? Che goá toàn-toàn bô án-ni chò. Chhiáⁿ hiân-chhe bo̍h-tit in-ūi chhù hoāi, mı̍h pháiⁿ lâi khoà-lū; sim-lāi nā ū tō-lí, bān mı̍h lóng bô khoà-gāi. Khoàⁿ chit keng ê sió-chhù, pí kàu chāi-chá kap Thian-tông bô koh-iūⁿ.”
I-ê bó͘ thiaⁿ-kı̀ⁿ hoaⁿ-hí hâng-ho̍k kóng,“Ta̍k kù-oē chhin-chhiūⁿ kim ge̍k, khui goá ê gû-gōng o͘-àm, chiàu án-ni kiâⁿ chin hó.”
Āu--lâi Lí sian-siⁿ chı̄n-la̍t hêng-chè, bô loā-kú bô khiàm lâng poàⁿ ı̂ⁿ, chiū siu-lí chhù, hak mı̍h. Chiàu án-ni khoàⁿ, Lí sian-siⁿ jı̍p-kàu, m̄-sı̄ ū lêng-hûn ê hok-khı̀ niā-niā, i ê he̍k-sin ia̍h ū toā-toā ê hok-khı̀. Sèng-keng ū kóng, “Hoān-nā kèng-khiân, lâi ho̍k-sāi Siōng-tè ê toā lı̄-ek, chit-sı̀ lâi-sı̀ lóng ū hok-khı̀, che sı̄ thang sı̀n ê oē.”
Hiuⁿ-lí-lāi ê lâng khoàⁿ chit-ê khoán-sit, to lóng o-ló chin-tō, lâi kui êng-kng hō͘ Siōng-tè. Ū chı̍t-ê kàu-su lo̍h hiuⁿ, khı̀ thoân-tō, gū--tio̍h chı̍t-ê lāu lâng, kā i kóng, “Goán chai kùi kàu ê tiong-kan ū Sèng-sı̂n kám-hoà lâng ê sim, chin-chiàⁿ ū iáⁿ.”
Kàu-su mn̄g i kóng,“Lí án-cháiⁿ-iūⁿ chai?”
Ìn kóng,“Goán chng--nı̍h ū chı̍t-ê Lí sian-siⁿ í-keng jı̍p-kàu. Chāi-chá pháiⁿ kiáⁿ hòng-tōng; āu--lâi khı̀ thiaⁿ chin ê tō-lí, toā-toā ké-pı̀ⁿ, m̄-sı̄ tō-lí bô beh kóng, bô beh kiâⁿ, bô beh siūⁿ. Tùi án-ni kám-hoà i choân-ke, ia̍h kám-hoà hiuⁿ-lí, m̄-sı̄ ka-tı̄ ē ké-pı̀ⁿ, ia̍h m̄-sı̄ lâng khǹg i ké-pı̀ⁿ, tek-khak sı̄ Siōng-sı̂n kám-hoà i, hû-chō͘ i, chiah án-ni-siⁿ.”
Kàu-su thiaⁿ-kı̀ⁿ sim-lāi hoaⁿ-hí kóng,“Che chin-chiàⁿ sı̄ Sèng-tô͘, sı̄ sè-kan ê kng, lâi chiò chèng-lâng; sı̄ sè-kan ê iâm, lâi tiâu-hô͘ chèng-lâng. Só͘ goān chò Chú ê ha̍k-seng, lóng ū chit-hō ê tek-hēng.”
