Tē cha̍p-jı̄ Chiuⁿ
Lí sian-siⁿ tı̄ hiuⁿ-siā ê tiong-kan, Hoaⁿ-hí--i hâng-ho̍k--i ê lâng chin chē. Nā-sı̄ gû-gōng, m̄-bat, lām-sám húi-pòng, lé-mē i-ê lâng ia̍h ū; ū-ê keng-thé i sı̄ chia̍h-iûⁿ-kàu; ū-ê ki-chhı̀ i bô chó͘-kong; chhin-chhiūⁿ chit-hō oē kóng bē-tit-thang liáu.
Lí sian-siⁿ to̍k-to̍k ē kı̀--tit Chú ê kà-sı̄ kóng,“Tùi-te̍k lí ê lâng tio̍h thiàⁿ-thàng i; lé-mē lí ê lâng tio̍h kā i chiok-hok; oàn-hı̄n lí ê lâng tio̍h hó khoán-thāi i; hām-hāi khún-tio̍k lí ê lâng tio̍h thè i kı̂-tó. Ūi-tio̍h gı̄ hō͘ lâng khún-tio̍k; kap hō͘ pháiⁿ-oē húi-pòng ê, ū hok-khı̀ lah; in-ūi lí tı̄ Thiⁿ--nı̍h só͘ tit-tio̍h ê pò-siúⁿ toā.” Só͘-í Lí sian-siⁿ hō͘ lâng mē, bô khui-chhùi, hō͘ lâng phah, bô té-chhiú, it-bı̄ thun-lún.
Thun-lún kàu boé, ū-sı̂ chiū tú-tio̍h hêng-ge̍k ê tāi-chı̀, thiaⁿ-kı̀ⁿ chhin-chhiūⁿ bô thiaⁿ-kı̀ⁿ, khoàⁿ chhin-chhiūⁿ bô khoàⁿ-kı̀ⁿ. Ū-sı̂ hó-oē khui-thiah ín-chhoā in, siòng ki-hoē lâi kiâⁿ niā-niā, lóng bô beh hō͘ lâng ê pháiⁿ khah-iâⁿ ka-tı̄ ê hó, tek-khak beh ēng ka-tı̄ ê hó sèng-koè pa̍t lâng ê pháiⁿ.
Lí sian-siⁿ koh ū jiáu-loān i sim-sı̂n ê tāi-chı̀,chiū-sı̄ hiuⁿ-siā--nı̍h siu-lí biō-ú, chng pho͘-sat, già sı̂n sài-hoē, poaⁿ-hı̀ liām-keng, tê-chı̂ⁿ hoà-iân, hiah-ê sū Jı̍p-kàu ê lâng bô-beh chhut poàⁿ ı̂ⁿ, m̄-sı̄ sioh--tio̍h chı̂ⁿ, ia̍h m̄-sı̄ tiâu-kò͘-ı̀ tek-choē--lâng, sı̄ kàu-hoē-lāi ê lâng chai chit-ê sū sı̄ lām-sám bô-iáⁿ, koat-toàn m̄-thang kiâⁿ, bián-tit hoān--tio̍h Siōng-tè ê kài-lu̍t, jiá-tāng Siōng-tè ê siū-khı̀. Hit-hō m̄-chai ê lâng lia̍h-chò jı̍p-kàu ê lâng bô-beh hô-chiòng, siông-siông seⁿ-khí cheng-toan, kap kàu-hoē oan-ke, chò tùi-te̍k, chin-chiàⁿ khó-sioh.
Lí sian-siⁿ ū-sı̂ chiū ēng hó oē kā lâng kóng,“Kèng sı̂n sı̄ chhut-chāi lâng ê sim, bē saⁿ bián-kióng--tit; chhin-chhiūⁿ goá kèng Siōng-tè, ia̍h m̄-bat bián-kióng lí chhut chı̂ⁿ, lí kèng pho͘-sat án-cháiⁿ-iūⁿ ē-tit bián-kióng goá tê-iân leh? Che kiám m̄-sı̄ kong-tō ê oē mah? Nā-sı̄ oân-chō͘ la̍p-hiòng pho͘-kiô chō-lō͘, chín-chè ki-hng, pang-chō͘ pı̂n-khó͘, it-khài ê hó-sū, goá tek-khak hoaⁿ-hí chhut, kap chèng-lâng pêⁿ hūn lâi thoân.”
Chng-siā hiuⁿ-lí thiaⁿ chit-hō oē, lóng tı̀m-thâu kóng,“Che oē ia̍h tio̍h. Goán chiah-ê thang chò kan-chèng, siā-lāi ū sím-mı̍h hó sū, ū sím-mı̍h gı̄-kí, Lí sian-siⁿ bô koh m̄ chı̄n-la̍t tê-chı̂ⁿ saⁿ chān, chı̄n-la̍t chàn-sêng. Lūn-kàu bián-kióng lâng chhut chı̂ⁿ, kèng sı̂n, bô ha̍p chêng-lí, ta̍k lâng tio̍h chai.”
Lí sian-siⁿ tı̄ chit siā-lāi lóng ēng hó ê kí-tōng lâi siú-kí an-hūn, hō͘ m̄-bat ê lâng bô oē thang kóng.
Tē cha̍p-saⁿ Chiuⁿ
Lí sian-siⁿ pún-jiân ū pē-bó, chhoā toā kiáⁿ toā sim-pū khı̀ pa̍t só͘-chāi chò seng-lí. Kap Lí sian-siⁿ phoe-sı̀n hán-tit lâi-óng; in-ūi chai i chiông-chêng sı̄ lōng-tōng-chú, bó͘-kiáⁿ siōng-chhiáⁿ m̄ chiàu-kò͘, mih-sái lūn-kàu pē-bó hiaⁿ-só, chá-chá khoàⁿ i chò ū ná bô leh.
Tùi jı̍p-kàu liáu-āu ké-pı̀ⁿ oāⁿ sin, ia̍h bat jı̂n-lûn pē-bó hiaⁿ-tı̄ ê chêng-gı̄, ia̍h put-chí ū siàu-liām ı̀-ài. Siūⁿ i pē-bó nı̂-lāu, chhut-goā thàn-chia̍h, eng-kai tio̍h khı̀ khoàⁿ i, lâi chı̄n chú-tē chit-hūn; hô-hòng i tit-tio̍h chı̀ pó ê kiù, nā m̄ chiong Siōng-tè ê un-tián pun hō͘ pē-hiaⁿ hiah-ê lâng, m̄-nā bē-kham--tit chò lâng ê chú-tē, ia̍h bē-kham--tit chò Chú ê ha̍k-seng.
Chiū kā in bó͘ saⁿ-sı̂, it-tı̍t khı̀ chhoē i. Í-keng kàu i pē-bó ê ke, mn̄g an liáu-āu, tāi-ke kóng chit kúi nı̂ lâi lı̄-khui ê chêng-hêng, chiah chai i-ê hiaⁿ tı̄ goā-bı̄n siông-siông kiat-kau pháiⁿ lâng, koh chia̍h a-phiàn chin toā. Kúi-nā nı̂ bô kui ke, pē-bó bó͘-kiáⁿ bô lâng chiàu-kò͘ chin-chiàⁿ sı̄ chhám. Lí sian-siⁿ khoàⁿ che kéng-hóng, siong-sim iu-būn, koáⁿ-kín chhiáⁿ i ê pē-bó kap hiaⁿ-só seng kap i chò-hoé tò--lâi hō͘ i khoán-thāi iúⁿ-chhı̄. I-ê ū-hàu m̄-sái kóng, to̍k-to̍k kap i-ê bó͘ jı̍t-jı̍t chiong sèng ê tō-lí kóng hō͘ pē-bó hiaⁿ-só saⁿ lâng thiaⁿ. Kóng kàu it-liû-súi tin-tin iú-bı̄, kú-kú bô soah. Hiaⁿ-só thiaⁿ chin-lí khoài siū kám-tōng. Nā-sı̄ pē-bó chiū bô án-ni; siông-siông kóng,“Goá lāu lah, kin-kut soe-lám, kū-sèng oh ké-oāⁿ, Sèng-keng oh-tit kı̀, m̄ pí siàu-liân lâng hoân-sū khah lêng-lāi.”
Lí sian-siⁿ ang-bó͘ sêng-sim khún-kiû Siōng-tè kám-hoà pē-bó ê sim, hō͘ i ē-tit sı̀n-khò Kiù-chú, bô sit-lo̍h thian-tông ê éng-oán-oa̍h. Nn̄g ê pē-bó sui-jiân bô sím-mı̍h bat Sèng-tō, chóng-sı̄ khoàⁿ i-ê hāu-siⁿ sim-pū saⁿ kèng hô-hó, cha-po͘-sun cha-bó͘-sun ia̍h lóng chai ū-hàu-kèng sı̄-toā, chı̍t-ke ū hô-pêng ê khı̀-siōng; siông-siông thó͘-khùi kóng,“Goán nn̄g lâng chiong-kı̄n chhit-cha̍p hoè, khoàⁿ pa̍t lâng ê ke bē-tit chhin-chhiūⁿ án-ni; nā m̄-sı̄ chin-lí teh kám-hoà, beh thài-ē kàu chiah-nı̍h hó?”
Sui-jiân tō-lí ê ò-biāu oh-tit bêng-bêng chhim-chai, nā-sı̄ khoàⁿ kiáⁿ-jı̂ sim-pū choân-ke ē hàu-sūn, ē chò lâng, khoài-khoài thang chai. Siat-sú kàu-hoē-lāi lóng ē án-ni, sı̀n ê lâng tek-khak ta̍k jı̍t ná chē, kàu-hoē chiū ē koáⁿ-kín heng-ōng, chiàu goá sim só͘ goān lah.
Tē cha̍p-sı̀ Chiuⁿ
Lí sian-siⁿ chı̍t-ke í-keng an-jiân, to̍k-to̍k ū chı̍t-ê hiaⁿ khı̀ tı̄ goā-bı̄n liû, iáu-boē an-sim, sı̀-kè khı̀ thàm-thiaⁿ, bô sı̍t-chāi ê siau-sit. Ū-ê kóng tı̄ hit-tah, ū-ê kóng tı̄ chit-tah, thiaⁿ che bô tiāⁿ-tio̍h ê oē, sim-koaⁿ koh khah tio̍h-kip. Bô loā-kú koh ū lâng kóng,“Lí ê hiaⁿ tı̄ bó͘ siâⁿ, toaⁿ-sin kan-khó͘, liông-poē, pháiⁿ-iūⁿ, kàu bē-kham-tit.”Lí sian-siⁿ thiaⁿ-kı̀ⁿ chhin-sin khı̀ hit-ê siâⁿ, ǹg-bāng ē-tit kı̀ⁿ-tio̍h i. Í-keng kı̀ⁿ-tio̍h, hiaⁿ-tı̄ ê chêng siong-sim bô soah, lám teh háu kóng,“Hiaⁿ ah! Lí án-cháiⁿ-iūⁿ kàu chiah chhám leh?”Ìn kóng,“Hàiⁿ ah! Lín hiaⁿ kiâⁿ chhò-lō͘, chin-chē hām-hāi, chóng-sı̄ tē-it hāi goá ê, chiū-sı̄ a-phiàn; hiaⁿ ê sı̀ⁿ-miā chá-khí bē-kò͘-tit ê-hng. Lín hiaⁿ sí, ia̍h bô khó-sioh, m̄-kú pē-bó bó͘-kiáⁿ beh án-cháiⁿ-iūⁿ leh? Bāng thiⁿ thó͘-khùi, ka-tı̄ oàn-hı̄n bô tàng thang hoán-hoé ké-pı̀ⁿ lah.”
Lí sian-siⁿ kóng,“Chai hoán-hoé chiū-sı̄ oa̍h ê ki; hiaⁿ koh chin hoán-hoé bô?”Ìn kóng,“Goá chin-chiàⁿ hoán-hoé.”Lí sian-siⁿ ēng ka-tı̄ só͘ keng-koè ê tāi-chı̀ kā i kóng,“Iâ-so͘ ē kiù goá thoat-lı̄ choē-ok ê tiong-kan, kiám bē kiù hiaⁿ mah? ”
In hiaⁿ thiaⁿ-kı̀ⁿ che oē toā hoaⁿ-hí, chhin-chhiūⁿ bı̂n-bāng tú-á chai; chhin-chhiūⁿ chiú-chùi taⁿ chiah chhíⁿ; chhin-chhiūⁿ ko͘-tâ ê tiū-á tit-tio̍h hō͘-chúi; chhin-chhiūⁿ ko͘-ta ê chhiū-ba̍k tú-tio̍h chhun-thiⁿ. Lí sian-siⁿ khan in hiaⁿ ê chhiú, ná kiâⁿ ná kóng. Kiâⁿ kàu hit só͘-chāi ê lé-pài-tn̂g, chiū chò-hoé jı̍p khı̀ thiaⁿ tō-lí.
Bo̍k-su kóng-liáu, Lí sian-siⁿ chhoā hiaⁿ jı̍p lāi-tn̂g kap bo̍k-su kóng kúi kù oē, soà chiong in hiaⁿ chá-chêng chhut-goā ê kéng-hóng lio̍h-á kóng hō͘ i thiaⁿ. Bo̍k-su chiū mn̄g i ê hiaⁿ kóng,“Lāu hiaⁿ, lí chin-chiàⁿ kam-goān tit-tio̍h kiù á bô?”
Ìn kóng,“Chin hoaⁿ-hí kam-goān, to̍k-to̍k kiaⁿ-liáu oh-tit. Goá chia̍h a-phiàn chiong-kı̄n jı̄ cha̍p nı̂, nā liâm-piⁿ ké, sı̀ⁿ-miā káⁿ lân-pó.”
Bo̍k-su kóng, “Lí chhiáⁿ pàng sim, lí ū nn̄g-hāng ê loán-jio̍k. Chı̍t-hāng chiū-sı̄ seng-khu ê loán-jio̍k, tit-tio̍h chit sè-kan ê i-io̍h thang pó-choân. Chı̍t-hāng chiū-sı̄ sim-koaⁿ ê loán-jio̍k tit-tio̍h Kiù-chú ê in-tián thang pó-niá. I-io̍h sı̄ kian-kò͘ seng-khu ê hó-hng-thâu; in-tián sı̄ kian-kò͘ sim-koaⁿ ê hó-hng-thâu. Nn̄g-hāng lóng tit-tio̍h chiū bô oh-tit ké. Nā-sı̄ kan-ta chia̍h io̍h, kiaⁿ-liáu bē sí-sim, bē kú-kú thun-lún-tit, tek-khak tio̍h ū Sèng-sı̂n chhiong-moá lí ê sim, chiah ē koat-ı̀ éng-oán bô piàn.”
Bo̍k-su chiū kap i chò-hoé kı̂-tó, kiû Siōng-tè kám-hoà i ê sim, chān i thoat-lı̄ khó͘-hái, seng-khu kap lêng-hûn lóng tit-tio̍h kiù.
Chiū chhoā i kàu i-koán lâi kı̀ⁿ i-seng, kā i kóng chit ê in-toaⁿ.
I-seng khoàⁿ in nn̄g lâng ê hêng-siōng toā-toā bô saⁿ-tâng, chı̍t ê pûi-phàng ū sı̂n-chhái; chı̍t ê sán-giàn tài-iu-iông, chiū thó͘-khùi kóng,“Thiⁿ-kha-ē kài ē kiù lâng ê, sı̄ hok-im; kài ē hāi lâng ê, sı̄ a-phiàn! ”Chiah kā i ê hiaⁿ kóng, “Lâi ké-hun chin-chiàⁿ hó. Chhiáⁿ lí toà tı̄ chit koán--nı̍h, goá tek-khak chiàu-sı̂ hoat io̍h hō͘ lí chia̍h. Nā-sı̄ chia̍h io̍h bô kàu-gia̍h, lāu hiaⁿ tek-khak tio̍h kiû Siōng-tè siúⁿ-sù Sèng-sı̂n lâi pang-chān lí, chiah ū èng-hāu leh”.
Lí sian-siⁿ ia̍h kap i ê hiaⁿ chò-hoé toà. Teh ké kàu saⁿ jı̍t kú, hun-giàn toā hoat-choh, thâu-hı̂n, ba̍k-àm, kut-thiàⁿ, sim-jia̍t, chē bē chē, khùn bē khùn. Hit-sı̂ bo̍k-su lâi i-koán káng-chheh, jı̍p āu mn̂g khoàⁿ-kı̀ⁿ i chhut toā mn̂g beh cháu khı̀, chiū hoāⁿ i ê keng-thâu kóng,“Lāu hiaⁿ beh-tó-khı̀?” Ìn kóng,“Goá kan-khó͘ tòng-bē-tiâu teh-beh tò--lâi-khı̀, iông goá lēng jı̍t chiah koh lâi.”
Bo̍k-su chiū chó͘-tòng i kóng,“M̄ thang khı̀, nā khı̀ tek-khak bô hoê-thâu, nā tò-tńg--lâi ké, bē bián-tit chit hō ê kan-khó͘.”
I chiū mn̄g kóng,“Goá chit sı̂ sim-koaⁿ ná chhin-chhiūⁿ beh lı̄-khui, seng-khu pah-thé lóng bē an-jiân, teh-beh sí lah. Taⁿ beh án-cháiⁿ-iūⁿ?”
Bo̍k-su kóng,“Goá chai hiaⁿ chı̄n-chāi kan-khó͘, sı̍t-chāi sı̄ chiām-sı̂ niā-niā. Thun-lún chı̍t sı̂ ê kan-khó͘ tit-tio̍h chiong-sin ê hok-khı̀, siáⁿ-sū m̄ chò?”
Koh kóng,“Tng-tio̍h chit hō ê kan-khó͘ ū sím-mı̍h thang an-ùi mah?”
Ìn kóng,“Ū i-io̍h tek-khak ē pó͘-hiaⁿ ê sı̀ⁿ-miā. Lūn-kàu hiaⁿ sı̀n Iâ-so͘ ê sim, kiaⁿ-liáu bô kàu-gia̍h ū la̍t, khǹg hiaⁿ jı̍p khùn-pâng chiong loán-jio̍k thàng-thiàⁿ ê chêng-iû lóng kā Iâ-so͘ kóng; Kiù-chú tek-khak ke-thiⁿ lı̂n-bín lâi pang-chān an-ùi lí.”
Lí sian-siⁿ ê hiaⁿ, siūⁿ kàu put-chí kú chiah kóng,“Taⁿ thàn lí ê bēng-lēng chiū koh jı̍p i-koán.”Lāi-bı̄n khún-kiû Chú kiù i ta̍k jı̍t chiām-chiām pêng-an, kàu lóng hó.
Keh kúi-nā jı̍t chiah tú-tio̍h bo̍k-su tı̄ kàu-tn̂g-téng, bo̍k-su khoàⁿ i ê bı̄n-māu kng-siⁿ hó khoàⁿ, moá sin kin-kut chhun-ûn, kap chiông-chêng toā-toā koh-iūⁿ lah.
Bo̍k-su chiū mn̄g i kóng,“Giàn lóng ké-lı̄, pēⁿ lóng siau-tû mah?”Ìn kóng,“Tio̍h! Sı̂n-hûn lóng tit-tio̍h Chú ê kiù; sı̍t-chāi sı̄ chò koh-chài oa̍h ê sin lâng.”
Bo̍k-su kā kiong-hí kóng,“Lāu hiaⁿ ū hok-khı̀ lah! Khó͘-khǹg lí tùi chia kian-kò͘ sı̀n-thàn Iâ-so͘, lâi chun-thàn, kiâⁿ sèng ê lō͘, chiah ē kian-kò͘ khiā-chāi bô ı̂-e̍k bô chhian-soá.”
Ìn kóng,“Chin kam-goān jı̍p kàu. Kı̀-jiân jı̍p-kàu liáu-āu, chiū soà toè sió-tı̄ tò-khı̀ kui ke, kı̀ⁿ pē-bó kap bó͘-kiáⁿ. In-ūi chē-chē nı̂ tı̄ goā-bı̄n, chò put-hàu ê kiáⁿ, put-gı̄ ê ang, chò put-chû ê pē, m̄ bat tò-khı̀ chı̍t pái. Taⁿ tit-tio̍h Chú kiù goá, chhin-chhiūⁿ sí koh-oa̍h, liām kàu ke-lāi bô bē kı̀-tit”.
Bo̍k-su thiaⁿ chiah ê oē chiū tı̀m-thâu kóng,“Sı̄, che chin-chiàⁿ sı̄ sı̀n Iâ-so͘, hō͘ Sèng-sı̂n kám-hoà ê pı̂n-kı̀. Tng i chò pháiⁿ ê sı̂ lóng bô siūⁿ-tio̍h ke-lāi ê tāi-chı̀, kàu taⁿ chiah chai só͘ tio̍h chhin-kı̄n ê, só͘ tio̍h thiàⁿ-thàng ê. Nā m̄ sı̄ Sèng-tō lâi kám-hoà lâng kín koh chhim beh thài ē án-ni-siⁿ leh?”Āu--lâi kap sió-tı̄ chò-hoé tò-khı̀, choân-ke toā-toā hoaⁿ-hí.
Lí sian-siⁿ chiong i khı̀ chhoē hiaⁿ-ko ê chêng-iû, lóng kóng hō͘ ke-lāi thiaⁿ. Hiaⁿ-só thiaⁿ-kı̀ⁿ sim chiū siū kám-tōng. Beh ēng chin-lí lâi mn̄g i, chiū ı̀n kàu put-chí thong-ta̍t thàu-thiat, lóng sı̄ tùi Lí sian-siⁿ ê bó͘ lâi kà i, ia̍h siông-siông kap i kı̂-tó, chiah ē án-ni.
To̍k-to̍k nn̄g ê lāu lâng, sui-jiân hoaⁿ-hí toā kiáⁿ ké-pı̀ⁿ, kui-ke ia̍h chai chit ê tō-lí ū kám-tōng lâng ê khùi-la̍t, tàu-tí iáu-boē chhim-bat tō-lí, siông-siông ka-tı̄ kóng, “Tō-lí khiok chin koân chin hó, kiáⁿ-sun lâi sūn-thàn chiū hó, goán taⁿ lāu lah! Bô lō͘-ēng, jı̍p-kàu chē-chē hāng m̄ lı̄-piān.”Sı̄ in-ūi nn̄g ê lāu-lâng iáu-boē siū Sèng-sı̂n ê kám-hoà, só͘-í kóng chit hō oē.
Lí sian-siⁿ choân-ke to̍k-to̍k choan sim thè i kı̂-tó, khún-kiû Siōng-tè kā i khui chit tiâu tit-tio̍h kiù ê lō͘.
Tē cha̍p-gō͘ Chiuⁿ
Lí sian-siⁿ chiong ke-sū thok-tiōng i-ê hiaⁿ kā liāu-lí koán-kò͘, ka-tı̄ khı̀ chhut-goā bé-bē, bē cha̍p-hoè, chio hoé-kı̀ lâi pang-chhiú. Chò seng-lí chin kong-pêⁿ, put-lūn gín-ná lāu-lâng lóng bô khi-phiàn, seng-lí chiām-chiām ka-ia̍h lı̄-chhı̄. Lâng-lâng chai i sı̄ chin-chiàⁿ put-jı̄-kè.
Lí sian-siⁿ sui-jiân bô chhin-chhiūⁿ lâng koà put-jı̄-kè ê pâi, nā sı̄ i-ê hoè-mı̍h chin-chiàⁿ, kè-chı̂ⁿ sı̍t-chāi, kàu-gia̍h hō͘ chèng lâng saⁿ-kap chhim-sı̀n i; sı̄ án-cháiⁿ sı̀n? Sı̄ sı̀n i-ê hoè, sı̀n i-ê kè, in-ūi tāi-seng sı̄ sı̀n i-ê lâng. In-ūi i teh bé hoè iok-liōng khùi-la̍t lâi chò, bô khiàm lâng ê siàu; bē hoè ia̍h beh hiān-chı̂ⁿ. He̍k-sı̄ jı̍p, he̍k-sı̄ chhut, lóng bô ēng pháiⁿ chı̂ⁿ. Só͘-í tú-tio̍h nı̂-cheh ke-ke chhù-chhù hong-bông jiáu-loān, to̍k-to̍k i chı̍t ke an-jiân chhin-chhiūⁿ éng jı̍t.
I ū khí ke ê kè-bô͘ sı̄ ēng kong-tō lâi khí-ke tē-it-hó ê kè-chhek. Lí sian-siⁿ ēng kong-tō lâi chò tāi-chı̀, m̄-sı̄ in-ūi beh khí-ke, sı̄ in-ūi beh thàn Siōng-tè ê bēng-lēng, ke-thiⁿ kàu-hoē ê miâ-siaⁿ, chiàu-kò͘ ka-tı̄ ê liông-sim, siú ka-tı̄ ê pún-hūn. Kiù-sı̍t khí ke ê hok-khı̀ sı̄ tùi án-ni chiah ū.
Khò Iâ-so͘--ê, chāi-siⁿ ē thoat-lı̄ choē, goá chá-chá thang chò chèng-kı̀ⁿ: ia̍h m̄ chai sí ê sı̂ Iâ-so͘ ia̍h ē hû-chhı̂ hûi-hiám, lâi siúⁿ-sù pêng-an. Kàu taⁿ chiah chai lah. Goá chı̍t-sı̀-lâng m̄ bat khoàⁿ-kı̀ⁿ ê sū, m̄ bat thiaⁿ-kı̀ⁿ ê sū, kin-á-jı̍t khoàⁿ-kı̀ⁿ thiaⁿ-kı̀ⁿ.
Lán toā sim-pū lı̂m-chiong, m̄ nā bô kiaⁿ, koh toā-toā ǹg-bāng tı̄ sí āu. Khoàⁿ sí chhin-chhiūⁿ tò-khı̀ lóng bô chı̍t-tiám-á ê iu-chhiû. Chiàu án-ni khoàⁿ chit ê tō-lí kiám m̄ sı̄ lán nn̄g lâng ê lō͘-ēng mah?
Ta-ke ı̀n kóng,“Tio̍h, ū iáⁿ, goá kin-á-jı̍t ia̍h ū chè sim, goá siông-siông khoàⁿ-kı̀ⁿ kiáⁿ-jı̂ sim-pū, ūi-tio̍h lán lāu-lâng kı̂-tó ; khó-sioh, lán boē bat ka-tı̄ kı̂-tó.”
Ta-koaⁿ kóng,“Chit-tia̍p lâi chò-hoé kı̂-tó.”Chiū kūi-teh pek-chhiat kóng, “Kiû Siōng-tè sià goán tāng-choē, siúⁿ sù Sèng-sı̂n chiò goán ê sim, kám-hoà goán ê sim, chhiong-moá goán ê sim.”
Kı̂-tó liáu, khí--lâi tit-tio̍h Siōng-tè chún i só͘ kiû, sim-sı̂n pêng-an, sim-ı̀ tiāⁿ-tio̍h. Siūⁿ ài liâm-piⁿ khı̀ kā toā sim-pū kóng; in-ūi mı̂ chhim lah, kàu koè chá-khí chiah chò-hoé khı̀ kā sim-pū kóng.
Toā sim-pū séng-chhat i ê giân-gí, khoàⁿ i ê iông-māu, chai sı̄-toā-lâng ū iáⁿ tit-tio̍h Sèng-sı̂n kám-hoà, chiū o-ló Siōng-tè, kóng,“Siōng-tè ah, siúⁿ-sù goá an-jiân lâi khı̀.”
Hit-jı̍t nn̄g ê ke-koaⁿ chı̍t-khek-á bô lı̄-khui, pí éng jı̍t ka-poē thiàⁿ i, koh hoaⁿ-hí thiaⁿ i kóng-chhut tō-lí ê oē; ia̍h hoán-hoé chá-chá bô ài thiaⁿ.
Choân-ke khoàⁿ chit nn̄g ê lāu-lâng án-ni, lóng toā hoaⁿ-hí, tāi-ke teh kóng, “Taⁿ lán chı̍t ke lóng sı̄ tit-tio̍h kiù ê lâng ah! Tı̄ sè-kan chò-hoé chheng chò Siōng-tè ê sèng-bı̂n; lı̄ sè-kan chò-hoé hióng-siū Thian-tông ê éng-hok. Chin khoài-lo̍k! Chin-hok-khı̀ lah! Che lóng sı̄ Siōng-tè siúⁿ-sù--ê, tio̍h kui êng-kng Siōng-tè.”
Lí sian-siⁿ toā-toā siū kám-tōng, kan-ta thó͘-khùi kóng,“Kui êng-kng Siōng-tè sı̄ goá só͘ goān.”
Só ê pēⁿ ta̍k jı̍t tı̂m-tāng, bô khùi-la̍t thang kóng oē chē-chē, iáu-kú chhun tām-po̍h khùi-me̍h thang kā Iâ-so͘ chò chèng-kı̀ⁿ.
Lâi khoàⁿ--i ê lâng, nā boē jı̍p-kàu--ê, chiū khǹg i tio̍h hoán-hoé, sı̀n hok-im; nā-sı̄ jı̍p-kàu--ê, chiū khǹg i tio̍h chhim sı̀n, bô piàn, kı̂-û bô pa̍t-mı̍h oē.
Ū chı̍t jı̍t kā ke-lāi ê lâng kóng,“Goá taⁿ tio̍h khı̀ lah.”
Mn̄g i án-cháiⁿ-iūⁿ ē chai. Ìn kóng,“Chā-mê bāng-kı̀ⁿ, sui-jiân bı̂n-bāng chē-chē bông-bông-iá-iá, chóng-sı̄ chit ê bāng bô saⁿ-tâng, put-chí chhin-chhiūⁿ chin--ê. Bāng-kı̀ⁿ Chú chhut-hiān chhēng pe̍h-saⁿ, ēng chhiú ia̍t--goá. Goá liāu kin-á-jı̍t tek-khak kui tı̄ Chú, lâi pàng-soah sè-kan ê lô-khó͘ lah.”
Kàu hit ē-po͘, khùi beh choa̍t, sè siaⁿ tùi Lí sian-siⁿ kóng, “Chhiáⁿ tāi-ke tio̍h lâi.” Chı̍t ke ê lâng kı̀-jiân chū-chı̍p chiàu chhù-sū saⁿ-sı̂; āu--lâi kiò chı̍t lâng sè siaⁿ gı̂m-si, tı̄ sı̀-cha̍p-gō͘ siú; lóng teh gı̂m kóng:
1.Thian-tông lóng bô khó͘-lān,
Éng-oa̍h bô sí;
Hó lâng chheng-chheng bān bān,
Hióng hok bô pí.
Gı̂m-si sı̍t-chāi hó thiaⁿ,
Tâng o-ló Iâ-so͘ chun miâ;
Mı̂-jı̍t hoaⁿ-hí toā siaⁿ,
Tı̍t kàu bān sè.
2. Tāi-ke koáⁿ-kín tio̍h lâi,
Tâng kiâⁿ thiⁿ lō͘;
Siáⁿ-sū iân-chhiân gı̂-ngái?
M̄ thang chhò-gō͘,
Lâi siū ke̍k toā an-lo̍k,
Bô iu-būn ia̍h bô choē ok,
Kú-tn̂g tiàm tı̄ Thian-kok,
Kap Chú Iâ-so͘.
3. Thian-tông moá-moá jı̂n-ài,
To sı̄ hiaⁿ-tı̄,
Sèng-tô͘ kau-poê Thiⁿ-sài,
Tâng sim chı̍t-ı̀;
Lóng-chóng êng-kng chun-kùi,
Tı̀ bián-liû koân-koân chē ūi,
Siōng-tè kap lán chò tui,
Éng-oán bô lı̄.
Teh gı̂m ê sı̂ ba̍k-chiu gia̍h koân khoàⁿ thiⁿ-téng ê êng-kng chiò tı̄ i bı̄n--nı̍h. Gı̂m-si liáu-āu kā i khoàⁿ, i-ê lêng-hûn í-keng kui Chú lah.
“Sèng-tô͘ ê siông-siông thun-lún siú Siōng-tè ê bēng-lēng kap Iâ-so͘ ê tō-lí, tùi án-ni-siⁿ it-hoat chai. Goá thiaⁿ-kı̀ⁿ tùi thiⁿ-nı̍h ū siaⁿ kā goá kóng; āu-lâi sio̍k tı̄ Chú lâi sí ê lâng tek-khak tit-tio̍h hok-khı̀; tio̍h siá tı̄ chheh-nı̍h.” (Ín ka Tòng tō taⁿ ı̀n bêng-pe̍k lah.)
(Tâi-oân Hú-siâⁿ Kàu-hoē-pò tē 63~74koàn,1890 nı̂ 9 ge̍h~1891 nı̂ 8 ge̍h)
