Ó͘ phı̄ⁿ-sái

Pēⁿ-ı̄ⁿ khui-to-pâng ê hō͘-sū ū nn̄g-chióng: a) Soa-chhiú-hō͘-sū, chiū-sı̄ hām goā-kho-i-su chò-hoé khiā tı̄ chhiú-su̍t-tâi ê Bô-khún-hō͘-sū; b) Liû-tōng-hō͘-sū, chiū-sı̄ choan-bûn chò āu-khı̂n chi-oân ê hō͘-sū, in-ūi bô khiā tı̄ chhiú-su̍t-tâi piⁿ--a, tùi chhiú-su̍t ê koè-thêng kap chōng-hóng bô it-tēng chin chheng-chhó. Ū chı̍t-kang, I-su teh chı̀n-hêng chhiú-su̍t, hut-jiân toā-siaⁿ hoah kóng: “O.P. Site!”（chù: sı̄ chı̍t-chióng thàu-bêng, po̍h-po̍h ê liâm-pò͘) Chit-sı̂ tú-hó liû-tōng-hō͘-sū bô tı̄--leh, kan-na chı̍t-ê tē-it-kang lâi khui-to-pâng sı̍t-sı̍p ê hō͘-lí ha̍k-hāu ê ha̍k-moāi, khiā tı̄ hia bô hoán-èng, in-ūi I kin-pún m̄-chai I-su teh hoah siáⁿ. Soa-chhiú-hō͘-sū khoàⁿ I bô tōng-chēng, chiū kóng: “Ha̍k-moāi--a, I-su beh ài O.P. Site--lah!” Chit-ê ha̍k-moāi kín-tiuⁿ chı̍t-ē, chiū koáⁿ-kín chông-khı̀ I-su hia, kā I ê chhùi-om giú--lo̍h-lâi, koh iōng boé-chńg-cháiⁿ-á khı̀ ó͘ I-su ê phı̄ⁿ-khang. Só͘-ū ê lâng lóng khoàⁿ kah gāng-gāng-gāng, goân-lâi I kā “O.P. Site” thiaⁿ choh “Ó͘ phı̄ⁿ- sái”.