e̍k
Kó͘-chá kó͘-chá, tı̄ Chiu-tiâu ū 3 ê lông-hu; chı̍t ê sı̄ sı̀ⁿ “Ông”, chı̍t ê sı̄ sı̀ⁿ “Tân”, koh chı̍t ê sı̄ sı̀ⁿ “N̂g” ê. Saⁿ ê lâng lóng siūⁿ khoàⁿ ū siáⁿ pān-hoat thang tit-tio̍h chhân-hn̂g khah choē á boē; in-ūi nā beh ēng chı̂ⁿ boé, tio̍h su-iàu chin-choē chı̂ⁿ, só͘-í .......
Ū chı̍t jı̍t, sı̀ⁿ Ông--ê khı̀ mn̄g hit chng ê hù-ong Kóng, “Hù-ong ah! Ū sím-mı̍h pān-hoat thang tit-tio̍h chhân-hn̂g khah choē mah?”
Hù-ong chin giâm-siok kā i ı̀n kóng, “Ông sàng! Lí ta̍k jı̍t khı̀ hn̂g-nih, thàn chháu iáu-bē hoat ê sı̂, tio̍h kín khau chháu.”
Ông sàng ēng kı̂-koài ê bı̄n kā i kóng, “Chóng-sı̄, Hù-ong ah! Chháu to iáu-bē hoat chhut-lâi, thài oē thang khau i.”
Hù-ong chí-ū ı̀n i kóng, “Chiàu goá só͘ kā lí kóng ê, khı̀ choè khoàⁿ bāi!”
Ông sàng boē liáu-kái Hù-ong só͘ kā i kóng ê oē, m̄-kú ta̍k jı̍t chiàu Hù-ong só͘ kóng ê, tùi chá-chá chiū khı̀ hn̂g-nih, kàu ê-hng tē it lia̍p chhiⁿ chhut; ba̍k-chiu thí chhin-chhiūⁿ phiat-á hiah toā, tı̍t-tı̍t chhē chháu; nā ū khoàⁿ-tio̍h chı̍t ki chháu íⁿ-á puh chhut-lâi, i chiū kiaⁿ chı̍t-ē! Iā kóng, “Ah! Hāi lah! Hù-ong kóng, thàn chháu iáu-bē hoat tio̍h kín khau chháu.......” I chiū ná kóng ná khau hiah ê chháu íⁿ-á, khau kàu moá-sin tāng koāⁿ.
Tân sàng iā khı̀ chhéng-mn̄g Hù-ong, “Khoàⁿ ū pān-hoat thang tit-tio̍h chhân-hn̂g khah choē á bô?”
Hù-ong chiàu kā Ông sàng kóng ê oē kā i kóng, “Thàn chháu iáu-bē hoat ê sı̂, tio̍h kín khau chháu.”
Tân sàng soà ài chhiò kóng, “Chháu to boē hoat, thái oē thang khau i?”
Hù-ong koh kóng, “Chiàu goá só͘ kóng ê khı̀ choè bāi!”
Tân sàng khiok ū chiàu Hù-ong só͘ kóng, ta̍k jı̍t khı̀ hn̂g-nih khoàⁿ-khoàⁿ, m̄-kú khah siông chē tiàm chhiū-kha teh tuh-ka-chē. Bô kú chháu hoat khí-lâi lah! Hoat kàu 2, 3 chhùn lah! Tân sàng khoàⁿ, chı̍t phiàn hn̂g hoat kàu lóng sı̄ chháu, chiah kóng, “Oah! Hāi lah! Bô khau chháu boē ēng-tit lah!” Tân sàng chiah khai-sí piàⁿ-miā khau chháu, khau kàu moá-sin moá-bı̄n lóng sı̄ koāⁿ. Chóng-sı̄ chêng khau, āu hoat, iū jı̍t-thâu iām phà-phà, koh chháu-kun tèng chin ân, khau kàu beh bô miā.
Sı̀ⁿ N̂g ê, iā khı̀ chhéng-kàu Hù-ong, khoàⁿ ū hó pān-hoat thang tit-tio̍h chhân-hn̂g khah choē á bô? Hù-ong iā sı̄ án-ni kā i kóng, “Thàn hn̂g-nih ê chháu iáu-bē hoat ê sı̂ tio̍h kín khau chháu.”
Nā-sı̄ sı̀ⁿ N̂g ê ài chhiò. I hán-tit khı̀ hn̂g-nih, nā khı̀, sui-jiân khoàⁿ chháu hoat iā lóng bô khau, pàng hn̂g choè chháu-po͘, chí-ū toà chhù-nih hoan-lo̍k, khùn tiong-tàu. Chng-nih ê lâng lóng phoe-phêng, “N̂g sàng ê hn̂g; m̄-sı̄ tiū-á-hn̂g, sı̄ chháu-á-hn̂g.”
Bô joā kú siu-koah ê sı̂ kàu lah! Ông sàng ê siu 10 pē; Tân sàng ê siu 2 pē; N̂g sàng ê siu 10 hūn chi it.
Chng-nih ê gín-ná liām choè koa-khek lâi chhiùⁿ, “Ông sàng ê hn̂g 10 pē siu-sêng; Tân sàng ê hn̂g 2 pē siu-sêng; N̂g sàng ê hn̂g chí-ū cha̍p hūn chi it siu-sêng.”
Choè pē-bú ê thiaⁿ án-ni iā chhiùⁿ chı̍t tiâu koa hō͘ in ê kiáⁿ-jı̂ thiaⁿ:
“Tio̍h o̍h chhin-chhiūⁿ Ông a-peh ê chhân-hn̂g;
Thàn chháu iáu-bē puh, i chiū kín khau-tû.
Tı̄ lán ê sim-lāi, só͘ ū ê pháiⁿ-tāi.
Thàn i iáu-bē puh, tio̍h kín-kín san-tû.
Koh tio̍h ài phah-piàⁿ, tı̄ lán ê kang-tiâⁿ.
Chú chiū toā chiok-hok, hō͘ lán tit khoài-lo̍k.”
Lāu-pē kóng chit ê kò͘-sū hō͘ in ê kiáⁿ-jı̂ thiaⁿ. Só͘-í in ê kiáⁿ mn̄g, Ông a-peh āu-lâi ū pı̀ⁿ hó-gia̍h mah?
Lāu-bú ı̀n, Sı̄! In-ūi i ê chı̄n-la̍t, chiū nı̂-nı̂ toā hoat-ta̍t, kàu 10 nı̂ āu, i chiâⁿ-choè chı̍t ê toā hù-ong.
（Lú-soan Ge̍h-khan Tē 38 kı̂, 1963 nı̂ 2 ge̍h)
