—— Koan-hē Goá ê Chòng-sek
Sí liáu-āu,
Kā goá ê seng-khu sio-chò hu.
Lí tō ū N̄g-chióng soán-te̍k.
Iā tı̄ thô͘-kha,
Jiân-āu chèng chı̍t-châng chhiū.
Goá ê kut thoàⁿ-jı̍p i ê kin,
Hioh tı̄ tē-hā ê chúi-choâⁿ.
Goá ê lêng-hûn
Phı̄ⁿ-tio̍h kò͘-hiong ê thô͘-phang-bı̄,
Bāng-tio̍h chhiⁿ-gı̀n-gı̀n ê hio̍h-á-íⁿ,
Chı̍t-tāi chı̍t-tāi
Gín-á tı̄ ńg--nih chhiùⁿ-koa cháu-sio-jiok.
Ah-sı̄
Kā goá iā tı̄ Tâi-oân Hái-kiap,
Hō͘ goá ê bah
Tam-tio̍h hái-hong ê kiâm-siap,
Toè hái-éng ê siaⁿ khí-khí-lo̍h-lo̍h,
Goá ê hûn-phek
Khiâ tı̄ jı̍t-kng téng-bı̄n,
Chiú tı̄ Ou-chúi-kau goā-ûi.
Tùi-hoāⁿ ê sí-tùi-thâu
Nā káⁿ chı̀n-chêng chı̍t-pō͘,
Goá tāi-seng lia̍h in chò chúi-kúi.
