2 A-hoa Thoat-chhut Chhim-ian
Tiam phoê-oê ê A-peh sı̄ toà tı̄ chı̍t-ê hāng-lō͘ ê piⁿ-kak. Tùi toā-lō͘ jı̍p chı̍t ê sió hāng-lō͘, kiâⁿ kàu hāng-boé, ū chı̍t-keng kū-kū lâ-sâm ê chhù, chit-keng chiū-sı̄ in ê chhù. Ū A-peh chò kang ê só͘-chāi, iā chò chia̍h-pn̄g thiaⁿ kiam kheh-thiaⁿ, koh ū chı̍t-keng pâng-keng, iā ū chı̍t-keng chàu-kha. A-hoa ê chhn̂g sı̄ siat tı̄ A-peh teh chò kang ê piⁿ-kak ê só͘-chāi, tı̄ hia ū kē-kē ê chhâ-siuⁿ, téng-bı̄n ū chhu chháu-chhio̍h.
Lāi-bı̄n ê mı̍h-kiāⁿ lóng bô chéng-chê, chin ho̍k-cha̍p loān-soàⁿ chı̍t-tiûⁿ. Ū ke-kak thiàu chiūⁿ toh-téng teh chia̍h-mı̍h, ū lâ-sâm iáu tı̄ pâng-keng. Chiah-ê kong-kéng teh chèng-bêng hū-jı̂n-lâng ê jı̂n-bu̍t. I jı̍p mn̂g chiū khai-sí mē ke, thêng bô kú niau-á tio̍h koh thau chia̍h i ê hı̂, i chiū phah niau-á, koh toā mē hit-chiah niau-á. I ê chhùi lóng bô hioh-khùn teh mē. Khiok A-peh chhin-chhiūⁿ lóng bô khoàⁿ tio̍h bô thiaⁿ tio̍h sím-mı̍h ê khoán, tı̄ i ê só͘-chāi teh chò kang. I ê bı̄n lóng m̄-káⁿ khoàⁿ pa̍t-ūi, i ê sim ū teh tiuⁿ-tı̂, kiaⁿ-liáu hit-ê thang-kiaⁿ ê loé-mē oē choán-kàu i ê sin-chiūⁿ. Kó-jiân ū-iáⁿ, chú-hū chiū hiòng A-peh lâi toā-mē i, kóng i bô siu chia̍h-mı̍h hō͘ hó-sè, koh bô koáⁿ niau-á cháu. A-hoa chí-ū chē tı̄ i ê chhn̂g-ūi lâi teh kàm-chhat chiah-ê chêng-hêng. I ê sim chin kín-tiuⁿ, chhin-chhiūⁿ chhoán-khùi iā khùn-lân. Kàu tı̄ chú-hū kiò A-hoa ê miâ ê sı̂, A-hoa chiū sim-chêng chin kip lâi ı̀n i. “Ma-ma goá tı̄ chia.” “Án-ni tio̍h! Lí tio̍h kiò goá ma-ma, chóng-sı̄ goá siūⁿ kiò goá A-bú khah hó.” Chú-hū ê sim ū tām-po̍h hoaⁿ-hí sı̄ in-ūi ū lâng kiò i ma-ma.
“A-hoa lí m̄-thang thit-thô âng-á, tı̄ chia tio̍h chò kang.” Chú-hū kı̄n-oá A-hoa lâi, tùi i ê chhiú chhiúⁿ âng-á khí-lâi. “Chia ū sàu-chhiú, hia ū toh-pò͘, tio̍h ài chò kang.” A-bú chiū gia̍h sàu-chhiú hō͘ A-hoa, koh soah chí-sı̄ i tio̍h chò ê kang.
A-hoa chiū khai-sí lâi sàu-tè. I tú-tú sı̄ moá gō͘-hoè ê gín-ná, chóng-sı̄ chiàu-khoàⁿ sı̄ sı̀-hoè nā-tiāⁿ, iáu-kú chin soè-hàn. A-hoa chin chhong-bêng pún-sū, só͘-í chiah oē-thang èng-hù chit-ê bô-lí ê hū-jı̂n-lâng.
Keng-koè la̍k ge8-jı̍t āu, lín nā siat-sú koh khoàⁿ-tio̍h A-hoa, lán beh tio̍h-kiaⁿ koh ūi-tio̍h i lâi siong-sim. Tı̄ chhù-lāi it-chhè iû-goân sı̄ chin loān-cha̍p, lâ-sâm. Hū-jı̂n-lâng nā m̄-sı̄ teh khùn chiū-sı̄ tı̄ chhù-piⁿ teh kóng êng-oē, nā bô chiū tı̄ chhù-lāi teh jiáng-loān. A-peh ta̍k-sı̂ lóng tiām-tiām bô kóng-oē teh chò kang. I chı̍t-poàⁿ khah-ke ê sı̂-kan lóng taⁿ tàⁿ chhut-khı̀ goā-bı̄n teh chò kang. Khiok A-hoa lán hiám-hiám tio̍h boē jı̄n-tit i, in-ūi i pı̀ⁿ-chiâⁿ chı̍t-ê chin lâ-sâm pháiⁿ-khoàⁿ ê gín-ná, i ê bı̄n chin chiau-chūi, i ê kha-chhiú kap sin-khu lóng ū siū phah ê siong-hûn.
I goân-lâi sı̄ chı̍t-ê bêng-lóng oa̍h-phoat ê gín-ná, iáu-kú tı̄ chit-ê khoân-kéng hō͘ i ū chin toā ê khoà-sim, kiaⁿ-liáu ū sím-mı̍h kang-chok chò bô hó-sè koh hō͘ lāu-bú phah mē. Só͘-í lāu-bú nā tı̄ chhù-lāi ê sı̂, tı̄ i ê sin-chiūⁿ lóng bô ū chı̍t sı̂-khek ê pêng-an. A-hoa ê kha-chhiú lóng bô sı̂-thêng teh chò kang, in-ūi chai-iáⁿ nā án-ni chò oē-thang tām-po̍h kiám-chió lāu-bú ê hoat-sèng. Só͘-í sui-jiân lóng bô sím-mı̍h thang chò, iáu-kú A-hoa ê kha-chhiú tio̍h kè-sio̍k tōng-chok. Tı̀-kàu A-hoa ê sim tı̍t-tı̍t ǹg-bāng A-bú bô tı̄ chhù-lāi á-sı̄ khı̀ khùn, thang tit-tio̍h tām-po̍h ê pàng-sim kap chū-iû. Nā khoàⁿ-kı̀ⁿ A-bú chhut mn̂g-kháu, i chiū pàng i ê sàu-chhiú á-sı̄ toh-pò͘, thò͘ chı̍t-ê khùi, lâi chē tı̄ thô͘-kha, ēng sûi-piān ê mı̍h-kiāⁿ lâi chò âng-á, kap niau-á kóng-oē, chò hı̀ hō͘ niau-á khoàⁿ, chióng-chióng thian-chin ê iû-hı̀. Niau-á Lı̄-lı̄ sı̄ i hó ê pêng-iú, i siông-siông kap niau-á chò-hoé kóng-oē. “Sí niau-á, lí chin bô lō͘-ēng, lí ta̍k-jı̍t lóng teh thit-thô, lóng m̄ chò kang. Hó! Ē-àm tek-khak m̄ hō͘ lí chia̍h-pn̄g!”
A-hoa o̍h A-bú ê kháu-khı̀ lâi mē niau-á, ū sı̂ tio̍h ké-iáⁿ phah niau-á. Khiok chit chiah niau-á sı̄ A-hoa tı̄ hoān-lān tiong ê hó tâng-phoāⁿ. I iā kap niau-á saⁿ-kap thiàu-bú, iā kà niau-á gı̂m-si.
“Lí chin-chiàⁿ lóng bô lō͘-ēng! Kā lí kà hiah-nı̍h choē-pái lí lóng boē-hiáu-tit! Tio̍h án-ni pí lah, siang-chhiú khui-khui, thâu-khak oai-oai, kha tio̍h khut-khut, ài-ah, lí chit-ê sí-mı̍h lóng boē-hiáu-tit, lí sı̄ tó-ūi ê iàm-chiān mı̍h, chiah-nı̍h gōng, chiah-nı̍h khiap-sı̀!”
“Chit téng sı̄ goá ê bō-á, goá chò sin-niû ê sı̂ goá ê lāu-pē sàng goá ê, chit-téng sı̄ goá ê pó-poè, in-ūi chit-sı̂ lóng bô thang boé chit-khoán ê mı̍h.”
“Ū chin hó-khoàⁿ bô? Tek-khak ū! Khó-sioh goá lóng bô eⁿ-á, nā-ū goá ê eⁿ-á toā-hàn ê sı̂, goá beh sàng goá ê bō-á hō͘ i, i tek-khak chin-súi!”
“Án-ni tio̍h, án-ni tio̍h! M̄-thang thǹg khí-lâi, ài-ah, lí chit-ê pháiⁿ-mı̍h sı̍t-chāi chin gōng!”
A-hoa ū thian-sèng ê chhong-bêng kap kı̀-ek, lâi têng-su̍t A-bú tı̄ tām-oē tiong só͘ kóng ê oē.
“Chit-ê gín-á koh kap niau-á teh chò sńg thit-thô!” Hut-jiân A-bú ê siaⁿ hō͘ A-hoa tio̍h-kiaⁿ. “Lí khoàⁿ, ke-kak koh thiàu-khı̀ toh-téng teh chia̍h-pn̄g lah!” Kó-jiân ū-iáⁿ toh-téng ê pn̄g hō͘ ke chhéng kàu moá sı̀-koè. A-bú chin toā siū-khı̀ lâi gia̍h tiàu tı̄ piah-téng ê chhoê khí-lâi phah A-hoa.
“A-bú m̄-káⁿ lah, A-bú m̄-káⁿ lah!” Chai-lān tı̄ bô gı̂-gō͘ ê tiong-kan koh lı̂m-kàu lâi kiò-hoê A-hoa kàu tı̄ chit-ê pi-chhám put-hēng ê hiān-sı̍t.
“Sí-kúi, lí í-āu m̄-thang kiò goá a-bú!” Tùi án-ni A-hoa chiū bô kiò i a-bú, sı̄ chiàu boē-chhài ê lâng kiò chit-ê hū-jı̂n-lâng, “Thâu-ke-niû.”
Taⁿ chit-ê thâu-ke-niû mı̂-jı̍t su-liām, ài siⁿ chı̍t-ê eⁿ-á. “Goá liam-piⁿ beh ū gín-ná lah!” Thâu-ke-niû kā i chhin-bı̍t ê chhù-piⁿ kóng. I iā siong-sı̀n i beh ū gín-ná. Chiū mı̂-jı̍t tó chhn̂g. “Lán ê siu-jı̍p siuⁿ-chió, gín-ná nā chhut-sı̀ beh án-choáⁿ seng-oa̍h!” Thâu-ke niû tio̍h tùi A-peh án-ni kóng, m̄-sı̄ kóng, sı̄ án-ni jióng lâi ui-hat i. Chóng-sı̄ A-peh ê sim-lāi teh chhiò, “Hi, hi, lí beh siⁿ chı̍t-ê kúi lah!”
Thâu-ke niû ta̍k-jı̍t teh khoàⁿ ū sím-mı̍h piàn-hoà á-bô, ū-sı̂ tı̄ mı̂-sı̂ khoàⁿ chhin-chhiūⁿ ū, kàu chá-khí sı̂ koh tio̍h piàn bô. Iáu-kú i ta̍k-jı̍t siūⁿ kóng i ū gín-ná lâi teh tán-hāu.
“Goá teh beh ū gín-ná lah, só͘-í A-hoa í-āu tio̍h hū-tam chú-pn̄g, gín-ná nā chhut-sı̀ tio̍h hū-tam āiⁿ gín-ná.” A-hoa ê tāng-tàⁿ tı̍t-tı̍t ke-thiⁿ, i ê siū-khó͘ iā ná chhim.
Chóng-sı̄ koh keng-koè poàⁿ-nı̂,thâu-ke niû lóng bô ū gín-ná, i chin choa̍t-bāng, chin oàn-chheh, chiū koh-khah ke-thiⁿ hoat-sèng lâi khó͘-chhó͘ kiáu-jiáu chhù-lāi. In-ūi án-ni A-peh chiū chha-put-to lóng chhut-khı̀ tı̄ goā-bı̄n, chá-chá chhut, àm-àm chiah jı̍p-mn̂g, sı̄ beh tô-siám chit-ê hiông-ok iá-bân ê hū-jı̂n lâng.
Khiok A-hoa bô hoat-tō͘ thang tô-siám, chiū it-chhè ê chai-hāi lóng lı̂m-kàu tı̄ i loán-jio̍k ê sin-chiūⁿ.
Khó-lı̂n ê A-hoa, i ê bı̄n soah pı̀ⁿ chhin-chhiūⁿ lāu-lâng ê bı̄n, i ê iūⁿ-siùⁿ chin lâ-sâm thang-kiaⁿ. Thâu-ke niû ta̍k-jı̍t lóng ū lí-iû lâi phah i, só͘-í i iā bâ-phoê bâ-phoê, hō͘ i phah á-sı̄ liàm, ū thang chia̍h á-sı̄ bô thang chia̍h lóng bô lia̍h-chò sím-mı̍h lâi kan-khó͘, ūi-tio̍h thit-thô hō͘ lâng phah, chóng-sı̄ phah-liáu i iû-goân koh thit-thô. Chhoê-kàu tı̄ i ê sin-chiūⁿ ê sı̂ iā chhin-chhiūⁿ lóng bô kám-kak oē thiàⁿ ê khoán. Thâu-ke-niû nā tı̄ chhù-lāi, i chiū ké choè kang lâi tín-tāng kha-chhiú, nā bô chiū khai-sí thit-thô.
“Niau-bı̂, lí chin bái, Lí lóng boē chò sím-mı̍h, Goá beh lia̍h lí khı̀ pàng-seⁿ, Kàu tı̄ chhim-soaⁿ khòng-iá, Hō͘ lí ko͘-toaⁿ bô-lō͘, Àm-mı̂ ū pháiⁿ-mı̍h ê só͘-chāi.
Lí beh háu, goá ê chhù, Goá ê chhù tı̄ tó-ūi, Chhiū-nâ lāi ê àm-kong-chiáu beh kóng, Pháiⁿ-khoàⁿ bô chhù ê sió-niau, Lí ê chhù tı̄ thiⁿ-chhiⁿ ê téng-koân, Chhái-khēng ê boé-liu, Hn̄g-hn̄g poâⁿ-koè lâng ê ba̍k-chiu.”
A-hoa ê keh-piah ū chı̍t-ê eⁿ-á kiò-chò A-gı̄. I ê ma-ma ta̍k-jı̍t tio̍h liām chin-choē iô-nâ si lâi iô A-gı̄ khùn.
Ū chı̍t-pái A-gı̄ ê a-pa tı̄ mê-sı̂ jı̍p-mn̂g ê sı̂, i chiū tùi ma-ma kóng.
“Goá tú-chiah beh tńg-lâi ê sı̂, tı̄ hit-ê hāng-lō͘ ū tú-tio̍h chı̍t-chiah káu-á, hit-chiah káu-á hō͘ goá chin kı̂-koài, in-ūi chhin-chhiūⁿ lâng teh gı̂m-si ê khoán, cháu tùi goá ê sin-piⁿ koè-khı̀.” A-pa chin put-khó su-gı̂ ê bı̄n. Chóng-sı̄ ma-ma sûi-sı̂ lâi kái-tap chit-ê sū.
“Hit-ê m̄-sı̄ káu-á lah, sı̄ keh-piah ê gín-ná A-hoa lah!”
“Chóng-sı̄ goá ū thiaⁿ-kı̀ⁿ cháu kàu hāng-thâu ê sı̂ ū kaiⁿ chı̍t-siaⁿ.” “M̄-sı̄ lah, hit-ê sı̄ A-hoa in-ūi kiaⁿ teh háu ê siaⁿ lah, hit chām lō͘ chin àm-sàm, A-hoa nā cháu kàu hit só͘-chāi tek-khak tio̍h háu chı̍t-siaⁿ lah.”
“Chóng-sı̄ hiah-nı̍h soè-hàn chiah àm beh khı̀ tó-ūi?” A-pa ê bı̄n iáu khah put-khó su-gı̂. “Thâu-ke-niû kiò i tio̍h khı̀ boé tiám-sim”, ma-ma án-ni kóng. A-pa tı̄ i ê chhùi-lāi án-ni liām, “Hiah-nı̍h soè-hàn kiám oē-thang chò hit khoán ê sū.”
A-gı̄ in pē-bú lóng tó-chhn̂g khı̀ khùn ê sı̂, hut-jiân ū thiaⁿ-tio̍h chı̍t ê ı̄ⁿ-siông ê siaⁿ.
“Sím-mı̍h lâng tı̄ toā-lō͘ teh sio-phah!” A-pa kín-kín khí-sin beh khí-lâi, chóng-sı̄ ma-ma chhun-chhiú chó͘-tòng i kóng, “Hit-ê m̄-sı̄ teh sio-phah, sı̄ keh-piah ê hū-jı̂n lâng teh phah-mē A-hoa lah!” “Ūi sím-mı̍h chiah àm teh phah-mē hiah-nı̍h soè-hàn ê gín-ná?” A-pa ê bı̄n chin kat. “Phah-sǹg sı̄ boé m̄-tio̍h mı̍h tńg-lâi, nā bô chiū-sı̄ chhia-tó mı̍h lah!” “Chin khó-lı̂n, hiah-nı̍h soè-hàn beh kiò i chò sím-mı̍h!” A-pa thò͘ chı̍t-ê khùi, koh tó lo̍h-khı̀.
“Só͘-í ta̍k-jı̍t tek-khak tùi chá-khí phah kàu poàⁿ-mê. Goá í-keng chin koàn-sı̀ lah!” In nn̄g-lâng lóng tiām-tiām, chóng-sı̄ in ê sim-lāi iáu-kú ūi-tio̍h A-hoa kap thâu-ke niû, chit nn̄g-ê jı̂n-bu̍t lâi teh kan-khó͘ sim.
Kó-jiân keh chá-khí chin chá A-hoa chiū siū kiò khí-lâi chú-pn̄g. Í-keng sı̄ chin-koâⁿ ê jı̄-ge̍h thiⁿ lah! A-hoa siūⁿ beh thau-ēng lāi-bı̄n ê chúi, chóng-sı̄ sûi-sı̂ siū hoat-kak, chiū chhut-khı̀ goā-bı̄n chhiūⁿ-chúi, jı̍p-lâi soé-bí chú-moê. Liáu-āu i chiām-sı̂ khut-sin lâi bih-koâⁿ, niau-á iā thiàu-jı̍p tı̄ i ê hoâi-tiong.
I só͘ tú-tio̍h ê í-keng koè-thâu tı̄ i só͘ oē-thang tam-tng, koâⁿ-léng kap ià-siān kau-pek tı̄ i loán-jio̍k ê sin-thé, hō͘ i khó-ài ê thian-sèng lóng siau-bia̍t khı̀.
I iā ū khoàⁿ-tio̍h pa̍t ê cha-bó͘ gín-ná ê ka-têng, hēng-hok khoài-lo̍k ê seng-oa̍h, lāu-bú thiàⁿ kiáⁿ, ka-têng thoân-lo̍k ê chêng-hêng lâi mō͘-hóng in ê kóng-oē, khiok i ê sim m̄-chai sím-mı̍h sı̄ him-soān, oàn-thàn.
It-chhè ê put-hēng tı̄ i put-kò sı̄ chū-jiân ê sū. “Sí-mı̍h, moê phū chhut-lâi iáu m̄-chai!” A-hoa tı̄ poàⁿ tù-bı̂n ê tiong-kan ū koh thiaⁿ-tio̍h thâu-ke niû hiông-ok ê siaⁿ teh jióng, i chiah chai-iáⁿ chit-ê sio-lō ê hoé-lô͘ hō͘ i khùn-khı̀. Thâu-ke niû tùi pâng-keng cháu chhut-lâi, thâu-mn̂g sàm-sàm hiông-ok ê ba̍k-chiu, thang-kiaⁿ ê hêng-chōng lâi kàu A-hoa ê bı̄n-chêng chiū chiong A-hoa hiông-hiông thoa tùi āu-bı̄n khı̀. A-hoa chiū poa̍h-tó tı̄ thô͘-kha. “Thâu-ke niû ah, m̄-káⁿ lah!” “M̄-káⁿ khı̀ sí!” Thâu-ke niû án-ni toā siaⁿ jióng soà ēng moê-siah lâi phah seⁿ-oe hō͘ i piak chı̍t ē lâi chān i ê hiông-sè.
“Sí-kúi, lóng boē-choè sím-mı̍h, chá-khí tek-khak m̄ hō͘ lí chia̍h, koh beh hō͘ lí kūi, tek-khak beh hō͘ lí kiò khó͘!” Thâu-ke niû kè-sio̍k jióng-mē phah-loān bô soah. A-hoa tiām-tiām khiā teh, ēng kha-chng-thâu-á lâi ngeh niau-bı̂ ê boé. A-peh iā khí-lâi lah, chiū teh khoán tàⁿ beh chhut mn̂g, sı̄ in-ūi kiaⁿ liáu loé-mē oē kàu tı̄ i ê sin-chiūⁿ, chiū tı̄ thâu-ke niû bô khoàⁿ-kı̀ⁿ ê sı̂ beh siám chhut-khı̀, khiok kàu mn̂g-kháu ê sı̂ siū hoat-kiàn tio̍h.
“Lí hiah-nı̍h chá beh khı̀ tó-ūi sí!” Thâu-ke niû chiū toā-siaⁿ lâi mē i. A-peh m̄-káⁿ tín-tāng. “Jı̍p lâi chia̍h moê!” A-peh chiū koh taⁿ tàⁿ jı̍p lâi, koh chē tı̄ í lâi tán-hāu chia̍h moê. Hit-ê chêng-hêng tú-tú sı̄ sió-ha̍k ê gín-ná hoān-choē teh kiaⁿ lāu-bú chı̍t-iūⁿ, tı̀-kàu hō͘ A-hoa iā kám-kak hó chhiò.
Thâu-ke-niû ê chhùi kè-sio̍k teh mē, kàu chia̍h-pn̄g ê sı̂ iáu-kú bô soah, chia̍h chı̍t-chhùi mē chı̍t-chhùi, lóng bô léng-chēng.
A-hoa tı̄ hit-ê sı̂-kan chiū chē tı̄ thô͘-kha lâi kap niau-á thit-thô. Kó-lı̂n bô chhù ê sió-niau, Lí sı̄ tùi tó-ūi chı̍t-kok lâi, Chhiⁿ-sı̂n ê téng-koân chhái-khēng ê boé-liu, Hn̄g-hn̄g poâⁿ-koè lâng ê ba̍k-chiu.
Lí siang-kha ta̍h tı̄ o͘-àm ê tı̂n-sè, Lí ê sim khiok bāng-sióng bô soah, Sûn-chin sı̄ lí ê miâ, Chin-sı̍t sı̄ lí ún-ba̍t ê sit-giáu.
Thâu-ke-niû chia̍h-pá ê sı̂ kó-jiân chiū kiò A-hoa khı̀ kūi. “Khı̀ kūi! Goá siūⁿ lóng bô hoat-tō͘ thang hō͘ lí kiò khó͘, goá m̄ sı̀n goá lóng bô hoat-tō͘!” A-hoa chiū kiâⁿ-kàu só͘ chí-tēng ê só͘-chāi lâi kūi tı̄ thô͘-kha. Thâu-ke-niû kè-sio̍k chāu-chāu mē. A-peh kín-kín liam kha-chhiú lâi liu chhut-khı̀.
“Kı̂-tó ê sı̂ chhiú tio̍h ha̍p-ha̍p, ba̍k-chiu tio̍h ǹg thiⁿ-téng, tı̄ hia ū Iâ-so͘, ū thiⁿ-sài, ū Siōng-tè ê pó-chō teh thiaⁿ lán ê kı̂-tó.”
Niau-á oá lâi ê sı̂ A-hoa chiū án-ni soat-bêng.
“Goá m̄-sı̀n goá lóng bô hoat-tō͘ lah! Goá tek-khak beh hō͘ lí kiò-khó͘!” Thâu-ke-niû khoàⁿ-lâi khoàⁿ-khı̀, chhoē-khoàⁿ ū sím-mı̍h thang lâi khó͘-chhó͘ A-hoa á-bô, sı̄ khoàⁿ i put-chí thài-jiân chū-jio̍k bô kiaⁿ-sim. Thâu-ke-niû khoàⁿ-tio̍h chàu-kha ê bı̄n-tháng chiū siūⁿ chı̍t-ê hó ê hoat-hō͘. “Iàm-chiān mı̍h! Lí chit-ê bı̄n-tháng tio̍h giâ tı̄ thâu-khak-téng, nā phah ka-la̍uh lâi kòng-phoà, lí chiū kai-sí! Hit-sı̂ goá tek-khak tiàu lí tı̄ chhù-téng!” A-hoa ê chhiú chiū sit-lo̍h chū-iû lah. I ēng siang-chhiú lâi giâ hit-ê péng-khap ê bı̄n-tháng.
“Nā kā goá phah ka-la̍uh, hit-sı̂ lí tio̍h sí! Goá m̄-sı̀n goá lóng bô hoat-tō͘ thang tùi-hù lí!” Thâu-ke-niû kám-kak i siūⁿ-chhut chit-ê hoat-tō͘ chin hó, i chin boán-chiok, chin pàng-sim khı̀ chéng-lí i ê thâu-mn̂g. “Nā kā goá ka-la̍uh lí tio̍h kai-sí! Kàu goá khı̀ boé chhài tńg-lâi lóng m̄-thang tín-tāng!” Thâu-ke-niû ê chhùi lóng bô hioh-khùn.
“Tı̄ ke-á kùi-khı̀ ê hū-jı̂n-lâng lóng tio̍h tı̀ bō-á, ū lâng tı̀ oáⁿ bō-á tı̄ thâu-khak sim, ū lâng tı̀ bı̄n-tháng bō-á, tú-tú chhin-chhiūⁿ goá án-ni. Chit-ê bı̄n-tháng bō-á sı̄ kùi-khı̀ ê hū-jı̂n-lâng chhut-goā ê sı̂ teh tı̀ ê.” A-hoa chiū koh tùi niau-á soat-bêng i ê chêng-hêng. Thâu-ke-niû beh chhut-mn̂g ê sı̂ ū khoàⁿ-tio̍h A-hoa pèng-bô lia̍h hit-ê chò kan-khó͘, hoán-tńg ēng bı̄n-tháng tı̀ tı̄ thâu-khak, chı̍t-chhiú hoāⁿ, chı̍t-chhiú teh chò pá-hı̀, i chiū chin toā siū-khı̀.
“Goá m̄-sı̀n lóng bô hoat-tō͘ lah!” I chiū koh tùi tû-téng gia̍h chı̍t-ki hoe-kan lo̍h-lâi, lâi hē tı̄ bı̄n-tháng-téng. “Lí koh tín-tāng khoàⁿ, lí nā kā goá phah-phoà chit-ki hoe-kan, lí chiū bô miā, goá tek-khak tiàu lí tı̄ chhù-téng lâi phah hō͘ lí sí.”
Chit-ê sū hō͘ A-hoa chin kín-tiuⁿ, i lóng m̄-káⁿ tín-tāng, sı̄ chai-iáⁿ chit-ê sı̄ chin toā ê mō͘-hiám, koh i iā sı̀n thâu-ke-niû tek-khak oē chiàu i ê oē phah sí i, só͘-í chit-sı̂ i chiū oân-choân sit-lo̍h chū-iû lah. Thâu-ke-niû chài-saⁿ chài-sı̀ pàng-tiau chiū só mn̂g chhut-khı̀. I ê sim kám-kak chin boán-chiok, in-ūi taⁿ hō͘ A-hoa bô chū-iû lah, chit-ê pān-hoat put-chí hián-bêng.
Bô loā-kú ê kín-tiuⁿ, A-hoa ê chhiú chiū khai-sí khu-khu-chhoah sit-lêng, i ê thé-lio̍k iā put-chí bô, sı̄m-chı̀ chá-khí iā bô chia̍h sím-mı̍h. A-hoa sı̍t-chāi ū kám-kak kan-lân.
I lóng bô koh kap niau-á chò sím-mı̍h sńg, i ê sim chí-ū teh khoà-lū kín-sı̄n. Put-kò i tio̍h cha̍p-hun ê thêng-chēng. Iáu-kú chı̍t-chióng ê kín-tiuⁿ tı̄ hiān-sı̂ ê A-hoa sı̄ put-khó-lêng ê sū, i ê chhiú lóng bô lêng-la̍t lah, i ê sin-khu iā sit-lo̍h chí-la̍t, i ê thâu-náu iā chiām-chiām jı̍p tı̄ tù-bı̂n ê lāi-bı̄n, i khiok ū kám-kak kúi-nā-pái hiám-hiám tio̍h ka-la̍uh hoe-kan, iáu-kú i ê ı̀-sek chiām-chiām bô-khı̀, hō͘ i bô hoat-tō͘ thang tí-khòng.
“Ph-siap!” Chı̍t-ê thang-kiaⁿ ê siaⁿ kiò-chhéⁿ A-hoa ê it-chhè. I khoàⁿ-kı̀ⁿ hit-ê miā-ūn ê hoe-kan í-keng tı̄ sit-sı̂n ê tiong-kan ka-la̍uh phoà-chhùi tı̄ thô͘-kha.
“Goá ê hoe-kan! A-hoa toā tio̍h-kiaⁿ lâi lám-oá hit-ê phoà-chhùi ê hoe-kan tı̄ i ê heng-chêng. I gia̍h-ba̍k beh chhoē khoàⁿ ū sím-mı̍h chín-kiù á-bô, chóng-sı̄ i só͘ khoàⁿ-tio̍h ê sı̄ chı̍t-tiâu soh tùi chhù-téng tūi-lo̍h teh tán-hāu A-hoa, chit-tiâu soh sı̄ thâu-ke-niû í-chêng tio̍h chún-pı̄ khí-lâi khǹg, iáu-boē sı̍t-hêng ê soh. A-hoa khoàⁿ-liáu chiū chin toā-kiaⁿ, lâi ka-léng-sún. “Goá ê thiⁿ-sài ah, pang-chān goá!” Iáu-kú A-hoa ū khoà-kı̀ⁿ chı̍t-ê poàⁿ-khui ê thang-á, oē-thang tô-cháu chhut-khı̀. A-hoa chiū lóng bô khó-lū sím-mı̍h, kín-kín peh-chiūⁿ thang-á lâi thiàu chhut goā-bı̄n khı̀.
A-hoa chiū kín-kín cháu-kàu hit-ê hāng-kháu khı̀, jiân-āu chiū cháu-jı̍p khı̀ toā-lō͘, tı̄ hiah-ê koè-lō͘ ê lâng ê lāi-bı̄n lâi sit-lo̍h i ê iáⁿ.
