6 Choē-ok Ê Kang-chı̂ⁿ Chiū-sı̄ Sí
Pek-jím be̍k-kiù liáu-āu koh keng-koè 3 nı̂ goā-kú ê jı̍t-chí lah! Hit sı̂ ê sı̂-kio̍k í-keng chı̀n-jı̍p tı̄ chóng-tōng-oân ê sı̂. Chiàn-cheng ê o͘-hûn koáⁿ-kip tà-oá tı̄ chéng-kô ê Tâi-oân. Jı̍t-pún ê chiàn-sū í-keng kàu tı̄ thè-pāi ê sı̂-chām lah. Seng-sán lóng thêng-chí, bu̍t-chit toā-toā khiàm-khoeh, seng-oa̍h hām-lo̍h tı̄ khùn-khó͘ kiaⁿ-hiâⁿ o͘-àm ê lāi-bı̄n.
Tùi-te̍k ê hui-ki ta̍k-jı̍t kui-lu̍t-tek ê sı̂-kan poe lâi po̍k-chà kun-sū iàu-sài-toē. Tùi Ko-hiông khai-sí chiām-chiām ı̂-pak ê tōng-sè lâi húi-hoāi kok toē-khu ê siâⁿ-chhı̄, kau-thong ki-koan kap kun-pı̄ si-siat.
Ò͘-chiu kap Sai-pháng ê hām-lo̍h í-lâi bêng-kun chhin-chhiūⁿ phoà-tek ê sè-le̍k, chiām-chiām koáⁿ-pek Jı̍t-kun thè-āu, kong-phoà i ê tı̄n-soàⁿ. Ma-ni-lah ê chiàn-kio̍k iā kè-sio̍k sit-pāi, koh lâi sı̄ beh koat-tēng Tâi-oân ê miā-ūn ê sı̂ lah. Tâi-oân í-keng bı̄n-lı̂m tı̄ choè-toā ê gûi-kio̍k, teh khióng-hông, iô-chhoah. Hit-sı̂ ê seng-oa̍h tı̄ hui-siông ê kín-tiuⁿ kap put-an ê lāi-bı̄n.
Kàu tı̄ × ge̍h × jı̍t, sı̄ Tâi-lâm chhı̄-bı̂n èng-kai tio̍h kı̀-liām ê jı̍t.
“Khong-sı̍p kéng-pò!!” Chit-ê hoah-siaⁿ chiàu-siông tı̄ siōng-ngó͘ 10 tiám chiū thoân-ta̍t kàu tı̄ chèng chhı̄-bı̂n ê hı̄-khang.
Bô kú chiū ū thiaⁿ-tio̍h hui-ki teh poe bı̂-jio̍k ê siaⁿ-im.
“Thoè-pı̄!!” Kè-sio̍k tı̄ ke-lō͘ thâu ke-lō͘ boé ū hông-khong-thoân-oân ê siaⁿ saⁿ chiap-soà teh thoân-ta̍t.
Khiok chiah-ê siaⁿ chhin-chhiūⁿ ū khah koàn-sı̀ tı̄ lâng ê hı̄-khang lah. In-ūi koè-khı̀ 2,3 ge̍h jı̍t ê keng-giām, hō͘ Tâi-lâm chhı̄-bı̂n sit-lo̍h chin-toā ê kéng-séng.
“Koh teh khong-sı̍p lah, sı̍t-chāi chin mâ-hoân ê sū.” Lâng chí-ū án-ni liām lâi kè-sio̍k in ê kang-chok, ū chia̍h-mı̍h ê lâng kè-sio̍k in ê chia̍h-mı̍h, ū tâm-oē ê lâng kè-sio̍k in ê tâm-oē, ū thit-thô pâi-á ê kè-sio̍k thit-thô in ê pâi-á.
In-ūi chiàu koè-khı̀ lóng sı̄ chı̍t ê khang-khang ê háng-hoah nā-tiāⁿ. Hiah-ê kéng-pı̄-thoân, hông-khong-thoân iā sı̄ lóng siâng chı̍t-iūⁿ ê sim-su, put-kò piáu-bı̄n chiū teh koán-lí lâng tio̍h “thoè-pı̄!” Khı̀ hông-khong-hô nā-tiāⁿ.
Chóng-sı̄ kàu tı̄ chit-jı̍t khong-sı̍p kéng-pò ê siau-sit thoân-ta̍t bô joā kú, chiâⁿ-tiám cheng liáu-āu hut-jiân ū thiaⁿ-tio̍h chı̍t-ê ı̄ⁿ-siông kim-sio̍k sèng ê lāi-siaⁿ, chhı̀-chha̍k tı̄ hı̄-khang. Lâng-lâng kín-kip cháu-jı̍p hông-khong-hô lāi, ū bêng-ki B-29 hêng kap B-38 hêng ê chà-ki, chhin-chhiūⁿ siám-tiān ê sok-tō͘ lâi kàng-lo̍h, sùn-ba̍k ê tiong-kan í-keng bô khoàⁿ-kı̀ⁿ lah. Chóng-sı̄ chhı̄-lāi í-keng pı̀ⁿ-chiâⁿ hong-hoé, phoà-siong chhám-tām ê khòng-iá.
Chhin-chhiūⁿ phoà-hāi ê ok-mô͘ cháu-koè Tâi-lâm chı̍t-iūⁿ, Tâi-lâm ê múi chı̍t-ê kak-lo̍h lóng ū siū-hāi pi-chhám kiaⁿ-hiâⁿ, thı̂-khàu ê siaⁿ. Kiaⁿ-hiâⁿ tín-tāng choân-chhı̄ ê peh-sı̀ⁿ.
Bêng-ki tē-jı̄ pái chà-lo̍h lâi ê sı̂ chiū tı̄ chit-ê phoà-hāi ê hoè-hu téng pàng siau-ı̂-tân. Bô-kú Tâi-lâm chiū pı̀ⁿ-chiâⁿ hun-hoé ê toā-hái. Chit-ê thang kóng sı̄ chı̍t-ê bı̄-chêng-iú ê toā chai-lān. Khióng-hông ê sek hián-chhut tı̄ choân chhı̄-bı̄n. Tô-cháu, so͘-khai ê chhia-bé, jı̂n-kûn tı̄ hit-ê toā-hoé ê ē-bı̄n hán-hoah, au-kiò, thı̂-khàu, chiâⁿ-chò chı̍t-tiûⁿ pi-chhám, hūn-loān ê oa̍h-ke̍k.
Hit-ê toā-hoé kàu tı̄ hit chı̍t-mê iáu-kú chin iām teh sio-to̍h. Thiⁿ-khong it-phiàn pı̀ⁿ-chiâⁿ chu-âng ê hoé-kéng. Chhı̄-bı̂n toā pō͘-hūn lóng so͘-sàn liáu lah. Só͘ lâu ê sı̄ hiah-ê hông-oē-thoân, kiù-hō͘ jı̂n-oân kap tām-po̍h chhı̄-bı̂n nā-tiāⁿ. Nā-sı̄ toā-ke-bı̄n í-keng chin-chió ū lâng-iáⁿ tı̄ hia teh kiâⁿ lah, sı̍t-chāi pı̀ⁿ-chiâⁿ lâng-khı̀ sek-khong ê léng-chēng, chhám-tām. Ū hoé teh sio-to̍h pia̍k-pia̍k kiò ê siaⁿ-im, ū chhiûⁿ teh tó-hoāi ê siaⁿ, ū tām-po̍h lâng tı̄ ke-lō͘ teh cháu koh hoah-jióng ê siaⁿ í-goā chí-ū sı̄ hun-hoé pau-ûi tı̄ chhı̄-lāi. Tang-tó sai-oai ê chhı̄-bı̄n bô ū chı̍t-ê só͘-chāi sı̄ an-choân, lóng sı̄ loān-cha̍p hong-hoé ê hoé-kéng.
Tı̄ hit chı̍t-mê ê poàⁿ-iā, hoé-sè í-keng khah léng-lo̍h ê sı̂, tùi hoé-chhia tiàm thàng kàu Tāi-chèng kong-hn̂g ê lō͘-chām, ū chı̍t-ê koh-iūⁿ, chhēng phoà-noā ê saⁿ ê ta-po͘ lâng, ná-pê ná-kiâⁿ teh kiâⁿ bô lō͘ thang chhut-lâi. Iām-jia̍t ê hoé pek-tı̄ hit lâng ê sin-chiūⁿ, hō͘ i moá-sin tāng-koāⁿ. Hit lâng ê khoán-sit chhin-chhiūⁿ sı̄ chhiⁿ-mı̂ lâng, in-ūi i sin-khu khut-khut, ēng chhiú teh bong-tang bong-sai. I ê kha-chhiú phı̄-phı̄-chhoah, chhùi-lāi hā-hā chhoán, ū koāⁿ chı̍t-tih chı̍t-tih tih-lo̍h i ê bı̄n. I thong sin-khu lóng sı̄ thô͘-hún. I pê kàu ū hoé-kng ê só͘-chāi, hō͘ i ê bı̄n hián-chhut chin bêng-pe̍k. Goân-lâi chit-ê lâng chiū-sı̄ hit-ê khó-lı̂n ê chheng-liân Pek-jím!
I tùi be̍k-kiù liáu-āu chiām-sı̂ toà tı̄ Hoâ i-seng ê pı̄ⁿ-ı̄ⁿ. Hoâ i-seng, i-seng niû ū khó͘-khǹg i kú-tn̂g toà tı̄ in ê pı̄ⁿ-ı̄ⁿ kàu sin-thé oân-choân hoê-ho̍k. Khiok sin-thé ū khah hó, chóng-sı̄ ba̍k-chiu soà sit-bêng khı̀. Pek-jím tı̄ chit-ê sı̂ chiū thau-cháu chhut Hoâ i-ı̄ⁿ. I kàu Tâi-lâm lâi jı̍p tı̄ Bông-a ha̍k-hāu, chóng-sı̄ bô-kú sı̂-kio̍k ê iân-kò͘ ha̍k-hāu chiū so͘-soàⁿ lâi hun-lı̄.
Pek-jím tùi án-ni chiū khai-sí tı̄ lō͘-piⁿ kiû-khit-ê seng-oa̍h. I ê iūⁿ-siùⁿ í-keng hui-siông ê soe-pāi lah, koh tong-sı̂ ê seng-oa̍h chin khùn-lân, tı̀-kàu i oân-choân chiâⁿ-chò chı̍t-ê lō͘-piⁿ khit-chia̍h. I lóng lı̄-ēng hông-khong-hô lâi chò i chiām-sı̂ ê ke, piàn-kiâⁿ Tâi-lâm chhı̄-lāi lâi kiû-khit chhoē-chia̍h.
Hit chá-khí tú-tio̍h ı̀-goā ê chai-lān ê sı̂, i tú-tú sı̄ tı̄ chhia-thâu teh kiû-khit. Khong-sı̍p kéng-pò siau-sit chhut-lâi ê sı̂, i chiū toè jı̂n-kûn siám-bih tı̄ chhia-chām āu-bı̄n ê khang-toē. Kàu tı̄ khong-sı̍p liáu-āu chhı̄-lāi hoat-seng toā-hoé ê sı̂ lâng-lâng lóng cháu-soàⁿ lah.
Chí-ū Pek-jím chı̍t-lâng bih tı̄ hit só͘-chāi lâi thàm-thiaⁿ chêng-hêng. Keng-koè chı̍t-chām ê hán-hoah nāu-tōng, kàu tı̄ hit chı̍t mê, tı̄ chit-ê só͘-chāi chha-put-to lóng bô ū lâng teh kiâⁿ iā bô ū sím-mı̍h tōng-chēng ê sı̂ Pek-jím chiū kám-kak hui-siông ko͘-to̍k pé-pak. Kàu poàⁿ-mı̂ i lóng bô hioh-khùn, i chhin-chhiūⁿ jím-siū boē-tiâu i ê ko͘-toaⁿ, kap kiaⁿ-hiâⁿ, chiū siūⁿ ài beh cháu-jı̍p chhı̄-lāi, khoàⁿ tı̄ hia ū sím-mı̍h thang an-ùi i ê sim á-bô? Khiok kui-tiâu ke-lō͘ lóng bô ū lâng, nā ū, iā sûi-sı̂ koh bô-khı̀. I kiâⁿ tùi Tāi-chèng lō͘ lo̍h lâi, kàu Tāi-chèng kiô ê sı̂, lō͘ í-keng chin pháiⁿ kiâⁿ lah. Siang-piⁿ ê lâu lóng tó-lo̍h tı̄ lō͘-chiūⁿ lâi thūn-ba̍t lō͘-chām, ū só͘-chāi ū chin-iām ê hoé teh to̍h. I chiū sió-sim lâi poâⁿ-koè hiah-ê that-gāi hoâiⁿ-tó ê mı̍h. I ê chhiú í-keng lâu-huih lah, kha iā siū-sio, poa̍h-tó chiū koh peh khí-lâi ná-kiâⁿ ná bô lō͘, tı̄ hit-ê hoé-hun, loān-cha̍p ê lō͘-chiūⁿ tńg-tńg se̍h-se̍h teh chı̀n-hêng boē-chhut. I ê sim tı̄ chı̍t ê chhám-tām, hong-hoé ê khoân-kéng, it-hoat kám-kak chhiⁿ-chhı̀n pi-chhám. Lō͘ sui-jiân gûi-hiám khùn-lân, i lóng bô iàu-kín hit-ê, tı̄ i ê sim-lāi ū chin-toā ê kiaⁿ-hiâⁿ kap ko͘-toaⁿ, chhin-chhiūⁿ o͘-hûn tı̍t-tı̍t chhèng-chhut lâi pau-ba̍t i ê it-chhè. I iā kám-kak i ê sim oân-choân khang-hi, bô ū chı̍t-sut-á le̍k-liōng hō͘ i thang tí-khòng chit-ê kiaⁿ-hiâⁿ. I ê bı̄n-iông lóng in-ūi án-ni oai-chhoa̍h khı̀ lah, tı̄ i ê hia̍h-téng ū chin-toā khó͘-náu, hoân-hūn ê sek hián-chhut. I ê bı̄n ū tāng-koāⁿ teh sûi-lo̍h. I ê sin-khu phı̄-phı̄ chhoah. I ná kiâⁿ ná pê lâi teh chhoē chhut-lō͘.
Hut-jiân i kám-kak tio̍h ū lâng tó tı̄ i ê kha-piⁿ, chiū khut-sin beh khan i khí-lâi.
“Sím-mı̍h lâng tó tı̄ chia, kín khí-lâi!”
I lám hit-ê lâng khí-lâi ê sı̂, chai-iáⁿ hit-ê í-keng sí-khı̀ lah. I ê sim in-ūi tio̍h-kiaⁿ lâi “chhiak” chı̍t-ē, chiū kín-kín chiong hit-ê sí-lâng pàng-lo̍h-khı̀, lâi thè cháu āu-bı̄n. I ê chhiú ū moá-moá ê huih bak-tio̍h. I ka-léng-sún chı̍t-ē, sûi-sı̂ tı̄ i ê saⁿ-khò͘ lâi chhit-khı̀ chhiú ê huih. Chóng-sı̄ hoat-kak i ê saⁿ iā lóng ū bak-tio̍h huih.
I toā-kiaⁿ lâi ngia̍uh-ngia̍uh chhoah, kín-kín phoe-miā, pê-cháu hit-ê só͘-chāi.
“Khó-phàⁿ ê sí!” I tı̄ sim-lāi án-ni liām lâi tı̍t-tı̍t pê cháu khui khı̀. I ê bı̄n chhiⁿ sún-sún, in-ūi kiaⁿ sim-thâu pho̍k-pho̍k chhéng. I lóng bô koán ū sím-mı̍h gûi-hiám tı̄ i ê bı̄n-chêng lâi ū-sı̂ ēng kha-chhiú pê, ū-sı̂ peh khí-lâi cháu.
“Khó-phàⁿ ê sí!” I liân-liân tı̄ chhùi-lāi án-ni liām. I kám-kak i ê sim-chı̀ í-keng chin loán-jio̍k bô-pí lah. I koè-khı̀ ê chō-gū kap i chhám-tām ê hiān-sı̍t hō͘ i ê sim sit-lo̍h lóng-chóng ê chı̀-la̍t. I kám-kak hiān-chāi chí-ū ko͘-toaⁿ ê pi-ai kap kiaⁿ-hiâⁿ choè chú lâi chiàm-moá i khang-hi soe-pāi ê sim.
“Goá sı̄ choè chhiⁿ-chhám ê lâng! Koè-khı̀ hit-ê iá-bōng, hùn-tò͘ ê Pek-jím tı̄ tá-lo̍h?!”
I lâu ba̍k-sái lâi án-ni liām. I ê kiaⁿ-hiâⁿ hō͘ i toā iô-chhoah, chiū lām-sám cháu. Ū hoâiⁿ-tó ê mı̍h-kiāⁿ lâi ke̍h i ê kha hō͘ i koh siak-tó, i peh khí-lâi chiū koh cháu. I chhim-chhim ǹg-bāng ū sím-mı̍h lâng thang keng-koè chit-ê só͘-chāi. Khiok hn̄g-hn̄g ū-sı̂ ū thiaⁿ-kı̀ⁿ kun-chhia teh cháu í-goā, it-tài lóng sı̄ chhiong-moá im-tı̂m ê léng-chēng. I ǹg-bāng choè chió ū thiaⁿ-kı̀ⁿ lâng ê siaⁿ iā hó, khiok lóng sı̄ tı̄ chin hn̄g, hán-hán thiaⁿ-kı̀ⁿ, sûi-sı̂ chiū koh thiam-chēng.
Koh chı̍t-pái siak-tó ê sı̂, i soà lóng bô khùi-la̍t thang peh khí-lâi, i kha-chhiú lóng bô la̍t lah. I ê sin-khu ngia̍uh-ngia̍uh chhoah. Chóng-sı̄ i kám-kak ū sím-mı̍h koh-iūⁿ ê mı̍h tı̄ i ê sin-khu-ē???
“Sí-lâng! Sí-lâng!” Pek-jím hut-jiân toā-siaⁿ jióng lâi peh khí-lâi cháu.
“Sí-lâng! Sí-lâng!” I jia̍t-kông ê siaⁿ hiáng-chiūⁿ hit-ê hun-sio chhiⁿ-chhı̀n ê thiⁿ-khong tiong khı̀.
“Sím-mı̍h sı̄ sí!” I kám-kak ū sí ê kiaⁿ-hiâⁿ, chhin-chhiūⁿ ok-mô͘ ê sè-le̍k pek-oá lâi beh thun-bia̍t i. I ê kiaⁿ-hiâⁿ í-keng kàu tı̄ choa̍t-tiám lah.
“Sí ah, sím-mı̍h sū kà-tı̍t lí ê thun-bia̍t!? Lóng-sı̄ pi-chhám! Sè-kan lâng ê hēng-hok tı̄ tá-lo̍h! Ū sím-mı̍h khoài-lo̍k, kiám m̄-sı̄ lóng hō͘ sí chhiúⁿ-toa̍t khı̀ mah!”
“Sí, lí sı̄ jı̂n-lūi ê tāi-te̍k, lí lâi pāi-hoāi it-chhè ê lô-khó͘ tio̍h boâ, lí lâi hō͘ bān-sū lóng koh kui tı̄ khang-hi. Sè-kan lâng tı̄ lí ê ē-bı̄n ū sím-mı̍h chûn-chāi ê kà-tı̍t.”
“Choè chân-jím ê tùi-te̍k, sí ah, lí hō͘ lâng ê sim tian-tò, bê-sit.”
Pek-jím lám-oá i ê sim lâi cháu-jı̍p Tāi-chèng kong-hn̂g khı̀. I ū pōng-tio̍h chı̍t-châng toā-chhiū, chiū chiong i bô-la̍t ê sin-thé lâi the-oá tı̄ hit-ê chhiū-sin. I lám hit-ê chhiū-sin lâi kūi-lo̍h tı̄ hit-ê chhiū-thâu.
“Ko͘-to̍k, lí hō͘ goá kiaⁿ-hiâⁿ! Te̍k-piat goá chai goá ê put-hēng chhám-chheh ê sı̂ goá beh án-choáⁿ lâi jím-siū goá ê ko͘-to̍k!” Pek-jím ê sı̂n-hûn chhin-chhiūⁿ beh siau-soàⁿ khı̀ ê khoán-sit, i ê sin-khu kap bı̄n lóng ân-ân pek-oá tı̄ hit-ê chhiū, i ê ba̍k-chiu ū ba̍k-sái teh lâu.
“Sím-mı̍h sı̄ sí?” I ê chhùi án-ni kè-sio̍k liām. Ba̍k-sái chhin-chhiūⁿ khoe-chúi tı̍t-tı̍t chhèng-chhut. I pi-chhám ê ba̍k-sái kek-tōng i ê choân sin-khu lóng tín-tāng.
“Lâng ah, lí ê kong-kéng sı̄ hô-téng ê put-hēng choa̍t-bāng, pi-chhám!!”
Pek-jím khai-sí khàu chhut-siaⁿ khí-lâi.
“Sím-mı̍h sı̄ sí!” I koh tı̄ chhùi-lāi án-ni kóng.
“Choē-ok ê kang-chı̂ⁿ chiū-sı̄ sí!” Hut-jiân 3 nı̂ chêng Hoâ sian-siⁿ niû tùi i kóng ê oē ho̍k-oa̍h tı̄ i ê hı̄-khang piⁿ.
Pek-jím chhin-chhiūⁿ hō͘ tiān tiān-tio̍h chı̍t-poaⁿ sin-khu bı̄n-māu lóng ngē-tı̍t-khı̀, i bô khoàⁿ-kı̀ⁿ ê ba̍k-chiu thí chin toā-lúi, chhùi iā toā-khui, tú-tú sı̄ lâng hoat-kak tio̍h sím-mı̍h pó-poè chı̍t-iūⁿ.
“Choē-ok ê kang-chı̂ⁿ chiū-sı̄ sí!” I tı̄ chhùi-lāi án-ni liām. “Choē-ok ê kang-chı̂ⁿ chiū-sı̄ sí!” I toā-siaⁿ lâi jiáng chhut-lâi. Hit-ê kı̂-koài ê siaⁿ-im ū hiáng-èng tı̄ chit-ê chhám-tām to͘-chhı̄ ê khong-tiong khí-khı̀.
“Choē-ok ê kang-chı̂ⁿ chiū-sı̄ sí!”
Hiah-ê kong-hn̂g lāi ê chhiū-ba̍k lóng chhut-siaⁿ teh tùi i jiáng chit kù oē, it-chhè ê hiān-siōng lóng saⁿ kiò-ı̀n lâi teh chhut-siaⁿ ê khoán.
Pek-jím kín-kín ēng siang-chhiú lâi am-ba̍t i ê hı̄-khang, i ê bı̄n chhin-chhiūⁿ gín-ná beh háu, háu boē chhut-lâi ê bı̄n, tı̄ ke̍k-kı̂ khùn-lân thòng-khó͘ ê sı̂ só͘ hoat-chhut ê piáu-chêng. I chiū phak-tó tı̄ hit-ê thô͘-téng.
“Lâng chí-ū ū chı̍t-ê tông-it ê miā-ūn, hit-ê miā-ūn kiò-chò sí! Tı̄ hit-ê sí ê lāi-bı̄n bô ū sím-mı̍h hēng-hok á-sı̄ put-hēng, sūn-kéng á-sı̄ ge̍k-kéng, lóng sı̄ pı̂ⁿ-pı̂ⁿ siū thun-bia̍t, kàu tı̄ lóng bô ū sím-mı̍h chha-piat!”
Hoâ i-seng niû ê oē chı̍t-kù chı̍t-kù koh hián-chhut tı̄ i ê sim-lāi, i thâu gia̍h khí-lâi, chhin-chhiūⁿ lâng teh thiaⁿ sím-mı̍h oē ê khoán.
“Lán lâng lóng sı̄ chı̍t-ê choa̍t-bāng bô chín-kiù ê choē-jı̂n. Choē-ok pāi-hoāi chit-ê sè-kan í-lâi, lâng bô ū chin-sı̍t ê pêng-an, bô ū oa̍h-miā ê ǹg-bāng, bô ū chin-lí ê lō͘. Goân-lâi ê lo̍k-hn̂g hiān-sı̂ sı̄ chiâⁿ-chò pāi-hoāi, sí-hia̍t ê sè-kài!” I chhin-chhiūⁿ tùi chiah-ê oē lâi tit-tio̍h chin-toā ê kái-tap chı̍t-iūⁿ.
“Siōng-tè chin su-iàu lí, I te̍k-piat koan-sim tı̄ lí, in-ūi lí sı̄ chı̍t-ê ge̍k-kéng, siū-khó͘ ê lâng, lí èng-kai tio̍h jı̄n-bat hit-ê koan-sim lí ê Siōng-tè!”
“Siōng-tè ê chhiú put-sı̂ tio̍h chhun tn̂g-tn̂g teh tán-hāu lán, kóng ū-choē ê lâng ah, tńg-lâi o͘h. Chí-ū lán nā hoaⁿ-hí chhun lán ê chhiú lâi chiap-la̍p I ê chhiú, lán chiū ū oa̍h-miā ê ǹg-bāng.”
“Lâng tio̍h khoàⁿ bô it-chhè lâi tui-kiû Iâ-so͘ kap só͘ èng-ún ê kok, chiū-sı̄ chin-sı̍t pêng-an, khoài-lo̍k ê kok. In-ūi tı̄ hit-ê kok chí-ū thiàⁿ sı̄ in ê tiong-sim.”
“Tû-khı̀ chit-ê sū, tı̄ sè-kan lâng, lóng tio̍h pı̂ⁿ-pı̂ⁿ hióng-siū choē-ok ê koé-chí, chiū-sı̄ choa̍t-bāng, thòng-khó͘, sí-sit!”
“Só͘ thiàⁿ ê hiaⁿ-tı̄ ah, lí tio̍h sı̀n Iâ-so͘ kap i ê chín-kiù! In-ūi lí te̍k-piat su-iàu kiù-un, Siōng-tè iā te̍k-piat su-iàu lí, lí tio̍h chiap-siū Iâ-so͘ chò lí ê Kiù-chú lâi kái-piàn lí it-chhè ê sim-su liām-thâu.”
Hoâ i-seng niû ê bı̄n iā hián-chhut tı̄ i ê ba̍k-chêng, siang-chhiú khui-khui, ēng khún-chhiat ê siaⁿ lâi koh teh khó͘-khǹg i tio̍h sı̀n Iâ-so͘.
Pek-jím ê bı̄n phak-lo̍h tı̄ toē-bı̄n lâi pàng-siaⁿ toā-khàu.
