9 Tùi Thiⁿ-téng Lâi Ê Siaⁿ-im
Tùi Pak-tâu, Tām-chúi choán-se̍h kàu Tang-pō͘ iok-lio̍k ū nn̄g-ge̍h-jı̍t kú, kàu tı̄ la̍k-ge̍h chhe, hē-thiⁿ pek-kı̄n, lâng-lâng lóng lō͘-chhut pe̍h-sek ê kán-i chhiú gia̍h jı̍t-soàⁿ ê sı̂, hit-ê lâu-téng bô-liâu ê hū-jı̂n-lâng, ū chı̍t-jı̍t hut-jiân koh khoàⁿ-kı̀ⁿ Pek-jím kap A-hoa koh chhut-hiān tı̄ Ki-lûn, goân-lâi hit-ê teng-kha teh chò-kang.
A-hoa ū piàn chin hó-khoàⁿ, chin kó͘-chui ê la̍k-hoè gín-ná lah. I ê bı̄n, ba̍k-chiu lóng ū hí-lo̍k ê kng-chhái hoat-chhut. I ê sin-thé iā hián-bêng iu-siù ê hoat-io̍k. I ū chhēng chı̍t-niá le̍k-sek bô chhiú-ńg ê kán-i. Ou-kim-kim ê thâu-mn̂g chin-tn̂g, soê kàu tı̄ keng-thâu. Nā-sı̄ Pek-jím iā ū chin-toā ê piàn-oāⁿ lah. Kú-kú só͘ tı̂ⁿ-tiâu tı̄ i ê sin-chiūⁿ hit-ê ko͘-toaⁿ, iu-chhiû ê iáⁿ, taⁿ lóng bô khı̀ lah. I choân-sin lóng sı̄ pe̍h-sek. Chháu-bō-á, hun-saⁿ, ē-ho̍k, oê lóng hō͘ lâng oē kám-kak tó-kok hē-thiⁿ ê hong-chêng. I ê bı̄n ū ǹg-bāng kap hoaⁿ-hí chin-toā.
Ū khoàⁿ-kı̀ⁿ in ê lâng ê sim beh chit-ê sio-siâng ê ı̀n-siōng, chiū-sı̄, “Hēng-hok, khoài-lo̍k ê pē-kiáⁿ!”
Pek-jím kiat-kio̍k ū chhoā A-hoa koh tńg-lâi Ki-lûn, in chá só͘-toà ê só͘-chāi. Tı̄ Pek-jím ê sim-lāi hit-ê put-an iā chiām-chiām siau-bô khı̀ lah. In kè-sio̍k tı̄ hit-ê toē-tiám chò-kang.
Ū chı̍t-jı̍t in chò-kang liáu, tı̄ ke-lō͘ teh kiâⁿ-iû ê sı̂, ū tú-tio̍h chı̍t-tâi Ki-tok-kàu pò͘-tō-hoē ê soan-thoân chhia. Hit tiuⁿ chhia ê kóng-seng-ki bô-sı̂-thêng teh chio-ho͘ chhı̄-bı̂n tio̍h khı̀ hù pò͘-tō-hoē. Pek-jím chiū thêng-kha lâi beh thiaⁿ hit-ê siông-sè.
“Chhin-ài ê kok-ūi hiaⁿ-ché, goán sı̄ pún-chhı̄ × × Ki-tok kàu-hoē pò͘-tō-hoē ê soan-thoân-tūi, ài beh hiòng kok-ūi pò chı̍t ê hó siau-sit. Chiū-sı̄ tùi kim-mı̂ peh tiám khí ū Bí-kok chhut-miâ ê pò͘-tō-ka × × bo̍k-su beh tı̄ pún kàu-hoē pò͘-tō saⁿ-mı̂. Chhiáⁿ kok-ūi m̄-thang sit-lo̍h chit-ê hó ê ki-hoē lâi khı̀ chham-ka. Iâ-so͘ kóng, kı̀ⁿ-nā lô-khó͘ tio̍h-boâ poē tāng-tàⁿ ê tio̍h lâi chiū-kūn goá, goá beh hō͘ lí tit-tio̍h an-hioh. Koh kóng, Goá sı̄ lō͘, sı̄ chin-lí, sı̄ oa̍h-miā, só͘-í kı̀ⁿ-nā sim-lāi bô pêng-an ê lâng, chhoē bô oa̍h-miā kap chin-lí ê lâng, chhiáⁿ lín lóng tio̍h lâi thiaⁿ, Iâ-so͘ beh hō͘ lín pêng-an, oa̍h-miā, chin-lí.” Soan-thoân chhia chiām-chiām hn̄g-khı̀, i ê siaⁿ iā bô thiaⁿ-kı̀ⁿ lah.
Hiah-ê oē khak-sı̍t lia̍h-tio̍h Pek-jím ê sim.
“Lı̄-lı̄, lán kim-mê-hng lâi khı̀ thiaⁿ tō-lí, lí ū ài khı̀ bô?” I ná liām ê khoán lâi mn̄g án-ni. “Pa-pa, goá chin ài!” Nā-sı̄ A-hoa toā hoaⁿ-hí.
Chia̍h àm-tǹg liáu-āu, pún-lâi in saⁿ-chhoā beh khı̀ lé-pài-tn̂g, chóng-sı̄ tı̄ poàⁿ-lō͘ Pek-jím hut-jiân koh choán hong-hiòng, chhoā A-hoa koh tńg-lâi lú-koán. A-hoa ê sim ū tām-po̍h kı̂-koài.
Chóng-sı̄ kàu tı̄ pâng-keng Pek-jím ū kā A-hoa soé kha-chhiú, soà oāⁿ-saⁿ, hit-sı̂ A-hoa ê hoaⁿ-hí koh tò-tńg lâi. Pek-jím iā jı̍p e̍k-keng, koh soà oāⁿ saⁿ-khò͘, liáu-āu in chiah koh khai-sí chhut-hoat.
Kàu pài-tn̂g ê sı̂ chū-hoē í-keng teh khai-sí lah. Ū chin chòng-giâm ê si-koa tùi lāi-bı̄n teh lâu chhut-lâi, tı̀-kàu hō͘ Pek-jím thiaⁿ-tio̍h ê sı̂ soà m̄-káⁿ jı̍p-khı̀. I thoat i ê bō-á, àⁿ-thâu lâi khiā tı̄ hn̄g-hn̄g ê mn̂g-kháu. Tı̄ i ê sim ū chin-choē kóng boē chhut-lâi ê toā-khùi.
Chóng-sı̄ sûi-sı̂ ū àn-lāi ê lâng chhut-lâi kàu in ê bı̄n-chêng beh chhoā in jı̍p lāi-bı̄n khı̀.
“Goán tiàm chia tio̍h hó!” Pek-jím kheh-khı̀ khiok hit-ūi sı̀n-tô͘ ū jia̍t-khún lâi chhiáⁿ in tio̍h jı̍p-khı̀. Pek-jím toè i ta̍h-jı̍p pài-tn̂g-lāi ê sı̂ gı̂m-si ê siaⁿ it-hoat hiáng-liāng lâi pau-ûi in. I kám-kak sı̄ jı̍p tı̄ thian-kài ê kéng-lāi. A-hoa ū khı̂ⁿ-oá tı̄ Pek-jím, lâi chı̀n-chêng kàu tı̄ thâu-chêng-bı̄n ê ūi khı̀. Hiah-ê gı̂m-si ê siaⁿ-im chhin-chhiūⁿ hái-éng, hoa-hoa háu. I kiong-kiong kèng-kèng kàu tı̄ lâi khiā tı̄ chèng-lâng ê tiong-kan, tú-tú chhin-chhiūⁿ khiā tı̄ pó-chō kap chèng thiⁿ-sài, sèng-tô͘ ê bı̄n-chêng chı̍t-iūⁿ.
I lóng m̄-káⁿ tín-tāng, chhiú iā m̄-káⁿ bong tio̍h í. In-ūi i kám-kak lāi-bı̄n ê it-chhè lóng sı̄ sèng-kiat, chun-kùi.
Gı̂m-si liáu bo̍k-su ū kóng beh saⁿ-kap kı̂-tó, Pek-jím thiaⁿ-tio̍h chit-kù oē, siūⁿ kóng i tio̍h kūi lo̍h-khı̀, i beh kūi lo̍h-khı̀ ê sı̂ piⁿ-thâu ê chı̍t-ūi hiaⁿ-tı̄ ū tùi i kóng m̄-bián án-ni choè. Tı̄ kı̂-tó ê tiong-kan i kám-kak chin ngông-gniah, chin bô chū-jiân. Kı̂-tó liáu, chē hó-sè ê sı̂, kè-sio̍k ū tha̍k Sèng-keng Iok-hān saⁿ-chiuⁿ cha̍p-la̍k chat. Liáu-āu ū gı̂m-si-pan ê hiàn-si, ū koh kı̂-tó, jiân-āu chiū ū chı̍t-ūi lēng-goā ê bo̍k-su khí-lâi khai-sí káng-tō.
A-hoa tı̍t-tı̍t khı̂ⁿ tı̄ Pek-jím ê sin-khu, m̄-káⁿ pàng-lı̄ i. I ê ba̍k-chiu chù-sı̂n khoàⁿ tâi-téng ê lâng, āu-lâi chiah khoàⁿ sı̀-ûi ê chèng-lâng koh chiām-chiām soá-ba̍k lâi khoàⁿ hiah-ê teh cháu-chông ê hū-chek-jı̂n. Nā-sı̄ Pek-jím, chí-ū àⁿ-thâu lâi tùi siaⁿ-im teh chhat-giām lāi-bı̄n ê chōng-hóng.
Bo̍k-su khui-siaⁿ káng-tō ê sı̂, lâng-lâng ê sim lóng chù-sı̂n tı̄ i ê oē. I chho͘-toā ê siaⁿ-im chin-bêng, kù-kù lóng jı̍p tı̄ Pek-jím ê sim.
“In-ūi Siōng-tè chiong to̍k-siⁿ ê Kiáⁿ siúⁿ-sù sè-kan, hō͘ kı̀ⁿ-nā sı̀n I ê lâng boē tı̂m-lûn, oē tit-tio̍h éng-oa̍h; I thiàⁿ sè-kan kàu án-ni.”
“Goá beh tāi-seng tùi chit-chat ê lāi-bı̄n ê oē ‘Siōng-tè’ lâi soat-bêng.”
“Siōng-tè chiū-sı̄ chhòng-chō ê chú-cháiⁿ. Sè-kan ê bān-mı̍h lóng sı̄ tùi I lâi chō-chiâⁿ ê. I sı̄ choân ú-tiū ê ı̂-it chú-lâng, bān-mı̍h lóng sı̄ sio̍k tı̄ I ê só͘-iú. I ēng toā koân-lêng ê khùi-la̍t lâi tùi bô chhòng-chō bān-ū, koh tùi I ê tı̀-hūi lâi chò-chiâⁿ lóng-chóng ê tia̍t-sû kui-lu̍t. Siōng-tè chhòng-chō ê kiat-chok chiū-sı̄ ‘lâng’. Lâng sı̄ chiàu Siōng-tè ê siōng lâi chhòng-chō ê. In-ūi chhòng-chō lóng-chóng ê bo̍k-tek sı̄ tı̄ lâng, chhòng-chō ê tiong-sim sı̄ tı̄ lâng. In-ūi lâng sı̄ beh lâi tāi-piáu Siōng-tè, sı̄ beh lâi êng-iāu Siōng-tè. Siōng-tè chiong bān-mı̍h sù hō͘ lâng, ūi-tio̍h lâng Siōng-tè chhòng-chō bān-mı̍h. In-ūi Siōng-tè ài lâng kap I kau-poê, kèng-pài I, o-ló I, kám-siā I, êng-iāu I. Tı̄ bān-mı̍h ê tiong-kan bô ū pa̍t ê pı̄-chō-mı̍h kap lâng sio-siâng, ū Siōng-tè lóng-chóng ê tek-sèng kap ū chı̍t-chióng tùi Siōng-tè ê hêng-thong. Tû-khı̀ lâng bô pa̍t-mı̍h oē-hiáu o-ló, kèng-pài, kám-siā.”
“Lâng ê lí-tı̀, tō-tek-sèng, gē-su̍t-sèng lóng sı̄ tùi Siōng-tè ê hêng-siōng só͘ sêng-chiap lâi ê....”
“Koè-khı̀ beh kóng ‘sè-kan’”
“Chit-ê sè-kan goân-lâi sı̄ chı̍t ê lo̍k-hn̂g. Tı̄ chit-ê sè-kan ta̍k-hāng lóng sı̄ chin bí-moá, khoài-lo̍k. Ū ún-chông Siōng-tè ê toā koân-lêng kap bān pù-ū. Lâng-lâng lóng oē thang tı̄ chit-ê sè-kan lâi hióng-siū Siōng-tè chhòng-chō ê bí-biāu. Khiok choē-ok chı̀n-jı̍p sè-kan í-lâi, chit-ê khoài-lo̍k, pêng-an ê lo̍k-hn̂g soà chiâⁿ-choè o͘-àm, thòng-khó͘ ê toē-ga̍k, Chhú-chhú ū pāi-hoāi, sí-hiat ê siong-jiah. Tı̄ chit sè-kan bô koh ū oa̍h-miā ê ǹg-bāng, iā bô ū chin-lí ê kng, sı̄ in-ūi chit-ê sè-kan tùi poē-ge̍k Siōng-tè liáu-āu chiū lı̄-khui Siōng-tè ê koán-kài lah. Sè-kan bô-khı̀ Siōng-tè, chiū ka-kı̄ chò-sêng i ê siōng-tè, lia̍h bān-mı̍h chò i ê siōng-tè, lâi ke-thiⁿ i ê choē-ok kap gû-gōng.
Bô-khı̀ Siōng-tè liáu, chit-ê sè-kan lóng chhiong-moá put-hēng kap pi-chhám. Tı̄ chit-ê choē-ok pāi-hoāi ê sè-kan só͘ ū ê miā-ūn, chiū-sı̄ sí-hiat nā-tiāⁿ.”
“Goá beh koh kóng ‘Lâng’.”
“Lâng sı̄ Siōng-tè chhòng-chō bān-mı̍h ê tiong-sim bo̍k-tek. Lâng ū toà tio̍h Siōng-tè êng-iāu ê siōng. Só͘-í lâng ū te̍k-piat ê chek-jı̄m.
Lâng tio̍h kèng-pài, o-ló, êng-kng Siōng-tè.
In-ūi Siōng-tè chhòng-chō lâng sı̄ beh tāi-piáu I. Koh Siōng-tè ài lâng kap I tâng-sim, chhin-chhiūⁿ I ê khoán-sit, soà ho̍k-chiông I.
Khiok lâng chiong Siōng-tè chiah-ê un-sù, lâi piàn-oāⁿ choè ka-kı̄ ê êng-iāu, soà poē-poān Siōng-tè ê ı̀-sù. Lâng chhin-chhiūⁿ iûⁿ kiâⁿ bê-lō͘, ta̍k-lâng kiâⁿ ka-kı̄ ê phian-lō͘, kı̀-jiân sòng-sit liông-sim, chiū hòng-chhiòng su-io̍k tı̄ ta̍k-iūⁿ ê pháiⁿ-tāi, seng-seng sı̄ ka-kı̄ chhú sún-phoàⁿ tı̄ bia̍t-bông ê só͘-chāi.”
“Choē-jı̂n, che sı̄ lâng tùi tūi-lo̍h liáu-āu ê lēng-goā chı̍t-ê bêng-chheng.
Siōng-tè bô tēng pa̍t ê pı̄-chhòng-chō mı̍h ê choē, in-ūi in m̄-bat poē-poān, iā bô ū toà-tio̍h Siōng-tè te̍k-piat ê sú-bēng.
Chí-ū lâng sı̄ choē-jı̂n, in-ūi lâng ū phoà-hāi Siōng-tè lóng-chóng ê kè-e̍k, ū pāi-hoāi chit-ê lo̍k-hn̂g. Choē-ok ê kang-chı̂ⁿ chiū-sı̄ sí. Lâng ê kiat-kio̍k chiū sı̄ bia̍t-bông, sí-sit. (Chham-khó Lô-má jı̂n-su, 1 chiuⁿ kàu 3 chiuⁿ.)”
“Lâng tı̄ chit-ê sí ê miā-ūn ê ē-bı̄n chhoē bô oa̍h-miā, chin-lí, lâi put-an, choa̍t-bāng.”
“Goá beh koh lâi kóng ‘to̍k-siⁿ Kiáⁿ’.”
“Sui-jiân Siōng-tè chhòng-chō ê tāi-kè ū tú-tio̍h chia̍t-chı̍h, I ê chí-ı̀ ū siū poē-poān, lâng kap sè-kài ū ka-kı̄ chhú bia̍t-bông, pāi-hoāi ê lō͘, khiok Siōng-tè m̄-kam I ê só͘ thiàⁿ ê lâng tı̂m-lûn, á-sı̄ I só͘ chhòng-chō ê sè-kan lâi bia̍t-bông.”
I iáu ǹg-bāng ū sím-mı̍h pān-hoat thang bán-hoê, thang kiù-sio̍k, hō͘ I ê chhòng-chō m̄-bián tú-tio̍h lêng-jio̍k, phoà-hāi. Só͘-í I ū chiong sim-hoâi tiong ê to̍k-siⁿ Kiáⁿ chhe-khián kàu sè-kan, lâi khui chit tiâu kiù-sio̍k ê lō͘. Chiū-sı̄ hō͘ kı̀ⁿ-nā sı̀n I ê lâng, oē-thang thoat-lı̄ chit-ê bia̍t-bông lâi koh sêng-chiap éng-oa̍h ê kok. Ūi-tio̍h án-ni to̍k-siⁿ Kiáⁿ Iâ-so͘ ū ǹg ta̍k-lâng teh âu-kiò, lín tio̍h hoán-hoé tò-tńg lâi kui-ǹg Siōng-tè. Siōng-tè tı̄ I ê kok ū koh siat-hoat, kiàn-tı̀ chı̍t ê kok-tō͘ beh hō͘ kı̀ⁿ-nā sı̀n Kiáⁿ ê lâng thang tı̄ hia kè-sio̍k hióng-siū chhòng-chō ê khoài-lo̍k, lâi oân-sêng chhòng-chō ê tāi-kè. Chí-ū sı̀n Kiáⁿ ê lâng oē-thang thoat-lı̄ chit sè-tāi ê bia̍t-bông lâi jı̍p hit-ê só͘-chāi. Beh jı̍p hit-ê sin kok-tō͘ ê hoat-tō͘ chin kán-tan, chiū-sı̄ sı̀n to̍k-siⁿ Kiáⁿ kap I só͘ kóng lóng-chóng ê oē, só͘ kiàn-chèng lóng-chóng ê sū, só͘ èng-ún lóng-chóng ê tāi-chı̀. Siōng-tè bô beh koh tùi lâng iau-kiû sím-mı̍h tek-hēng, á-sı̄ ū sím-mı̍h kui-lu̍t, chí-ū nā sı̀n I, chiū pe̍h-pe̍h thang tit-tio̍h hun-piat, kap kiù-sio̍k ê un-tián. Chit-ê sı̀n iā sı̄ lí hiān-chāi sûi-sı̂ oē-thang tı̄ lí ê sim-lāi lâi koat-tēng ê....”
“Koh lâi goá beh kóng, ‘I thiàⁿ sè-kan kàu án-ni’.”
“Siōng-tè éng-oán ê chí-ı̀ tı̄ chit ê sè-kan ū sit-pāi, khiok tı̄ hit-ê sin-thiⁿ sin-toē beh tit-tio̍h ta̍t-sêng. Kiù-sio̍k ê lâng beh tı̄ hia, in-ūi hióng-siū ê khoài-lo̍k lâi toā chheng-chàn to̍k-it chō-hoà ê Chú-cháiⁿ. Hit-ê ông-kok beh kiò-chò thiàⁿ.
In-ūi Siōng-tè sı̄ thiàⁿ, koh chhiat-chhiat su-iàu thiàⁿ ê.... Tùi thiàⁿ, Siōng-tè chhòng-chō bān-mı̍h, tùi thiàⁿ koh chhòng-chō lâng, sı̄ ài lâng tı̄ I ê lāi-bı̄n lâi hióng-siū úi-tāi ê thiàⁿ, koh ài lâng soà chiap-siū chit hō thiàⁿ ê oa̍h-miā. In-ūi chí-ū tı̄ chit-ê thiàⁿ ê lāi-bı̄n chiah ū chin-sı̍t ê hēng-hok kap khoài-lo̍k.”
“Hit-ê thiàⁿ ê ông-kok sı̄ lán sè-kan lâng tio̍h chhiat-chhiat him-bō͘ ê..., in-ūi chit-ê sè-kan í-keng bô ū chin-sı̍t ê oa̍h-miā, moá-moá sı̄ toà tio̍h sí-hiat, pāi-hoāi ê siong-hûn. Tı̄ chia ū put-hēng khó͘-thàng pi-chhám. Siat-sú nā ū thang kiò-choè hēng-hok, hit-ê sı̄ hu-ké koh sı̄ chiām-sı̂, ngó͘-jiân ê nā-tiāⁿ.”
“Sè-kan lâng ah, lín tio̍h ǹg-bāng, tio̍h lâi sı̀n to̍k-siⁿ Kiáⁿ Iâ-so͘!”
“Sı̀n Iâ-so͘ sı̄ beh kàu hit-ê ông-kok ı̂-it ê lō͘.” Bo̍k-su ū kè-sio̍k ēng chin jia̍t-chêng teh kóng, khiok Pek-jím í-keng chin bêng-pe̍k lah. Hiah-ê oē tú-tú sı̄ chı̍t-ki só-sı̂ lâi khui tı̄ i sin-chiūⁿ só͘ tú-tio̍h hiah-ê put-hēng ê kéng-gū.
Hiah-ê oē chhin-chhiūⁿ kńg-lê hong, tı̍t-tı̍t kńg se̍h tı̄ i ê sim-lāi, hō͘ i tı̀-kàu lóng bô koh thiaⁿ-kı̀ⁿ í-āu ê oē. I chhin-chhiūⁿ ka-kı̄ chı̀n-jı̍p tı̄ hit-ê êng-kng ê ông-kok lâi thé-giām tio̍h hit-ê thiàⁿ só͘ ū lóng-chóng kı̂-biāu ê hēng-hok chı̍t-iūⁿ. I ê chhiú ū khan-oá A-hoa tı̄ i ê sin-piⁿ, ū-sı̂ ēng i ê ē-hoâi lâi so-se̍h A-hoa ê thâu-mn̂g. I kám-kak chin boán-chiok, chin hēng-hok. Khiok hut-jiân bo̍k-su ū ēng chin kiông-toā ê siaⁿ, ǹg tùi Pek-jím ê hong-hiòng lâi.
“Sè-kan lâng ah, lín ê hēng-hok, lín ê khoài-lo̍k lóng sı̄ hu-kí, hit-ê sı̄ chiām-sı̂, ngó͘-jiân ê chhò-kak nā-tiāⁿ, lín ê hēng-hok, lín ê khoài-lo̍k tek-khak oē chám-tn̄g. Lín tham-loân chit-ê bia̍t-bông ê sè-kan beh kàu sím-mı̍h sı̂?! Tùi sè-kan toà-tio̍h sí-hiat ê miā-ūn í-lâi, kı̀ⁿ-nā khí-chō hēng-hok ê toē-ki tı̄ i ê téng-bı̄n ê, bô lâng oē thang thoat-lı̄ i ê oa̍h-tauh, chiū-sı̄ choa̍t-bāng, oàn-thàn ê oa̍h-tauh! “Lín ê hēng-hok, lín ê khoài-lo̍k tek-khak oē chám-tn̄g!”
Chiah-ê oē ū chhiok-tōng Pek-jím chin-toā.
I ê bı̄n khai-sí hián-chhut toā iô-tāng kap chhiⁿ-chhı̀n.
“Lín ê hēng-hok, lín ê khoài-lo̍k tek-khak oē chám-tn̄g!” Chit kù oē sı̄ chin-lí, khiok chit-ê chin-lí sı̄ hō͘ Pek-jím só͘ jím-siū boē-tiâu ê, in-ūi i bêng-pe̍k i ê oa̍h-miā oá-khò tı̄ i ê hēng-hok. I chhin-chhiūⁿ koh hām-lo̍h tı̄ o͘-àm sit-bāng ê chhim-khiⁿ lâi iu-būn kat-ba̍k.
Bo̍k-su ū kè-sio̍k teh tui-pek lâng tio̍h hoán-hoé lâi sı̀n Iâ-so͘, koh ū chhiáⁿ hiah-ê hoaⁿ-hí chiap-siū ê lâng kiâⁿ kàu tâi-chêng lâi.
Hoē-tiûⁿ chiū khai-sí nāu-tōng lah. Ū lâng teh kiâⁿ-kàu tâi-chêng, ū Sèng-koa-tūi teh gı̂m-si, ū hiah-ê hū-chek ê hiaⁿ-ché teh pang-chān lâng hó-táⁿ chhut-lâi.
Tâi-téng ê Bo̍k-su lóng kàu tâi-chêng teh kè-sio̍k kiò lâng. Iā ū lâng khai-sí thè-se̍k tńg-khı̀ lah. Pek-jím ê sim-su chin tı̂m-būn, hun-loān. Kàu-boé soà kám-kak gông-ngia̍h se̍h-sı̂n. I chiū toè hiah-ê khí-sin beh thoè-tiûⁿ ê lâng lâi kín-kín lı̄-khui hit-ê só͘-chāi, chhut-lâi goā-bı̄n.
I ê sim kám-kak chin bô pêng-an.
“Pa-pa, lán án-choáⁿ bô kàu tı̄ tâi-chêng khı̀, lán kiám m̄-sı̄ sı̀n Iâ-so͘ ê lâng mah?” Hit chı̍t-mı̂ tńg-lâi tı̄ lú-koán, beh tó-chhn̂g ê sı̂ A-hoa chiah khui-chhùi lâi án-ni mn̄g i.
Pek-jím lóng bô ı̀n-tap sím-mı̍h, chí-ū thêng-chí i ê tōng-chok lâi chē-tiām tı̄ chhn̂g-téng.
“Lı̄-lı̄, chhiáⁿ lí kín-khùn, bı̂n-ná-jı̍t chiah lâi kóng, an-bı̂n!” Pek-jím kóng án-ni lâi beh tô-cháu A-hoa ê chit-mn̄g.
“Goá sı̄ chı̍t-ê éng-oán ê lo̍k-ngó͘-chiá mah?” I phō i ê thâu-khak lâi ka-kı̄ hoán-būn.
Pek-jím kàu chin-àm lóng khùn boē lo̍h-bı̂n. Ū chı̍t-ê ap-pek ê khùi-la̍t tà-oá tı̄ i ê sim. Bo̍k-su ê oē, A-hoa ê bı̄n, í-kı̍p koè-khı̀ lóng-chóng ê chêng-hêng lóng koh khai-sí chiò-iáⁿ tı̄ i ê sim-lāi. Kín-kín lı̄-choa̍t ê áu-náu koh tńg-lâi, hō͘ i thong-mı̂ lóng bô ū pêng-an.
“Pa-pa! Pa-pa!” Hut-jiân tı̄ poàⁿ-mı̂-koè ê sı̂, Pek-jím ū thiaⁿ-tio̍h A-hoa ê siaⁿ teh jióng.
I kín-kín cháu-kàu A-hoa ê chhn̂g-piⁿ khı̀.
“Lı̄-lı̄, goá tı̄-chia, lí án-choáⁿ?” Chóng-sı̄ A-hoa goân-lâi sı̄ teh chò-bāng.
Pek-jím ū khan A-hoa ê chhiú, chiām-sı̂ chē tı̄ i ê chhn̂g. Sim-sı̂n iû-goân kám-kak chin ut-chut, o͘-àm.
Keh chá-khí, in saⁿ-kap chia̍h moê ê sı̂, A-hoa hut-jiân siūⁿ-tio̍h i chā-mı̂ ê bāng.
“Pa-pa, goá chā-mı̂ ū bāng-kı̀ⁿ chı̍t-ê chin kı̂-biāu ê bāng!” Tùi A-hoa ê chhùi só͘ kóng chhut-lâi ê bāng sı̄ chhin-chhiūⁿ ē-bı̄n.
Pek-jím ū chhoā A-hoa chē tı̄ pài-tn̂g ê lāi-bı̄n teh thiaⁿ káng-tō. Ū chin-choē lâng khoeh-moá pài-tn̂g. Liân tâi-téng kap thang-á goā iā sı̄ lóng moá-moá ê jı̂n-kûn. Bo̍k-su káng-tō liáu ū kiò lâng lâi kàu tâi-chêng, khiok lóng bô lâng beh khı̀. Bo̍k-su kap chèng-lâng ê ba̍k-chiu lóng teh chhoē, teh tán-hāu, ū lâng thang chhut-lâi. A-hoa chiū khan Pek-jím ê chhiú kóng, chiah-ê lâng lóng teh tán-hāu lán chhut-khı̀. A-hoa chiū kiông-kiông thoa Pek-jím chhut-lâi. Pài-tn̂g lāi ê chèng-lâng khoàⁿ-tio̍h in nn̄g-lâng chhut-lâi ê sı̂ chiū toā hoaⁿ-hí lâi phah-chhiú. In chiū saⁿ-kap kiâⁿ hit tiâu thàng tâi-chêng ê lō͘ khı̀, jı̂n-kûn lóng ǹg in khui siaⁿ gı̂m-si o-ló, in tı̄ hit-ê tiong-kan chhin-chhiūⁿ khái-soân ê chiong-kun chı̍t-iūⁿ. A-hoa ū khan Pek-jím lâi chı̀n-chêng. Chóng-sı̄ hit tiâu tâi-chêng ê lō͘ ná kiâⁿ ná pı̀ⁿ chin hn̄g. Pài-tn̂g iā lóng pı̀ⁿ chò sı̄ chı̍t-ê toā khong-tiong, hiah-ê jı̂n-kûn lóng sı̄ thiⁿ-sài. Tâi-chêng piàn-choè chı̍t-ê ke̍k-kı̂ êng-kng, chhàn-lān ê pó-chō. Ū chheng-chheng bān-bān ê thiⁿ-sài teh hoan-ho͘, o-ló.
A-hoa chiū toā hoaⁿ-hí lâi khan Pek-jím poàⁿ-kiâⁿ, poàⁿ-poe lâi tı̍t-tı̍t ǹg hit-ê pó-chō chı̀n-chêng. Tı̄ pó-chō chêng ū chı̍t-ê toā chúi-tı̂.
Bo̍k-su ū kiò Pek-jím tio̍h thǹg-saⁿ lo̍h tı̄ chúi-tı̂ lāi, khiok Pek-jím lóng chin tiû-tû, A-hoa ū pang-chān i thǹg-saⁿ, āu-lâi chhoā i lo̍h hit-ê chheⁿ-le̍k-le̍k ê chúi-lāi. Pek-jím tùi chúi-lāi khí-lâi ê sı̂, thiⁿ-sài thian-kun ê siaⁿ ná-toā, chhin-chhiūⁿ hái-éng háng-hoah lóng bô soah.
Ū thiⁿ-sài ēng chı̍t-niá pe̍h-saⁿ the̍h-kàu Pek-jím ê bı̄n-chêng. A-hoa ū pang-chān i chhēng.
Hiah-ê thiⁿ-sài koh teh khai-sí gı̂m-si, hit tè sı̄ ta̍k-lâng lóng chin-se̍k ê, chiū-sı̄ “Siū-siong ê iûⁿ-ko.”
Āu-lâi thiⁿ-sài chin bô-êng lâi teh chún-pı̄ iân-siah. A-hoa ū khan-tiâu Pek-jím ê chhiú.
“Pa-pa, pa-pa, lí khoàⁿ hiah-ê thiⁿ-sài só͘ pı̄-pān ê chia̍h-mı̍h lóng giâ tı̄ thâu-khak téng, tùi thiⁿ-téng pâi-lia̍t poe lo̍h-lâi!”
Hit-ê chêng-kéng toā kám-tōng A-hoa. Kàu tı̄ keh chá-khí A-hoa teh kóng ê sı̂ hit-ê kám-hùn iáu-kú tı̄ i ê sim-lāi.
Khiok Pek-jím thò͘ chı̍t-ê toā-khùi, lâi pàng-hē i ê chá-tǹg, khí-lâi kiâⁿ-kàu têng-á-kháu khı̀ beh suh goā-bı̄n ê khong-khı̀.
In-ūi i chā-mı̂ iā ū bāng-kı̀ⁿ chı̍t-ê bāng. Hit-hāng sı̄ tú-tú kap A-hoa ê bāng siong-hoán ê.
Pek-jím bāng-kı̀ⁿ i ū kiâⁿ-kàu chı̍t-keng chin-toā ê biō-ú jı̍p-khı̀. Lóng bô khoàⁿ-tio̍h lâng tı̄ biō-ú ê lāi-goā. Lāi-bı̄n ū chin kı̂-koài ê an-chēng, khiok Pek-jím ta̍h-jı̍p hit-ê chòng-toā ê mn̂g ê sı̂, hoat-kiàn tı̄ hit-ê mn̂g-āu ū khiā chı̍t-ê lāu-lâng. Hit-ê lāu-lâng chin choa̍t-bāng iu-chhiû ê khoán-sit. Pek-jím ná jı̍p-khı̀, chiū hoat-kak tı̄ hiah-ê mn̂g-āu, piah-kak, àm-sàm bô lâng khoàⁿ ê só͘-chāi lóng ū khiā lâng tı̄ hia, in ê iūⁿ-siùⁿ hui-siông chiau-chui, ló-soe, in ê piáu-chêng lóng chin pi-siong, choa̍t-bāng. Hiah-ê lâng ê khoán-sit tú-tú sı̄ kap thè-sin siāng-khoán.
Hit-ê biō-ú ná jı̍p-khı̀ ná toā, chhin-chhiūⁿ chı̍t-ê ko͘-lı̍p ê sè-kài. Lāi-bı̄n chin àm-ut chhiⁿ-chhı̀n, iā ū sio-hiuⁿ ê hun-bı̄ moá-moá.
Tùi lāi-bı̄n ê só͘-chāi chhin-chhiūⁿ kui-lu̍t-tek ū cheng-siaⁿ teh tân ê khoán. Hit-ê siaⁿ ná-bêng, khiok kám-kak hit-ê siaⁿ-im ū toà-tio̍h pi-chhám choa̍t-bāng teh hiáng. Pek-jím in-ūi chhiⁿ-chhı̀n lâi iô i ê sin-khu. Pek-jím ū chı̍t-keng chı̍t-keng lâi jı̍p-khı̀, chiām-chiām ū thiaⁿ-tio̍h bı̂-jio̍k ê siaⁿ teh lâu chhut-lâi.
Āu-lâi bêng-pe̍k hit-ê siaⁿ chiū-sı̄ choa̍t-bāng thó͘-khùi ê ai-siaⁿ. Pek-jím tı̄ hit-ê siaⁿ-im ê lāi-bı̄n kui-sin tāng-koāⁿ, kha-chhiú phı̄-phı̄-chhoah. I ka-kı̄ pún-sin iā beh háu chhut-lâi lah. I kín-kín lâi kiâⁿ, khoàⁿ oē-thang thoat-chhut hit-ê só͘-chāi á-boē, khiok ná kiâⁿ ná chhim, hiah-ê pi-chhám âu-kiò ê siaⁿ-im ná oá lâi tı̄ i ê sin-chiūⁿ. Āu-lâi Pek-jím chiū cháu-chông hit-ê bê-kiong.
I ná kiâⁿ ná bô-lō͘, ū o͘-àm ê hûn-bū tùi lāi-bı̄n teh chhèng chhut-lâi. Āu-lâi hûn-bū chiū pau-ba̍t Pek-jím, koh hiah-ê thang-kiaⁿ pi-chhám ê siaⁿ-im í-keng ki-ki-háu tı̄ i ê hı̄ⁿ-khang chêng. Pek-jím kín-kín ēng i ê chhiú lâi that-ba̍t i ê hı̄ⁿ-khang. Iáu-kú hiah-ê pi-chhám âu-kiò ê siaⁿ tı̍t-tı̍t pek-oá lâi.
Pek-jím kiaⁿ-kàu phi-phi-chhoah lâi khiā tiàm hia. I kàu-boé soà toā-jióng chhut-lâi, “kiù goá! kiù goá!”, chiū hūn-tó tı̄ hit lāi-bı̄n.
Hit chı̍t-mı̂ Pek-jím iû-goân toà A-hoa khı̀ hù chū-hoē. Bo̍k-su káng-tō liáu-āu ū chiàu-siông kó͘-bú lâng chiap-siū Iâ-so͘ soà kiâⁿ-kàu tâi-chêng.
Pek-jím ê sim phok-phok-chhéng, bo̍k-su kè-sio̍k teh kiò lâng, A-hoa tı̍t-tı̍t khoàⁿ bo̍k-su ê bı̄n kap Pek-jím ê bı̄n. Āu-lâi Pek-jím chiū khan A-hoa chò-chêng lâi kiâⁿ-chhut in ê ūi. Ū hū-chek ê hiaⁿ-tı̄ sûi-sı̂ hoat-kiàn tio̍h in, cháu-oá lâi beh àn-nāi in kàu tâi-chêng. Chèng-lâng í-keng khai-sí teh gı̂m-si lah, chòng-giâm, heng-hùn ê khong-khı̀ moá-moá tı̄ hoē-tiûⁿ-lāi.
Pek-jím chiū kap Pa̍t-ê lâng saⁿ-kap pâi-lia̍t tı̄ tâi-chêng. Bo̍k-su ū chı̍t-ê chı̍t-ê teh kap in ak-chhiú, soà kóng kám-siā Chú. Koh ū hū-chek ê hiaⁿ-tı̄ lâi toè tı̄ ta̍k-lâng ê āu-bı̄n.
“Hiaⁿ-tı̄ ah, lí sı̄ toà tı̄ tó-ūi?” Hū-chek Pek-jím ê tâm-tō hiaⁿ-tı̄ ū án-ni mn̄g. Pek-jím chiū chiong chū-chí pò i chai.
“Iâ-so͘ oē kiù lán thoat-lı̄ choē-ok lóng-chóng ê thòng-khó͘ kap khu-sok. I beh ēng I ê pó-huih lâi soé-tû lán ê choē, hō͘ lán ū sin ê oa̍h-miā, sı̄ beh chiap-siū I ê kok ê oa̍h-miā. I iā beh taⁿ lán ê tāng-tàⁿ, beh i-tı̄ lán it-chhè ê pı̄ⁿ-chèng.” Hū-chek ê lâng kóng kàu chia chiah chai-iáⁿ Pek-jím sı̄ chhiⁿ-mı̂ lâng. “Lán tı̄ sè-kan ū khó͘-lān, chóng-sı̄ Iâ-so͘ beh hō͘ lán ū pêng-an, in-ūi lán só͘ tú-tio̍h ê khó͘-lān tı̄ I ê kok lóng beh bêng-pe̍k, sı̄ chhut tı̄ Siōng-tè ê hó ı̀-sù, koh hiah-ê khó͘-lān beh pı̀ⁿ-chiâⁿ ke̍k-toā ê êng-kng, ke̍k-toā ê bián-liû. Só͘-í lán bô lia̍h sı̍p-jı̄-kè chò tāng-tàⁿ, sı̄ hoán-tńg khoàⁿ bô ka-kı̄ lâi giâ sı̍p-jı̄-kè. In-ūi hiān-sè ê sı̍p-jı̄-kè sı̄ piáu-bêng lâi-sè ê êng-kng bián-liû. Tı̄ hit-jı̍t lán beh in-ūi hoaⁿ-hí kap khoài-lo̍k lâi boē kı̀-tit it-chhè sio̍k-sè ê kan-khó͘.”
Gı̂m-si ê siaⁿ ū pau-moá lâi tín-tāng pài-tn̂g-lāi. Pek-jím hut-jiân siūⁿ-tio̍h A-hoa chā-mı̂ só͘ bāng-kı̀ⁿ ê bāng. I tı̄ hit-ê si-koa ê lāi-bı̄n, tı̄ hiah-ê sı̀n-tô͘ ê bı̄n-chêng kám-kak chin-toā ê giâm-siok. Ū chı̍t-chióng boē-thang piáu-bêng sı̂n-sèng ê le̍k-liōng tı̍t-tı̍t phah i ê sim. Liân A-hoa ê chûn-chāi tı̄ hit-sı̂ iā oân-choân lı̄-khui i ê sim.
Koè-khı̀ hiah-ê put-hēng ê jı̍t-chí koh chı̍t-pái chiò-iáⁿ tı̄ i ê sim-lāi. Siū-khó͘ ê lāu-bú ê bı̄n, í-kı̍p tı̄ i hoâi-lāi lóng-chóng ba̍k-sái ê jı̍t. Tı̄ A-kū ê ka-têng só͘ keng-koè hiah-ê lêng-jio̍k siū khó͘-chhó͘ ê jı̍t, kàu tı̄ Tâi-lâm, khó͘-tàn phoe-miā ló͘-le̍k tha̍k-chheh ê sı̂-tāi. Ì-khı̀ iông-iông chı̀n-kàu Tâi-pak ko-téng ha̍k-hāu ê sı̂, hut-jiân tú-tio̍h phoà-pı̄ⁿ, Tâi-pak toā kiô-téng ê kong-kéng. Hoâ i-seng, i-seng niû, Tâi-lâm tú-tio̍h po̍k-kek, chhám-tām khó͘-būn ê àm-mı̂, lō͘-piⁿ kiû-seng ê choa̍t-kéng, kong-ho̍k āu chiâⁿ-chò thian-gâi phiau-liû ê lō͘-piⁿ ga̍k-jı̂n, koh kàu Tâi-pak, A-hoa ê chhut-hiān!!!
Chiah-ê sū chhin-chhiūⁿ cháu-bé-teng lâi cháu-koè i ê sim-lāi. I iô-thâu lâi iô-cháu hiah-ê iáⁿ-siōng. Ū ba̍k-sái chhut-lāi tı̄ i ê ba̍k-chiu.
“Siōng-tè ah, kiû Lí lı̂n-bín goá! Kiû Lí ín-chhoā goá ê lō͘!” Pek-jím tı̄ sim-lāi kı̂-tó, ba̍k-sái ū lâu chhut-lâi.
Chóng-sı̄ bô loā-kú i chiū sûi-sı̂ kám-kak ū chin-toā ê pêng-an kap khoài-lo̍k tı̄ sim-lāi.
Gı̂m-si ê siaⁿ tiām-khı̀, bo̍k-su ū khai-sí ūi-tio̍h chiah-ê hoaⁿ-hí chhut-lâi chiap-siū Iâ-so͘ ê hiaⁿ-ché kı̂-tó. “Siōng-tè ah, goá kám-siā Lí, in-ūi Lí kim-mı̂ ū kám-tōng chiah-ê lâng lâi khiā tı̄ Lí ê bı̄n-chêng beh chiap-siū Lí ê kiù-un.
Kiû Lí ēng Lí ê Sèng Sı̂n toà-niá, pó-siú in, hō͘ in oē kú-tn̂g tı̄ Lí ê lāi-bı̄n tióng-chı̀n, tı̍t-kàu Lí koh lâi ê jı̍t, thang chı̀n-jı̍p tı̄ Lí ê kok, chiū-sı̄ tùi chhòng-chō ê tāi-seng só͘ kè-e̍k beh siúⁿ-sù hō͘ Lí ê chú-bı̂n ê...”
Bo̍k-su ê oē chin koâiⁿ, ta̍k-kù oē chin bêng-pe̍k. Āu-lâi hit-ūi hiaⁿ-tı̄ ū kù-kù tâng-sim lâi hoat-chhut A-men ê siaⁿ.
Pek-jím ê sim ū chhiong-moá pêng-an ê hoaⁿ-hí. I hoat-kiàn tio̍h Ki-tok ê chin-lí sı̄ lâng èng-kai tio̍h tui-chhoē ê..., chit-ê chin-lí sı̍t-chāi thàu-thiat tı̄ i lóng-chóng sim-lāi ê būn-tê, lâi pau-moá, lâi chheng-sǹg hiah-ê khùn-lân.
I chhin-chhiūⁿ chı̍t-ê toā būn-tê tit-tio̍h kái-koat chı̍t-iūⁿ chin hoaⁿ-hí.
“Lı̄-lı̄ chiah-ê lâng sı̄ m̄-sı̄ chhin-chhiūⁿ lí chā-mı̂ só͘ bāng-kı̀ⁿ ê thiⁿ-sài ê khoán-sit!?”
Pek-jím ū lám-oá A-hoa, soà àⁿ-sin soè-siaⁿ lâi mn̄g i, chóng-sı̄ A-hoa ǹg i bı̂-chhiò chı̍t-ê.... “Pa-pa, thiⁿ-téng ê Chú Iâ-so͘ kap lóng-chóng ê thiⁿ-sài chit-sı̂ iā tı̄ thiⁿ-nı̍h ūi-tio̍h lán teh toā hoaⁿ-hí gı̂m-si!”
“Phah-sǹg sı̄ án-ni, hiah-ê gı̂m-si ê siaⁿ chiah oē hiah-nı̍h kò-iūⁿ ê hó-thiaⁿ.”
Sèng-si-pan khai-sí teh gı̂m-si lah. A-hoa ê sim iā chin hoaⁿ-hí, chin khoài-lo̍k, i ê sin-khu kheh-oá tı̄ Pek-jím ê kha-thúi lâi lám-oá i.
