10 Chài-hoē Ah, Goá Ê Thiⁿ-sài
Kè-jı̍t chiū-sı̄ lé-pài-jı̍t, Pek-jím kap A-hoa chin-chá chiū lâi kàu tı̄ pài-tn̂g teh tán-hāu chū-hoē.
Hit chı̍t chá-khí bo̍k-su ê káng-tō tê-ba̍k, chiū-sı̄ “Ū chı̍t-ê ông-kok, kiò-choè thiàⁿ.” Keng-kè gı̂m-si, kı̂-tó, tho̍k-keng liáu-āu, bo̍k-su ū khiā khí-lâi kóng “Chhin-ài ê hiaⁿ-ché, tı̄ Iok-hān it-su sı̀-chiuⁿ chhit-chat, peh-chat ū teh kóng: ‘Só͘ thiàⁿ ê hiaⁿ-tı̄ ah, lán tio̍h saⁿ-thiàⁿ; in-ūi thiàⁿ sı̄ tùi Siōng-tè lâi, kı̀ⁿ-nā thiàⁿ ê sı̄ tùi Siōng-tè siⁿ, koh bat Siōng-tè. Bô thiàⁿ ê m̄-bat Siōng-tè, in-ūi Siōng-tè sı̄ thiàⁿ.’ Koh cha̍p-la̍k chat kóng, ‘Siōng-tè só͘ ū thiàⁿ lán ê, lán iā chai iā sı̀n. Siōng-tè chiū-sı̄ thiàⁿ, koh lâng tiàm tı̄ thiàⁿ, chiū-sı̄ tiàm tı̄ Siōng-tè, Siōng-tè iā tiàm tı̄ i.’ ”
Siōng-tè sı̄ thiàⁿ, I tùi thiàⁿ lâi chhòng-chō sè-kan, tùi thiàⁿ lâi chhòng-chō bān-mı̍h, tùi thiàⁿ lâi chō lâng chiàu I ê hêng-siōng. I tùi thiàⁿ hō͘ lâng tāi-piáu I, thang koán-lí chit-ê sè-kan, hō͘ lâng ū chú-koân kap chū-iû. Lâng hoān-choē tūi-lo̍h liáu-āu, Siōng-tè tùi thiàⁿ koh chiong I to̍k-siⁿ Kiáⁿ siúⁿ-sù hō͘ lán, kam-goān chhek-chiū pi-bı̂. Koh tùi thiàⁿ hō͘ I ê Kiáⁿ lâi tāi-thoè lán lâng lóng-chóng ê choē-gia̍t, tam-tng lán ê choē-chek, siū pah-poaⁿ ê lêng-jio̍k, khó͘-chhó͘. I tùi thiàⁿ hō͘ I ê Kiáⁿ sí tı̄ sı̍p-jı̄-kè téng, hō͘ lán tit-tio̍h an-ún pêng-an. I tùi thiàⁿ koh ūi lán khui kiù-sio̍k ê oa̍h-lō͘, hō͘ kı̀ⁿ-nā sı̀n Chú ê lâng oē-thang tit-kiù lâi siám-bián chit sè-kan ê bia̍t-bô.
I tùi thiàⁿ koh ūi lán hoé-kái ê choē-jı̂n siat-lı̍p chı̍t ê ông-kok, beh hō͘ lán tı̄ hia hióng-siū éng-oán oa̍h. I tùi thiàⁿ hō͘ lán tı̄ hit-ê kok thang koh kap I kau-poê. In-ūi Siōng-tè sı̄ thiàⁿ, koh sı̄ chhiat-chhiat su-iàu thiàⁿ ê. I ê ông-kok iā beh kiò-chò thiàⁿ ê ông-kok. In-ūi thiàⁿ sı̄ hit-ê kok ê chı̍t-tiâu ê hoat-lu̍t, koh lâng tı̄ hia chí-ū beh saⁿ-thiàⁿ, iā beh kóng thiàⁿ ê sū í-goā bô pa̍t-mı̍h.
Tı̄ hit-ê thiàⁿ ê kok bô ū iu-siong kan-khó͘ ê sū-chêng. Put-hēng kap pi-chhám iā bô koh jı̍p hit-ê só͘-chāi. Tı̄ hia lâng bô koh lô-khó͘, bô koh chhoē-kiû, in-ūi tı̄ thiàⁿ ê lāi-bı̄n ū chin-lí kap oa̍h-miā moá-moá.
Tı̄ thiàⁿ ê lāi-bı̄n iā bô oàn-thàn, put-an, ko͘-to̍k, in-ūi thiàⁿ ê kng beh chiò-moá lâng ê sim. Tı̄ hit-ê thiàⁿ ê lāi-bı̄n lâng chí-ū beh hióng-siū thiàⁿ kı̂-biāu ê khoài-lo̍k.
Sè-kan lâng ah, lí tio̍h gióng-bōng hit-ê thiàⁿ ê ông-kok, lí tio̍h gia̍h-thâu ǹg-bāng.
Tû-khı̀ chit chân sū, lâng tı̄ sè-kan sı̄ choa̍t-bāng, put-hēng, pi-chhám.
Sè-kan lâng ah, lí tio̍h chhoē-kiû hit-ê thiàⁿ ê ông-kok. Tı̄ hia ū oa̍h-miā kap chin-lí moá-moá.
Tû-khı̀ chit chân sū, lâng tı̄ sè-kan ū kan-khó͘, kiaⁿ-hiâⁿ, put-an.
Tı̄ hit-ê kok, I ê ông iā sı̄ kiò-choē thiàⁿ, in-ūi ông ê thâu-hia̍h ū I ê miâ, thiàⁿ ê jı̄.
Thiàⁿ ê ông beh hoat-chhut thiàⁿ ê kng lâi chiò-iāu i ê siâⁿ, kok-lāi ê kang-hô iā beh hoán-siā thiàⁿ ê pe̍h-kng. Tı̄ hia bô ū àm-sı̂ ê iáⁿ. Peh-sı̀ⁿ beh tı̄ hit-ê thiàⁿ ê hô-piⁿ, ǹg thiàⁿ ê ông lâi chhiùⁿ thiàⁿ ê chàn-koa. Saⁿ-thiàⁿ ê chêng-kéng, tı̄ hia ê ke-chhı̄, lō͘-siōng, chhiū-kha lóng ū khoàⁿ-kı̀ⁿ.
Chit-ê úi-tāi, thiàⁿ ê kok sı̄ hēng-hok, khoài-lo̍k ê kok. Lâng beh tı̄ hit lāi-bı̄n boē kı̀-tit it-chhè sè-chiūⁿ ê kan-khó͘.”
Bo̍k-su ê káng-tō ū kek-khí chin-toā ê heng-hùn tı̄ hoē-tiûⁿ lāi. Soàⁿ-hoē liáu-āu Pek-jím tńg lâi kàu tı̄ lú-koán ê pâng-keng ê sı̂, i ê sim iáu-kú chhin-chhiūⁿ toà-tio̍h chı̍t-ê ke̍k-kı̂ kı̂-biāu ê bı̂n-bāng ê khoán, ū chı̍t-chióng sı̂n-pı̀ ê hoaⁿ-hí lâu-teh.
Tùi chiah-ê sū í-āu Pek-jím chiū chhoā A-hoa jia̍t-sim khı̀ hù múi-pái ê chū-hoē. Ū chı̍t-àm chū-hoē liáu-āu, Pek-jím ū chhoā A-hoa kàu Hô-pêng-tó ê hái-chúi-e̍k tiûⁿ khı̀ thit-thô.
Hit chı̍t-mı̂ te̍k-piat sio-joa̍h, koh sı̄ chin-súi ê ge̍h-àm. Sui-jiân sı̂-kan sı̄ chhut cha̍p-tiám lah, iáu-kú ke-lō͘ chiūⁿ kiâⁿ-iû ê lâng chin-chiàⁿ choē.
Hái-chúi-e̍k tiûⁿ ū chı̄n-choē siû-e̍k ê lâng teh jia̍t kún-kún. Pek-jím ū khan A-hoa lâi kiâⁿ hit-ê nāu-jia̍t ê hái-hoāⁿ. In chin khui-sim lâi khoàⁿ hiah-ê hò͘-chúi ê chheng-liân, gín-ná tı̄ chúi-lāi teh chò pah-iūⁿ ê hı̀-chúi. Pek-jím khiok lóng bô khoàⁿ-tio̍h sím-mı̍h, iáu-kú i ta̍uh-ta̍uh mn̄g A-hoa ū sim-sek bô? A-hoa kám-kak chin hoaⁿ-hí khoài-lo̍k. Pek-jím iā sı̄ chin khoài-lo̍k. In sūn hit-ê hái-hoāⁿ lâi ná-kiâⁿ ná-khoàⁿ, kiâⁿ kàu lı̄-khui siû-e̍k hn̄g-hn̄g ê piⁿ-kak khı̀. Tı̄ hia ta̍k-hāng lóng chin an-chēng, chí-ū hn̄g-hn̄g ū thiaⁿ-tio̍h siû-e̍k ê lâng teh hoat-jióng bı̂-jio̍k ê siaⁿ tı̄ chò-tı̄n teh háu hái-éng ê siaⁿ-im ê lāi-bı̄n teh khí-hiat nā-tiāⁿ. Kàu tı̄ chı̍t-ê ū chio̍h-thâu ê só͘-chāi A-hoa chiū khan Pek-jím lâi poâⁿ hiah-ê chio̍h-téng kè-sio̍k kiâⁿ. Toā-chio̍h sió-chio̍h khi-khi khu-khu chiàm-moá hit-tài ê hái-piⁿ. A-hoa tio̍h ēng la̍t lâi pang-chān Pek-jím keng-kè hit-ê chio̍h-thâu ê hái-hoāⁿ. In nn̄g lâng tı̄ khùn-lân ê chı̀n-hêng tiong kám-kak chin chhù-bı̄, lâi ná-chhiò ná-poâⁿ. Kàu tı̄ chı̍t-tè chin su-hok ê toā-chio̍h-poâⁿ téng ê sı̂, Pek-jím chiū thê-gı̄ beh chē hit téng-bı̄n hioh-khùn. In chiū saⁿ-kap chē tı̄ hia, koh soah thǹg in ê oê khí-lâi, chiong kha lâi chhun-lo̍h tı̄ hái-chúi ê lāi-bı̄n. Āu-lâi A-hoa ū gia̍h-thâu khoàⁿ tio̍h āu-bı̄n Ki-lûn chhı̄ ê iā-kéng.
“Pa-pa, chin-súi ê kong-kéng!! Chhin-chhiūⁿ thian-tông ê khoán-sit!” A-hoa hut-jiân jióng chhut-lâi. Kó-jiân ū-iáⁿ, Ki-lûn chhı̄ ê iā-kéng kng-bêng chhàn-lān phû-chhut tı̄ hái-chúi ê hit pêng hoāⁿ.
“Goá lóng bô khoàⁿ-tio̍h sím-mı̍h. Lı̄-lı̄ chhiáⁿ lí kóng hit-ê chhin-chhiūⁿ thian-tông ê iā-kéng hō͘ goá thiaⁿ.” Pek-jím ēng kha lâi lā hái-chúi.
“Chin-chiàⁿ súi! Chhàn-lān ê kng ū thàng kàu khong-tiong khí-khı̀!” A-hoa tı̍t-tı̍t teh khoàⁿ hit-ê bí-lē, kng-bêng oán-jiân thian-kài ê iā-kéng lâi teh kám-thàn bô-soah.
“Hit-ê phah-sǹg sı̄ soaⁿ-téng ê chhù ê kng lah!” Pek-jím án-ni thoè A-hoa soat-bêng.
“Pa-pa, liān hái-bı̄n iā ū chin-súi, chhàn-lān ê kng, hit-ê kng lóng oē tín-tāng, koh chiò kàu lán ê bı̄n-chêng lâi!”
“Hit-ê phah-sǹg sı̄ hoán-chiò tı̄ chúi-lāi ê kng lah. Án-ni it-tēng sı̄ chin-súi! Chóng-sı̄ khiok goá bô khoàⁿ-kı̀ⁿ.” Pek-jím án-ni kóng lâi tó-tı̍t tı̄ hit-ê chio̍h-poâⁿ téng. A-hoa iā hoan-sin phak-lo̍h tı̄ i ê sin-piⁿ lâi khoàⁿ Pek-jím ê bı̄n.
“Pa-pa, lán koh chiām-sı̂ ê jím-nāi nā-tiāⁿ. Nā kàu thian-tông ê só͘-chāi, lán oē-thang khoàⁿ-tio̍h koh-khah súi ê kong-kéng, hit sı̂ chit khoán ê só͘-chāi bô khoàⁿ-tio̍h mā bô kám-kak án-choáⁿ.”
Pek-jím khoàⁿ-tio̍h A-hoa chit-chióng ēng sim ê an-ùi chiū siū kám-tōng kàu chhiò chhut-lâi.
“Án-ni tio̍h, koh chiām-sı̂ ê jím-nāi nā-tiāⁿ. Nā kàu thian-tông, goá só͘ tē it him-bō͘ ài khoàⁿ ê chiū-sı̄ Lı̄-lı̄ kó͘-chui ê bı̄n.” A-hoa iā chhiò chhut-lâi, chiū saⁿ-kap lám-oá lâi tó tı̄ hit-ê chio̍h-téng. Hái-éng ū phah-tio̍h in ê chio̍h-poâⁿ lâi phùn chúi-chhiu. Hn̄g-hn̄g ê goā-iûⁿ ū hái-éng, gong-gong háu ê siaⁿ chı̍t-tı̄n chı̍t-tı̄n teh hiáng lâi. Chin kng-liāng chheng-chhái ê ge̍h, koà tı̄ khong-tiong teh chiàu-iāu chit-ê an-chēng, chheng liâng ê káng-to͘. A-hoa chiām-sı̂ teh khoàⁿ hit-ê ge̍h, liáu-āu soà khùn-khı̀. Pek-jím hoat-kak A-hoa teh khùn, chiū beh kín-kín kiò i chhíⁿ, khiok A-hoa ba̍k-chiu khui chı̍t-ē, chiū koh khùn-khı̀.
Pek-jím kín-kín thǹg i ê saⁿ lâi hō͘ A-hoa kah. Hut-jiân i ū kám-kak hái-chúi í-keng chiūⁿ kàu tı̄ chio̍h-poâⁿ téng lah. “Boán-tiāu!” kiaⁿ-hiâⁿ lia̍h Pek-jím ê sim. I kín-kín koh kiò A-hoa, khiok A-hoa lóng bô chhíⁿ. I chiū phō A-hoa khí-lâi. In lo̍h chio̍h-poâⁿ-ē ê sı̂ hái-chúi í-keng kàu tı̄ kha-thúi lah. Gông-ngia̍h kap kiaⁿ-hiâⁿ hō͘ Pek-jím ê choân-sin lóng ngē-tı̍t khı̀. I chı̍t-chhiú phō A-hoa, chı̍t-chhiú bong chio̍h-thâu lâi beh kín-kín cháu-lı̄ hit-ê só͘-chāi. Khiok Pek-jím oân-choân sit-lo̍h hong-hiòng khı̀, chúi í-keng kàu tı̄ poàⁿ-sin lah, koh kiâⁿ lóng bô chhut-lō͘ thang koè hit-ê chio̍h-poâⁿ, khi-khu ê hái-piⁿ.
In nn̄g-lâng ê sin-khu lóng hō͘ hái-éng phùn-kàu tâm-lok-lok khı̀. Kiâⁿ-kàu chit só͘-chāi Pek-jím soà ku̍t-kha lâi siak-tó.
A-hoa kui-sin lóng chı̀m tı̄ chúi-lāi lah, A-hoa chhíⁿ khí-lâi. “Pa-pa, pa-pa!” A-hoa iā toā tio̍h-kiaⁿ lâi lám-oá tı̄ Pek-jím!
“Lı̄-lı̄, m̄-bián kiaⁿ! Lí kín-kín chhoā goá kiâⁿ khah bô chúi, koân ê só͘-chāi!” In nn̄g-lâng chiū saⁿ lám-oá, saⁿ hû-chhı̂ lâi thoat-lı̄ hit-ê gûi-hiám ê só͘-chāi.
Tú-tio̍h chit-ê sū keh-jı̍t, A-hoa chiū phoà-pı̄ⁿ bô hoat-tō͘ thang khí-chhn̂g lah. I tùi poàⁿ-mı̂ chiū hoat-sio, kàu tı̄ keh-chá-khí lóng bô thè-liâng.
Pek-jím ū pài-thok lú-koán ê A-pô kín-kín chhiáⁿ i-seng lâi. Chóng-sı̄ kàu hit tiong-tàu jia̍t lóng kè-sio̍k chhèng-koâiⁿ. A-hoa in-ūi jia̍t ê iân-kò͘ lóng bô chhíⁿ teh khùn. Kàu hit ē-po͘ A-hoa khai-sí chò-pàng. Hit chı̍t-mı̂ ū koh chhiáⁿ i-seng lâi khoàⁿ ê sı̂, kóng sı̄ ok-sèng ê ūi-tn̂g iām.
Hit chı̍t-mı̂ A-hoa ū pàng chin lı̄-hāi, Pek-jím ū chhiáⁿ A-pô lâi su-hāu A-hoa. Ka-kı̄ iā lóng bô khùn lâi chē tı̄ A-hoa ê chhn̂g-piⁿ lâi khan i ê chhiú, bong i ê thâu-khak, thiaⁿ i ê chhoán-khùi. Tē-jı̄ jı̍t A-hoa chiū pàng n̂g-sek ê mı̍h. I ê chò-pàng ná-lâi ná lı̄-hāi. Tā-saⁿ jı̍t chiū pàng âng-sek ê huih lah. Pek-jím ê put-an kap pé-pa̍k lóng hián-chhut lâi. I sı̀-koè khı̀ chhéng-kàu lâng, koh lóng bô sioh só͘-hùi lâi chông-tang chông-sai.
Kàu tı̄ tē-sı̀ jı̍t, A-hoa ê soe-jio̍k í-keng kàu tı̄ choa̍t-tiám lah, khiok chêng-hêng lóng bô khah hó-sè. Tı̄ mı̂-sı̂ tán-hāu boē-kàu thiⁿ-kng thang koh chhiáⁿ i-seng.
“Chit-ê gín-ná ê sı̀ⁿ-miā í-keng chin gûi-hiám!” Hit chá-khí chhiáⁿ lâi ê lāu i-seng chín-toàn A-hoa liáu-āu ū iô-thâu lâi tùi Pek-jím án-ni kóng, Pek-jím thiaⁿ-tio̍h chit-kù oē, bı̄n piàn-sek, sin-khu ngia̍uh-ngia̍uh-chhoah.
“Sian-siⁿ ah, ū sím-mı̍h khah thò-tòng ê pān-hoat, á-sı̄ io̍h thang chù á-bô?”
Pek-jím chin tio̍h-kip lâi mn̄g i-seng, khiok i-seng siūⁿ chı̍t-ē..., liáu-āu thó͘ chı̍t-ê khùi.
“Goá siūⁿ kín-kín chhiú-sio̍k khı̀ jı̍p pı̄ⁿ-ı̄ⁿ.”
I-seng tńg-khı̀ liáu-āu Pek-jím chiū chhiáⁿ lâng khı̀ thàm-mn̄g koan-hē jı̍p-ı̄ⁿ ê pān-hoat.
“Tio̍h seng kiáu-la̍p 500 kho͘ ê jı̍p-ı̄ⁿ-hùi,” tò-tńg lâi ê chheng-liân án-ni pò-kò Pek-jím.
Chóng-sı̄ Pek-jím ê chhù-lāi chha-put-to lóng bô chı̂ⁿ lah. “Ū sím-mı̍h pān-hoat?!” Pek-jím tı̄ sek-lāi kiâⁿ-lâi kiâⁿ-khı̀ siūⁿ kàu chin choa̍t-bāng thòng-khó͘. Chóng-sı̄ āu-lâi i chhin-chhiūⁿ ū siūⁿ-tio̍h sím-mı̍h hó ê pān-hoat lâi thêng-kha, koh kín-kín kiâⁿ kàu piah-kak ê toh-kūi khı̀. Pek-jím ê chhiú ū lia̍h-tio̍h i ê chhiú-thê-khı̂m, lâi gia̍h khí-lâi tı̄ i ê heng-chêng, i ū chiong i ê chhùi àⁿ tı̄ khı̂m ê pèⁿ lâi chiām-sı̂ khiā tı̄ hia tiû-tû, ū ba̍k-sái ê iáⁿ chhut-hiān tı̄ i ê ba̍k-chiu, chóng-sı̄ i sûi-sı̂ chiong ba̍k-sái koh thun lo̍h-khı̀, cháu-kàu A-hoa ê chhn̂g-piⁿ, lâi thàm i ê chêng-hêng, āu-lâi tán-hāu A-pô jı̍p lāi-bı̄n, i chiah gia̍h khı̂m chhut-mn̂g khı̀.
Thêng tia̍p-á-kú i jı̍p-lâi ê sı̂, i ê chhiú-thê-khı̂m í-keng bô khoàⁿ-kı̀ⁿ lah. Khiok i ū tùi tê-á-lāi jı̂m 500 kho͘ chhut-lâi, kau-tài A-pô kín-kín khı̀ chhiú-sio̍k beh jı̍p-ı̄ⁿ.
A-pô chhut-mn̂g ê sı̂ Pek-jím kín-kín koh lâi chē tı̄ A-hoa ê chhn̂g-piⁿ.
I hoat-kak tio̍h A-hoa ê ho͘-khip í-keng ū kò-iūⁿ lah. Jia̍t iā koh chhèng chin-koâiⁿ.
Pek-jím ū khan-ân A-hoa ê chhiú, i ê sim-chêng chin tio̍h-kip siong-pi.
A-hoa ū in-ūi kan-khó͘ teh chhoán, koh tín-tāng i ê sin-khu.
“Lı̄-lı̄! Lı̄-lı̄! Lí án-choáⁿ?!” Pek-jím ū chı̍t-chhiú gı̄m-oá A-hoa ê chhiú, chı̍t-chhiú lâi so i ê heng-khám.
“Pa-pa, pa-pa, phō goá, phō goá!” A-hoa soe-lám bô la̍t ê siaⁿ ū án-ni ai-kiû.
Pek-jím kín-kín tùi chhn̂g-téng lâi phō A-hoa khí-lâi. Siong-pi, choa̍t-bāng ê o͘-hûn chhin-chhiūⁿ kiông-hong, pō-ú sàu-lo̍h tı̄ i ê sim-lāi.
“Siōng-tè ah, kiù goán! K-i-ù g-o-á-a!!”
Pek-jím phō A-hoa lâi kūi-lo̍h tı̄ pâng-keng-lāi, soà pàng-siaⁿ toā-háu.
“Goá ê thiⁿ-sài! Goá ê thiⁿ-sài!”
Ba̍k-sái chhin-chhiūⁿ toā-chúi piàⁿ-lo̍h tı̄ i ê heng-chêng. I ê bı̄n ǹg tùi thiⁿ-téng khí-khı̀, khàu-siaⁿ tı̄ i ê nâ-âu choa̍t-kàu ō͘-ō͘-kiò.
I pi-chhám, kı̂-ı̄ⁿ ê siaⁿ ū kiaⁿ-chhíⁿ A-hoa. A-hoa ba̍k-chiu thí-khui lâi khoàⁿ Pek-jím ê bı̄n, chiū chhun i soe-jio̍k ê chhiú lâi bong Pek-jím pı̀ⁿ-pe̍h ê thâu-mn̂g.
“Pa-pa, lí m̄-thang háu, lán koh chiām-sı̂ ê jím-nāi nā-tiāⁿ. Nā tı̄ thian-tông lán bô koh lâu ba̍k-sái, bô koh kan-khó͘. Lán koh chiām-sı̂ ê jím-nāi nā-tiāⁿ!”
A-hoa ê siaⁿ chhin-chhiūⁿ beh hoa-khı̀ ê khoán, i ê ba̍k-chiu iā ū chı̍t-tiâu ba̍k-sái sûi lo̍h lâi. Pek-jím khoàⁿ-kı̀ⁿ A-hoa chhíⁿ koh tùi i kóng-oē, chiū kín-kín an-chēng.
“Sı̄ lah, lán koh chiām-sı̂ ê jím-nāi nā-tiāⁿ! Bı̂n-ná-jı̍t pa-pa oē chhoā lí khı̀ jı̍p-ı̄ⁿ, bô loā-kú Lı̄-lı̄ chiū oē hó, hit sı̂ Lı̄-lı̄ oē-thang koh thit-thô, oē-thang chia̍h-mı̍h. Ah, tio̍h! Pa-pa chiah boé phōng-kó hō͘ lí chia̍h, phōng-kó sı̄ lí kú-kú só͘ him-bō͘ ài beh chia̍h ê.” Pek-jím sim-chêng chin kip ê tiong-kan lâi kóng án-ni beh kó͘-bú, an-ùi A-hoa.
Khiok A-hoa ǹg i bı̂-chhiò chı̍t-ê..., chiū koh khùn-khı̀.
“Lí m̄-thang án-ni háu lâi kiáu-jiáu gín-ná ê sim. Tio̍h an-chēng!” A-pô ū khui mn̂g jı̍p lâi, kiâⁿ-kàu Pek-jím ê bı̄n-chêng, chiū chiong A-hoa chiap-khı̀, hē tı̄ chhn̂g-nı̍h.
“Gín-ná í-keng chiah-nı̍h chia̍h-la̍t lah, toā-lâng tio̍h léng-chēng!” A-pô ū hē A-hoa hō͘ hó-sè, chiū khiā tı̄ A-hoa ê chhn̂g-piⁿ lâi khoàⁿ i ê bı̄n.
“Sı̍t-chāi sı̄ chı̍t ê chin koai, chin khó-ài ê gín-ná! Chin khó-sioh! Chin khó-sioh!”
A-pô ū khan i ê kûn khí-lâi chhit i ê ba̍k-sái, Pek-jím iā cháu-oá lâi tı̄ chhn̂g-piⁿ, chiū kūi tı̄ A-hoa ê sin-piⁿ, chhiú lia̍h A-hoa ê chhiú, in-ūi siong-sim lâi sin-khu tín-tāng. “Lı̄-lı̄, lí m̄-thang lı̄-khui goá khı̀! Tek-khak m̄-thang lı̄-khui goá khı̀!” I ê ba̍k-sái koh chı̍t-pái moá-lâu i ê bı̄n.
Chóng-sı̄ tı̄ hit chı̍t-mı̂ ê poàⁿ-mı̂, A-hoa ê lêng-hûn chiū kui-thiⁿ, lı̄-khui sè-kan lah.
×××
