Keng-kè liáu saⁿ, sı̀-jı̍t, bâi-chōng ê sū iā í-keng chheng-chhó liáu lah.
Lāu A-pô tı̄ chı̍t chá-khí ū phâng moê jı̍p-lâi Pek-jím ê pâng-keng, khoàⁿ-kı̀ⁿ i tiām-tiām chē tı̄ thang-á piⁿ ê í-nı̍h, bı̄n ǹg tùi thang-goā chhut-khı̀. Sı̂ sı̄ chhit-ge̍h chho͘, í-keng chin pek-joa̍h lah. Khiok Pek-jím ê pâng-keng ê thang lóng koaiⁿ teh.
“Lí chā-mı̂ iā bô khùn ê khoán neh?!” A-pô khoàⁿ Pek-jím ê chêng-hêng lâi án-ni kóng soà thó͘ toā-khùi. I ū chiong chia̍h-mı̍h pâi tı̄ toh-téng hō͘ hó-sè, chiū khı̀ khui thang-á-mn̂g hō͘ khui.
“Lí koaiⁿ tı̄ chit lāi-bı̄n lâi kek-sim, iu-siong ū sím-mı̍h lı̄-ek! Lâng í-keng sí lah, kiám m̄-sı̄ tio̍h khoàⁿ-phoà lâi kò͘ pún-sin! Kui lé-pài bô-chia̍h bô-khùn, lí iā chin thiám lah!” A-pô án-ni kóng lâi thàm Pek-jím chhin-chhiūⁿ bô sı̂n-hûn ê lâng tiām-tiām chē, lóng bô tín-tāng. I ê thâu-mn̂g lóng bô chéng-lí, sàm-sàm, bı̄n iā lóng bô sé, ū lah-sap tı̄ ba̍k-chiu. I ê khoán-sit tı̄ chit kúi-jı̍t oân-choân chiau-chūi, ló-mò͘ khı̀ lah.
“Sí sı̄ ke̍k phó͘-siông ê sū, tı̄ sè-kan ta̍k-jı̍t lóng ū lâng teh sí. Sí m̄-sı̄ hiah-nı̍h thang siong-pi ê sū, sí sı̄ tú-tú chhin-chhiūⁿ lâng teh poaⁿ-chhù, tùi lâu-ē poaⁿ chhù kàu lâu-téng chı̍t-iūⁿ.” A-pô khai-sí lâi chéng-lí lāi-bı̄n ê mı̍h-kiāⁿ.
“Lâng chhut-sı̀ lâi tı̄ sè-kan hit chı̍t-tia̍p tio̍h ài siūⁿ kàu sí ê sū, nā-ū án-ni àn-sǹg chiū sí lóng boē tùi lán ū sím-mı̍h táⁿ-kek.” A-pô kóng án-ni chiū koh thàm-khoàⁿ Pek-jím ê bı̄n.
“Sı̍t-chāi sí sı̄ ke̍k pêng-siông ê sū! Te̍k-piat kàu tı̄ goán ê nı̂-kí, sí sı̄ sı̍t-chāi thang ǹg-bāng ê sū, in-ūi lâng tı̄ chit-ê sè-kan sı̄ chin bô chu-bı̄.” A-pô ū thêng-tiām i ê kang-chok lâi koh thó͘ chı̍t-ê khùi. I chiū koh khai-sí beh chheng-sàu pâng-lāi.
“Lí iā sǹg sı̄ iáu siàu-liân lâng, nā kiat-hun iáu oē-thang tit-tio̍h gín-ná. Lí ê chiân-tô͘ iáu ū chin-toā ê ǹg-bāng. Tâi-pak thiaⁿ kóng ū bông-jı̂n ê hia̍p-hoē beh ài chhiàⁿ bông-jı̂n tı̄ hia chò-kang. Chhin-chhiūⁿ lí nā khı̀ jı̍p, it-tēng oē tit-tio̍h chhái-ēng. Tı̄ hia lí oē thang chò chı̍t-ê ki-su̍t jı̂n-oân, lâi tit-tio̍h hó ê thāi-gū, chı̍t-ge̍h jı̍t káⁿ ū chheng-goā kho͘ o͘h. Nā-sı̄ án-ni lí oē-thang chhoā chı̍t-ê hū-jı̂n-lâng lâi pang-chān lí, lí oē-thang koh ū chı̍t-ê chin bí-moá un-loán ê ka-têng.”
“Ah tio̍h, tı̄ Tâi-pak iā ū thiaⁿ kóng, ū chı̍t-ê Bí-kok bo̍k-su, oē kı̂-tó i-pı̄ⁿ, lí ê ba̍k-chiu nā khı̀ hō͘ i thoè kı̂-tó, Siōng-tè kiám-chhái oē hō͘ lí koh khoàⁿ-kı̀ⁿ! Sı̍t-chāi lí ê chiân-tô͘ ū chin-toā ê ǹg-bāng! Ū chin-toā ê hēng-hok!” A-pô kiâⁿ lâi kàu Pek-jím ê bı̄n-chêng, chiū thêng i ê kang-chok lâi chhiú chhah, koh khoàⁿ Pek-jím ê bı̄n. “Lí nā sı̍t-chāi ū hit-ê ı̀-sù, goá oē pài-thok bo̍k-su thoè lí chhut-la̍t, lí siūⁿ án-choáⁿ? Lí siūⁿ án-choáⁿ?” A-pô ài beh chai Pek-jím ê ı̀-sù. Khiok Pek-jím ka-léng-sún chı̍t-ē, chiū khui-chhùi ı̀n A-pô.
“A-pô, hō͘ lí chin to-siā! Goá hiān-chāi lóng bô teh siūⁿ hiah-ê sū. Goá iā bô ǹg-bāng goá oē khoàⁿ-kı̀ⁿ, iā bô ǹg-bāng goá oē-thang tit-tio̍h sím-mı̍h hēng-hok ê seng-oa̍h. Hiah-ê hoán-tńg sı̄ goá só͘ kiaⁿ-hiâⁿ ê. Hiah-ê í-keng kap goá oân-choân so͘-oán lah.” Pek-jím ê piáu-chêng chin chhiⁿ-chhı̀n, i soè-siaⁿ tı̄ chhùi-lāi án-ni liām. Ba̍k-sái kap phı̄ⁿ-chúi iáu ta bô-liáu lâu-teh. “Sí m̄-sı̄ ū sím-mı̍h thang hō͘ lâng hiah-nı̍h kàu choa̍t-bāng. Lí tio̍h khoàⁿ-phoà! Tio̍h pàng-khı̀ koè-khı̀ ê sū! Tio̍h kiû sin ê lō͘!” A-pô ū ēng chhiú lâi pí tı̄ Pek-jím ê bı̄n-chêng. Khiok Pek-jím kín-kín that i ê hı̄-khang, sim-chêng chin-kip kóng, “A-pô, chhiáⁿ lí m̄-thang koh kā goá kóng sím-mı̍h! Goá m̄-ài koh thiaⁿ sím-mı̍h! Kiû lí hō͘ goá ka-kı̄ chı̍t-lâng tiàm chia, thang tit-tio̍h an-chēng!” A-pô chai-iáⁿ Pek-jím ê ı̀-sù chiū kā i koh khoàⁿ chı̍t-ē, lâi khui-mn̂g lı̄-khui i ê bı̄n-chêng chhut-khı̀.
Iu-siong, thòng-khó͘ chhin-chhiūⁿ o͘-hûn koh tà-oá i ê sim. I ê ba̍k-sái koh chhut-hiān. I choân-sin ngia̍uh-ngia̍uh-chhoah, chiū khiā khí-lâi, lâi soá kha-pō͘ kàu tı̄ thang-á piⁿ khı̀. I ū chiong i ba̍k-sái ê bı̄n khı̀ oá tı̄ thang-á kı̂ⁿ, i ê háu-siaⁿ koh kàu tı̄ nâ-âu.
“Lı̄-lı̄! Lı̄-lı̄!” Pek-jím án-ni jióng chhut-lâi, soà khui-siaⁿ háu. I ū koh cháu kàu A-hoa ê chhn̂g-piⁿ, lâi kūi tı̄ thô͘-kha, soà ēng chhiú lâi bong hit-ê khang-khang ê chhn̂g-téng ê phoē.
“Lı̄-lı̄, goá ê thiⁿ-sài! Lí pàng goá chı̍t-lâng beh án-choáⁿ!!” Pek-jím ê sim chhin-chhiūⁿ beh piak-lı̍h ê kan-khó͘. Chóng-sı̄ i hut-jiân siūⁿ-tio̍h í-chêng i tı̄ Tâi-pak ê ha̍k-hāu hù-sio̍k pı̄ⁿ-ı̄ⁿ só͘ keng-koè hiah-ê choa̍t-bāng ê jı̍t. Pek-jím chiū tòng-tiām i ê ba̍k-sái, lâi siūⁿ hiah-ê siông-sè ê sū. I siūⁿ liáu koh pí-kàu i hiān-sı̂ só͘ tú-tio̍h ê sū. Chóng-sı̄ kiat-kio̍k i kám-kak chit-pái sı̄ koh khah oh-tit hō͘ i jím-siū ê sū. I ū koh siūⁿ tio̍h tı̄ Tâi-pak toā-kiô téng ê sū.
“Chóng-sı̄ chit tia̍p goá beh ēng sím-mı̍h hong-hoat lâi kái-koat chit-ê koh-khah oh-tit jím-siū ê sū!!” I tı̄ sim-lāi án-ni liām, i ê ba̍k-sái kap khàu-siaⁿ chiū koh hoê-ho̍k lâi.
Kè-jı̍t chá-khí, Pek-jím chiū oāⁿ-saⁿ chéng-lí thâu-mn̂g, chhit i ê bı̄n lâi chhut lú-koán ê mn̂g.
A-pô ū tı̄ sim-lāi teh siūⁿ, i tàu-té sı̄ beh khı̀ tá-ūi, chiū kiò gín-ná toà i ê āu-bı̄n. Thêng tia̍p-á kú gín-ná ū tńg-lâi kóng, i chē kong-lō͘-kio̍k ê chhia khı̀ Tâi-pak.
Chha-put-to tı̄ 10 tiám ê sı̂, Tâi-pak ê kau-thong tng teh toā jia̍t-khai ê sı̂, tı̄ Tâi-pak toā-kiô téng ū chı̍t-ê chhēng pe̍h-saⁿ ê lâng, tiām-tiām khiā-oá tı̄ hit-ê kiô-lân. Iām-jia̍t ê thài-iông ū chiò lo̍h tı̄ i ê sin-chiūⁿ, khiok i lóng bô kiâⁿ. I khiā tı̄ hia iok-lio̍k chiâⁿ tiám cheng-kú, āu-lâi chiū khoàⁿ-kı̀ⁿ i koh kiâⁿ kàu Tām-chúi-khoe piⁿ ê chúi-mn̂g-lō͘ khı̀. I ū tı̄ lō͘-piⁿ ê chhiū-á kha koh khiā beh chiaⁿ tiám-cheng.
I ê khoán-sit tú-tú chhin-chhiūⁿ bô sı̂n-hûn ê lâng ê khoán chin chhiⁿ-chhı̀n.
Hit-ê chhēng pe̍h-saⁿ ê lâng, tı̄ tiong-tàu 12 tiám ū koh chhut-hiān tı̄ Ki-lûn ê chhia-chām chêng. I ū kiâⁿ-jı̍p chı̍t-keng pn̄g-tiàm. I ū tiām-tiām chē tı̄ hit-ê chia̍h-pn̄g ê í, khiok lóng bô tāng-tio̍h só͘ pâi tı̄ bı̄n-chêng ê chia̍h-mı̍h. I chē tı̄ hia iok-lio̍k poàⁿ-tiám-cheng, chiū koh chhut pn̄g-tiàm. Thiⁿ-khı̀ hut-jiân pı̀ⁿ chin o͘-im. Thiⁿ-téng ū o͘-hûn bı̍t-pò͘ tà-oá lâi.
Hit-ê chhēng pe̍h-saⁿ ê lâng ū kiâⁿ kàu káng-kháu ê chúi-gı̂n-teng kha-ē khı̀. Tı̄ hia khiā bô loā-kú i chiū koh kàu tı̄ chı̍t-tè chio̍h-liâu khı̀ chē.
Tùi-hoāⁿ ê lâu-téng ū chı̍t-ê bô-liâu ê hū-jı̂n-lâng teh chù-sı̂n khoàⁿ i. I khoàⁿ-liáu chiū at i ê chńg-thâu-á. “Chha-put-to chı̍t lé-pài bô khoàⁿ-tio̍h in lah. Kàu kin-á-jı̍t chiah koh khoàⁿ-tio̍h, chóng-sı̄ í-keng ū toā kò-iūⁿ, chiū-sı̄ nn̄g-lâng pı̀ⁿ chı̍t-lâng, chóng-sı̄ hit-ê chı̍t-lâng sı̄ hô-téng ê ko͘-toaⁿ, sit-sı̂n.”
Pek-jím ê bı̄n pı̀ⁿ chin chhiⁿ-pe̍h ngē-tı̍t. I chhin-chhiūⁿ tı̄ mı̂-kan teh chò-bāng ê lâng ê khoán ka-kı̄ hong-ba̍t tı̄ hoê-kò͘ ê lāi-bı̄n.
“A-peh ah, hia ū chı̍t-chiah chin toā-chiah-ê toā-chûn, iā ū chı̍t-chiah chin soè-chiah-ê sió-chûn saⁿ-kap tùi hái-nı̍h teh jı̍p-lâi, hit-chiah toā-chûn phah-sǹg sı̄ pa-pa chûn, soè-chiah-ê sı̄ kiáⁿ-chûn, saⁿ-kap kheh-oá teh kiâⁿ.” A-hoa ê oē ho̍k-tò tı̄ i ê sim-lāi. Chóng-sı̄ i iû-goân tı̄ sim-lāi án-ni kóng.
“Āu-lâi hit-chiah kiáⁿ-chûn chiū tı̂m-lo̍h khı̀, chhun hit-chiah toā-chûn, chóng-sı̄ bô lâng chai hit-chiah toā-chûn ê pi-chhám!” Ba̍k-sái beh kō chhut-lâi ê sı̂ Pek-jím kín-kín khiā khí-lâi, chiong ba̍k-sái kiông-kiông thun-lo̍h-khı̀, kiâⁿ kàu lō͘-piⁿ, lâi tà chhia, chē kàu Hô-pêng-tó ê hái-chúi e̍k-tiûⁿ khı̀.
Chha-put-to nn̄g-tiám cheng-kú āu, tú-tú sı̄ ē-po͘ sı̂ ê saⁿ-tiám goā-cheng, tı̄ Hô-pêng-tó ê ke-lō͘ nı̍h, lán beh koh khoàⁿ-tio̍h Pek-jím ko͘-toaⁿ tı̄ hia teh kiâⁿ. I ê kha-pō͘ lóng bô chāi. I tı̄ lō͘-piⁿ ū khioh chı̍t-ki chhoê teh chò koáiⁿ, i ê bı̄n toà-tio̍h ke̍k-toā ê iu-siong choa̍t-bāng, chhin-chhiūⁿ sit-sı̂n ê lâng teh chı̀n-hêng i ê lō͘. I ka-kı̄ iā í-keng m̄-chai iáⁿ i tı̄ sím-mı̍h só͘-chāi, koh beh khı̀ sím-mı̍h só͘-chāi. I ê chhùi khui-khui, ba̍k-chiu ū ta bô liáu ê ba̍k-sái, thâu-mn̂g hō͘ hong phah kàu sàm-sàm.
Thiⁿ-téng oân-choân lóng chhin-chhiūⁿ boâ-ba̍k chı̍t-iūⁿ o͘ ba̍k-ba̍k, tı̀-kàu ke-lō͘ iā lóng chin àm. Hn̄g-hn̄g ū thiaⁿ-kı̀ⁿ lûi ê siaⁿ teh kı̄n-oá lâi. Ū kiông-lia̍t ê hong teh chhoe-lâi, í-keng iā ū sè-hō͘ teh lo̍h lah.
“Teh beh chò toā-hō͘ ê khoán!” Ū lâu-téng ê lâng án-ni kóng lâi kín-kín teh koaiⁿ in ê thang.
Hong ū sàu-tó nê-saⁿ ê tek-ko kap chhāi tı̄ tiàm-kháu ê pâi-pián, ke-ke hō͘-hō͘ ê lâng lóng cháu chhut-lâi teh siu in tı̄ goā-bı̄n ê mı̍h-kiāⁿ.
Hō͘ í-keng chin chho͘ lah, ke-lō͘ ê lâng lóng teh cháu lah, ū saⁿ-lián-chhia, ū hoè-mı̍h chhia, lóng teh cháu.
Nā-sı̄ Pek-jím lóng bô piàn-oāⁿ i ê kha-pō͘, i iû-goân bān-bān-á tı̄ hit-ê o͘-hûn kip-kò, soè-hō͘ biân-bı̍t ê ke-lō͘ siōng, chhùi khui-khui, bı̄n ǹg chêng-bı̄n, ná kiâⁿ ná thêng teh chı̀n-hêng. I ê siōng-poàⁿ-sin í-keng hō͘ sè-hō͘ ak-tâm khı̀ lah.
I thêng tı̄ chı̍t-chām ê só͘-chāi ê sı̂, hut-jiân ū thiaⁿ-tio̍h chı̍t-ê hū-jı̂n-lâng teh gı̂m-si ê siaⁿ-im chhin-chhiūⁿ tùi téng-koân hiáng lâi. I tāi-seng lóng bô kám-kak sı̄ sím-mı̍h, chóng-sı̄ kı̂-tiong ê chı̍t kù-oē “Kiù goá!” Ū kiò-chhíⁿ Pek-jím kàu-tı̄ hiān-sı̍t. I chiū kiâⁿ oá tı̄ lō͘-piⁿ ê chiûⁿ-piah, chiong i ê sin-khu lâi thoè oá tı̄ hit-ê, lâi thiaⁿ hit-ê si-siaⁿ.
“Goá ê Siōng-tè, kiû Lí kiù goá, chín-kiù goá, Ou-àm, thòng-khó͘ ná toā-chúi beh im-ba̍t goá ê sı̀ⁿ-miā, Goá hām-lo̍h tı̄ chhim thô͘-bê-tiong bô-ūi khiā-khí, Jı̍p tı̄ chhim-chúi lāi kiû-kiò goá Chú miâ.
Goá in-ūi goá ê âu-kiò tı̀-kàu ià-siān, Goá in-ūi thèng-hāu goá ê Siōng-tè ba̍k-chiu hoe-khı̀,Kiû Lí m̄-thang hō͘ hiah-ê chhoē Lí ê lâng kiàn-siàu, M̄-thang ng-ba̍t Lí ê bı̄n m̄ khoàⁿ goá.
Goá tı̄ hoān-lān ê sı̂, Lí sı̄ goá ê Siōng-tè, Ko͘-toaⁿ siū khı̀-sak ê sı̂ Lí chò goá ê ǹg-bāng, Goá ê bı̄n ǹg thiⁿ koâiⁿ só͘-chāi chhoē goá an-ùi, Goá tán-hāu Siōng-tè chín-kiù sim bô hoe.” (詩篇69, Chok-chiá ū chit-ê si-tiāu)
Hū-jı̂n-lâng ê siaⁿ-im chin pi-chhiat. Pek-jím sûi-sı̂ sióng-siōng kàu tı̄ chit-ê lâu-téng lâu ba̍k-sái, kı̂-tó ê lâng. Ū chı̍t-chióng kng-bêng hoaⁿ-hí ê sim toè chit-ê siaⁿ-im chı̀n-kàu tı̄ Pek-jím ê sim-lāi lâi.
Hō͘-chúi ū sip-tâm i ê thâu-mn̂g, koh soà lâu-lo̍h tı̄ i ê bı̄n, khiok i chin gông-ngia̍h lâi khiā tiàm tı̄ hit-ê chhiûⁿ-piⁿ. Ū chı̍t-ê kı̂-biāu ê lêng-la̍t khai-sí piàn-oāⁿ i ê sim-lāi, hit-ê lêng-la̍t ū tı̄ i ê sim-lāi lâi kiò-chhíⁿ lēng-goā ún-chông tı̄ i ê sim-té iáu koh chı̍t-chióng ê sim khí-lâi. Ū chı̍t-chióng ǹg-bāng ê kng khai-sí chiò-jı̍p tı̄ i ê sim-lāi, chit-ê sin ê hoaⁿ-hí ū hō͘ Pek-jím lâu ba̍k-sái chhut-lâi.
I ēng chhiú hoāⁿ hit-ê piah-chhiûⁿ lâi beh chhoē-khoàⁿ ū mn̂g thang jı̍p hit-ê chhiûⁿ-lāi á-bô.
I kiâⁿ kàu mn̂g-kháu ê sı̂ chiah hoat-kak hit-ê sı̄ lé-pài-tn̂g ê toā-mn̂g. Pek-jím chhim-chhim kám-tōng, koh in-ūi hit-ê sı̄ lé-pài-tn̂g lâi chin kám-siā Siōng-tè ê an-pâi. I ū jı̍p lé-pài-tn̂g ê mn̂g lâi kiâⁿ kàu chiàⁿ-mn̂g khı̀, khiok hit-ê chiàⁿ-mn̂g ū koaiⁿ khí-lâi, chóng-sı̄ Pek-jím chı̍t-sim ài beh jı̍p khı̀, chiū bô loé-chı̀ lâi chhoē piⁿ-kak ê mn̂g.
Chin kai-chài, ū chı̍t-ê piⁿ-kak ê mn̂g tú-tú khui-teh, Pek-jím chiū jı̍p-khı̀. Lāi-bı̄n chin an-chēng lóng bô lâng ê khoán. Pek-jím chiū chhoē i pêng-siông kap A-hoa teh chē ê ūi. I ēng chhiú lâi bong, ū chı̍t-ê kek-tōng tı̄ i ê sim-lāi hō͘ i choân-sin lóng phı̄-phı̄-chhoah.
I chhoē-tio̍h in ê ūi ê sı̂, chiū chiong choân-sin hiat-lo̍h lâi kūi tı̄ hit-ê thô͘-kha siang-chhiú ha̍p-oá, khoè tı̄ í-koáiⁿ, thâu-khak phak tı̄ siang-chhiú ê lāi-bı̄n lâi thı̂-khàu. I m̄-káⁿ háu chhut-siaⁿ, chí-ū ba̍k-sái toā-lia̍p soè-lia̍p lâu chhut lâi sip-tâm i ê bı̄n.
“Goá ê Siōng-tè ah, goá ê Siōng-tè ah!” Lí chhiúⁿ goá it-chhè ê it-chhè!! Goá boē chhut-sı̀ Lí tio̍h ēng put-hēng, pi-chhám tiāⁿ goá ê miā-ūn. Tı̄ goá ê lāi-bı̄n ū sím-mı̍h oa̍h ê ǹg-bāng, tû-khı̀ Lí. Chhiáⁿ Lí hō͘ goá chai lí ê chí-ı̀!! “Pek-jím tı̄ ba̍k-sái tiong lâi án-ni soè-siaⁿ kı̂-tó, kàu tı̄ ba̍k-sái lóng piàⁿ-liáu ê sı̂, i kám-kak i ê sim chin khin-sang, pêng-an, chhin-chhiūⁿ beh gı̂m-si chhut-lâi ê sim-toē, sū-sı̍t bô ū sím-mı̍h hō͘ i jím-siū boē-khí ê khoán. Chóng-sı̄ i sûi-sı̂ kám-kak i í-keng chin ià-siān lah. Pek-jím tı̄ bô-ı̀ bô-sek ê tiong-kan soà khùn-khı̀.
Bô-loā-kú tı̄ bı̂n-bāng-tiong i ū bāng-kı̀ⁿ A-hoa lâi kàu i ê bı̄n-chêng kóng.
“Pa-pa, kin-á-jı̍t sı̄ lé-pài-jı̍t, lán soà boē kı̀-tit thang khı̀ chò lé-pài!” A-hoa ū án-ni tio̍h-kiaⁿ ê khoán.
“Ah, ū-iáⁿ! Lán á-chai sı̄ án-choáⁿ, soà liân lé-pài iā boē kı̀-tit! Lı̄-lı̄, lí kín-kín chún-pı̄ lán thang koáⁿ-kín lâi khı̀, hù khoàⁿ oē-tio̍h á-boē!!” In nn̄g-lâng chiū saⁿ-chhoā lâi cháu chı̍t-tiâu bô lâng kiâⁿ ê toā-lō͘. “Pa-pa, goá ū thiaⁿ-tio̍h pài-tn̂g ê cheng teh tân!” “Lé-pài í-keng beh khai-sí lah, khiok lán ê lō͘ iáu-kú chin-hn̄g!” Āu-lâi Pek-jím ū khoàⁿ-tio̍h A-hoa tı̍t-tı̍t cháu chò-chêng khı̀.
“Pa-pa, koáⁿ-kín cháu lâi lah!” Tùi hn̄g-hn̄g ū A-hoa ê siaⁿ teh kiò i. Chóng-sı̄ Pek-jím ná-cháu ná-bān, i chiū siūⁿ kóng beh ēng poe--ê, chhin-chhiūⁿ chiáu-á chı̍t-iūⁿ, kó-jiân i chı̍t-ê chhut-la̍t, i ê sin-thé ū phû tı̄ khong-tiong, khiok poe-liáu boē koân. Hit tiâu toā-lō͘ ū pe̍h-hûn pau-ûi teh, hō͘ i khoàⁿ bô A-hoa.
“Li-ki!” I ná kiò, chiū koh hián-chhut tı̄ hit-ê hûn-hái hn̄g-hn̄g ê chêng-bı̄n.
“Pa-pa, goá tı̄ chia lah, kín lâi lah!” Hiah-ê hûn-hái ná-piàn ná o͘-àm, āu-lâi soà tı̄ àm-hûn ê lāi-bı̄n oân-choân chhoē-bô A-hoa, Pek-jím bô koh chı̀n-chêng lah.
I chí-ū khiā tı̄ hit-ê o͘-àm ê hûn-hái tiong teh ho͘-kiò A-hoa, Pek-jim kám-kak chin tio̍h-kip, put-an, i ê sim khai-sí toā pé-pa̍k.
Hut-jiân Pek-jím ū khoàⁿ-tio̍h tı̄ o͘-àm tiong ū chı̍t-tiâu kng-bêng ê soàⁿ, tùi hui-siông hn̄g ê bı̄n-chêng chiò siā lâi. Hit tiâu kng ná-toā ê sı̂, hiah-ê o͘-hûn lóng siau-soàⁿ, thoè-bô khı̀.
Hit-ê kng tı̍t-tı̍t siā Pek-jím ê ba̍k-chiu, Pek-jím kàu-boé soà ēng chhiú lâi jia-khàm i ê ba̍k-chiu.
Thêng tia̍p-á-kú, i soá chhiú lâi thau-khoàⁿ ê sı̂, i ū khoàⁿ-tio̍h chêng-bı̄n hn̄g-hn̄g ê só͘-chāi ū phû-chhut chı̍t-chō hui-siông bí-lē, chòng-toā ê siâⁿ. Tùi hit-ê siâⁿ ū êng-kng hoat-chhut chiàu-iāu sı̀-ûi. Pek-jím ê sim hui-siông hoaⁿ-hí. I m̄-sı̀n i ê ba̍k-chiu oē-thang khoàⁿ-tio̍h hiah súi ê kong-kéng. I kín-kín ǹg hit-ê siâⁿ lâi tı̍t-cháu.
Tı̄ hit-ê siâⁿ ê goā-bı̄n ū chin toā koh koân ê chhiûⁿ, lóng sı̄ ēng phek-ge̍k lâi chō ê. Tı̄ hit-ê siâⁿ-chhiûⁿ ê toā-mn̂g téng ū jı̄ khek tı̄ hia, chiū-sı̄, “Thiàⁿ ê ông-kok.”
Hit-ê siâⁿ chhin-chhiūⁿ thàu-bêng ê po-lê, koh chhin-chhiūⁿ sûn-kim lâi chō ê, chin-chiàⁿ súi. Hit-ê kng-bêng chhin-chhiūⁿ pó-ge̍k ê kong-hui, kng-siám-siám siā tı̄ siâⁿ-lāi kap siâⁿ-goā.
Pek-jím kiâⁿ-kı̄n hit-ê siâⁿ ê sı̂, koh khoàⁿ-tio̍h tı̄ hit-ê siâⁿ ê sı̀-ûi ū chı̍t-tiâu chhut ian-bū ê toā-hô ûi-teh. Hô ê chúi chhiⁿ-le̍k-le̍k, koh léng-chhı̀n-chhı̀n, chhin-chhiūⁿ bô lâng ū hoat-tō͘ thang keng-kè ê khoán.
Pek-jím chin sit-bāng, lâi khiā tı̄ hia, kè-sio̍k lâi koan-chhat hit-ê Bí-lē ê siâⁿ.
Hut-jiân siâⁿ ê chı̍t-ê mn̂g khui khí-lâi, ū chin-toā ê kng koh siā chhut-lâi. Hit-ê siâⁿ-lāi êng-kng chhàn-lān, chhin-chhiūⁿ sı̄ chı̍t-ê bô-jia̍t ê hoé-hái.
Pek-jím tı̄ hit-ê toā-kng ê lāi-bı̄n ū khoàⁿ-tio̍h chı̍t-ê pó-chō, ū toà-tio̍h chhin-chhiūⁿ phek-ge̍k kap âng-bé-ló ê chun-kùi kap êng-kng ê ông chē tı̄ hit téng-bı̄n, tı̄ pó-chō ê sı̀-ûi ū le̍k-ge̍k ê chhái-khēng ûi teh. Choân-siâⁿ ê kng lóng sı̄ tùi pó-chō ê ông só͘ hoat-chhut lâi ê. Hit-ê kng iā chhin-chhiūⁿ sih-nà ê tiān-kng chı̍t-poaⁿ. Tı̄ pó-chō chêng ū chúi-chiⁿ ê po-lê hái. Ū chheng-chheng bān-bān, sǹg boē-chı̄n ê toā kûn-chiòng, lóng chhēng pe̍h-saⁿ, chhiú gia̍h chang-chhiū-hio̍h, pâi-lia̍t tı̄ hit pó-chō chêng teh chàn-bí, o-ló, kèng-pài hit-ê êng-iāu ê ông.
Hit-ê chheng-chàn ê siaⁿ-im, chhin-chhiūⁿ hái-éng hoā-hoā háu. Tùi chúi-chiⁿ ê po-lê hái ū chı̍t-tiâu toā-hô lâu tı̄ siâⁿ ê tiong-ng. Tı̄ hô ê lióng-pêng lóng ū chin-súi ê ké-chí-chhiū. Tùi pó-chō ū 12 tiâu toā-lō͘ thàng kàu tı̄ 12 ê toā-mn̂g khı̀. Hiah-ê ke-lō͘ lóng sı̄ pho͘ kim ê. Lāi-bı̄n ê lâng lóng sı̄ chhēng pe̍h-saⁿ. Tı̄ ke-lō͘, tı̄ hô-piⁿ, tı̄ chhiū-kha, lóng ū moá-moá ê lâng tı̄ hia, ǹg pó-chō teh o-ló. O-ló ê siaⁿ pêng-chēng liáu-āu, ū chı̍t-ê siaⁿ tùi pó-chō hoat-chhut, kóng, “Lí khoàⁿ, Siōng-tè ê hoē-bō͘ tı̄ lâng ê tiong-kan, Siōng-tè beh kap in saⁿ-kap khiā-khí, in beh choè I ê peh-sı̀ⁿ, Siōng-tè pún-sin beh kap in tı̄-teh, lâi choè in ê Siōng-tè. Koh beh kā in ê ba̍k-chiu chhit-khı̀ lóng-chóng ê ba̍k-sái, bô beh koh ū sí-sit, iā bô koh ū ai-siong, âu-kiò, thàng-thiàⁿ, chêng ê tāi-chı̀ í-keng kè-khı̀.”
“Lóng bô koh ū chiù-chó͘, sı̄ Siōng-tè kap Iûⁿ-ko ê chō-ūi beh toà tı̄ hia. I ê lô͘-po̍k beh ho̍k-sāi I, iā beh khoàⁿ-kı̀ⁿ I ê bı̄n. Koh I ê miâ tı̄ in ê thâu-hia̍h.”
“Bô koh ū mı̂-sı̂, iā bô khiàm-ēng teng ê kng kap jı̍t ê kng, in-ūi Chú Siōng-tè beh chiò-kng in.” Hit-ê siaⁿ kóng liáu-āu tı̄ peh-sı̀ⁿ ê tiong-kan ū koh hoat-chhut chin-toā ê o-ló, kóng, “Sèng-chài, Sèng-chài, Sèng-chài. Chú Siōng-tè, choân-lêng ê, chá tı̄-teh, hiān-chāi tı̄-teh, chiong-lâi tı̄-teh ê. Lí kham-tit siū êng-kng, chun-kùi, koân-lêng, in-ūi Lí bat chhòng-chō bān-mı̍h, bān-mı̍h tı̄-teh, bān-mı̍h siū chhòng-chō, lóng sı̄ tùi Lí ê chí-ı̀.” Hiah-ê peh-sı̀ⁿ toā hoaⁿ-hí, chàn-bí ê siaⁿ ū tín-tāng siâⁿ-lāi. Lâng-lâng lóng gia̍h chang-chhiū-hio̍h koâiⁿ-koâiⁿ, lâi toā ha̍p-chhiùⁿ.
Pek-jím khoàⁿ-tio̍h A-hoa tı̄ hit-ê êng-kng ê lāi-bı̄n, lām-cha̍p tı̄ tāi-chiòng ê tiong-kan, bı̄n toā hoaⁿ-hí, ǹg tùi Pek-jím chia lâi. A-hoa í-kı̍p hiah-ê lâng hoaⁿ-hí ê bı̄n hō͘ Pek-jím toā hoaⁿ-hí, tı̄ i ê sim-lāi ū kóng boē hiáu-tit ê kek-tōng kàu tú boē-tiâu hō͘ i an-chēng.
“Lı̄-lı̄! Lı̄-lı̄! Lı̄-lı̄!” Pek-jím ū chông khí-lâi, i ê thâu-khak ū cheng-tio̍h í, i chiū bêng-pe̍k i sı̄ khùn tı̄ pài-tn̂g lāi. Chóng-sı̄ hit-ê hoaⁿ-hí ê kek-tōng lóng bô siau-bia̍t khı̀. I ū kè-sio̍k peh khí-lâi cháu kàu lé-pài-tn̂g ê āu-bı̄n khı̀.
I ēng phı̄-phı̄-chhoah ê chhiú lâi khui hit-ê chiàⁿ-bı̄n ê toā-mn̂g. Mn̂g chı̍t-ē khui, goā-bı̄n goân-lâi teh chò toā-hō͘. Thiⁿ chhin-chhiūⁿ teh piàⁿ toā-chúi ê sè, toā-hō͘ kheng-phûn, hō͘ chéng-kô ê káng-to͘ chı̀m tı̄ toā-hō͘ ê lāi-bı̄n.
Ū toā-lûi toè-āu teh phah. Lûi-kong, sih-nà, khiⁿ-khēⁿ háu lâi ui-hia̍p, kiaⁿ-chhíⁿ chit-ê káng-to͘. Goā-bı̄n lóng bô khoàⁿ-tio̍h poàⁿ-ê lâng teh kiâⁿ, liân káu-á ê iáⁿ to bô, pō-ú hō͘ it-chhè ê hiān-siōng lóng bông-bū khı̀.
Pō-ú hō͘ it-chhè ê hiān-siōng lóng bông-bū khı̀. Khiok Pek-jím tı̄ chit-ê kiông-hong, po̍k-ú, toā-lûi ê lāi-bı̄n, lóng bô kám-kak sím-mı̍h ê khoán lâi tı̍t-tı̍t cháu chhut pài-tn̂g goā khı̀. I ê koáiⁿ-á iā pàng bô khı̀ lah. I ê choân-sin lóng oân-choân kap tı̄ chúi-lāi bô kò-iūⁿ lah.
“Lı̄-lı̄! Lı̄-lı̄! Lı̄-lı̄!” I kè-sio̍k án-ni kiò lâi cháu hit-ê toā-hō͘ ê lō͘.
Ū chin-toā ê hoaⁿ-hí kap kún-ká tı̄ i ê sim-lāi. I ê choân-sin thang kóng lóng sı̄ hō͘ ǹg-bāng kap hoaⁿ-hí chiàm-moá, lóng bô ū pa̍t-ê toē-pō͘.
I ū cháu-jı̍p toā-hō͘ ê lāi-bı̄n lâi bô khoàⁿ-tio̍h. Ū lûi-kong ê tiān-kng phah-lo̍h lâi, lâi koh chiò-chhut i ê sı̂, i í-keng cháu-kàu chin hn̄g ê só͘-chāi khı̀ lah.
Toā-hō͘ koh chı̍t-pái am-ba̍t lóng-chóng ê mı̍h, khiok tùi hn̄g-hn̄g ū thiaⁿ-tio̍h chı̍t-ê jia̍t-kông ê siaⁿ teh jióng.
“Ū chı̍t-ê ông-kok kiò-chò thiàⁿ!” Āu-lâi bô-chêng ê hō͘, liân it-chhè ê siaⁿ-im iā thun-bia̍t khı̀.
(oân)
