Chá chhíⁿ-gō͘ bê-lō͘
Ū lâng ēng thih-ki chò khı̀-kū, hē jı̄ teh tng niáu-chhú, hit-hō-mı̍h kiò-chò thih-niau. Tı̄ bó͘ só͘-chāi ê tiàm-chú, i lāi-bı̄n niáu-chhú chin chē , chiū chiong thih-niau lâi tng; kàu mı̂--sı̂ kui-kûn ê niáu-chhú it-tio̍h beh chia̍h jı̄ chiū jı̍p--khı̀, oa̍h-kúi chı̍t-ē tín-tāng, mn̂g ka-tı̄ koaiⁿ,lóng bô lō͘ thang cháu-chhut--khı̀. Hiah-ê niáu-chhú chiū hoā-hoā-háu, chò-hoé teh gı̄-lūn kóng, lán tāi-ke án-cháiⁿ-iūⁿ lâi kàu chia mah ? Chiông-tiong chı̍t-chiah teh kóng, goá khoàⁿ-kı̀ⁿ ū mı̍h chiū jı̍p--lâi, mn̂g soà koaiⁿ--khı̀, só͘-í bē-tit chhut. Koh chı̍t-chiah kóng, goá kan-ta kò͘ ba̍k-chiu-chêng ê jı̄ , m̄-chai cháiⁿ-iūⁿ thài-ē lâi chia. Koh chı̍t-chiah kóng, án-cháiⁿ-iūⁿ kàu chit só͘-chāi, goá chin-chiàⁿ siūⁿ bē -hiáu--tit. Koh chı̍t-chiah kóng, kàu to kı̀-jiân kàu, chhiáⁿ lâi chia̍h chiah- ê jı̄ chiū hó lah ! Koh chı̍t-chiah chhám-pe̍h-sek ê lāu-niáu-chhú iu - thâu ba̍k-kat loā-kú, lián-pe̍h-chhiu thó͘-khùi kóng , lín m̄-bián án-ni lō-lō-háu loān -loān-piān, lóng sı̄ bô lō͘-ēng. Taⁿ í-keng kàu chia lah ! Nā beh piān khoàⁿ tùi tah-lo̍h jı̍p--lâi, m̄-ta̍t-tio̍h siūⁿ khoàⁿ cháiⁿ-iūⁿ chiàⁿ ē-tit chhut--khı̀, sı̄ khah hó lah !
Tiàm-chú thiaⁿ-kı̀ⁿ chiū thó͘-khùi kóng, Kui-tı̄n niáu-chhú jı̍p-khı̀ lah ! In it-tio̍h chia̍h , m̄ bē -kı̀-tit kò͘ seng-khu. Hit-chiah lāu-niáu-chhú só͘ kóng--ê chai tô͘-bô͘ chhut , m̄ m̄-chai tiuⁿ-tı̂ jı̍p . Taⁿ sè-kan-lâng tham gán-chiân ê châi -lı̄ , m̄ bô kò͘-tio̍h āu-lâi ê hō -toan, chiū-sı̄ chhin-chhiūⁿ án-ni . Só͘- í sio̍k-gú kóng, “Kun-chú ê lâng beh kín-sı̄n lō͘-boé, m̄-ta̍t-tio̍h kín-sı̄n khí-thâu. ” Sèng-keng iā kóng, “ Ū tı̀-sek ê lâng, tāi-seng chai lâi siám-pı̄ hām-hāi ; gōng-ê-lâng , chı̀n-chêng khı̀ , tú-tio̍h hêng-hoa̍t .”
(Tâi-lâm Hú-siâⁿ Kàu-hoē-pò tē 91 koàn, 1892 nı̂ 11 ge̍h)