Châi tēng jı̂n phín

Tı̄ Sai-kok ū lâng ēng kı̂-koài ê chheh. Chí-ū sı̀ bı̄n, ia̍h bô kı̀-chài jı̄.

Thâu-chı̍t-bı̄n sı̄ o͘.

Tē-jı̄-bı̄n sı̄ âng.

Tē-saⁿ-bı̄n sı̄ pe̍h.

Tē-sı̀-bı̄n sı̄ kim.

Tı̄ A-hui-lı̄-ka ê pak-pêng ū siat Iâ- so͘-kàu. Tı̄-hia ū sian-seⁿ siông-siông ēng hit-ê Bô-jı̄-ê-chheh kà-sı̄ m̄-bat tō-lí pún- tē ê lâng. Chiông-tiong ū chı̍t-lâng lio̍h- á thiaⁿ-kı̀ⁿ hit-pún-chheh ê ı̀-gı̄. I gâu hau-la̍k, koh sı̄ gōng-lâng, nā-sı̄ chng chò toā tı̀-sek. Tng tú-tio̍h chı̍t-ê pêng-iú chiū hó-táⁿ pò i chai Bô-jı̄-ê-chheh ê ı̀-sù.

I kóng, "Taⁿ, lí khoàⁿ, chit-ê o͘-bı̄n sı̄ phı̀-jū Iû-thài-lâng in-ūi in-ê sim sı̄ chin káu-khiat, lóng-chóng sı̄ o͘-àm.”

"Ia̍h chit-ê tē-jı̄-bı̄n, âng--ê, sı̄ chí Ki- tok-tô͘".

Pêng-iú kóng, "Káⁿ-sı̄ Ki-tok-tô͘ m̄-sı̄ âng."

Phín-phóng lâng ı̀n kóng, "Tı̄ goā bı̄n khoàⁿ khiok bô, chóng-sı̄ tı̄ lāi-bı̄n ū. Lí kiám m̄-bat khoàⁿ-kı̀ⁿ in-ê jia̍t-sim? Sı̄ tú-tú chhin-chhiūⁿ hoé âng-ki-ki! Án- ni-seⁿ hit-ê âng-bı̄n sı̄ phı̀-jū Ki-tok-tô͘."

"Koh, chit-ê tē-saⁿ-bı̄n, pe̍h--ê, sı̄ chí goá ka-tı̄ ê sim, choan-choan sı̄ pe̍h-pe̍h ná seh chı̍t-iūⁿ".

"Iū chit lō͘-boé-bı̄n, chiū-sı̄ kim, sı̄ chí Ki-tok-tô͘ só͘ toā tham ê mı̍h".

Tâi-oân kàu-hoē ê lâng tha̍k chit-chat- sū kàu chia, lín í-keng ū siūⁿ-chhut hit- pún-chheh ê ı̀-gı̄ á-bô? Kiaⁿ-liáu ū lâng siūⁿ bē chhut, taⁿ beh lio̍h-á ké-bêng. Bô-jı̄-ê-chheh sı̄ piáu-bêng tit-kiù ê sū.

Ou-bı̄n sı̄ phı̀-jū choē, chèng-lâng ê sim goân-pún ê o͘-àm.

Âng-bı̄n sı̄ phı̀-jū Iâ-so͘ ê hoeh, kò͘-ı̀ ū lâu-chhut lâi sio̍k-choē.

Pe̍h-bı̄n sı̄ phı̀-jū chheng-khı̀ ê sim, sı̄ í-keng hō͘ Siōng-tè tùi lāi-bı̄n tû-khı̀ choē.

Kim-bı̄n sı̄ phı̀-jū thian-tông ê êng- kng, chiū-sı̄ sı̀n Chú ê lâng beh hióng- siū--ê.

Iû-goân tı̄ téng-bı̄n kóng hit-ê tē-hng ū chı̍t-ê chò lô͘-po̍k ê gín-ná bat khoàⁿ- kı̀ⁿ hit-ê Bô-jı̄-ê-chheh. Pí hit-ê phín- phóng ê lâng i khah ē-hiáu-tit hit-pún- chheh ê ı̀-sù. Gín-ná ê miâ sı̄ Ma-ka-ba. Ū chı̍t-ê Sai-kok ê ko͘-niû toà tı̄-hia kà- sı̄ siàu-liân lâng. In kiò i Ma-ma.

Ū chı̍t-ê Pài-jı̄ mê-hng ha̍k-seng lóng ū khı̀-khùn. To̍k-to̍k Ma-ka-ba iáu-boē ū. I teh khoà-lū i-ê choē ê tāi-chı̀. Sui- jiân sı̄ sè-hàn i siông-siông teh chò m̄- tio̍h, hō͘ lâng chek-pı̄ i. In-ūi thiaⁿ-kı̀ⁿ sio̍k-choē ê tō-lí kàu jı̍p-sim i ài chò koh- iūⁿ ê lâng, só͘-í hit mê-hng ū beh mn̄g chı̍t-kù, chiū tùi ko͘-niû kóng, "Ma-ma, goá siáⁿ-sū m̄-sı̄ Ki-tok-tô͘?" Ko͘-niû siông-sè kà-sı̄ i, chóng-sı̄ i-ê sim iáu-boē pêng-an. Āu-lâi ū khı̀ khùn.

Hit lé-pài ê tiong-kan i sit-sı̂n sit-sı̂n. Kàu Lé-pài-jı̍t Chú-jı̍t-o̍h pàng-hē ū kı̂-tó-hoē. Ū gō͘-lâng thèng-hāu, chiông- tiong sı̄ Ma-ka-ba. Kàu soah Ma-ka-ba bô kap pa̍t-lâng sı̀-soàⁿ. I chiū kóng, "Ma-ma, goá chin-ài toè Iâ-so͘". Ko͘- niû koh-chài kà-sı̄ i, chóng-sı̄ i-ê sim iû- goân bē-chheng.

In-ūi ko͘-niû tio̍h khı̀ pa̍t-ūi i ū chiong chı̍t-tiuⁿ ang-á-tô͘, sı̄ piáu-bêng Iâ-so͘ tı̄ sı̍p-jı̄-kè siū sí, chhiáⁿ hō͘ Ma-ka-ba khoàⁿ, chiū chhut-khı̀ lâu i tiàm tı̄ pâng--nı̍h. Gín-ná ta̍uh-ta̍uh siòng hit-ê ang-á ná- chhin-chhiūⁿ teh toā siàu-liām Iâ-so͘ thè ū-choē ê lâng siū sí.

Koh bô-loā-kú Ma-ka-ba khoàⁿ-kı̀ⁿ ko͘- niû tı̄ goā-bı̄n, chiū khí-lâi khı̀ chiū-kı̄n i lâi kóng, "Ma-ma, chhiáⁿ lí koh kà-sı̄ goá sı̀n kap thiàⁿ-thàng Iâ-so͘". Ko͘-niû bêng-bêng pò i chai hok-im, chiū tı̄ chhiū-kha kap i saⁿ-kap kı̂-tó. Tú-tú tı̄ hit-sı̂ i tit-tio̍h hiáu-gō͘, chiū tùi ko͘-niû kóng, "Ma-ma, taⁿ goá sı̀n Iâ-so͘".

Ma-ka-ba sûi-sı̂ chhim-tı̂m hoaⁿ-hí. Jiân-āu i tú-tio̍h toā chhı̀-liān, ia̍h ū-sı̂ chò m̄-tio̍h, chóng-sı̄ liâm-piⁿ hoân-ló i- ê choē kiû Siōng-tè sià-bián.

Hoān-nā tha̍k téng-bı̄n kı̀-chài Ma-ka-ba ê tāi-chı̀, lí ū hoân-ló choē, sı̀n Iâ-so͘, lâi tit-tio̍h kiù, iā-bô? Nā bô, sı̄ cháiⁿ-iūⁿ?

(Tâi-lâm Hú-siâⁿ kàu-hoē-pò tē 102 koàn, 1893 nı̂ 9 ge̍h)