Chí-ū chı̍t kho͘-gûn

Iok-lio̍k tı̄ 100 goā nı̂ chêng, tı̄ Bí-kok lâm-pō͘ chhiⁿ-chhùi ê chháu-po͘ kap soaⁿ-lûn-á, ū khí chin-choē lé-pài-tn̂g. Iah hit sı̂ lé-pài-tn̂g ê mn̂g siông-siông lóng bô koaiⁿ, sı̄ beh ūi-tio̍h chiau-thāi tùi hn̄g lō͘ lâi ê lú-kheh, thang toà tı̄ hia lâi hioh mı̂. Taⁿ, ū chı̍t jı̍t, tı̄ chı̍t ê jı̍t-thâu chiām-chiām beh lo̍h-soaⁿ ê hông-hun-àm, tāi-ke lóng chún-pı̄ beh tńg-khı̀ chhù-nih hioh-mı̂ ê sı̂, ū chı̍t ê ta-po͘ gín-ná ba̍k-thâu kat-kat, thâu-khak lê-lê, ná chhin-chhiūⁿ hui-siông ià-siān ê khoán, i ēng chin kan-khó͘ ê kha-pō͘ kiâⁿ lâi chit keng lé-pài-tn̂g. Chit ê gín-ná ê miâ kiò choè Tek-sêng. I ê chiàⁿ-chhiú chhah tı̄ khò͘-tē-á teh bong i só͘ chhun ê chı̍t kho͘-gûn. In-ūi i chit-chūn só͘ chhun ê châi-sán chí-ū chit chı̍t kho͘-gûn kap chı̍t pau saⁿ, í-goā lóng bô pa̍t hāng mı̍h lah. I toà chiah ê châi-sán chhut-goā, ǹg-bāng oē thang chhē-tio̍h kang-chok lâi tō͘-oa̍h. Chóng-sı̄ bô phah-sǹg, tng i tı̄ lō͘-tiong teh kiâⁿ ê sı̂, hut-jiân ū chı̍t ê pháiⁿ liām-thâu chı̀n-jı̍p i ê sim lāi, i siūⁿ kóng: “Tı̄ lé-pài-tn̂g kiám m̄-sı̄ ū 4 ki chin súi ê gûn teng tâi mah? Che sı̄ tùi hn̄g-hn̄g ê Au-chiu ūn-poaⁿ lâi ê, chin ta̍t chı̂ⁿ, kim-mı̂ goá nā tán bô lâng ê sı̂, kā i thau-the̍h lâi boē, goá kiám m̄-sı̄ oē thang kè chı̍t-ê chin khoài-lo̍k ê seng-oa̍h mah?” Tú-hó i án-ni teh siūⁿ ê sı̂, bô phah-sǹg í-keng kiâⁿ kàu lé-pài-tn̂g ê toā mn̂g-kháu lah. Tú tı̄ hit sı̂, lé-pài-tn̂g ê cheng-siaⁿ teh toā tân, chit ê gín-ná Tek-sêng iā kap lâng choè-tı̄n jı̍p-khı̀ lé-pài-tn̂g beh choè àm-sı̂ ê lé-pài. I in-ūi bô se̍k-sāi ê lâng, só͘-í chē tı̄ āu-bı̄n. Tng i gia̍h-thâu khoàⁿ káng-tâi téng ê sı̂, i ê ba̍k-chiu chiū pı̀ⁿ-choè chin toā lúi, in-ūi i khoàⁿ-tio̍h hit 4 ki hui-siông súi ê gûn teng-tâi tú-hó tiám 4 ki teh to̍h ê la̍h-tiâu. Só͘-í Tek-sêng ná khoàⁿ chiū ná kah-ba̍k. Tng lé-pài soah, lâng lóng tńg-khı̀ ê sı̂, i chiū lâu tı̄ lé-pài-tn̂g, chē tı̄ í-á téng. Tng i khoàⁿ bo̍k-su kiâⁿ oá-lâi ê sı̂, i chiū ké hah-hı̀, ná chhin-chhiūⁿ chin ài khùn ê khoán-sit. Bo̍k-su khoàⁿ-tio̍h án-ni, chiū mn̄g i kóng: “Gín-ná, gín-ná, lí kim-mı̂ beh tı̄ chia hioh mı̂ mah?” Tek-sêng ı̀n kóng, “Sı̄ lah, in-ūi goá bô só͘-chāi thang khı̀ lah.” Bo̍k-su chin tông-chêng i, só͘-í chiū ēng chin un-jiû ê siaⁿ kā i kóng: “Goān Siōng-tè pó-hō͘ lí!” kóng soah chiū hoan-hù lâng chhoā i khı̀ khùn. Hit ê chhoā i khı̀ khùn ê gín-ná chhiú gia̍h chı̍t ki teng-hé teh chhiō lō͘, thoè i chhu bı̂n-chhn̂g liáu-āu, sûi-sı̂ lı̄-khui hit só͘-chāi. Tng chit ê gín-ná lı̄-khui liáu-āu, chhù-lāi chiū chhun chı̍t ki teng-hé ê hé-chhiⁿ teh tín-tāng nā-tiāⁿ, chhù-lāi lóng chēng-chēng, sı̍t-chāi hō͘ lâng kám-kak tio̍h hui-siông ê chhiⁿ-chhı̀n, Tek-sêng kia̍h-thâu khoàⁿ chhù ê sı̀-ûi, siūⁿ beh chhē khoàⁿ chı̍t ūi hó só͘-chāi thang tı̄ i thau-the̍h hit 4 ki gûn teng-tâi liáu-āu, thang thau cháu chhut-khı̀, choè-āu i ū hoat-hiān tı̄ i teh khùn ê chhù piⁿ ū chı̍t ê sió-sió ê chhiū-nâ, i thang khı̀ bih tı̄ hit só͘-chāi. I chhē-tio̍h só͘-chāi liáu-āu, koh khoàⁿ i bı̂n-chhn̂g ê sı̀-ûi, tû liáu chı̍t ê chho͘-oáⁿ í-goā, lông bô koh ū kı̂-thaⁿ ê mı̍h-kiāⁿ, só͘-í i chiū kiâⁿ oá hit tè oáⁿ. I chı̍t-ē kiâⁿ oá-khı̀, i ū hoat-kak tio̍h hit tè oáⁿ-té ná chhin-chhiūⁿ ū toé sím-mı̍h mı̍h-kiāⁿ ê khoán. I ba̍k-chiu chı̍t ē khoàⁿ chin, goân-lâi chiū-sı̄ té gûn-kak-á kap tâng chı̂ⁿ-á. Tek-sêng siūⁿ kóng: “Chiah ê chı̂ⁿ it-tēng sı̄ chêng pái tı̄ chia khùn ê lâng boē kı̀-tit the̍h-khı̀ ê,” Só͘-í i chiū chhun chhiú me tām-po̍h gûn-kak-á khí-lâi tē tı̄ i chiàⁿ-pêng ê khò͘-tē-á lāi. Chóng-sı̄ i kiaⁿ-liáu bo̍k-su thiaⁿ-tio̍h i khò͘-tē-á lāi ê gûn-kak-á khiang-khiang kiò, só͘-í i chiū chiong hē tı̄ oáⁿ-té ê choá the̍h khí-lâi. Bô phah-sǹg, tı̄ hit tiuⁿ choá ê lāi-bı̄n ū siá jı̄ kóng: “Nā ū lâng khiàm ēng, thang chiong chiah ê chı̂ⁿ sûi-ı̀ the̍h-khı̀.” Tek-sêng khoàⁿ-tio̍h chiah ê jı̄ liáu-āu, chı̍t pái kè chı̍t pái siông-sè lâi tha̍k. I chai chiah ê chı̂ⁿ sı̄ ūi-tio̍h sı̍t-chāi kan-khó͘ ê chhut-goā lâng lâi pı̄-pān ê, só͘-í bô-lūn sím-mı̍h lâng kı̀ⁿ-nā lâi chia hioh mı̂ lóng thang sûi-ı̀ the̍h hiah ê chı̂ⁿ khı̀ ēng. Taⁿ Tek-sêng siūⁿ kóng, i ū chu-keh thang tit-tio̍h hiah ê chı̂ⁿ, in-ūi i ê seng-khu chí-ū chhun chı̍t kho͘-gûn kap kúi niá phoà-saⁿ nā-tiāⁿ. I m̄ nā thang the̍h hiah ê chı̂ⁿ, i iā thang the̍h hit 4 ki gûn teng-tâi. Chóng-sı̄ tng i teh khí tham-sim ê sı̂, tı̄ i ê sim-lāi ū koh siūⁿ-tio̍h chı̍t hāng sū, chiū-sı̄ tng i jı̍t-sı̂ tı̄ lō͘-nih teh kiâⁿ ê sı̂, i ū khoàⁿ-tio̍h kúi-nā lâng ê sin-thé pí i khah lám, nı̂-hè iā pí i khah lāu, bô khùi-la̍t thang choè kang. In bı̂n-á-jı̍t oē lâi chia hioh mı̂, só͘-í in chiah sı̄ chin-chiàⁿ su-iàu chiah ê chı̂ⁿ ê lâng. Siūⁿ kàu chia, i m̄ hān-tiāⁿ bô koh siūⁿ beh thau-the̍h, siāng-sı̂ chiong i só͘ chhun ê chı̍t kho͘-gûn iā lok tı̄ oáⁿ-lāi, jiân-āu i sim-lāi chiū tit-tio̍h pêng-an, chit sı̂ i chiah khai-sí an-bı̂n hó-khùn. （Lú-soan Ge̍h-khan Tē 67 kı̂, 1965 nı̂ 7 ge̍h)