Chò choá ê hong-hoat
Lâng ū ēng chē-chē mı̍h chò choá, tı̄ Tiong-kok khah-siông sı̄ ēng chíⁿ-chíⁿ ê tek ; tı̄ Sai-kok nā beh chò khah-hó ê choá chiū ū ēng pò͘ , sı̄ lâng só͘ pàng-sak ê kū i-chiûⁿ , hit-hō . Taⁿ, beh lio̍h-á gı̄-lūn chiong pò͘ chò choá ê hong-hoat .
Chò choá ū ēng moâ kap mı̂ ê phoà-pò͘. Si, tiû, nı̂ bô ha̍p, só͘-í chiah-ê mı̍h kap pín-chiam, liú-pâi, hit-hō, tio̍h kéng-chhut lâi tû-khı̀. Koh chiông-tiong ha̍p-ēng ê phoà-pò͘ tio̍h hun-pia̍t khoán-sit, chho͘--ê thang chò chho͘-choá , iù--ê thang chò iù-choá .
Phoà-pò͘ hun-pia̍t liáu chiū ū the̍h tı̄ Koah-pò͘-toh, koah hō͘ i chı̍t-tè chı̍t-tè, hoâiⁿ-tı̍t kok sı̀-chhùn. Koah-pò͘ tō-sı̄ thán-khiā chhah tı̄ toh-bı̄n. Lâng chiong siang-chhiú koah-lı̍h pò͘ tı̄ to-chhùi. ( Khoàⁿ tùi-bı̄n ang-á-tô͘ téng-thâu-ê . )
Phoà-pò͘ koah-liáu chiū ū the̍h-khı̀ lok tı̄ toā-kng, tāi-lio̍k chhin-chhiūⁿ hong-kó͘ chı̍t-iūⁿ , kó͘ tı̂n-ai lóng chhut-khı̀ .
Khah-siông phoà-pò͘ sı̄ bak--tio̍h iû kap pa̍t-mı̍h ù-oè, só͘-í soà ū lo̍h kiâm-kiⁿ-chúi lâi sa̍h hō͘ lâ-sâm khí-lâi .
Phoà-pò͘ sa̍h-liáu chiū ū the̍h jı̍p Sé-thoā-chhia hō͘ chheng-khı̀ ê chúi chhiâng jı̍p-lâi siông-sè sé-thoā . ( Khoàⁿ tùi-bı̄n ê ang-á-tô͘ tiong-ng tò-chhiú-pêng--ê . )
Tùi hit--nı̍h tio̍h the̍h lo̍h Thiah-lı̀-pò͘ ê bō-chhia. Tı̄ lāi-bı̄n ū chē-chē khí tāi-lio̍k chhin-chhiūⁿ ka-to chı̍t iūⁿ . In ū thiah-lı̀ phoà-pò͘ kàu chhùi-chhùi iù-iù, chham chúi sı̄ chò iûⁿ kô͘-kô͘ ê mı̍h, hō-chò Choá-chiuⁿ .( Khoàⁿ tùi-bı̄n ê ang-á-tô͘ tiong-ng chiàⁿ-chhiú-pêng--ê . )
In-ūi phoà-pò͘ ū cha̍p-hāng ê sek-tı̀, tú-á chò choá-chiuⁿ sı̄ bô sím-mı̍h pe̍h, só͘-í lâng ū chiong hit-ê choá-chiuⁿ au lo̍h tı̄ phiò-hún lâi phiò hō͘ i pe̍h .
Chò choá-chiuⁿ kàu-gia̍h pe̍h chiū ū ēng chheng-khı̀ chúi koè-tiû, hō͘ phiò-hún tùi lāi-bı̄n lóng khí-lâi .
Chhòng kàu án-ni choá-chiuⁿ sı̄ lóng chiâu-pı̄ thang chò choá , só͘-í lâng ū the̍h koè-khı̀ tı̄ Chò-choá-chhia . ( Khoàⁿ tùi-bı̄n ang-á-tô͘ ē-kha--ê . ) Tı̄-chia thang pau-hâm hun-pia̍t hong-hoat ê sı̀-chām. ( 1 ) Piàⁿ choá-chiuⁿ tı̄ choá-chiuⁿ-kng. ( 2 ) Hō͘ choá-chiuⁿ tùi kng-kha lâu-chhut tı̄ toā-phı̀ⁿ tâng-lô-se , tı̄-hia thoaⁿ-po̍h-po̍h kap hō͘ chúi tùi sè-khang-á sia̍p-chhut-lâi . ( 3 ) Soà ū chı̀n-chêng pho͘ tı̄ toā-niá chiⁿ-tiâu, í-keng sı̄ pı̀ⁿ-chò chheⁿ-choá, nā-sı̄ chin chho͘-siap ia̍h bô sím-mı̍h kian-tēng. ( 4 ) Āu-lâi hit-ê chheⁿ-choá ū jı̍p tı̄ kúi-nā tùi ê chhia-kńg ê tiong-ng , ū-ê géng i chò pêⁿ-bı̄n kap kim-seⁿ , ia̍h ū-ê sı̄ sió thang hang i chò ta , chiū kàu lō͘-boé choá lóng bêng-pe̍k ū soan-chhut-lâi put-chí tn̂g, chhut-chāi lâng chhâi-koah chò lō͘-ēng .
Lán ê sim goân-pún sı̄ pāi-hoāi kap lâ-sâm, chhin-chhiūⁿ lâng só͘ khı̀-sak phoà-pò͘ chı̍t-iūⁿ .
Siōng-tè ài kám-hoà lán ê sim-sı̂n chò chheng-khı̀-siùⁿ, kap hó lō͘-ēng ê khoán-sit .
Lâng siū piàn-hoà chiū-sı̄ tio̍h hō͘ tō-lí kek-phoà sim-koaⁿ lâi hoán-hoé , soà hō͘ Iâ-so͘ ê hoeh sé-tû choē, kap Sèng-sı̂n siông-sè iok-sok su-io̍k kàu chin-chiàⁿ ké-kū oāⁿ-sin, chhin-chhiūⁿ choá tú-á chò chiâⁿ ê thé-sek. Goān lán tāi-ke hoaⁿ-hí tùi Siōng-tè siū ké-pı̀ⁿ , chiah hō͘ I toā hoaⁿ-hí lán ê iūⁿ . Sim só͘ goān .
(Tâi-lâm Hú-siâⁿ kàu-hoē-pò tē 102 koàn,1893 nı̂ 9 ge̍h)