Chò lâng

Tùi jı̂n-chè-koan-hē chin ū gián-kiù ê Kán Chhun-an sian-siⁿ bat án-ni kóng: “Hó-lâng bô-it-tēng ū hó ê jı̂n-chè-koan-hē.” I iōng chı̍t-ê chin kán-tan ê phı̀-jū lâi soeh-bêng. Lán chú âng-tāu-á-thng, chiū phâng chı̍t-koá sàng hō͘ keh-piah ê Tiuⁿ sian-siⁿ. Tiuⁿ sian-siⁿ sı̄ chı̍t-ūi hêng-ûi toan-chiàⁿ, hōng-kong siú-hoat, boē khı̀ phiⁿ--lâng ê lâng. Âng-tāu-á-thng sàng kàu i hia ê sı̂, i kóng: “Ài iò! M̄-bián--lah! Gún m̄--lah! Bô-iân-bô-kò͘ gún m̄ chia̍h pa̍t-lâng ê mı̍h-kiāⁿ--lah!” “Bô iàu-kín--lah! Chin hó-chia̍h neh!” “Chin hó-chia̍h mā m̄--lah!” “Kín phâng leh mah, bē thāu lí--lah!” “Bē thāu goá, mā bô-ài--lah!” M̄-chia̍h tō-sı̄ m̄-chia̍h. Chhin-chhiūⁿ Tiuⁿ sian-siⁿ chit-khoán ê lâng, sı̄ hó-lâng. Tān-sı̄, hō͘ lâng kám-kak boē sóng-khoài. Hō͘ lán kám-kak, hó-sim, ke soe--ê. Lán koh chiong âng-tāu-á-thng sàng hō͘ lēng-goā chı̍t-ê chhù-piⁿ Ông sian-siⁿ. “Ài-iò, hō͘ lí tùi chiah hn̄g phâng lâi kàu chia, pháiⁿ-sè lah, bô-iân-bô-kò͘ goán m̄-káⁿ chiap-siū--lah!” “Bô iàu-kín lah, the̍h khı̀--lah!” Lán chiah-nı̄ hó-ı̀, Ông sian-siⁿ choè-āu chiū chiap-siū. Lán hoaⁿ-hoaⁿ-hí-hí tńg-lâi. Tān-sı̄ koè nn̄g-tiám-cheng āu, Ông sian-siⁿ lâi kho̍k lán-tau ê mn̂g. I kóng: “Tú-á chia̍h lí ê âng-tāu-á-thng, sı̍t-chāi kóng, chin hó-chia̍h. M̄-kú, chhù-piⁿ-tau, ū lâi ū khı̀. Goán bô-ài chiàm lâng ê pân-gı̂. Goá chú le̍k-tāu-á-thng lâi hêng lí. Chit-má bô sio-khiàm ah. Chài-chián.” Ông sian-siⁿ mā-sı̄ hó-lâng. Ē hō͘ lán siūⁿ kóng: Hó lah, to-siā lí ê le̍k-tāu-á-thng lah. Í-āu goá chú mı̍h-kiāⁿ iā boē koh sàng hō͘ lí ah lah. M̄ siong-sı̀n, lán koh chiong âng-tāu-á-thng sàng hō͘ Tiō sian-siⁿ. Tiō sian-siⁿ sûi-sı̂ kóng: “Ài-iò, hō͘ lí tùi chiah hn̄g sàng lâi, sı̍t-chāi kám-tōng. To-siā, to-siā. Goá sûi chia̍h, goá sûi chia̍h.” Lán hoaⁿ-hí tńg-khı̀. Kè chı̍t-ē-á, Tiō sian-siⁿ iā lâi kho̍k lán ê mn̂g. Lán siūⁿ kóng: “Hāi ah! Koh lâi ah!” Khı̀ khui-mn̂g, Tiō sian-siⁿ kóng: “Eh! Tú-á lí sàng lâi ê âng-tāu-á-thng, goán choân-ke lóng ū chia̍h-tioh. Chin chán! M̄-chai iáu ū-bô ho͘h ?” Chit-pái lán thiaⁿ liáu, khí-mo͘ su-pú-léng-giang. Nā bô-kàu, lán koh lâi-khı̀ chú. Kam-goān! Chin ū ı̀-sù ho͘hN! Chit-ê phı̀-jū. (Hong-hiòng Tē 2 kı̂, 1991 nı̂ 1 goe̍h)