1. Cha̍p ê lâi hù Chú-jı̍t-o̍h,
Tāi-ke Chú-lāi chiâⁿ tong-o̍h;
Chı̍t ê kóng goá bô sim-sek,
Chiū chhun káu ê lâi chhut-se̍k.
2. Káu ê gín-ná chin hoaⁿ-hí,
Chú-jı̍t-o̍h lāi thiāⁿ tō-lí;
Kı̂-tiong chı̍t ê khùn siuⁿ oàⁿ,
Poeh ê ba̍k-chiu kim-kim khoàⁿ.
3. Poeh ê gín-ná chin hēng-hok ,
Thiⁿ-pē ài lán jı̍p thian-kok;
Chı̍t ê siū chio khı̀ peh-soaⁿ,
Hun-soàⁿ chhit ê ê sim-koaⁿ.
4. Chhit ê gín-ná chiū koat-sim,
Chú-jı̍t ha̍k-hāu tio̍h chûn-sim;
Chı̍t ê kóng goá bô chhù-bı̄,
Chhit ê kiám it la̍k chiū-sı̄.
5. La̍k ê gín-ná siūⁿ jia̍t-sim,
Kiû Chú Iâ-so͘ thiaⁿ goán gı̂m;
Chı̍t ê m̄-ài liām kim-kù,
Kim-jı̍t soà bô beh lâi hù.
6. Gō͘ ê gín-ná siūⁿ chı̄n-la̍t,
Hō͘ Chú-jı̍t-o̍h oē hoat-ta̍t;
Chı̍t ê cháu khı̀ khoàⁿ iá-kiû,
Sı̀ ê tông-o̍h tiàm hia hiu.
7. Sı̀ ê gín-ná saⁿ iok-sok,
Taⁿ lán m̄-thang koh lo̍h-po̍h;
Hut-jiân chı̍t ê khı̀ tiò-hı̂,
Saⁿ ê siūⁿ tio̍h chin hi-kı̂.
8. Saⁿ ê gín-ná sim bâng-bâng,
Chú-jı̍t-o̍h lāi khoàⁿ bô lâng;
Chı̍t ê kóng goá chhù bô êng,
Chhiáⁿ lín N̄g lâng jı̍p Thian-têng.
9. Nn̄g ê gín-ná chn hi-bı̂,
Lí bı̄n khoàⁿ goá, goá khoàⁿ lí;
Chı̍t ê kóng goá taⁿ m̄-khı̀,
Āu chhiú chı̍t ê chin loé-chı̀.
10. Chı̍t ê gín-ná kiû Thiⁿ-pē,
Khún-kiû Sèng Sı̂n kàng-lo̍h toē;
Goá taⁿ chhut-la̍t chio chı̍t ê,
Goān Chú chiok-hok goán N̄g-ke.
11. Kok lâng chı̍t ē chhut-la̍t chio,
Kiû Chú chān goán sim oē sio;
Chú-jı̍t-o̍h lāi piàn sı̀ ê,
Tāi-ke koat-sim lâi thê-hê.
12. Sı̀ ê gín-ná choè tông-ha̍k,
Tāi-ke chhut-la̍t saⁿ-kap tha̍k;
Lí chio, i chio, goá iā chio,
Kàu-sek lāi-bı̄n chiū piàn sio.
13. Poeh ê ha̍k-seng chı̄n le̍k-liōng,
Ǹg-bāng ūi Chú lâi chı̄n-tiong.
Chı̍t lâng chhoā chı̍t sı̄ pún-hūn,
Kim-jı̍t piàn chiâⁿ cha̍p-la̍k kun.
14. M̄-bián koh kóng lí iā chai,
Liân-liân koh-chài têng gō͘ pái;
Lâng-gia̍h chı̍t-chheng jı̄-cha̍p-sı̀,
Hián-bêng ha̍k-seng ê chı̀-khı̀.
15. Lí goá tio̍h chı̀n m̄-thang thè,
Lí sı̄ gō͘-chheng goá chı̍t-chheng;
Lí goá chı̄n-la̍t chiū ū hok,
Choè Chú chı̄n-tiong ê lô͘-po̍k.
16. Chú-jı̍t-o̍h ê Ho̍k-heng-koa,
Kàu chia teh beh lâi kiat-sok;
Ǹg-bāng tāi-ke tàu koan-sim,
Hō͘ Chú-jı̍t-o̍h oē ho̍k-heng.
(Tâi-oân Kàu-hoē Kong-pò, Tē 896 kı̂, 1962 nı̂ 1 goe̍h)
