I thiah
Goán ı̀n hō͘ ha̍k-seng khoàⁿ ê káng-gı̄
I kóng
Goán sim-koaⁿ im-hiám ok-to̍k bû-pí
I thiah
Goán siāu-kài “Tiong-kok-lâng sim-lí”
I kóng
Goán su-sióng ū būn-tê
Ou-pe̍h khı̀ ka pò-choá
Ìn bûn-chiong hō͘ ha̍k-seng khoàⁿ
I kah goán
Î-sàng choân-hāu kàu-ha̍k gián-kiù-hoē sím-phoàⁿ
I kóng i ê kok-ka sı̄ “China”
Ū chı̍t-ê kiáⁿ sàng-khı̀ “Australia”
Lēng-goā chı̍t-ê sàng-khı̀ “America”
I kóng goá ê káng-gı̄ kó͘-lē lâng hoâi-gı̂
M̄-ài ka-tı̄ ê kok-ka
Goá thiaⁿ i
Kóng kah chhin-chhiōⁿ i ê kok-ka beh bia̍t-bông
Goá khoàⁿ i
Kóng kah chiok ke̍k-tōng
Ba̍k-sái it-tı̍t lâu-lo̍h nâ-âu
I kà bu̍t-lí-ha̍k
Ba̍k-kiàⁿ khoàⁿ--khí-lâi chiok ū ha̍k-būn
Lâng-lâng kóng sı̄ o̍h hiān-tāi kho-ha̍k
Goá m̄-chai i sı̄-m̄-sı̄
Liáu-kái lí-sèng sı̄ siáⁿ-mı̍h
Goá mn̄g i
Bu̍t-lí-khò-pún lāi-bı̄n
Sı̄-m̄-sı̄ ū kan-chà ê H2O
Sı̄-m̄-sı̄ ū sim-koaⁿ
Ok-to̍k bû-pí ê Nacl、CaCÒ
Sı̄-m̄-sı̄
Ū seng thiah pa̍t-lâng ê káng-gı̄
Chiah cháu-khı̀
Kóng goá lâi hâm lí kóng tō-lí
Goá chai-iáⁿ
Kóng--lo̍h-khı̀ ia̍h-sı̄ bû-chhái-kang
I thâu-khak-lāi ū nńg-thé ê chó͘-kok
I ū i bāng-tiong ê kiù-chheⁿ eng-hiông
Kóng siáⁿ-mı̍h tō-lí
I lóng bē jı̍p-ní
Tû-liáu tóng-koa、 kun-koa
I éng-oán leh chhiòⁿ chèng-khı̀-koa
I siáⁿ-mı̍h tō lóng bē-hiáu thiaⁿ
