Chham-ka Lâm Tiong 2 kı̂ Kàu-oân Lêng-siu-hoē kám-sióng

 1. Kám-siā Chú un-tián kek-goē, 
  Thang khui Kàu-oân Lêng-siu-hoē, 
  Chhut-se̍k ū khah ke pah-jı̄, 
  Tāi-ke chhùi-á chhiò gı̄-gı̄. 
 2. Tē-chí:Tióng-êng Lú-o̍h chia, 
  Lâm, lú hun-piat toà siok-sià, 
  Lâm--ê sió-khoá ài kiâⁿ lō͘, 
  Óng-hoê sı̀-choā ná sàn-pō͘. 
 3. Hoē-tiûⁿ lé-tn̂g sı̀-bı̄n hong, 
  Chō-se̍k kám-kak chin chheng-sóng, 
  Chiàu khoàⁿ chit kài sūn-sū toaⁿ, 
  Kong-khò pâi kàu moá-moá-moá. 
 4. Chó-thian, se̍k-iông lé-pài sı̂, 
  Chú-jı̍t-o̍h hāu-tiúⁿ chú-chhı̂, 
  Ke-thiⁿ tāi-ke ū oa̍h-khı̀, 
  Thang thiaⁿ ta̍k tiám ê kà-sı̄. 
 5. Pō͘-tiú bo̍k-su Lâu Hoâ-gı̄, 
  Ín-chhoē kàu-oân o̍h sù-sı̄, 
  Bêng-tiong sian-siⁿ chò chóng-bū, 
  Ge̍k-chhàn sian-siⁿ pān chhui-sū. 
 6. Koh-chài chı̍t hāng ê hun-tam, 
  An-sù sian-siⁿ tng sià-kam, 
  Lūn kàu phí-jı̂n put-khó kham, 
  Niû, Tân lióng Bo̍k ê pō͘-hūn. 
 7. Káng-ián Sin Kū-iok khài-lūn, 
  Koan-hē Ki-tok-kàu kàu-gı̄, 
  Káng-su sı̄ Âng Siu-kiong sian-siⁿ, 
  Iáu ū Ki-tok kàu-hoē sú. 
 8. Chú-chhı̂:Lí Ka-siong bo̍k-su, 
  Siū-hūi tiúⁿ-ló só͘ koan-hē, 
  Léng-tō sı̍t-chè chu būn-tê, 
  Só͘ thó-lūn chı̍t-tiâu chı̍t-tiâu. 
 9. Lóng sı̄ chhiat-sı̍t chin tiōng-iàu, 
  Toā-siaⁿ sè-siaⁿ chin piàⁿ-miā, 
  Kò-kò ha̍k-oân chù-sim thiaⁿ, 
  Moâ-tāu kàu-hoē lāu chí-moē. 
 10. M̄-bat khoàⁿ i tuh ka-choē, 
  Teh thiaⁿ ba̍k-chiu kim khok-khok. 
  Chı̍t khoàⁿ hián-chhut chin khoài-io̍k, 
  Sui sı̄ chhit-cha̍p ū goân-khı̀. 
 11. Choân-thé iā sı̄ chin tı̀-ı̀, 
  Thiaⁿ liáu moá-ı̀ sim iû-ia̍h, 
  Sı̄m-chı̀ pn̄g-tǹg bô kò͘ chia̍h, 
  Kiâm-chúi kàu-oân ū jia̍t-sêng. 
 12. Chham-ka lán chia toā hoan-gêng, 
  Su sı̄ hiah hn̄g bô siūⁿ siān, 
  Kám-sim kiû-tō chı̀ ū kian, 
  Chit kù goá chin hó-táⁿ kóng. 
 13. Sêng-chek pí-kàu phò thian-hong, 
  Kiò chò jı̄ kı̂ ha̍k-khò tēng, 
  Só͘ thiaⁿ iā sı̄ chin hun-bêng, 
  Siàu-liām káng-su gâu pı̄-pān. 
 14. Iā ū chhiú-chheh saⁿ pang-chān, 
  In chin tio̍h-boâ gâu chún-pı̄, 
  Tùi sim-té chhùi piáu kèng-ı̀, 
  Téng-soaⁿ kha chiáng-koán iô cheng. 
 15. Pò chai sı̂-kan thang hiòng-chêng, 
  Kong-im jı̍t-chí chin-chiàⁿ kín, 
  Bêng-thian pı̀-hoē tı̍t-tı̍t kı̄n, 
  Lâi hù chin-chiàⁿ ū hok-khı̀. 
 16. Thang hióng ò-biāu hó chu-bı̄, 
  Sèng-keng ha̍k-sek tit gián-kiù, 
  Kàu-oân chu-chit tit chō-chiū, 
  Bô lâi ê lâng chin khó-sioh. 
 17. Chit hoê un-sù tit bô tio̍h, 
  Chhim bāng tńg-khı̀ toā hoat-hui, 
  M̄-thang khǹg ba̍t che in-hūi, 
  Poê-iúⁿ sè-kiáⁿ gâu chio-ho͘. 
 18. Chú-jı̍t-o̍h tek-khak chı̀n-pō͘, 
  Tiogn-hoē gı̄-tiúⁿ pı̀-hoē sek, 
  Kek-lē kàu-oân tio̍h chı̄n-le̍k, 
  Kang-chok chiah thang ta̍t bo̍k-tek. 
 19. Che hoē pō͘-tiúⁿ chò chú-lâng, 
  Siat-hoat it-chhè chin pı̂ⁿ-pāng, 
  Siū-ú ha̍k-oân ê chèng-su, 
  Piáu-bêng siu-liáu ê ı̀-sù. 
 20. Tng tı̄ pı̀-hoē hı̍t chı̍t sı̂, 
  Ǹg kok tan-ūi kóng siā ı̀, 
  Koh ū teng-lêng tio̍h liû sim, 
  Tāi-ke tit-tio̍h ı̀n-siōng chhim!!! 

（Tâi-oân Kàu-hoē Kong-pò tē 801 kı̂, 1955 nı̂ 9 goe̍h）