Chiú-cheng

Peh-sı̀ⁿ siā-hoē ê hēng-hok sı̄ chāi tı̄ seng-khu, cheng-sı̂n, kap phín-tek ê poê-iúⁿ. Ài peh-sı̀ⁿ heng-ōng tio̍h kiám-chió phoà-pı̄ⁿ, pı̂n-kiông, bû-kak, hoān-choē chéng-chéng. Lūn phoà-pı̄ⁿ. Pēⁿ-to̍k ū chin chē khoán, chia̍h chiú ê lâng khah bô hit ê tí-khòng ê la̍t, chiū khah khoài jiám-tio̍h phoà-pı̄ⁿ. Tı̄ Eng-kok ū chin chē pēⁿ-ı̄ⁿ. Bat toà Lûn-tun pēⁿ-ı̄ⁿ 20 tang kú ê i-seng, put-chí chhut-miâ--ê, kóng hit ê pēⁿ-ı̄ⁿ nı̂-nı̂ só͘ ū ê pı̄ⁿ lâng múi 100 lâng ū 70 lâng phoà-pı̄ⁿ sı̄ ūi-tio̍h chiú-cheng. I koh kóng: "Goá m̄-sı̄ kóng hit 70 lâng sı̄ chùi-hàn." Khó-kiàn i só͘ kóng-ê nā sı̄ sı̍t, chiū Eng-kok ê pēⁿ-ı̄ⁿ 10 keng ê 7 keng sı̄ m̄-bián, thang ēng hit ê hùi-iōng lâi chàn-sêng kok ê pa̍t hāng sū, iā thang bián hiah-ê lâng ê kan-khó͘. Tı̄ 1903 nı̂ ū chı̍t keng toā keng ê i-koán, hiah-ê tài hı̀-lô pēⁿ sí ê lâng bô chı̍t-ê bô koan-hē chiú ê hāi; kiám-chhái sı̄ ka-tı̄ bat chia̍h, á-sı̄ tùi pē-bú ûi-thoân. Tı̄ 1905 nı̂ tı̄ Hoat-kok ê Pa-lí siâⁿ ū chū-chı̍p Hı̀-pēⁿ ê Bān-kok Hoē-gı̄. In koat-gı̄, "In-ūi chiú-to̍k kap hı̀-kiat-hu̍t ê koan-liân, chit ê Hoē tı̀-ı̀ gí-tiāⁿ chiú-cheng ê to̍k, kap hı̀-kiat-hu̍t iàu-kín tio̍h pı̂ⁿ-pı̂ⁿ kı̀m-kài". Iā ū gâm-chèng (to̍k-liû) chiū-sı̄ chin khó-siong ê chèng-thâu; bat ū kàu-khàm ê lâng kóng tài hit ê pēⁿ sí ê kı̂-tiong, ū chia̍h tām-po̍h chiú-ê pí kı̀m-chiú ê lâng sı̄ têng-poē. Pē-bú nā chia̍h chiú kiám-chhái ē hāi i ê kiáⁿ khah té-siū. Sūi-sū kok chı̍t ê i-seng chiong 15 nı̂ ê thóng-kè, chiū-sı̄ kéng 10 kháu-chàu hán-tit chia̍h chiú ê lâng siⁿ kiáⁿ ê sū kap 10 kháu-chàu ài chia̍h-chiú-chùi--ê lâi saⁿ pí. Tı̄ hit ê kı̂-hān bô chia̍h-chiú--ê siⁿ 61 ê gín-ná, kı̂-tiong 50-ê seng-chûn, iā bô phoà-siùⁿ. Ài chiú-chùi--ê siⁿ 57 ê gín-ná chí-ū 10-ê seng-chûn bô phoà-siùⁿ. Tı̄ hán-tit chia̍h-chiú hit 10 kháu-chàu ū 6 ê kiáⁿ bô chiâu-chn̂g, tı̄ ài chia̍h-chiú-ê hit 10 kháu-chàu ū 22-ê bô chiâu-chn̂g, ū-ê iûⁿ-hı̂n, ū-ê siáu ûn-ûn. Lūn sit-sim hit hō pēⁿ iā sı̄ án-ni. Hong-tian pēⁿ-ı̄ⁿ ê ı̄ⁿ-tiúⁿ bat kóng sit-sim 100 lâng(ta-po͘) ê lāi-tiong, 35 chı̀ 40-ê sı̄ ūi-tio̍h chiú chiah sit-sim, kiám-chhái sı̄ tùi ka-tı̄, á-sı̄ tùi pa̍t lâng liân-lūi. Taⁿ chiú-cheng sı̄ sím-mı̍h? Cháiⁿ-iūⁿ hiah sún-hāi? Chı̍t hāng: chiú-cheng sı̄ sio̍k tı̄ bâ-chùi io̍h ê lūi, nā chia̍h chiū ē tiòng-to̍k. Hit hō ê mı̍h ē hō͘ lâng chiām-sı̂ ióng-kám, put-chí tek-ı̀, nā-sı̄ kú-tn̂g iu-ut. A-phiàn sı̄ to̍k, chiú-cheng iā sı̄ to̍k; nā ēng che, kiān-khong bē bián-tit sún-sit. Koh chı̍t hāng: chiú-cheng ē siⁿ-khí giàn, chia̍h liáu ài koh ke-thiⁿ. Kan-ta chit hāng sı̄ kàu-gia̍h thang hō͘ lâng kiaⁿ. Chêng khah chē lâng phah-sǹg chia̍h chē sı̄ m̄-hó, chia̍h tām-po̍h sı̄ hó. Kàu taⁿ í-keng khah chai-iáⁿ. Tı̄ Lûn-tun siâⁿ tē it toā ê pēⁿ-ı̄ⁿ kúi-nā keng chit 50 nı̂ lāi só͘ ēng ê chiú toā kiám-chió, só͘ ēng ê gû-leng toā ke-thiⁿ. Hiān-sı̂ tı̄ hia khai chiú ê hùi chiong 50 nı̂ chêng tùi-pí m̄ chiūⁿ chhit hūn ê chı̍t hūn. Ū Au-lô-pa chı̍t kok ê peh-sı̀ⁿ khai chiú ê hùi múi nı̂ chı̍t lâng pêng-kin Y60, chóng-sı̄ tı̄ pēⁿ-ı̄ⁿ lāi chı̍t lâng pêng-kin chí-ū 5 kak. Koh lūn goā-kho-i iā sı̄ án-ni. Chá-sı̂ tio̍h hō͘ pēⁿ lâng chia̍h tām-po̍h chiú, chiū ǹg-bāng khah ū la̍t thang tam-tng chhiú-su̍t ê kan-khó͘. Hiān-kim hoán-tńg khǹg i m̄-thang chia̍h chiú, in-ūi hoeh-lāi nā ū chiú-cheng chiū ta̍k hō ê siong khah oh i-tı̄. Kúi-nā cha̍p nı̂ chêng chı̍t ūi i-seng siá phoe hō͘ i ê pêng-iú kóng: "Lí nā beh chia̍h tām-po̍h chiú, tio̍h jı̄n chit ê mı̍h sı̄ chhia-chhí,iā tio̍h chhut hit ê kè-ta̍t. Khah siông hit ê kè-ta̍t sı̄ tām-po̍h sit-lo̍h kiān-khong, á-sı̄ tı̀-hūi, á-sı̄ hó sèng-chêng hit hō." I só͘ kóng-ê taⁿ koè chē-chē chhı̀-giām-thang chai sı̄ ū iáⁿ. Chiú àn-cháiⁿ-iūⁿ bô lı̄-ek seng-khu, téng goe̍h iā ū kóng. Iáu ū kúi-nā hāng thang siūⁿ. Tı̄ Se-kok ū chin chē Seng-bēng Pó-hiám Hoē-siā; khoàⁿ in ê chóng-kè chiū chai kı̀m-chiú-ka pí bô kı̀m-ê pêng-kin ū khah tn̂g hoè-siū, koh ū-ê chún kı̀m-chiú ê lâng chhut pó-hiám-liāu pí bô kı̀m-chiú-ê khah chió. M̄-nā án-ni; bē chiú ê siong-gia̍p-ka in beh khı̀ pó-hiám, só͘ tio̍h la̍p ê chı̂ⁿ pí pa̍t lâng khah tāng, iū-koh pó-hiám hoē-siā ū-ê m̄ siu i. Che sı̄ in-ūi in sí-bông ê siàu-gia̍h pí pa̍t lâng khah chē. Tı̄ Sūi-sū kok múi nı̂ sí ê 100 ta-po͘-lâng 10-ê sı̄ ūi-tio̍h chiú-cheng. Ì-sù chiū-sı̄ in só͘ ū ê pı̄ⁿ chhin-chhiūⁿ sio̍k tı̄ hı̀, á-sı̄ koaⁿ, á-sı̄ sı̂n-keng hē-thóng, hit ê goân-in sı̄ tùi chia̍h chiú. Gín-ná chá-sí chin chē iā sı̄ in-ūi pē-bú chia̍h chiú. Chò lāu-bú ê lâng m̄-thang chhò-gō͘; in nā teh chia̍h chiú chiū hit ê chhı̄ kiáⁿ ê leng ē khah chió iā khah bô chu-ióng, tı̀-kàu eⁿ-á ū sún-hāi. Chiú iā ē chhiúⁿ-toa̍t lâng thiàⁿ kiáⁿ ê sim. Ū chē-chē thàn-chia̍h lâng ēng ta̍k lé-pài ê sin-lô la̍k hūn ê chı̍t hūn lâi chia̍h chiú, iā kı̂-û-ê tio̍h chò kàu-gia̍h thang bé ka-tı̄ kap hū-jı̂n lâng í-kı̍p kúi-nā ê gín-ná ê bí-niû, i-chiûⁿ, kap soè chhù téng-téng ê só͘-hùi. Koh ū loā-chē ke ūi-tio̍h lāu-pē chia̍h chiú chiah liông-poē, che sǹg bē liáu. Lâng chia̍h chiú m̄-nā sı̄ khah khoài phoà-pı̄ⁿ, koh i só͘ chò ê kang iā khah m̄ chiâⁿ mı̍h. Liân chia̍h tām-po̍h iā ē hō͘ i ê kin-la̍t khah chió. Bat ū nn̄g tūi ê peng chò chho͘ kang thàn chı̂ⁿ lâi pí-kàu: chı̍t tūi iáu-boē chò-khí tāi-seng chia̍h be̍h-á-chiú, chı̍t tūi bô chia̍h chiú. Tāi-seng chia̍h be̍h-á-chiú hit chı̍t tūi khí-thâu chin oa̍h-tāng chhut-la̍t, nā-sı̄ khah thêng siān-siān; kàu ê-hng só͘ chò-chiâⁿ ê kang chám-jiân khah su pa̍t tūi-ê. Āu pái koh chhı̀-khoàⁿ: hit ê tē-jı̄ tūi tāi-seng chia̍h be̍h-á-chiú, hit ê chia̍h be̍h-á-chiú--ê taⁿ bô chia̍h. Só͘ tú-tio̍h-ê tú sio-siāng: chia̍h be̍h-chiú hiah-ê kàu ê-hng bē pí-tit. Ū chı̍t ê So͘-kek-lân ê hó-gia̍h lâng (Carnegie) tı̄ i ê só͘-chāi chhiàⁿ chin chē chò kang lâng. I teh chhiàⁿ kang ū tiāⁿ-tio̍h ê kui-kí, chiū-sı̄ kiàn ū kı̀m-chiú-ê i ê sin-lô pí bô kı̀m-ê ke cha̍p hūn chı̍t. In-ūi i kóng kı̀m-chiú-ê só͘ chò ê kang sı̄ khah ta̍t. M̄-nā chò pêng-siông ê kang, koh beh tam-tng hui-siông ê jím-nāi iā sı̄ án-ni. Chhin-chhiūⁿ thàm-hiám sin tē, á-sı̄ ūn-tōng ê lâng, iā tio̍h kı̀m chiú. Thàm-hiám Lâm Pak Hân-tō ê lâng tio̍h keng-koè hui-siông tn̂g-tn̂g ê iau-gō koâⁿ kap ià-siān. Ū sı̂ in-ūi sng-seh ê tē pháiⁿ kiâⁿ, chı̍t jı̍t chı̄n la̍t chí-ū kiâⁿ phò͘-goā lō͘ nā-tiāⁿ. Koh só͘ ū ê jı̍t-sı̍t lóng sı̄ ka-tı̄ toà-khı̀-ê, iā ū tiāⁿ-tio̍h ê gia̍h, te̍k-pia̍t ê khoán, tē it chu-ióng, tē it ē hō͘ seng-khu sio-lō-ê. Chóng-sı̄ in lóng bô toà chiú, che sı̄ àn-cháiⁿ-iūⁿ? Chiú kiám bē-ē hō͘ lâng sio-lō koh oa̍h-tāng mah? In khah chai: chia̍h chiú hit hō ê sio-lō ē pı̀ⁿ chò léng, hit hō ê oa̍h-tāng ē pı̀ⁿ chò bô la̍t. Lâng m̄-nā ài seng-khu ióng-kiāⁿ, koh ài ū cheng-sı̂n gâu siūⁿ. Chóng-sı̄ ū chı̍t ê i-seng kóng: "Lâng nā hō͘ chiú-cheng kám-tio̍h, chiū ka-tı̄ ê ngó͘-koan bē oá-khò-tit". Kı̄n-lâi ū teh chhı̀ náu-la̍t ê tāi-chı̀. Siū chhı̀-giām ê lâng ū-ê chia̍h chiú (ū chı̍t niú khah ke ê chiú-cheng tı̄-teh), ū-ê lóng bô chia̍h. Khó liáu lóng ū chhò tı̄-teh, chóng-sı̄ kı̀ⁿ-nā bô chia̍h chiú ê lâng nā sǹg 100 ê chhò, chia̍h chiú-ê chiū ū 153 ê chhò. Chia̍h chiú-ê chin khoài chhò-gō͘, chin khoài hō͘ lâng siat . Nā ài làu lâng kóng chhut ún-ba̍t ê tāi-chı̀, ka-tı̄-ê á-sı̄ pa̍t lâng-ê, kan-ta ēng chiú chhiáⁿ i, chiū khah siông hit ê ún-ba̍t ê sū lóng piàⁿ-chhut hō͘ lâng chai. Chhin-chhiūⁿ ē-té só͘ kı̀ kúi-nā ê sı̍t-sū sı̄ piáu-bêng chit ê ı̀-sù. Bat ū chı̍t ê kiông kok kap chı̍t ê sió kok teh kau-chiàn, hit ê kiông kok ê peng ta̍uh-ta̍uh hām-lo̍h tı̄ sió kok ê lô-bāng. Āu-lâi ū lâng mn̄g toā kok chı̍t ê peng kóng thái hit ê sió kok hiah gâu phiàn in; i kan-ta ı̀n chı̍t kù kóng, "Sió kok ê peng bô chia̍h chiú". Kū-nı̂ tı̄ Āu-soaⁿ ū chı̍t ê lâng, tùi Koan-im-soaⁿ chit pêng khı̀ kàu Phoh-sit-koh hit pêng pān tāi-chı̀; tio̍h koè kúi-nā tiâu khe, koh sı̄ lo̍h-hō͘ thiⁿ. Tńg-lâi ê sı̂, lâng í-keng chiú-chùi; kàu khe-té ê soa-po͘ ià-siān, tı̄-hia tó teh khùn. Bâng-bâng m̄-chai chhut khe-lâu. Beh àm ê sı̂ i hō͘ chúi ûi-teh chiū chhíⁿ, hit-sı̂ chúi liâm-piⁿ tiòng moá. Chhin-lâng chai i iáu-boē tò-lâi, chiū kia̍h hoé-pé khı̀ chhoē. Kàu khe-piⁿ i ê kiáⁿ chiū thiaⁿ-tio̍h lāu-pē ê siaⁿ, teh kiò "Kiù miā! kiù miā! khiā bē tiâu lah!" Chóng-sı̄ bē hù, bô hoat-tō͘. Hit ê kan-khó͘ lâng, taⁿ chai gûi-hiám, cheng-sı̂n pek-chhiat kiû-kiò, kàu hut-jiân bô thiaⁿ-kı̀ⁿ siaⁿ, chiū chai hō͘ chúi lâu khı̀. Tı̄ Āu-soaⁿ ū só͘-chāi chhiⁿ-hoan iáu-boē tâu-hâng, iáu chin hó-táⁿ, só͘-í tı̄ soaⁿ-kha siat ài-ióng-liâu lâi sûn-sı̄. Ū sı̂ liân hiah-ê kéng-chhat soà hō͘ chhiⁿ-hoan thâi-sí; thiaⁿ lâng kóng chē-chē pái sı̄ in-ūi kéng-chhat ū chia̍h chiú-chùi bô tı̂-hông chiah án-ni. In-ūi chia̍h chiú ē hō͘ lâng hiah-nı̍h m̄ chai gûi-hiám, koh bē hiáu tı̂-hông, só͘-í Bí-kok ê toā thih-tō-pō͘ khah chē m̄ chhiàⁿ bô kı̀m-chiú ê lâng tı̄-hia chò kang. Téng-bı̄n hit ūi i-seng só͘ kóng-ê sı̄ tio̍h: tùi chiú ē sit-lo̍h kiān-khong kap tı̀-hūi, chiū-sı̄. Lūn phín-tek, chha-put-to m̄ bián kóng. Lán tāi-ke chai chùi-hàn--ê ài pı̀ⁿ gōng, saⁿ phah, khai chı̂ⁿ, m̄-ài chò kang. Tı̄ Eng-kok ū chı̍t ê koaⁿ chò piān-hō͘-sū 40 nı̂, chò phoàⁿ-koaⁿ 10 nı̂ kú, tı̄ 1909 nı̂ i kóng pún-kok múi 100 ê tēng-choē ê lâng 90-ê sı̄ ūi-tio̍h chiú ê hāi chiah hoān-tio̍h kok-hoat. Peh-sı̀ⁿ ê pı̂n-kiông chē-chē iā sı̄ tùi chiú. Kı̄n-lâi Gô͘-lô-su só͘ keng-koè ê sū tāi-ke káⁿ chai. Pún-jiân in ê peh-sı̀ⁿ chin chē m̄-bat jı̄, chò kang kan-khó͘, thiⁿ-khı̀ koâⁿ, chí-ū chı̍t hāng thang hō͘ in hoaⁿ-hí, chiū-sı̄ khı̀ chiú-tiàm lāu-jia̍t ê só͘-chāi chia̍h-chiú, ná chia̍h ná ài chia̍h, só͘-í chin oh kái-liông. In ê chiú hō chò vodka. Cha̍p goā nı̂ chêng Chèng-hú tit-tio̍h choan-bē koân, chóng-sı̄ Hông-tè bat kóng ēng hit hō hō͘ peh-sı̀ⁿ siū hāi ê tāi-chı̀ lâi hō͘ kok-ka tiông-chı̂ⁿ sı̄ bô ha̍p-gı̂. Āu-lâi khí kau-chiàn, Hông-tè chiū chhut chiàu it-chı̄n kı̀m lâng bē vodka. Taⁿ àn-cháiⁿ-iūⁿ? Ēng teh kau-chiàn ê 5 goe̍h jı̍t kap boē kau-chiàn ê 5 goe̍h jı̍t lâi saⁿ-pí, chiū chai tng kau-chiàn ê sı̂ peh-sı̀ⁿ só͘ kià gı̂n-hâng ê thû-thiok gı̂n ke-thiⁿ 15 poē khah ke. Koh Gô͘-kok Tāi-chông Tāi-sı̂n iā kan-chèng kóng, taⁿ siā-hoē ta̍k téng-hō ê hó-sū chám-jiân chín-heng, hoān-choē toā kiám-chió. Téng-bı̄n kàu-gia̍h thang hō͘ lán chai chia̍h chiú ê bô lō͘-ēng. Koh-chài sàm-su chı̍t pái. Chiú bē-ē chò tit bí-niû, hoán-tńg ē hō͘ chia̍h-mı̍h khah bē siau, koh nā chè-chō chiú chiū eng-kai chò bí-niû ê mı̍h, chhin-chhiūⁿ be̍h kap bí hit-hō, soà pı̀ⁿ chò to̍k. Chiú só͘ hō͘ lâng ê khùi-la̍t kap sio-lō sı̄ chiām-sı̂. Chiú ē phah-pháiⁿ lâng ê hó phín-hēng, ē hō͘ lâng kan-ta thiàⁿ ka-tı̄, chhut-chāi bó͘ kiáⁿ gō-sí, i koat-toàn beh chia̍h chiú. Chiú hō͘ lâng hoān-choē. Chiú teh phiàn lâng, lâng khı̀ chiú-tiàm sı̄ ài lāu-jia̍t hó thit-thô, iā bô phah-sǹg kàu boé kiám-chhái bô poàⁿ ı̂ⁿ, chí-ū bē chiú ê lâng tùi i toā hó-gia̍h nā-tiāⁿ. Nā kó-jiân sı̄ án-ni, lia̍t-kok ê chèng-hú thái m̄ lóng chhin-chhiūⁿ Gô͘-kok hit-khoán? Thái ū hiah chē lâng teh bē chiú, liân kàu-hoē lāi-ê iā ū? Thái ū hiah chē hó lâng iáu teh chia̍h chiú? Ū kúi-nā hāng ê in-toaⁿ: Chèng-hú m̄ pān in-ūi sı̄ khı̄-khek hiah-ê chin hó-gia̍h ê chè-chiú-ka m̄-ài tek-choē in. Lâng teh bē sı̄ in-ūi chit tô͘ chha-put-to tē-it hó thàn chı̂ⁿ. Lâng iáu teh chia̍h, ū-ê sı̄ ài thàn su-io̍k, ū-ê sı̄ in-ūi thàn hong-sio̍k koàn-sı̀, koh bô tı̀-ı̀ siūⁿ hit ê gûi-hiám, ka-tı̄ kóng sı̄ chia̍h tām-po̍h nā-tiāⁿ. Chóng-sı̄ lán tāi-ke nā lio̍h-á ū tı̀-ı̀ téng-bı̄n só͘ kı̀-ê chiū thang chai, nā tû-khı̀ chiú-cheng ê hāu-kó, chiū sè-kài ê i-koán, hong-tian pı̄ⁿ-ı̄ⁿ, ko͘-jı̂-ı̄ⁿ kap kaⁿ-ga̍k chē-chē bián ēng; sè-kan lâng ê hok-khı̀ ē ke-thiⁿ kàu bē sǹg-tit. Tı̄ chit ê tāi-chı̀ kiám m̄-sı̄ lán hō͘ Chú kiù ê lâng tio̍h chhut-thâu lâi chhoā lō͘? Kiám sı̄ beh thèng-hāu pháiⁿ hong-sio̍k ka-tı̄ ké-oāⁿ mah? Iā ū hó-lâng thui-sı̂ kóng: “Kiù-chú bat iōng chúi piàn-choè chiú, só͘-í lán m̄-thang kı̀m-chiú.” Che sı̄ ū-iáⁿ; iā chiú tı̄ Kū-iok sı̄ chí hoaⁿ-hí (Si-phian 104:15). M̄-kú ta̍k-kok ū i ê kèng-hóng, iā bat ū kóng hit-sı̂ Iû-thài-lâng toā-poàⁿ bô koè-thâu tiōng chiú, iū koh chit lō͘-boé sè-tāi chè-chō chin chē khoán ê chiú pí chá-sı̂ khah lı̄-hāi. Koh ū lâng kóng Pó-lô ū khó͘-khǹg Thê-mô͘-thài "tio̍h ēng tām-po̍h chiú" Che sı̄ ū iáⁿ, ē hō͘ lán chai Thê-mô͘-thài pún bô teh chia̍h chiú. Pó-lô koh kóng, "in-ūi lí ê pı̂-ūi, kap lí ê kāu phoà-pı̄ⁿ ê iân-kò͘". Thê-mô͘-thài sı̄ lám-sin iā hit-sı̂ káⁿ bô chhin-chhiūⁿ hiān-sı̂ ū hiah chē khoán ê pó͘-che thang ēng. Chóng-sı̄ ài khoàⁿ Sèng-chheh só͘ kan-sia̍p chia̍h chiú ê ı̀-sù, m̄-nā ū chiah-ê; āu goe̍h kiám-chhái beh koh kı̀. Tùi hit hō m̄ chai gûi-hiám ê lâng ài kóng chı̍t ê sı̍t-sū: Tı̄ siàu-liân pêng-iú ê tiong-kan, ū chı̍t-ê lio̍h-á ū chı̂ⁿ ê lâng, hó-sim bô sím-mı̍h thang hiâm. Tı̄ in chhù ta̍k jı̍t chia̍h pn̄g ê sı̂ koàn-sı̀ soà chia̍h tām-po̍h chiú, lūn chia̍h siuⁿ chē he m̄-bat. Kàu āu-lâi tú-tio̍h khah léng-chēng bô phoāⁿ, soà ēng chiú chò pêng-iú. Chia̍h liáu sim khah hoaⁿ-hí. Bô phah-sǹg chiām-chiām hō͘ chiú chò chú, kàu pa̍t-jı̍t giàn kàu tòng bē tiâu. Chhin-lâng kā i kı̀m; khı̀ toà tı̄ pêng-iú tau, pêng-iú kā i kı̀m. Chóng-sı̄ i su-khia toà jı̍p lâi. Chı̍t mı̂ pêng-iú phı̄ⁿ tio̍h chhàu-hoé lo, chiū chông jı̍p i ê khùn-pâng, khoàⁿ i tı̄ hoé-lô͘ piⁿ hō͘ hoé sio, m̄ chai i só͘ chò. Hó kai-chài hit pái hō͘ lâng kiù. Chiū koh tò-khı̀ chhin-lâng tau. Chhin-lâng koh kā i kı̀m chiú, i kan-khó͘ kàu ke̍k. Ū chı̍t jı̍t kap chhin-lâng teh kiâⁿ-lō͘, chiū siám soà thiàu-lo̍h Lûn-tun hô sí. Oá 40 hoè nā-tiāⁿ. Lí teh kóng: Goá éng m̄ chò chùi-hàn. Bô tek-khak chai. Chit hāng thang chai, chiū-sı̄ hit ê lâng nā lóng bô chia̍h chiú, chiū i m̄-bián chò chùi-hàn sí, che sı̄ ū iáⁿ. (Tâi-oân Kàu-hoē-pò tē 384~386 koan, 1917 nı̂ 3~5 ge̍h)