Choâ sô--koè ê hong-hiòng

Chhòng-sè-kı̀ 3-chiuⁿ 14-chat, Siōng-tè tùi choâ kóng: “Lí kı̀-jiân kiâⁿ chit-hō sū, lí beh siū chiù-chó͘, tùi taⁿ liáu-āu lí beh ēng pak-tó͘ lâi kiâⁿ-lō͘.” Tùi án-ni choâ chiū bô seⁿ kha, chiū ēng pak-tó͘ kiâⁿ-lō͘.Taⁿ, tı̄ chèng tōng-bu̍t, in lóng ū seⁿ kha, lán thang tùi in ê kha-jiáu-hō lâi khoàⁿ-chhut in kiâⁿ tùi toh 1 hong-hiòng khı̀. Chóng--sı̄ lán tı̄ chia lâi kóng choâ, i bô seⁿ kha, bô ū kha-jiáu-hō, lán beh choáⁿ-iūⁿ khoàⁿ-chhut i kiâⁿ tùi toh 1 hong-hiòng khı̀? Goá iáu oē-kı̀-tit ū kúi-pái toè-koè choâ sô ê hûn, só͘ hoat-seng ê éng-koè. Thâu 1-pái sı̄ choè gín-á ê sı̂-tāi, nā pàng-o̍h tò-tńg--lâi, bô tāi-chı̀ chò, chiū chio chhù-piⁿ ê tâng-phoāⁿ, choè-tı̄n khı̀ moâ-hông-nâ lāi ê chúi-khut-á piⁿ tiò 4-kha-á, goán chiong tō͘-kún chò tiò-jı̄, kā kau tı̄ tiò-kau téng, chiong só͘-ū ê tiò-koaⁿ chhah tı̄ chúi-khut-á piⁿ, liáu-āu chiū-sı̄ tán-hāu 4-kha-á lâi chia̍h jı̄, chit-ê sı̂-chūn thiaⁿ-tio̍h hù-kı̄n ū chiáu-á teh háu, tı̄ hia poe-lâi poe-khı̀. Goán chiū hò͘ⁿ-kı̂-sim beh khı̀ kā khoàⁿ māi--leh, teh kiâⁿ ê sı̂, tú-hó khoàⁿ-tio̍h choâ sô ê hûn. Moâ-hông-nâ lāi lóng sı̄ soa-bô͘-tē, choâ-hûn chin hó jı̄n. Só͘-í, nā ū choâ sô--koè, chin bêng-hián thang khoàⁿ-kı̀ⁿ i sô ê hong-hiòng, goán chiū it-tı̍t kā toè, kàu 1-châng moâ-hông-châng, choâ-hûn chiū thêng, gia̍h-thâu 1 khoàⁿ, goân-lâi hit-boé choâ í-keng kiu-khı̀ tı̄ téng-bı̄n, téng-bı̄n ū chò 1-siū chiáu-á-siū, hit-boé choâ siūⁿ beh chia̍h chiáu-á nn̄g, chiah oē hāi hiah-ê chiáu-á tı̄ hia khàu kiò-kiò. Poàⁿ-po͘ āu, goán iàu-kín beh thang siu hiah-ê tiò-koaⁿ, chin tú-hó, koh khoàⁿ-tio̍h 1-sô choâ-hûn, goán chiū koh kā toè, toè kàu chúi-khut-á piⁿ, 1 khoàⁿ, goân-lâi 1-boé choâ sı̄ lâi teh chia̍h tiò-kau téng ê 4-kha-á, sūn-soà hō͘ tiò-kau kau tiâu--leh. Choè gín-á khah bô-táⁿ, kiaⁿ pa̍t-ki tiò-á siāng-khoán koh tiò-tio̍h choâ, só͘-ū ê tiò-koaⁿ lóng bô siu, peh-khí kha chiū cháu, 1-khùn chiū cháu tò-tńg-lâi kàu chhù. Koh ū 1-pái, tı̄ 20 goā nı̂ chêng, tı̄ hái-kı̂ⁿ teh lia̍h hı̂-chai, hit-sı̂ tú-hó lia̍h bô, tāi-khài ū 10 goā lâng lóng khí-lâi tı̄ soa-lûn-á téng teh hioh-khùn, ū ê teh jiok soa-bé teh sńg, tú-hó khoàⁿ-tio̍h 1-sô choâ-hûn, goán chiū sūn choâ sô--koè ê hō it-tı̍t toè, toè kàu 1-tui chháu-tui, chiū hoah-hiu kiò tāi-ke lâi tàu-saⁿ-kāng, chiong chháu-tui poaⁿ soá-ūi, choâ kó-jiân bih tı̄ chháu-tui té. Beh liáu-kái choâ sô--koè ê hong-hiòng, lâi khoàⁿ-chhut i sô tùi toh 1-pêng khı̀, kı̂-sı̍t chin kán-tan, tùi ū koân-kē ê só͘-chāi lâi khoàⁿ chiū oē chai, chhin-chhiūⁿ ū soa-lûn-á lâi khoàⁿ siōng chheng-chhó, nā sı̄ khah sè-hō tı̍t-tı̍t ê hō, che sı̄ tùi koân-téng sô lo̍h kē, nā sı̄ ū 9-oan 18 oat, choâ sô ê hûn khah khoah, che sı̄ tùi ē-bı̄n sô chiūⁿ téng-bı̄n khı̀, in-ūi choâ tùi koân sô lo̍h kē, sı̄ bián chhut-la̍t--ê, tú-tio̍h ū koân ê jiah, pit-tēng ài khah chhut-la̍t, só͘-í choâ-hûn tiō oē khah khoah, tiō oē oan-lâi oan-khı̀, án-ni chiū thang liáu-kái i sô ê hong-hiòng. Í-siōng sı̄ pit-chiá í sı̍t-chè kéng-koè lâi siá, thê-kiong hō͘ tāi-ke chò chham-khó. (Tâi-bûn Bóng-pò tē 62 kı̂, 2001 nı̂ 11 ge̍h)