Choè hó ê kàu-oân

 Jı̂n-un mn̄g Pek-hiông kóng, “Cháiⁿ-iūⁿ lí bô khı̀ Chú-jı̍t-o̍h?” Pek-hiông kóng, “Goá hiān-chāi bô siūⁿ beh khı̀ Chú-jı̍t-o̍h, in-ūi í-chêng kà goá ê Sun lāu-su í-keng bô kà lah, só͘-í goá bô ài khı̀.” 
 Tē-jı̄ lé-pài-jı̍t Pek-hiông choân-ke kàu lēng-goā chı̍t ê siâⁿ khı̀ thit-thô. In khı̀ chham-ka kàu-hoē ê chū-hoē kap Chú-jı̍t-o̍h, tı̄ hia Pek-hiông khoàⁿ-kı̀ⁿ Sun lāu-su teh kà-chheh. Pek-hiông chin-chiàⁿ hoaⁿ-hí kóng, “Sun lāu-su, goá siūⁿ lí sı̄ choân sè-kài choè hó ê lāu-su. Lí chı̍t ē bô kà goán hit pan Chú-jı̍t-o̍h, goá chiū bô ài koh khı̀ Chú-jı̍t-o̍h lah.” 
 Sun lāu-su ê bı̄n piáu-chhut chin siong-sim kóng, “Pek-hiông, goá chin hoaⁿ-hí lí ài thiaⁿ goá kà-khò, chóng-sı̄ lí chit khoán siūⁿ-hoat khiok iā hō͘ goá ê sim kan-khó͘, in-ūi lí tio̍h chai Iâ-so͘ sı̄ pí goá khah tiōng-iàu. Siat-sú lí bô jı̄n-sek Iâ-so͘, án-ni goá sǹg sı̄ sit-pāi lah. Lán khı̀ Chú-jı̍t-o̍h sı̄ beh jı̄n-bat Iâ-so͘, chiap-siū Iâ-so͘ choè Chú, tùi án-ni lâi tit-tio̍h oa̍h-miā ê bí-niû. Iâ-so͘ chiah ē kiù lí.” 
 Pek-hiông siūⁿ liáu kóng, “Hó, Sun lāu-su, goá beh tò-khı̀ Chú-jı̍t-o̍h, in-ūi Iâ-so͘ sı̄ choè hó ê lāu-su.”

(“Kı̂-biāu ê Iâ-so͘”, Ia̍h 52 )