“Sióng-siān hoa̍t-ok” che-sı̄ thian-hoat; sui-jiân ū lâng kóng, “Siān-sim ê tó teh gō, ok-sim ê tı̀ se-bō,” “chò-ok chò to̍k khiâ bé kho̍k-kho̍k,” ū khah bô siu-ióng ê soà kóng, “Thiⁿ-lí bô ba̍k,” goá kóng lí m̄-thang hiah toā chhùi-táu, tùi thiⁿ hiah bô lé. “Thian-lí chiau-chiau, sı̂-sı̂n bē tò m̄-sı̄ hó pháiⁿ bô pò,” in-ūi pò-èng ū kín bān ê cheng-chha. Án-ni khoàⁿ choē-ok tek-khak ū kang-chı̂ⁿ(pò-èng). Kang-chı̂ⁿ sı̄ sím-mı̍h? Sı̄ khoàⁿ lí ê in lâi kiat-kó. Sio̍k-gú kóng, “Chèng tāu siu tāu, chèng chhek siu chhek.” Hô-se-a 8: 7 kóng, Só͘ chèng ê sı̄ hong, só͘ siu ê sı̄ kńg-lê-hong.” Lô-má 6:23 kóng, “Choē-ok ê kang-chı̂ⁿ sı̄ sí, chit ê sí sı̄ choè thang kiaⁿ ê hêng-hoa̍t8.” Án-ni thang siūⁿ.
Choè pháiⁿ ê lâng m̄-thang khoa-kháu, kóng hàm-hàm lah! Chhiúⁿ iâⁿ sı̄ siàu. Chú tek-khak ē lâi kap lí chheng-sǹg. Ū chı̍t-tùi chheng-liân hu-hū, ka-têng chin oân-boán, saⁿ-thiàⁿ teh koè-jı̍t, āu-lâi tiōng-hu tio̍h ài chhut-goā, chiū kā I ê hū-jı̂n-lâng kóng, lí ài kín-siú ka-hong, kèng toā thiàⁿ sè, hū-jı̂n-lâng ı̀n kóng, “Chò lí an-sim.” Tiōng-hu iā thok I chı̍t ê chı̀ chhin-bı̍t ê pêng-iú kóng, tı̄ I chhut-goā tiong kā I koan-sim I ê ka-têng. Hū-jı̂n-lâng chúi-sèng khah nńg-chiáⁿ, bô kú siū ín-iú tè tio̍h chı̍t ê siàu-liân lâng, chit ê siū-thok ê pêng-iú chai, teh siūⁿ pa̍t-jı̍t beh án-choáⁿ pò-kò chit ê hū-jı̂n-lâng ê só͘ kiâⁿ, I chiū chiong chit ê hū-jı̂n-lâng kap hit ê siàu-liân só͘ kiâⁿ só͘ kóng ê oē it-it kā thau hip siōng kap lio̍k-im khí-lâi. Pêng-iú tò-lâi lah, I chiū chiong I ê hū-jı̂n-lâng ê sū pò-kò, soà chiong só͘ hip ê siōng kap só͘ lio̍k ê im hō͘ I khoàⁿ. Tiōng-hu mn̄g I ê hū-jı̂n-lâng, hū-jı̂n-lâng láu-á ké sèng-jı̂n, teh siūⁿ I ê sū chin kı̂-bı̍t, ke-lāi bô lâng chai, sı̂n-kúi iā m̄-chai, chiū teh sé chheng, āu-lâi I ê tiōng-hu chiong I ê pêng-iú só͘ hip ê oa̍h-tāng siá-chin kā chò chhut-lâi, hū-jı̂n-lâng khoàⁿ chı̍t kı̀ⁿ, khui-siaⁿ toā-khàu, jı̄n-choē. Bat lâng sim-lāi ê Siōng-tè, I m̄-bián lâng kā I kóng. Siōng-tè khoan-iông sı̄ beh chhoā lí hoán-hoé, lí nā m̄ hoán-hoé, koh beh chiú-chùi hòng-tōng, oan-ke saⁿ-phah, Chú kàu, khoàⁿ lí án-ni kiâⁿ, beh tāng-tāng hêng-hoa̍t lí...(Má-thài 24:49, 51).
Khoàⁿ-tio̍h pháiⁿ-lâng teh heng-ōng, m̄-thang put-pêng.
Tio̍h chai “Thian-bóng khoe-khoe so͘ jı̂ put-lō͘.” Ū nn̄g-lâng chò-hoé kng-kiō, ū chı̍t-jı̍t kng tio̍h chı̍t ê hó-gia̍h lâng, toà chin-chē gı̂n. Kah-á chio It-á lâi bô͘-châi hāi-bēng, It-á m̄, kàu bô lâng só͘ kàu ê chhim-soaⁿ, Kah-á chiū phah-sí hù-ong, chhiúⁿ hiah ê gı̂n, beh pun It-á, It-á m̄-tı̍h; Kah-á kiaⁿ It-á kā lāu-siat, chiū ēng I ê cha-bó͘-kiáⁿ hō͘ It-á chò sim-pū, hoan-hù I tio̍h iú-hàu, I ê cha-bó͘-kiáⁿ kó-jiân chin iú-hàu, saⁿ tǹg chia̍h pn̄g ê sı̂, lóng su-hāu kā in ta-koaⁿ té pn̄g, beh kā té ê sı̂, in ta-koaⁿ ta̍k pái to kóng, “Bô thiⁿ”; kàu ū chı̍t-jı̍t, Kah-á in kiáⁿ tiòng chiōng-goân beh chiūⁿ kiaⁿ-siâⁿ chò toā koaⁿ, kui ke-hoé lóng chē chûn, kàu poàⁿ hái tı̂m-chûn, Kah-á kui-ke lóng bia̍t-bô, chit ê siau-sit jı̍p It-á ê hı̄-khang; hit ê-hng, in sim-pū beh koh kā té pn̄g ê sı̂ chiū kóng, “Ū thiⁿ”; in sim-pū chin kı̂-koài, chiah mn̄g, a-tia Í-chêng lóng kóng bô thiⁿ, kin-á-jı̍t goá ê pē-bó, hiaⁿ-tı̄ choân-ke bia̍t-bô, lí soà kóng ū thiⁿ, sı̄ sím-mı̍h Ì-sù? In ta-koaⁿ chiong in lāu-pē, bô͘-châi hāi-bēng teh heng-ōng, goá kiò sı̄ bô thiⁿ leh, taⁿ ū thiⁿ lah, ū pò-èng lah. (Chit nn̄g lâng chiū-sı̄ Ou-ku kap Phó͘-hin. (Kū-le̍k 12 goe̍h chhe 3 Ou-ku seⁿ).
Lia̍t-ūi ah, lán m̄-thang kàu khoàⁿ-tio̍h pháiⁿ-lâng siū pò-èng, chiah sı̀n ū thian-lí; Chú tek-khak beh lâi sím-phoàⁿ, hó-pháiⁿ tek-khak ē hun-bêng.
Lán ài chai choē-ok ê lı̄-hāi.
“Sat-tàn iā ka-kı̄ chng-chò kng-bêng ê thiⁿ-sài” (Lı̂m 11:14), hō͘ lí o͘-iáⁿ-tāⁿ, soà lia̍h choē-ok chò sim-sek, chhin-chhiūⁿ ti-tu ēng hit hō thn̂g-bı̍t tiⁿ ê oē lâi ín-iú hô͘-sı̂n.
Chiú lâi kóng, sió ím pó͘ jı̂n sin, chia̍h tām-po̍h khah bē siān, tāi-seng lâng chia̍h chiú, āu-lâi chiú chia̍h lâng, chiú-chùi gō͘ kang-san. Kiáu lâi kóng, gû-lo̍k-tāi, tāi-seng sı̄ sim-sek, āu-lâi poa̍h kàu sim kông hoé-jia̍t, khang-khoè bē kò͘-tit chò, pn̄g bē kò͘-tit chia̍h, phah hāi sin-thé, sàn-hiong chò chha̍t. Ū chı̍t ê gín-ná bı̄n-bô͘ chin súi, khó-sioh tio̍h kâu, sán-sán ná kâu, put-sı̂ haiⁿ, io kàu khı̀-sim ló͘-miā, soà siūⁿ-khı̀ kóng beh sí iā m̄ kín sí, toà teh lêng-tı̄ lâng. Lia̍t-ūi ah, m̄-sı̄ gín-ná lêng-tı̄ lí, sı̄ lí lêng-tı̄ I, I thài-ē m̄-chiâⁿ gín-ná, sı̄-toā-lâng tùi choē-ok só͘ niá ê moê-to̍k kang-chı̂ⁿ lâi liân-lūi lí ê kiáⁿ; só͘-Í tio̍h mē lí ka-kı̄. Lı̄-hāi ah, choē-ok ê kang-chı̂ⁿ, chit ê súi-súi ka-têng, oân-boán hu-hū, choē-ok chı̍t ē jı̍p-khı̀, chiū lōng-ke soàⁿ-the̍h, lı̄-iân pun kiáⁿ. Taⁿ ū sím-mı̍h kiù hoat? Ū. Chú Iâ-so͘ kóng, “Kı̀ⁿ-nā tio̍h-boâ taⁿ tāng-tàⁿ ê, tio̍h lâi chiū Goá, Goá beh hō͘ lín an-hioh” (Thài 11:28). Koh kóng, kı̀ⁿ-nā hoān-choē ê, chiū-sı̄ chò choē ê lô͘-châi, Kiáⁿ (Iâ-so͘) nā hō͘ lín chū-iû chiū chin-chiàⁿ chū-iû (Hān 8:34, 36). Sèng-si 115 siú, “Kı̀ⁿ-nā ū lâng hō͘ choē khó͘-chhó͘, tio̍h chhoē Kiù-chú Iâ-so͘, I ē kiù lí, I beh kiù lí, chek-sı̂ chín-kiù lí.” Hùn-heng koa 78. “Êng-kng ê tháu-pàng, kı̂-biāu ê tháu-pàng...” Lí ka-kı̄ beh lı̄-khui choē-ok sı̄ bô pān-hoat, tio̍h khò Chú ê pó-huih, kā lí sio̍k-hoê. Chhin-chhiūⁿ Jı̍t-pún teh khó͘-chhó͘, Tâi-oân ka-kı̄ bē ē thoat-lı̄, Bêng-kun ēng goân-chú-tân phah kàu hō͘ Jı̍t-pún tâu-hâng, Tâi-oân chiū tit-tio̍h tháu-pàng. Chú ê sı̍p-jı̄-kè pí goân-chú-tân ke ū chheng bān poē ê lêng-le̍k, ē táⁿ-tó Mô͘-kúi, húi-bia̍t choē-ok, hō͘ lán bô koh ū choē-ok pé-pa̍k thòng-khó͘, lâi tiàm tı̄ in-tián lāi, chò Siōng-tè chū-iû kiáⁿ-jı̂.
(Tâi-oân Kàu-hoē Kong-pò tē 788 kı̂, 1954 nı̂ 8 goe̍h)
