Choē ē siⁿ kiáⁿ

e̍k Ū chı̍t-ūi Kok-bı̂n ha̍k-hāu ê ha̍k-seng, siūⁿ beh tô-o̍h chiū tùi sian-siⁿ kóng chı̍t-kù pe̍h-chha̍t; “Sian-siⁿ, goá pak-tó͘ thiàⁿ”, sian-siⁿ chiū pàng i tò-khı̀. Kàu chhù, lāu-bú mn̄g--i kóng, “Lí kin-á-jı̍t án-choáⁿ ē chiah chá tńg--lâi?” Gín-ná m̄-káⁿ chiàu-sı̍t kóng, chiū kóng, “Goán sian-siⁿ phoà-pı̄ⁿ, só͘-í chá nn̄g-tiám-cheng pàng-o̍h.” Ē-po͘ tâng-o̍h lâi khoàⁿ--i, khoàⁿ i tı̄ chháu-po͘-á kap lâng teh sńg. Tâng-o̍h chiū mn̄g i kóng, “Lí to phoà-pı̄ⁿ thái-ē tiàm chia thiàu soh-á?” I chiū koh kóng pe̍h-chha̍t, kóng, “Goán ma-mah chhòng io̍h-á hō͘ goá chia̍h hó lah.” Kok-ūi chhiáⁿ khoàⁿ, chı̍t-kù pe̍h-chha̍t chiū liân-liân siⁿ kúi-kù pe̍h-chha̍t, chhin-chhiūⁿ án-ni choē ē siⁿ kiáⁿ. Koh chhin-chhiūⁿ chá ū chı̍t-ê lâng in-ūi tham-sim chiū thau-the̍h i ê pêng-iú ê chı̂ⁿ. Bô phah-sǹg hō͘ i hoat-kiàn tio̍h, chiū hō͘ pêng-iú lia̍h tiâu-teh, soà kā i hoah-chha̍t. Chit sı̂ hit ê lâng chin kiaⁿ, kiaⁿ-liáu lâng ûi-oá--lâi, só͘-í chiū tùi seng-khu thiu-chhut sió-to lâi tí-khòng, kó-jiân tuh-sí i ê pêng-iú. Tùi án-ni chiū pı̀ⁿ-chiâⁿ bô͘-châi hāi-bēng ê choē. Khí-thâu sı̄ tham-sim, chiū pı̀ⁿ choè bô͘-châi, soà hāi-bēng, tùi án-ni i chiū tô-cháu, soà pı̀ⁿ-choè kok-ka ê tô-hoān. Āu-lâi kèng-jiân ka-jı̍p thó͘-húi thoân-thé, soà chò-chhut thâi-lâng, pàng-hoé, kan-ı̂m, chhiúⁿ-toa̍t, kàu-boé tūi-lo̍h kàu bē tit siu-sı̍p ê tē-pō͘. Khah-siông lâng ê hoān-choē lóng-sı̄ án-ni, khí-thâu sió-khoá āu-lâi choē siⁿ choē, choē siōng ka choē, kàu-boé chiū kàu tı̄ put-khó siu-sı̍p ê tē-pō͘. Lāu-bó kap i ê cha-bó͘-kiáⁿ tı̄ chàu-kha teh sé phiat-á, lāu-pē kap i ê hāu-seⁿ tı̄ kheh-thiaⁿ teh chē. Hut-jiân thiaⁿ-kı̀ⁿ kòng-phoà phiat-á ê siaⁿ. Gín-á thiaⁿ-kı̀ⁿ, chiū tùi i ê pa-pa kóng, sı̄ ma-mah kòng-phoà--ê. Lāu-pē kı̂-koài mn̄g i cháiⁿ-iūⁿ oē chai? “In-ūi lóng bô thiaⁿ-kı̀ⁿ teh mē lâng ê siaⁿ,” gín-á án-ni ı̀n. Lâng chin iông-ı̄ⁿ chhē-tio̍h pa̍t lâng ê m̄-tio̍h, lâi mē lâng, ka-kı̄ ê choē khiok m̄-khéng jı̄n. Chú kóng, jı̄n-choē lâi ké-pı̀ⁿ--ê, beh tit-tio̍h lı̂n-bín. (Oa̍h-miā ê Bí-niû tē 33 kı̂,1957 nı̂ 2 ge̍h)