Choan-gia̍p hâng-oē Siû-chúi ê kàu-liān

 Ū chı̍t-ê kàu-liān tı̄ tı̂-á piⁿ tng-teh kà lâng siû-chúi ê hoat-tō͘,bô-tú-hó soah poa̍h lo̍h-khı̀ tı̂-á lāi,kàu-liān chhiú ná liòng ná hoah kiù-lâng,ka-chài ū ha̍k-oân thiàu lo̍h-khı̀ kā i kiù--khí-lâi. Chı̍t-ê ha̍k-oân mn̄g kóng: 
 「Lí sı̄ choan-bûn leh kà lâng siû-chúi ê kàu-liān,ná-ē ka-tı̄ soah bē-hiáu siû-chúi?」 
 Kàu-liān ı̀n kóng:「Tō-sı̄ bē-hiáu siû m̄-chiah chò kàu-liān,nā bô,goá tō khı̀ chò soán-chhiú--a.」 
 Ha̍k-oân léng-chhiò:「Ka-tı̄ bē-hiáu siû iā káⁿ beh kà--lâng!」 
 Kàu-liān án-ni kā ı̀n:「Ē-hiáu kà lâng siⁿ-kiáⁿ ê hū-sán-kho i-seng kám lóng ka-tı̄ ē-hiáu siⁿ-kiáⁿ!」

(Tâi-bûn Bóng-pò tē 34 kı̂, 1999 nı̂ 7 goe̍h)