Gín-á kap Chiáu

 Tı̄ Ná-ui kok bat ū chı̍t ê chiú-koáⁿ hū-jı̂n-lâng kap i ko͘-toaⁿ ê hāu-siⁿ, hō-choè Khoan-liōng, toà tı̄ chı̍t keng soè keng chhù. Múi nı̂ kı̀ⁿ-nā chhun-thiⁿ sı̂ ū chı̍t chiah koàn-chiáu lâi choh-siū tı̄ in chhù-nı̍h, tiàm hia siⁿ-nn̄g pū-kiáⁿ. Kàu chiáu-á-kiáⁿ lio̍h-á khah toā chiah, tú-hó sı̄ chhiu-thiⁿ léng-khı̀ ê sı̂-chūn, in chiū chhoā khı̀ toà tı̄ lâm-pêng sio-lō ê só͘-chāi, keh nı̂ ê chhun-thiⁿ chiah koh tńg-lâi. Tùi Khoan-liōng iù-chíⁿ ê sı̂ lóng sı̄ án-ni,nı̂ koè nı̂ i chin hoaⁿ-hí tán hit chiah chiáu tńg-lâi ê sı̂, in-ūi ta̍k jı̍t ài chhòng chia̍h mı̍h hō͘ i. Hit chiah chiáu-á chin koai ài hō͘ in chhı̄, só͘-í I kap i ê lāu-bú nn̄g lâng chin thiàⁿ i. Khoan-liōng nā kā i kho͘, i chiū poe lo̍h-lâi chia̍h, in-ūi chiáu-á kap i chin se̍k-sāi. 
 Khoan-liōng khah toā-hàn chiū khı̀ choè chúi-siú. Thâu chı̍t pái koè hái ê sı̂, in hit chiah chûn ū tùi A-hui-lı̄-ka chiu chiūⁿ-hoāⁿ, tı̄ hia tú-tio̍h hái-chha̍t soà hō͘ in lia̍h-khı̀ boē choè lô͘-châi. Koè chı̍t, nn̄g nı̂ Khoan-liōng ê lāu-bú lóng bô chiap-tio̍h i ê siau-sit, sim teh choa̍t-bāng, phah-sǹg i ê kiáⁿ káⁿ í-keng sí. Kı̂-sı̍t bô sí, sı̄ teh siū chhám, koà thih-liān, toà tı̄ chı̍t ê ke̍k chân-jím ê lâng ê chhù teh kā i choè kang. I ê sim toā-toā siàu-liām chó͘-ke kap i ê lāu-bú, teh siūⁿ m̄ chai kàu sím-mı̍h sı̂ ē thang koh kı̀ⁿ-tio̍h? Kiaⁿ-liáu éng-oán bô ki-hoē iā kú káⁿ. 
 Tú-hó chı̍t jı̍t Khoan-liōng teh choè kang ê sı̂, ngó͘-jiân khoàⁿ-kı̀ⁿ chı̍t chiah koàn-chiáu tı̄ i ê thâu-khak téng poe-lâi poe-khı̀. I ê sim bē bián-tit tò-tńg siūⁿ chá-jı̍t tiàm in chhù ê chêng-kéng, chiū chhut-siaⁿ kā i kho͘. Hé! Chin kı̂-koài, chiáu-á liâm-piⁿ hioh lo̍h-lâi, i chiah jı̄n-tio̍h sı̄ i chá-sı̂ ê pêng-iú. Khoan-liōng chin hoaⁿ-hí kàu bē-kò͘-tit! Siūⁿ chhut chı̍t hāng ê kè-tı̀ kóng, “Kàu koàn-chiáu nā beh koh poe-khı̀ pak-pêng, goá chiū beh siá chı̍t tiuⁿ phoe,pa̍k tı̄ i ê kha, hō͘ i toà tò-khı̀ goán tau,goán lāu-bó nā khoàⁿ-tio̍h chiū ē chai”. Kàu koh keh tang ê chhun-thiⁿ hit chiah koàn-chiáu chiàu-goân khı̀ Ná-ui-kok chhoē i ê kū siū. Khoan-liōng ê lāu-bó khoàⁿ i koh tńg-lâi chin hoaⁿ-hí,in-ūi siūⁿ-tio̍h i ê kiáⁿ chá-tang-sı̂ ê só͘ chò sim koh khah m̄ kam, chin thiàⁿ-sioh. Hut-jiân khoàⁿ-tio̍h chı̍t tiuⁿ phoe pa̍k tı̄ chiáu-á kha, chiū kín-kín kā i tháu khui, the̍h khí-lâi tha̍k, chai sı̄ i ê kiáⁿ só͘ siá ê oē. In pún-chng ê lâng thiaⁿ-liáu ia̍h thoè i hoaⁿ-hí. Ū chı̍t ê bo̍k-su kā in kóng, “Taⁿ lán tio̍h chı̄n-la̍t lâi khı̀ kiù i”. Liâm-piⁿ ū lâng chhut-thâu khı̀ tê chı̂ⁿ, chèng tāi-ke chiàu in só͘ ē lâi chàn-sêng: M̄-nā án-ni, in ū lâng hó-táⁿ khı̀ pín-kiû Hông-tè. Hông-tè thiaⁿ-liáu bē bián-tit lâu ba̍k-sái, piáu tông-chêng siat hoat-tō͘ lâi chín-kiù. Koh koè bô kúi jı̍t kau chiū pı̄-pān chiàn-chûn beh khı̀ A-hui-lı̄-ka lâi kiù hit ê siàu-liân ê lô͘-châi. Joa̍h thiⁿ iáu-boē koè ê sı̂, chiàn-chûn chiū tò-tńg-lâi, ia̍h chhoā Khoan-liōng kàu i só͘ thiàⁿ ê lāu-bú ê sin-piⁿ. Chèng lâng put-chí hoaⁿ-hí hoan-gêng i, soà chò-hoé khı̀ pài-tn̂g lâi kám-siā Siōng-tè ê in. 
 Kàu āu-lâi Khoan-liōng tı̄ pài-tn̂g í-kı̍p in chhù ê chhù-téng, ū chhāi chı̍t chiah koàn-chiáu ê tâng-siōng, hō͘ lâng thang chai Siōng-tè kiù i ê sı̀ⁿ-miā ê hoat-tō͘ sı̄ ēng hit chiah chiáu-á. 
 Chóng-sı̄ khah chai-iáⁿ ê lâng lóng chhut-la̍t kóng, Nā m̄ sı̄ hit ê gín-ná tùi khí-thâu ê sı̂ hó khoán-thāi hit chiah koàn-chiáu, i káⁿ oē khı̀ pa̍t keng chhù choh-siū, chiū khoan-liōng āu-lâi ún-tàng bô lō͘ thang tit-tio̍h kiù. 

(Tâi-lâm Kàu-hoē-pò, Tē 435 koàn, 1921 nı̂ 6 ge̍h)