Kó͘-chá, tı̄ chı̍t ê ū chin súi ê soaⁿ kap chin chheng ê ô͘ ê sè ê kok-ka-nı̍h, ū chı̍t ê lâng. I ta̍k jı̍t chin khoài-lo̍k peh soaⁿ liâu-chúi, khı̀ jiok hiah-ê poe-khı̂m cháu-siù.
Ū chı̍t jı̍t, i khoàⁿ-kı̀ⁿ chin súi ê kang ê lo̍k-á tùi i ê bı̄n-chêng cháu koè-khı̀, i khoàⁿ-tio̍h chiū it-tı̍t kā i jio̍k. Hit chiah lo̍k-á khoàⁿ-tio̍h lâng teh kā i jiok, chiū cháu jú kín, hit-ê siàu-liân lâng iā cháu jú-kín. Keng-koè chhân-iá, nǹg koè chhiū-nâ, soà cháu jı̍p-khı̀ chhim soaⁿ-nı̍h. I m̄-nā bô lia̍h-tio̍h lo̍k-á, iā soà m̄ chai lō͘ lah. I chin hō͘-hoé i m̄ eng-kai loān-loān tui-jiok. I chin chhoán chē tı̄ toā chio̍h téng hioh-khùn tia̍p-á-kú. Hut-jiân kan i thiaⁿ-kı̀ⁿ “Kiù-miā oh－” ê siaⁿ-im, i tio̍h chı̍t kiaⁿ, siūⁿ kóng, “Chiah-nı̍h chhim-soaⁿ ê lāi-bı̄n iáu ū pa̍t lâng ah?” I ǹg piⁿ-á khoàⁿ lâi khoàⁿ khı̀, chí ū khoàⁿ-kı̀ⁿ chı̍t chiah toā-eng tùi thâu-khak téng poe-koè, toā chiah eng ê siang kha gia̍p chı̍t ê lâng, siaⁿ-im sı̄ tùi hia chhut-lâi ê. Phah la̍h ê lâng chiū sûi-sı̂ the̍h i ê keng-chı̀ⁿ koáⁿ-kín biâu-chún, chiū siā khı̀. Hit chiah eng “Oá” chı̍t-siaⁿ chiū poa̍h lo̍h-lâi. Phah-la̍h ê lâng koáⁿ-kín cháu-khı̀ khoàⁿ, i khoàⁿ-kı̀ⁿ chı̍t ê é-é ê lâng tùi eng ê ē-bı̄n pê chhut-lâi. Hit-ê é lāu-lâng kā i seh to-siā, koh kóng beh sàng i pó-poè ê mı̍h-kiāⁿ, só͘-í chit-ê phah-la̍h ê lâng chiū toè é lāu-lâng kiâⁿ. In poâⁿ-koè kúi-nā ê soaⁿ, kiâⁿ kàu chı̍t ê chin sı̂n-pı̀ ê soaⁿ-tōng-nı̍h. Soaⁿ-tōng lāi ū kúi keng chin súi ê pâng-keng. É lāu-lâng chiong kúi keng pâng-keng lóng hō͘ i kiù miā un-jı̂n khoàⁿ. Phah la̍h ê lâng khoàⁿ-kı̀ⁿ hit lāi-bı̄n khǹg ê chha-put-to lóng sı̄ kim-gı̂n châi-pó kap lâng só͘ hán-tit khoàⁿ ê pó-poè. É lāu-lâng kā i kóng i thang chiàu só͘ ài ê kéng chı̍t hāng the̍h tńg-khı̀ chhù-nı̍h. Phah la̍h ê lâng khoàⁿ-kı̀ⁿ chı̍t chiah chin chhàn-lān koh chin súi ê chûn, hit chiah sı̄ ēng kim chò ê. Chit chiah chûn kı̂-koài ê, m̄ sı̄ kan-ta ē kiâⁿ chúi-bı̄n, iā ē poe-khı̀ khong-kiong chhin-chhiūⁿ poe-chûn. Só͘-í phah la̍h ê lâng chiū kā i thó hit chiah chûn, chin hoaⁿ-hí peh khí-khı̀. Phah la̍h ê lâng chhiáⁿ é lāu-lâng kā i kà cháiⁿ-iūⁿ sái hit chiah chûn í-āu, chiū kap i saⁿ-sı̂, chin hoaⁿ-hí sái chûn poe--khı̀ khong-tiong lah. I tı̄ chin koân ê hûn téng it-tı̍t poe kám-kak chin hoaⁿ-hí, tı̍t-tı̍t poe, poe kàu khoàⁿ-kı̀ⁿ ē-bı̄n ū chı̍t ê chin súi ê chhù ū chı̍t ê hoe-hn̂g. I iā khoàⁿ-kı̀ⁿ ū chı̍t ê chin chheng ê chúi-tı̂, i chiū poe lo̍h-lâi hioh tı̄ chúi-bı̄n. Chit sı̂ ū chı̍t ê ū kim-sek thâu-mn̂g ê siàu-liân cha-bó͘ gín-ná tùi hoe-tui ê tiong-kan nǹg chhut-lâi, ǹg phah la̍h ê lâng kóng, “Ah, chin súi ê chûn ah, lí ē-thang chhoā goá khı̀ thit-thô bē?” Phah la̍h ê lâng tong-jiân chin hoaⁿ-hí, chiū toà i poe kàu khong-tiong. In tı̍t-tı̍t poe, bô joā-kú khoàⁿ-kı̀ⁿ hái-tiong ū chı̍t ê sè tó-sū, khui chin chē súi ê hoe, in chiū chiong chûn kàng-lo̍h tı̄ hit-ê tó, tı̄ hia thit-thô.
Hit-ê phah la̍h ê lâng í-keng kám-kak chin ià-siān, soà khùn-khı̀. Hit-ê cha-bó͘ gín-ná khoàⁿ-kı̀ⁿ phah la̍h ê lâng khùn-khı̀, soà khí pháiⁿ-sim chiong hui-chûn sái cháu, in-ūi chı̍t lō͘ i chù-ı̀ phah la̍h ê lâng sái chûn ê hong-hoat. Hit-ê phah la̍h ê lâng tı̍t-tı̍t khùn kàu thiⁿ-kng chiah chhíⁿ khí-lâi. I ba̍k-chiu joê-joê leh chiah hoat-hiān saⁿ-kap lâi ê cha-bó͘ gín-ná bô khoàⁿ-kı̀ⁿ, koh hit chiah pó-kùi ê hui-chûn iā bô khoàⁿ-kı̀ⁿ iáⁿ lah. Phah la̍h ê lâng chiah chai khı̀ hō͘ cha-bó͘ gín-ná phiàn khı̀ lah, chóng-sı̄ tı̄ chit-ê tó-sū ū sím-mı̍h pān-hoat. Só͘-í i chiū bān-bān siūⁿ pān-hoat, siāng-sı̂ i kám-kak pak-tó͘ chin iau, i chiū tı̄ hia chhoē chia̍h-mı̍h, kó-jiân i chhoē-tio̍h chē-chē lâi-á-chhiū kiat chē-chē toā lia̍p ê koé-chí, iā ū âng ê, iā ū chhiⁿ ê, hō͘ phah la̍h ê lâng chhùi-noā soà kı̀m bē tiâu, tı̍t-tı̍t lâu chhut-lâi. I chiū bán chı̍t lia̍p âng ê lâi chia̍h. Chia̍h liáu-āu kám-kak seng-khu kı̂-koài, i ê thâu-khak kám-kak chin tāng, i chı̍t ē bong “Aih ah!” Hoah chı̍t siaⁿ, che chiū hāi lah, i ê thâu-khak téng soà hoat 2 ki kak, koh kè-sio̍k tı̍t-tı̍t tn̂g khí-lâi, i soà khàu chhut-lâi. I ê pak-tó͘ chı̍t-ē iau i koh bán chı̍t lia̍p chhiⁿ ê chia̍h lo̍h-khı̀, chin kı̂-koài, i ê thâu-khak soà pı̀ⁿ khah khin. Ah, kı̂-koài, chia̍h chhiⁿ lâi-á, thâu-khak téng ê kak soà kiu-khı̀.
Phah la̍h ê lâng chin hoaⁿ-hí chiū bán chin chē âng ê kap chhiⁿ ê lâi-á chiū chún-pı̄ beh toà tńg-khı̀. Bô kú, i khoàⁿ-kı̀ⁿ ū chı̍t chiah chûn tùi hū-kı̄n koè, chiū thǹg saⁿ khí-lâi ia̍t, chûn-téng ê lâng khoàⁿ--tio̍h, chiū sái lâi kā i chài tńg-khı̀.
Tńg lâi kàu siâⁿ nı̍h, i chiah chai-iáⁿ thau sái i ê hui-chûn ê, chiū-sı̄ kok-ông ê cha-bó͘-kiáⁿ. I chiū ké chò bē mı̍h-kiāⁿ ê, kiâⁿ kàu ông-kiong ê tû-pâng, hiah-ê oē-peng m̄ chún i jı̍p-khı̀, i kiông beh jı̍p-khı̀, koh toā-siaⁿ hoah, “Goá chiong chit lia̍p lâi-á beh sàng hō͘ kong-chú, goá beh chiong sè-kài choè hó ê lâi-á hiàn hō͘ kong-chú!” Chit sı̂ tı̄ tû-pâng lāi teh chú pn̄g ê thiaⁿ-tio̍h, chhut-lâi chı̍t-ē khoàⁿ, khoàⁿ-tio̍h in só͘ m̄-bat khoàⁿ-tio̍h ê hó lâi-á, i chiū kā oē-peng kóng, “Oeh, oeh, lín nā hiah pháiⁿ, goá bô ài pn̄g hō͘ lín chia̍h, hō͘ i jı̍p-lâi!” Phah la̍h ê lâng chiah ē-thang chı̀n kàu ông-kiong lāi, chiong chiah-ê âng-sek ê lâi-á bē hō͘ chú-pn̄g ê.
Chú-pn̄g ê chiong chiah-ê choè hó ê lâi-á sàng kàu kong-chú ê pâng-keng hō͘ i chia̍h. Kong-chú khoàⁿ-tio̍h hiah-ê lâi-á hui-siông hoaⁿ-hí, chiū tı̍t-tı̍t chia̍h. Chóng-sı̄ bô kú kong-chú ê thâu-khak téng iā siⁿ kak chhut-lâi. Chit-ê tāi-chı̀ hō͘ kok-ông kap choân kiong-lāi ê lâng khí tio̍h kiaⁿ, kok-ông kiò ióng-sū gia̍h kı̀-á lâi kı̀ chiah-ê kak, chóng-sı̄ bô-lūn cháiⁿ-iūⁿ kı̀, to kı̀ bē lo̍h-khı̀, hoán-tńg soà jú-tn̂g khí-lâi, kong-chú soà bē tín-tāng. Kong-chú ta̍k-jı̍t lâu ba̍k-sái, pn̄g iā soà chia̍h bē lo̍h-khı̀. Kok-ông lóng siūⁿ bô pān-hoat, chiū bēng-lēng choân-kok ê lâng, nā ū lâng ē-thang i-tı̄ chit-ê kı̂-koài ê pı̄ⁿ, beh chiong kong-chú kè hō͘ i. I chhut bēng-lēng liáu-āu, chē-chē chhut-miâ ê i-seng khı̀ kā i i, chóng-sı̄ bô lâng ū hoat-tō͘. Siàu-liân ê phah-la̍h ê lâng khoàⁿ-tio̍h ki-hoē lâi lah, chiū iā beh khı̀ ông-kiong i kong-chú. I chiū siū chhoā kàu kong-chú ê pâng-keng, i khoàⁿ-kı̀ⁿ chin loán-jio̍k ê kong-chú, moá-bı̄n chin hoân-ló; kong-chú khoàⁿ-tio̍h i, kám-kak chin kiàn-siàu. Phah-la̍h ê lâng kā kong-chú kóng, “Lí hoān-tio̍h chit-ê kı̂-koài ê pı̄ⁿ, sı̄ Siōng-tè teh chek-hoa̍t lí, lí nā jı̄n-choē, koh koat-sim í-āu bô beh koh hoān, chiū ē sûi-sı̂ hó.” Kong-chú thiaⁿ liáu sûi-sı̂ jı̄n i ê koè-sit, ǹg Siōng-tè chhàm-hoé. Phah-la̍h ê lâng chiah chiong chı̍t-lia̍p chhiⁿ lâi-á hō͘ kong-chú chia̍h. Chèng-lâng ê ba̍k-chiu lóng teh khoàⁿ, kong-chú ê kak chin kín chiū kiu-khı̀, bı̄n-sek iā pı̀ⁿ chin hó, hoê-ho̍k í-chêng ê bí-lē.
Kong-chú chin hoaⁿ-hí, chèng-lâng toā-siaⁿ hoah, kok-ông sûi-sı̂ soan-pò͘ hit-ê phah-la̍h ê lâng kap kong-chú kiat-hun, choân-kok ê lâng lóng chin hoaⁿ-hí chia̍h chhiⁿ-chhau, khèng-chiok cha̍p jı̍t cha̍p mı̂. Phah-la̍h ê lâng kap kong-chú chin khoài-lo̍k siông-siông sái poe-chûn khı̀ thit-thô.
(Ka-têng ê Pêng-iú tē 73 kı̂, 1964 nı̂ 3 ge̍h)
