Gín-ná ài thiaⁿ ê kò͘-sū Sió Sin-sū

Bí-kok ê chok-ka (siá sió-soat á-sı̄ siá bûn-chiuⁿ ê lâng). Thó͘-mh kap Kiat-sú ū chı̍t pái tùi Sūi-se sái chhia lâi Ì-tāi-lı̄ ê Ok-lô-ná siâⁿ thit-thô. In ê chhia lâi kàu siâⁿ-goā ê sı̂, hō͘ nn̄g ê chhēng phoà-saⁿ ê gín-ná tòng tı̄ lō͘-nı̍h, in ê chhiú lóng koāⁿ chı̍t nâ-á ê toā iûⁿ-moê, chhiáⁿ in tio̍h kā i bé. Thó͘-mh kap Kiat-sú khoàⁿ liáu iā chin ài chia̍h, chiū kā in bé chı̍t nâ. Teh kóng oē ê sı̂, in chai-iáⁿ hit nn̄g ê gín-ná sı̄ hiaⁿ-tı̄, toā-hàn ê kiò-chò Nı̂-ko-lah 13 hoè, sè-hàn ê kiò-chò Kiat-kó͘-pho 12 hoè. Tē-jı̄ jı̍t chá-khí, Thó͘-mh kap Kiat-sū tùi lú-koán chhut-lâi, koh tú-tio̍h hit nn̄g ê gín-ná, tı̄ kóng-tiûⁿ (chin khoah ê só͘-chāi) ê phùn-chúi-tı̂ piⁿ teh kā lâng chhit phoê-ê, in nn̄g ê khoàⁿ-tio̍h chiū kā in chio-ho͘. Thó͘-mh kóng, “Goá lia̍h-chò lín sı̄ kan-ta teh bē iûⁿ-moê”. Nı̂-ko-lah ı̀n kóng, “Sian-siⁿ, goán tio̍h chò chin chē tāi-chı̀ neh! Ū-sı̂ goán iā chò lú-kheh ê hióng-tō, chhoā lâng khı̀ khoàⁿ bêng-sèng kó͘-chek. ” Thó͘-mh kap Kia̍t-sū toà tı̄ Ok-lô-ná siâⁿ ê chı̍t lé-pài tiong, ta̍k-jı̍t lóng kap hit nn̄g ê hiaⁿ-tı̄-á kı̀ⁿ-bı̄n. In tı̄ chin joa̍h ê jı̍t-thâu ē, kui-jı̍t bô êng, chhit phoê-ê, bē chúi-kó, bē pò-choá, chò hióng-tō....... In sui-jiân sè-hàn, chóng-sı̄ tiong-sı̍t chò kang, chò kàu chin hó-sè. Ū chı̍t-jı̍t poàⁿ-mı̂, Thó͘-mh hoat-hiān tio̍h hit nn̄g-ê gín-ná khiā tı̄ kóng-tiûⁿ--nı̍h. I mn̄g in kóng, “Siáⁿ-sū lín iáu bē tò-khı̀ khùn?” Nı̂-ko-lah kóng, “Goán teh thèng-hāu choè-āu chı̍t-pang kong-kiōng khı̀-chhia, in-ūi khı̀-chhia nā lâi, goán chiū ē-thang chiong àm-pò bē liáu-liáu.” “Lín nn̄g ê khoàⁿ khí-lâi chin ià-siān, jı̍t--sı̂ chò kang lóng chiah kan-khó͘ sı̄ bô?” “Sian-siⁿ, goán bô hiâm kan-khó͘”. Nı̂-ko-lah chin ū lé-sò͘ án-ni ı̀n-tap. In-ūi Thó͘-mh m̄ ài tı̄ poàⁿ-mı̂ kiáu-jiáu in ê kang-chok, só͘-í chiū kóng tia̍p-á-kú chiū kap in saⁿ-sı̂, tò-khı̀ lú-koán. Keh chá-khí, Nı̂-ko-lah teh kā Thó͘-mh chhit phoê-ê ê sı̂, Thó͘-mh mn̄g kóng, “Lí kap sió-tı̄ chò kàu hiah phah-piàⁿ, chhēng-saⁿ kap chia̍h hiah bái, chhiáⁿ kā goá kóng, lín só͘ thàn ê chı̂ⁿ cháiⁿ-iūⁿ ēng?” “Sian-siⁿ, goán ū kè-oē”. Hit ê gín-ná iû-goân, chēng-chēng khoàⁿ kóng-tiûⁿ phùn-chúi-tı̂ piⁿ lâi-óng ê lâng, tùi i ı̀n-tap. “Chin hó, goán āu--jı̍t beh lı̄-khui chia goán iáu bē lı̄-khui í-chêng ē-thang thè lí chò sím-mı̍h tāi-chı̀ mah?” Thó͘-mh kóng. Nı̂-ko-lah tú kóng, “Bô”, ê sı̂, i ê sió-tı̄ khiok chin heng-hùn, chhiúⁿ-khı̀ kóng, “Múi lé-pài-jı̍t goán lóng tio̍h kàu lı̄ siâⁿ bô hn̄g ê hiuⁿ-siā. Pêng-siông sı̂ chē kong-kiōng khı̀-chhia, bı̂n-á-jı̍t, lí ēng lí ê chhia chài goán khı̀ hó bô?” Thó͘-mh chin hoaⁿ-hí tà-èng in ê iau-kiû. Keh-jı̍t thàu-chá Thó͘-mh chiū chài in khı̀, kàu siâⁿ-goā ê sı̂, Thó͘-mh siūⁿ in tek-khak ē tı̄ chı̍t-keng chin phoà lāu ê chhù-á thêng chhia, bô phah-sǹg keng-koè chı̍t-tòng âng chng-á ê chhiûⁿ-ûi-á pau-ûi-teh ê toā chhù ê sı̂, Kiat-kó͘-pho hut-jiân kóng, “Sian-siⁿ, chhiáⁿ tı̄ chia thêng chhia.” Thó͘-mh kám-kak chin kı̂-koâi, chiū toè in jı̍p toā-mn̂g. Chı̍t ê chhēng pe̍h-saⁿ ê hū-jı̂n-lâng chhiò-chhiò chhut-lâi, chı̍t-ē khoàⁿ chiū chai-iáⁿ i sı̄ chı̍t ê hô-ái ê hō͘-sū. Thó͘-mh tùi i kóng, “Chin sit-lé, goá chhoā nn̄g ê gín-ná lâi kiáu-jiáu lín”. “Ah, hoan-gêng, hoan-gêng, Nı̂-ko-lah, kap Kiat-kó͘-pho chhiáⁿ jı̍p-lâi.” Hō͘-sū chhiò-chhiò kóng. I chhoā in kàu chı̍t ê pēⁿ-pâng mn̂g-kháu, i ēng chiàⁿ-chhiú ê sı̍t-chí oá chhùi-tûn, ı̀-sù kiò in tio̍h tiām-tiām. Nn̄g ê gín-ná chiū jı̍p khı̀ chē tı̄ chı̍t ê chha-put-to 20 hoè ê sió-chiá ê piⁿ-á. I chhēng chı̍t-niá chin súi ê goā-saⁿ, kap in nn̄g ê teh kóng-chhiò. In ê bı̄n chin sio-siâng, tāi-khài sı̄ in ê a-ché. Thó͘-mh lı̄-khui pēⁿ-pâng ê sı̂, tı̄ lông-hā tú-tio̍h hit ê hō͘-sū, hō͘-sū chiong in 3 ê a-ché sió-tı̄ ê kò͘-sū kóng hō͘ i thiaⁿ. Goân-lâi in ê ma-ma chin chá chiū sí-khı̀, pa-pa sı̄ chin gâu chhiùⁿ-koa ê lâng, tı̄ chiàn-cheng tú khai-sí ê sı̂ chiū sí-khı̀. Bô-kú Ok-lô-ná siâⁿ siū hông-chà (hui-ki lâi tàn chà-toâⁿ), in soà bô chhù thang tò-khı̀, chí-hó liû-lōng tı̄ goā-bı̄n. Ok-lô-ná siâⁿ lûn-hām liáu-āu, in in-ūi ài kok chiong chêng-pò (tùi-te̍k ê siau-sit) chhàng tı̄ phê-ê ē, poàⁿ-mı̂ sàng kàu tı̄ koân-soaⁿ ê oān-kun (lâi kiù-oān ê kun-tūi.) Chiàn cheng sèng-lı̄ āu, nn̄g ê hiaⁿ-tı̄ tò-khı̀ Ok-lô-ná chhoē a-ché Lu-sū-a, hoat-hiān i in-ūi chiàn-cheng seng-oa̍h ê kan-khó͘ soà tio̍h hı̀-pı̄ⁿ. Nn̄g ê hiaⁿ-tı̄ chiū sàng i kàu chı̍t ê chin hó ê liâu-ióng-ı̄ⁿ, in-ūi hùi-iōng chin kùi, nn̄g ê hiaⁿ-tı̄ chin khiām, chia̍h chin bái chhēng chin bái, chı̄n-la̍t choè kang, thàn ê chı̂ⁿ lóng kau hō͘ a-ché chò i-io̍h-hùi. Thó͘-mh thiaⁿ liáu chin o-ló chit nn̄g ê hiaⁿ-tı̄. Tı̄ i sái-chhia chài in tò-lâi Ok-lô-ná siâⁿ ê sı̂, in nn̄g ê iû-goân chē tı̄ i ê sin-piⁿ, chóng-sı̄ i kám-kak chin hoaⁿ-hí. Bô-kú Thó͘-mh siá chı̍t phiⁿ kò͘-sū “Ok-lô-ná ê nn̄g ūi sió sin-sū”, hō͘ tha̍k ê sió pêng-iú siū toā kám-kek. (Ka-têng ê Pêng-iú tē 66 kı̂, 1963 nı̂ 8 ge̍h)