Tē 1 chiuⁿ
Hêng-sū kap Kat-la-tí
Chit ê sı̄ Hô-lân kok ê kò͘-sū, khoàⁿ chit ê kò͘-sū, m̄-thang m̄ chai Hô-lân kok, só͘-í tāi-seng chiong Hô-lân kok ê chêng-hêng, iok-lio̍k kóng i.
Hô-lân sı̄ sè-kài tē it kı̂-koài ê kok. Choân kok ê toē-sè pí hái-bı̄n khah kē, só͘-í m̄-nā kok ê piⁿ-kài choē-choē khí tē-hoāⁿ, chiū-sı̄ kok-lāi ta̍k só͘-chāi ê hiuⁿ-siā, iā choē-choē khí tē-hoāⁿ, tı̂-hông gûi-hiám, in-ūi án-ni ta̍k nı̂ liāu-lí tē-hoāⁿ, tio̍h hùi bān-bān chı̂ⁿ-gûn, chiū-sı̄ kiaⁿ-liáu tē-hoāⁿ tó-hoāi, hái-chúi lâu jı̍p tı̀-kàu peh-sı̀ⁿ im-sí. Siat-sú tē-hoāⁿ nā pang, chiū choân kok lóng oē piàn-choè chúi-tı̂, kok-lāi ê peh-sı̀ⁿ chiū tio̍h choè chúi-lāi ê hı̂ lah! Tı̄ pak-sı̀ ū chı̍t ê toā hái-oan, kiò-choè Sài-tek; chiū-sı̄ tı̄ 16 sè-kí ê sı̂, hái-chúi im jı̍p lâi chiâⁿ-ê, hiuⁿ-siā siū im ba̍t-ê ū 72 só͘-chāi, peh-sı̀ⁿ tú-tio̍h chúi-chai-ê cha̍p-bān lâng. Tùi án-ni kok-lāi ê peh-sı̀ⁿ, chin chù-ı̀ tı̄ chiah-ê chúi-lō͘, ta̍k só͘-chāi khui hô, khui kau sı̀-bı̄n thong-thàu, ín-chúi jı̍p hái. In teh hō͘ chúi lāu-chhut, lóng sı̄ oá-khò hong-chhia, chhia-chúi tı̄ hô-nı̍h, lâi thàu kàu hái-nı̍h. Kok-lāi choē-choē só͘-chāi ū siat hong-chhia, teh chhia chúi ê sı̂, chhia-téng ê sı̍t tı̍t-tı̍t lı̀n, hn̄g-hn̄g khoàⁿ chhin-chhiūⁿ chiáu teh pe chı̍t iūⁿ. Kok-lāi in-ūi chúi-lō͘ chin choē, chiū chûn-chiah iā choē, chài-hè óng-lâi chin lı̄-piān, nā-sı̄ kàu tang-thiⁿ sı̂, thiⁿ-khı̀ chin koâⁿ ta̍k só͘-chāi ê chúi lóng kian-peng; khiā-khí ê peh-sı̀ⁿ kiâⁿ tı̄ peng-téng, ū-ê chē peng-chhia, ū-ê chhēng peng-oê kiâⁿ kín kàu chhin-chhiūⁿ pe.
Hô-lân kok ê peh-sı̀ⁿ tē-it khùn-lân ê tāi-chı̀, chiū-sı̄ chiah-ê tē-hoāⁿ, in-ūi án-ni khùn-lân, chiū siⁿ-chhut thiàⁿ kok ê sim, siⁿ-chhut thun-lún ê sim, siⁿ-chhut un-khûn ê sim, siⁿ-chhut chiat-khiām ê sim, só͘-í kok sui-jiân chin soè, bô chı̍t ê oē pí-tit in ê ióng-kám, m̄-nā án-ni, chiū-sı̄ chhâ-khó sin ê mı̍h, hoat-bêng sin ê lí, gián-kiù seng-lí, í-kı̍p chû-siān chiah-ê tāi-chı̀, hán-tit khoáⁿ-kı̀ⁿ oē chhin-chhiūⁿ in chit-iūⁿ ê jı̄n-chin.
Hô-lân bó͘ só͘-chāi ū chı̍t ê Pek-chím ê ke, ū lâm-lú nn̄g ê gín-ná, á-hiaⁿ miâ Hêng-sū, nı̂ cha̍p-gō͘ hè, sió bē miâ Kat-la-tí, chí-ū cha̍p-jı̄ hè, sin-sè chin hó ki-kut, ba̍k-chiu Kng-bêng, chin sı̄ súi.
Bó͘ tang-thiⁿ chá-khí, nn̄g lâng khû tı̄ chı̍t ê peng-khoe ê hoāⁿ-téng, tı̄ hia chiong peng-oê pa̍k tı̄ in ê kha, in ê peng-oê m̄-sı̄ tùi tiàm-lāi boé ê, sı̄ ka-kı̄ ēng chhâ siah chiâⁿ to ê khoán-sit, téng-bı̄n chha̍k khang, ēng soh pa̍k, in-ūi in ê ke chin sòng-hiong, bô chı̂ⁿ thang thoè gín-ná boé peng-oê. In nn̄g lâng chiong oê pa̍k hó, Hêng-sū toā siaⁿ kiò i ê sió-bē kóng, “Kat-la-tí, taⁿ thang lâi liu-peng kè-khoe khı̀.”
I ê sió-bē chhiò kóng, “Chı̍t kha iáu-bē ū pa̍k hó, chā-jı̍t khı̀ chiūⁿ koe hō͘ toà-á sǹg goá ê kha chin thiàⁿ, chit tia̍p boē-oē koh-chài pa̍k ân.”
Hêng-sū kóng, “Pa̍k khah koâiⁿ tām-po̍h chiū oē-choè-tit.”
Kat-la-tí kóng, “Toà-á chiah té, goá beh cháiⁿ-iūⁿ pa̍k nih?” Hêng-sū kóng, “Lí chin sı̄ pūn, lí kiám bô ū pa̍t siang phê-oê mah?”
Kat-la-tí kóng, “Ai-ah, lí boē-kı̀-tit lāu-pē chiong chı̍t siang hó-hó ê sin oê, hiat tı̄ hé-lāi mah? Kàu goá chai khı̀ khoàⁿ ê sı̂, í-keng chiâⁿ hé-hu liáu, lí thoè goá choè chit siang chhâ-oê, iā oē chhēng-tit, goá tio̍h khah soè-jı̄ cháu nā-tiāⁿ.” Hêng-sū chiū tùi i ê tē á lāi the̍h-chhut chı̍t tiâu toà-á, kūi-lo̍h thoè Kat-la-tí ēng la̍t lâi pa̍k chat, i ê sió-bē toā siaⁿ hoah kóng, “A-hiaⁿ ah, thiàⁿ ah, thiàⁿ kàu-ke̍k ! Tùi án-ni Hêng-sū lio̍h-á khah khin. Thoè i pa̍k hó, nn̄g ê khan chhiú tı̄ peng-téng liu-lâi liu-khı̀, lí sak goá, goá sak lí, tāi-ke hah-hah chhiò, chin sı̄ chhù-bı̄. Tú-tú teh ko-hèng, hut-jiân thiaⁿ-kı̀ⁿ khin-iù ê siaⁿ kiò kóng,“Hêng-sū, Kat-la-tí, kín tò-lâi.”
Hêng-sū kóng, “Chit ê tek-khak sı̄ a-bú teh kiò lán, kín lâi khı̀.”
Chit sı̂ jı̍t-kng tú-tú chiò tı̄ peng-téng, ngó͘-chhái kim-kim cha̍p-hun súi, hiaⁿ-bē nn̄g lâng, sui-jiân m̄ kam goān liâm-piⁿ lı̄-khui hit só͘-chāi, iáu-kú in sı̄ hó ê gín-ná, m̄ káⁿ ûi-ke̍h lāu-bú ê bēng-lēng, chiong peng-oê thǹg-khı̀, cháu tò khı̀ ke-lāi.
In ê ke ê chhù sui-jiân oe̍h-soè, khiok siu-chéng chin chheng-khı̀, in ê lāu-bú Pek-chím kha chhēng chhâ-oê, thâu tı̀ pe̍h-bō, sin chhēng i-ho̍k chheng-khı̀ bô lâ-sâm, choè lâng hó khoàⁿ iā bín-chia̍t choè tāi-chı̀, hō͘ lâng khoàⁿ liáu, bô m̄ siⁿ-khí him-bō͘. In ê lāu-pē, So͘ Pek-hok tiàm tı̄ tē-hoāⁿ choè kang, sin-lô iā bô chió. Chı̍t jı̍t in-ūi hoat toā chúi, tı̄ tē-hoāⁿ chı̄n la̍t choè kang, bô phah-sǹg tùi tē-hoāⁿ-téng poa̍h-lo̍h-lâi, piàn-choè chı̍t ê gōng lâng, boē-oē koh-chài choè kang thàn chia̍h. Hit sı̂, Kat-la-tí iáu soè-hàn, Hêng-sū oē kı̀-tit i ê lāu-pē bē ū tio̍h-pı̄ⁿ ê sı̂, choè tāi-chı̀ un-khûn chin ū thiàⁿ sim, siông-siông khoài lo̍k, nā ū êng ê sı̂ chiū chiong Hêng-sū kı̂ tı̄ keng-thâu-téng chhiùⁿ-koa thit-thô, chin ū chhù-bı̄. Taⁿ lāu-pē í-keng put-ti jı̂n-sū, lāu-bú chin kan-khó͘, ta̍k jı̍t khò boē chhài kap pháng-cheh ê tām-po̍h chı̂ⁿ, chiah lâi tō͘-pá. M̄-nā ke-sū liân-lūi kàu chin tāng, koh i ê tiōng-hu sui-jiân bô ti-kak, khùi-la̍t chin toā, ū-sı̂ gōng-pı̄ⁿ hoat-khí, hı̀ⁿ oáⁿ, to óng-lâi tiô-thiàu, la̍t boē-oē at-chí i, siat-sú Hêng-sū tı̄ ke-lāi, chiū ū thang pang-chān, nā chí-ū i chı̍t lâng tı̄ ke-nı̍h chiū bô hoat-tit i.
Chı̍t jı̍t Hêng-sū ê lāu-bú tùi i kóng, “Ai-ah, lí oē kı̀-tit mah? Chá-chêng lí ê lāu-pē sı̄ chı̍t ê chin oē thun-lún tio̍h-boâ, koh chin gâu ê lâng, ū tı̀-sek chhin-chhiūⁿ lu̍t-su, liân koāiⁿ-koaⁿ ū-sı̂ bat kap i saⁿ-kap gı̄-lūn tāi-chı̀, hiān-sı̂ khó-sioh i boē jı̄n-tit goá sı̄ i ê bó͘, iā boē jı̄n-tit lín sı̄ i ê kiáⁿ cha-bó͘-kiáⁿ.”
Hêng-sū kóng, “A-bú, lí ê oē bô chhò, goá oē-kı̀-tit lāu-pē chin sı̄ ióng-kám hoân-sū oē choè, koh chin ài chhiùⁿ-koa.”
Lāu-bú kóng, “Lín chiah-ê oē-kı̀-tit i hó ê sı̂ ê kong-kéng, goá chin sı̄ khoài-lo̍k,” tú-tú kóng kàu chia hut-jiân kín-kín kiò kóng, “Kat-la-tí kín chiong lín lāu-pē chhiú-nı̍h ê be̍h-chiam the̍h-khí-lâi, nā bô chiū i oē chha̍k-tio̍h i ê ba̍k-chiu, kín kā i chhēng oê, lí khoàⁿ i ê kha í-keng tàng chhin-chhiūⁿ sng chı̍t-iūⁿ.” Kat-la-tí chiū kín-kín chiong chiam chhiúⁿ-lâi, the̍h oê kā i ê lāu-pē chhēng, chiah bô tāi-chı̀. In ke-lāi sió-khoá ê sū, to sı̄ in hiaⁿ-bē nn̄g lâng pang-chān choè, Kat-la-tı̀ chin gâu choè chhiú-kang kap chhiùⁿ-koa, gâu choè ke-lāi ê kang, nā-sı̄ bô sím-mı̍h tha̍k chheh ê châi; Hêng-sū ū-sı̂ chhut-goā chhò-chhâ, ū-sı̂ tı̄ ke-lāi choh-hn̂g, koh gâu tha̍k-chheh, i tı̄ o̍h-tn̂g, in-ūi sı̄ sòng-hiong ê gín-ná, i-ho̍k koh pháiⁿ, ū-sı̂ siū tông-chhong ê khoàⁿ-khin, nā-sı̄ i ê ha̍k-būn choè choân-o̍h ê thâu, koh bē bat siū sian-siⁿ ê chek-pı̄, chóng-sı̄ in bô êng thang kui-nı̂ khı̀ tha̍k chheh, sı̄ tio̍h kàu tang thiⁿ, hit sı̂ chúi lóng kian peng, goā-bı̄n bô kang thang choè, chiah thang khı̀ tha̍k tām-po̍h kú. Chit sı̂ in-ūi in lāu-pē phoà-pı̄ⁿ khah siong-tiōng, Kat-la-tí kap Hêng-sū ge̍h-goā-jı̍t bô thang khı̀ tha̍k chheh in-ūi tio̍h pang-chān lāu-bú choè ke-lāi ê sū kap chiàu-kò͘ lāu-pē, iā tio̍h chit be̍h chhiah chhiú-sok hit-hō, khı̀ koe-lō͘ boē.
Ū chı̍t jı̍t in tú-tú teh pang-chān lāu-bú choè tāi-chı̀, hut-jiân ū jı̄-cha̍p-goā gín-ná, tùi o̍h-tn̂g chhut-lâi, lâi liu-peng thit-thô, kı̂-tiong ū kúi-nā ê, khı̀-siōng léng-lı̄, sin-thé oa̍h-tāng, chin gâu liu-peng. Gín-ná ê tiong-kan ū chı̍t ê koāiⁿ-koaⁿ ê cha-bó͘-kiáⁿ, miâ-kiò Hek-tek, sin chhēng ke̍k kùi-khı̀ ê phê-saⁿ, goā-bı̄n chhēng chı̍t niá jiông ê goā-saⁿ, iā tı̄ hia thit-thô. Tú-tú thit-thô ê sı̂ ū koh chı̍t ê cha-bó͘ gín-ná lâi, miâ-kiò Khái-tē, hiah-ê gín-ná khoàⁿ-kı̀ⁿ i lâi, kóng, “Khái-tē, lí bat thiaⁿ-kı̀ⁿ beh siat pí-sài liu-peng ê thit-thô mah? Lí iā tio̍h lâi pí-sài thit-tô͘.”
Khái-tē chhiò kóng, “Sím-mı̍h liu-peng thit-thô, goá thiaⁿ bô bêng.”
Chı̍t ê ı̀n kóng, “Pún ge̍h 30 hō, sı̄ koāiⁿ-koaⁿ ê siⁿ-jı̍t,i ài khoàⁿ chı̄-chūi sı̄ tē-it gâu liu-peng ê lâng, chiū beh hō͘ i chı̍t hāng ke̍k hó ê siúⁿ.”
Kui kûn ê gín-ná ı̀n kóng, “Sı̄, sı̄, sı̄ chı̍t siang hó-khoàⁿ ê gûn-peng-oê, cha̍p-hun ê súi, oê-téng iā ū gûn ê liang-á, gûn-khàu chiah-ê mı̍h. Chit ê tāi-chı̀ chiū-sı̄ Hek-tek pān-lí ê.” In tú-tú teh kóng ê sı̂, thiaⁿ-kı̀ⁿ khoe-piⁿ ê o̍h-tn̂g kòng cheng, tāi-ke chiū kín cháu jı̍p o̍h, kóng tio̍h thèng-hāu pàng-hē chiah koh-chài kóng.
Tē 2 chiuⁿ
Hek-tek choè Pêng-iú
Jı̍t-tàu pàng-hē ê sı̂, o̍h-tn̂g ê gín-ná lóng chhut-lâi, saⁿ-kap liān liu-peng, ài pı̄-pān pí-sài-hoē, tú-tú hit sı̂ Hêng-sū kap Kat-la-tí iā lâi teh liu-peng. Ū chı̍t ê ta-po͘ gín-ná miâ-kiò Cha-lı̍p, tùi Hek-tek kóng, “Lí khoàⁿ, ū chı̍t tùi khioh phoà-pò͘ ê thé-biān gín-ná tùi peng-téng cháu-lâi, in ê peng-oê kap chèng lâng bô siâng, tiāⁿ-tio̍h sı̄ goā-kok lâi ê.”
Hek-tek kóng, “In chin ū jím-nāi ê sim chhēng chit hō kı̂-koài ê peng-oê, put-kò sı̄ ke-tiong sòng-hiong, chit ê peng-oê tāi-lio̍k sı̄ in ka-kı̄ choè ê.”
Cha-lı̍p chiū oa̍t bı̄n choāi chhùi ǹg pa̍t ūi kóng, “In sui-jiân ū jím-nāi ê sim to̍k-to̍k kiaⁿ-liáu in boē-oē liu-peng.”
Hek-tek iā bô lí-chhái i, cháu kàu Kat-la-tí ê bı̄n chêng, mn̄g kóng, “Lí kiò sím-mı̍h miâ ?” Ìn kóng, “Goá miâ Kat-la-tí, goá ê a-hiaⁿ miâ Hêng-sū.”
Hek-tek kóng, “Hêng-sū chin ióng-chòng, i ê sin-khu chhin-chhiūⁿ ū hé-lô͘ chı̍t iūⁿ, to̍k-to̍k lí sin-thé loán-jio̍k chhin-chhiūⁿ ū kiaⁿ koâⁿ, eng-kai chhēng khah choē saⁿ.”
Kat-la-tí bián-kióng chhiò kóng, “Goá bô koâⁿ.” Kóng hit hō oē sı̄ in-ūi i bô pa̍t niá saⁿ, kiaⁿ-liáu Hek-tek chhiò i.
Hek-tek kóng, “Goá chí-ū 14 hè, in-ūi goá chhēng khah choē saⁿ chiū khoàⁿ-liáu pí pa̍t lâng khah toā-hàn, nā-sı̄ lí nā chhēng khah choē saⁿ tek-khak pí goá khah toā-hàn.”
Hêng-sū khoàⁿ-kı̀ⁿ Kat-la-tí ba̍k-chiu teh-beh lâu ba̍k-sái chin kiàn-siàu chiū kóng, “Kūn jı̍t thiⁿ-khı̀ sui-jiân toā koâⁿ, lâng-lâng to chai léng, goá ê sió-bē khiok bô kiaⁿ léng.”
Kat-la-tí kóng, “Goá sı̍t-chāi bô koâⁿ, koh liu-peng ê sı̂ iáu-kú kiaⁿ hiâm joa̍h, sió-chiá lí chin sı̄ hó lâng, lí nā bô kóng, goá siūⁿ boē kàu.”
Hek-tek kóng, “Goá ài lí choè chı̍t hāng sū.” Hêng-sū liân-liân kóng, “Sím-mı̍h sū? Sió-chiá ah, bô lūn sím mı̍h sū goá to͘ oē choè.”
Hek-tek kóng, “Goá put-kò ài lín pí-sài liu-peng, in-ūi lín nn̄g lâng lóng sı̄ gâu liu ê, bô lūn sím-mı̍h lâng, nā tit-tio̍h iâⁿ, lóng thang tit-tio̍h siúⁿ.”
Hêng-sū hut-jiân kóng, “Goá ê peng-oê sı̄ ngı̄ chhâ choè ê, khoài-khoài poa̍h-tó, só͘-í boē-oē tâng liu-peng, nā-sı̄ kàu hit jı̍t, goán thang lâi khoàⁿ mah ?”
Hek-tek kóng, “Chū-jiân oē khoàⁿ.” Kóng liáu un-sûn khoàⁿ in nn̄g lâng, chit sı̂ i sim-lāi siūⁿ, ài pang-chān chí nn̄g ê gín-ná, khó-sioh í-keng chiong só͘ tit-tio̍h chı̍t ge̍h jı̍t ê chı̂ⁿ boé hoe piⁿ kap chong sek phín, chí-ū chhun poeh kak gûn, chit poeh kak gûn chí-ū thang boé chı̍t siang peng-oê, siūⁿ-liáu koh khoàⁿ in, thó͘-khùi chı̍t ē mn̄g kóng,“Lín nn̄g lâng tah-lo̍h chı̍t ê khah oē liu-peng ?”
Hêng-sū kóng, “Sió-bē tē-it gâu.”
Kat-la-tí kóng, “A-ko tē-it oē.”
Hek-tek chhiò kóng, “Khó-sioh goá boē-oē boé nn̄g siang peng-oê, chiū-sı̄ chı̍t siang hó peng-oê ê chı̂ⁿ iā bô kàu-gia̍h, lín thang chiong chí poeh kak gûn the̍h khı̀, ka-kı̄ phoè-ēng, tah-lo̍h chı̍t ê khah oē liu peng chiū thoè i boé peng-oê.” Kóng liáu chiū chiong chı̂ⁿ the̍h hō͘ Hêng-sū, kóng,“Chài-hoē,” chiū tńg sin cháu-khı̀. Hêng-sū tú-tú teh kat peng-oê toà, iáu-bē chat hó, khoàⁿ sió-chiá hō͘ i chı̂ⁿ, chiū kín kiò kóng, “Sió-chiá, sió-chiá, goá boē-oē siu chit ê chı̂ⁿ, goá sui-jiân chai lí sı̄ hó-ı̀ hō͘ goá, to̍k-to̍k chit ê m̄-sı̄ goá thàn ê chı̂ⁿ, goá toàn-toàn boē-oē siu.” Hek-tek thiaⁿ-kı̀ⁿ kóng chit ê oē, chiū khiā-teh, khoàⁿ-kı̀ⁿ Kat-la-tí ām-kún chı̍t koāⁿ chhâ-khek ê chu-á, chiū chioh oē kóng,“Chhiáⁿ lí thoè goá choè chı̍t koāⁿ chu-á, chhin-chhiūⁿ lí ê sió-bē ām-kún koà chit hō.”
Hêng-sū kóng, “Hó, sió-chiá, goá tek-khak chı̄n la̍t thoè lí choè chı̍t koāⁿ, goá ê ke-lāi iáu ū pe̍h-chhâ, chhin-chhiūⁿ chhiūⁿ-gê chı̍t iūⁿ. Bı̂n-á-jı̍t choè hó chiū sàng hō͘ lí.” Kóng liáu iû-goân chiong chı̂ⁿ the̍h hō͘ Hek-tek.
Hek-tek kóng, “Goá koat-toàn m̄ chún lí hêng goá ê chı̂ⁿ, chit poeh kak gûn boé lí ê chu-á iáu-bē kàu-gia̍h.” Tùi án-ni koáⁿ-kín cháu.
Hêng-sū kóng, “Goá thang chiong chit ê chı̂ⁿ chhiáⁿ siu koáⁿ-kín chı̄n la̍t thoè i choè, nā-sı̄ lāu-bú ún goá tiám la̍h-chek, goá kin-àm choè kàu poàⁿ-mı̂ chiū thang choè bêng-pe̍k.”
Kat-la-tí kóng, “Chit ê sió-chiá chin hó, nā a-bú bı̂n-á-jı̍t chhe lán jı̍p siâⁿ, lí chiū thang sūn-piān boé chı̍t siang peng-oê.”
Hêng-sū iô-thâu kóng, “Hit ê sió-chiá sui-jiân hō͘ goá thàn chí poeh kak gûn lâi choè boé peng-oê ê lō͘-ēng, nā-sı̄ goá siūⁿ tē-it hó tio̍h thoè lí boé tām-po̍h phòng-se choè chı̍t niá phòng-se saⁿ.” Hêng-sū koh khoàⁿ hit ê chı̂ⁿ koh siūⁿ i ê sió-bē chin gâu liu-peng, kiám-chhái i oē tit-tio̍h hit ê siúⁿ, chiū tùi Kat-la-tí kóng, “Lí m̄ sái niá-kun, goá chiū thoè lí boé chı̍t siang peng-oê hó mah ?
I ê sió-bē kóng, “Goá m̄ tı̍h niá-kun, goá iā m̄ tı̍h peng-oê, lí tio̍h ka-kı̄ boé chı̍t siang peng-oê, chiū-sı̄ lah.” Koh kóng, “Chit ê chı̂ⁿ sı̄ sió-chiá hō͘ lí ê, goá m̄-thang the̍h.”
Hêng-sū kóng, “Goá tek-khak tio̍h thoè lí boé.”
I ê sió-bē kóng, “Goá ū chı̍t ê hoat, boé chı̍t siang oê, nā-sı̄ lí chhēng lio̍h-á khah soè, goá chhēng lio̍h-á khah toā, án-ni lán nn̄g lâng thang chhēng, chit ê hoat hó mah ?”
Hêng-sū kóng, “Hāiⁿ-ah, lí cháiⁿ-iūⁿ oē chhēng hiah toā ê oê nı̍h ?”
Hêng-sū sui-jiân sim-tiong ka-kı̄ siūⁿ ài chı̍t siang oê, iû-goân khéng niū hō͘ i ê sió-bē, thang khoàⁿ sı̄ chı̍t ê chin hó ê gín-ná, koh kóng, “Goá ài lí jı̍t-jı̍t chhı̀-liān thèng-hāu kàu 30 hō hit chı̍t jı̍t, lí chai thang tit-tio̍h chı̍t siang gûn choè ê peng-oê.” I ê sió-bē thiaⁿ-kı̀ⁿ chit ê oē hoaⁿ-hí chhiò bô soah. Chit sı̂ thiaⁿ-kı̀ⁿ in lāu-bú kiò in nn̄g lâng, chiū ı̀n kóng, “Lâi lah.” Tùi án-ni nn̄g lâng koáⁿ-kín tò-khı̀ ke-nı̍h.
Beh kūn 30 hō hit kúi jı̍t, Hêng-sū sim-lāi sı̄ hui-siông ê khoài-lo̍k, khoàⁿ-kı̀ⁿ i ê sió-bē kha chhēng sin ê peng-oê, tı̄ peng-téng liu lâi liu khı̀, chhin-chhiūⁿ pe chı̍t iūⁿ, hit ê jı̂n-ài ê Hek-tek sió-chiá koh lēng-goā sàng i chı̍t tiâu niá-kun, in hiaⁿ-bē nn̄g lâng cha̍p-hun ê kám-kek. Ū chı̍t ê gín-ná miâ-kiò Pí-tek, khoàⁿ-kı̀ⁿ Kat-la-tí tı̄ peng-téng chin gâu kiâⁿ, chhin-chhiūⁿ ū nn̄g ê sı̍t chı̍t iūⁿ, chiū kóng, “Nā hō͘ chit hō soè-hàn gín-ná tit-tio̍h siúⁿ, hit ê chin ū chhù-bı̄ lah.”
Cha-lı̍p kóng, “M̄-thang choè siaⁿ, hit ê chhēng phoà saⁿ soè ko͘-niû, sı̄ Hek-tek sió-chiá tē-it thiàⁿ ê lâng, i ê kha chhēng ê peng-oê iā sı̄ Hek-tek sió-chiá sàng i ê.”
Pí-tek chhiò kóng, “Ū iáⁿ bô ?”
Ìn kóng, “Ū iáⁿ, i kò͘-ı̀ choè chit ê sū, beh hián-chhut i ê miâ-siaⁿ.”
Cha-lı̍p kóng chit hō oē in-ūi Hek-tek kap Kat-la-tí kiat choè hó ê pêng-iú, sim-lāi chin oàn-hūn, bô phah-sǹg Pí-tek kap Hek-tek iā sı̄ hó pêng-iú, thiaⁿ-kı̀ⁿ chit ê oē chin sı̄ chàn-sêng, iā beh boé chı̍t siang peng-oê hō͘ Hêng-sū.Kap Hek-tek gı̄-lūn liáu chiū cháu-khı̀ tùi Hêng-sū kóng,“Chhiáⁿ lí thoè goá ê sió-bē khek chı̍t chhǹg chu-á chhin-chhiūⁿ lí ê sió-bē só͘ koà ê chit iūⁿ.” Hêng-sū èng-ún, chiū tı̄ Sèng-tàn chêng nn̄g mı̂, tiám teng thoè Pí-tek chı̄n la̍t koáⁿ-kín choè, sı̄m-chı̀ chhiú chńg-thâu-á koah-tio̍h, āu-lâi chu khek bêng-pe̍k, i iā ū chı̂ⁿ thang kàu siâⁿ-lāi koh-chài boé chı̍t siang peng-oê.
