Tē 3 chiuⁿ
Ke-lāi ê Khó͘-sū.
Chit sı̂ Sèng-tàn choeh-kı̂ í-keng kàu lah, Hêng-sū ê lāu-bú Pek-chím, koáⁿ-kín chiong poe-poâⁿ oáⁿ-tı̄ soé hó, chhēng i chá-chêng kúi kiāⁿ hó ê i-ho̍k, pı̄-pān beh kap in siú Sèng-tàn choeh. Chha-put-to cha̍p nı̂ kú Pek-chím bô siông chhēng chit ê i-ho̍k, só͘-í sek-iūⁿ put-chí kó͘ phài, koh piàn gân-sek, sui-jiân án-ni, i ê gín-ná iáu-kú lia̍h-choè chin sı̄ súi ê, chiū kóng, “A-bú, lí chhēng chit ê i-ho̍k chin sı̄ hó khoàⁿ liân lāu-pē to khoàⁿ-kı̀ⁿ lí lah.” Pek-chím kín-kín oa̍t-bı̄n khoàⁿ i ê tiōng-hu ū teh khoàⁿ i á-bô, chiū thó͘-khùi kóng, “I iā boē-hiáu-tit i só͘ khoàⁿ-kı̀ⁿ sı̄ sím-mı̍h, put-kò sı̄ nn̄g lúi ba̍k-chiu ı̂ⁿ-ı̂ⁿ khoàⁿ, bóng khoàⁿ chiū-sı̄.” Tùi án-ni koh kiò Hêng-sū kóng, “ M̄-bián khoàⁿ goá ê saⁿ, kín-kín khı̀ boé lí ê peng-oê, hit ê peng-oê hē tı̄ siâⁿ-lāi teh thèng-hāu lí khı̀ boé.”
Hêng-sū kóng, “A-bú lí beh boé sím-mı̍h bô? Goá thái oē ūi-tio̍h ka-kı̄ boé peng-oê nı̍h ?”
I ê lāu-bú kóng, “ Cháiⁿ-iūⁿ án-ni kóng ? Lí choè kang tit-tio̍h chit ê chı̂ⁿ, choè lí ka-kı̄ boé peng-oê, thàn hiān-sı̂ iáu chá, lí kín-kín khı̀ boé.”
Kat-la-tí iā kóng, “Kín-kín ah, thang kín tò-lâi, nā a-bú chún lán khı̀ thit-thô, lán iáu thang khah chá kàu peng khoe liu-peng.”
Hêng-sū tı̄ mn̂g-kháu thêng tia̍p-á-kú koh kóng, “ A-bú lí ê pháng-se lûn beh boé chı̍t ê kha-ta̍h mah ?”
I ê lāu-bú kóng, “ Lí thang lâi ka-kı̄ choè chı̍t ê, m̄-bián khı̀ boé.”
Hêng-sū kóng, “ Sı̄ ah, kha-ta̍h goá oē choè chı̍t ê, lí iáu beh boé phòng-se, mı̄-hún, chhâ mah ?”
I ê lāu-bú kóng, “Beh boé ê mı̍h sui-jiân sı̄ choē, to̍k-to̍k lí ê chı̂ⁿ bô kàu-gia̍h thang boé hiah-ê mı̍h, in chiah-ê lâng sı̄ in-ūi lí bô peng-oê, só͘-í kiò lí thoè in choè chı̍t chhǹg chhâ-chu, hō͘ lí tit-tio̍h chit ê chı̂ⁿ thang boé peng-oê, lí nā-sı̄ thoè goá boé mı̍h, bô boé peng-oê, sui-jiân chı̄n lí ê hàu-sim, kiám bô ko͘ hū lâng ê chêng mah, só͘-í lí kin-á-jı̍t tiāⁿ-tio̍h tio̍h khı̀ boé peng-oê. Hêng-sū ah, chá-chêng lí ê lāu-pē siū siong hit mı̂, só͘ phah-m̄-kı̀ⁿ hit chı̍t chheng gûn, nā-sı̄ oē koh-chài chhē-tio̍h chin hó, lán chhı̀n-chhái mı̍h to thang boé, chā-àm goá in-ūi chit ê tāi-chı̀ kı̂-tó, kiû Siōng-tè hō͘ chit ê thau-the̍h gûn ê boē pêng-an, chek-sı̂ chiong hit ê sàng hoê-lâi, kiám-chhái chit ê gûn bô hō͘ lâng thau-the̍h khı̀, sı̄ lí ê lāu-pē khǹg-khí-lâi, chiū kiû Siōng-tè hō͘ lán koáⁿ-kín chhē-tio̍h.”
Hêng-sū thó͘-khùi kóng, “M̄ chai lāu-pē oē hiáu-tit chit ê sū mah ?”
I ê lāu-bú kóng, “Goá m̄ chai i oē-hiáu-tit á boē, kiám-chhái i the̍h hit ê chı̂ⁿ khı̀ boé chit ê kim-pió-á iā bē thang chai, goá tùi i siū siong hit jı̍t khí ū soè-jı̄ pó-siú chit ê pió-á.”
Hêng-sū kóng, “Chiàu goá khoàⁿ chit ê pió-á chí-ū ta̍t chı̍t chheng gûn ê cha̍p-hūn it.”
I ê lāu-bú kóng, “Chiū-sı̄ ah, lí ê lāu-pē bē siū siong ê í-chêng choè tāi-chı̀ chin bêng-pe̍k, chin khiām-séng ê, goá siūⁿ i toàn-toàn boē chiong lóng-chóng ê gûn khı̀ boé chit ê pió-á, hit jı̍t àm só͘ ū ê sū-chêng goá to kı̀-tit, goá tú-tú teh chia̍h àm-pn̄g ê sı̂, lí ê lāu-pē the̍h chı̍t ê pió-á hō͘ goá khoàⁿ, tùi goá kóng lí chiong chit ê pió-á sió-sim pó-siú, tú-tú kóng kàu pó-siú nn̄g jı̄, hut-jiân ū chhù-piⁿ ê lâng teh cháu-jı̍p-lâi, hoah kóng, “Tē-hoāⁿ lı̍h-khui lah ! Cha̍p hun ê gûi-hiám, kín-kín khı̀ kiù.” Lí ê lāu-pē thiaⁿ-kı̀ⁿ chit ê oē, koáⁿ-kín the̍h khı̀-khū, cháu chhut-khı̀, thèng-hāu kàu poàⁿ-mı̂, lâng chiong i kng tò-lâi, í-keng m̄ chai lâng lah, chhin-chhiūⁿ sí-liáu chı̍t iūⁿ, i thâu-pō͘ siū siong, chin siong-tiōng, choē-choē jı̍t hoat jia̍t, thâu-náu chiām-chiām pı̀ⁿ choè gōng, chiū tùi hit jı̍t khí bô ū chı̍t jı̍t khoàⁿ-kı̀ⁿ i ê thâu-náu hó-hó, hiān-chāi kéng-jiân piàn-sin chhin-chhiūⁿ eⁿ-á chı̍t iūⁿ.”
Hêng-sū kóng, “A-bú ah, goá siūⁿ lí chit sı̂ eng-kai tio̍h chiong hit ê kim ê pió-á boē.”
I ê lāu-bú kóng, “Boē i choè sím-mı̍h ? Goá koat-toàn m̄-boē, lí ê lāu-pē kiò goá tio̍h pó-siú, goá chū-jiân tio̍h hó-hó pó-siú i, m̄ nā án-ni, nā-sı̄ goá hiān-chāi the̍h chhut khı̀ boē hō͘ lâng khoàⁿ-kı̀ⁿ, tek-khak giâu-gı̂ lí ê lāu-pē chá-chêng thau-the̍h lah.”
Hêng-sū kóng, “A-bú, lí kóng ê bô chhò, goá tāi-seng bô siūⁿ-kàu, bô lūn lán cháiⁿ-iūⁿ sòng-hiong, chóng bô beh boē i, goá m̄ ài lâng giâu-gı̂ goá ê lāu-pē sı̄ chha̍t.”
I ê lāu-bú kóng, “Goá ê kiáⁿ ah, chit ê oē bô chhò, lán tio̍h hó-hó pó-siú chit ê pió-á, nā ū chı̍t jı̍t lí chhin-ài ê pē hó, oē hiáu-tit, chiū thang chiong chit ê sū mn̄g i, kiám-chhái chit chı̍t chheng gûn thang lâi chhē-tio̍h.” Koh kóng, “Hit jı̍t àm, kiám-m̄-sı̄ kı̂-koài mah, kiōng-chóng chhut saⁿ hāng sū, tē-it hāng sı̄ lí ê lāu-pē the̍h chit ê kùi-khı̀ ê pió-á hō͘ goá, tē jı̄ jı̍t i poa̍h-tó kàu beh sí, tē saⁿ chit chı̍t chheng gûn bô-khı̀.”
Hêng-sū kóng, “A-bú, lí tùi tah-lo̍h tit-tio̍h hiah choē ê gûn ?”
I ê lāu-bú kóng, “Choè lâng tiàm sè-kan, chóng tio̍h hó thiⁿ-sı̂ tı̂-hông lo̍h hō͘ ê jı̍t, m̄-thang chhut-chāi ı̀-sù lōng-hùi, só͘-í goá chiah-ê pêng-siông ê só͘-hùi jı̍t-jı̍t séng ēng, tng hoat toā chúi ê sı̂, lí ê lāu-pē thàn tı̄ tē-hoāⁿ ê chı̂ⁿ koh khah choē, koh in-ūi lí ê lāu-pē choè lâng sı̄ khûn-lô, àm tò-lâi, lēng-goā iā choè pa̍t hāng kang, tit-tio̍h ê chı̂ⁿ iā bô chió, só͘-í múi seng-kı̂ lán lēng-goā chhun chı̂ⁿ, goá khí-thâu chiong chı̂ⁿ hē tı̄ chı̍t khia kū-be̍h lāi, ū kim chı̂ⁿ koh ū gûn chı̂ⁿ, cha̍p hun thang ài, be̍h khǹg moá bô tè hē, goá koh chiong i hē tı̄ chı̍t ê soè khia siuⁿ-lāi, ū-sı̂ goá mı̂-sı̂ boē khùn-tit, goá chiū khui siuⁿ-koà, chhiú bong hit ê chı̂ⁿ, chin sı̄ hoaⁿ-hí, sim-lāi kám-siā Siōng-tè siúⁿ-sù goá chek-chū chiah-ê chı̂ⁿ, m̄ nā kàu-gia̍h choè kiáⁿ cha-bó͘-kiáⁿ jı̍p o̍h-tn̂g ê hùi-ēng, koh lí ê lāu-pē lâu ū chiah-ê chı̂ⁿ thang hō͘ i m̄-bián choè hit ê chho͘-tāng ê seng-oa̍h, tı̄ ke-lāi hiu-sek. Hāiⁿ-ah, lí ê lāu-pē chá-chêng chin sı̄ kan-khó͘, tùi chá kàu àm, bô ū chı̍t hāng sū hō͘ lán hùi-khı̀, múi Seng-kı̂ lí ê lāu-pē khui siuⁿ-koà chiong i só͘ thàn ê chı̂ⁿ hē chı̍t nn̄g kho͘ tı̄ siuⁿ-lāi, chhiò hi-hi kap lín chim-chhùi kóng, “Chit ê sı̄ lí ê ha̍k-hùi, chiong-lâi lí toā-hàn thang choè sian-siⁿ, á-sı̄ choè i-seng, lóng-khò chit ê chı̂ⁿ, “Tùi i tio̍h-pı̄ⁿ í-āu lōng kàu chit iūⁿ.” I ê lāu-bú kóng kàu chia koh pek Hêng-sū kóng, “Lí kín khı̀ boé peng-oê,m̄-thang koh iân-chhiân.”
Hêng-sū cháu kàu mn̂g-kháu, koh oat-lâi tùi i ê lāu-bú kóng, “A-bú, goá koh mn̄g lí chı̍t kù, lí bat mn̄g lāu-pē chit ê chı̂ⁿ tàu-tí hē tı̄ sím-mı̍h só͘-chāi nı̍h ?”
Lāu-bú kóng, “Kiáⁿ ah, goá iā siông-siông mn̄g i, nā-sı̄ i lóng sı̄ khoàⁿ goá tài-chhiò, kóng tām-po̍h bô siong-kan ê oē, chhin-chhiūⁿ soè-hàn gín-ná chı̍t iūⁿ. Kū-nı̂ tang thiⁿ, lí kap Kat-la-tí hoat tāng jia̍t ê sı̂, lán ê chia̍h mı̍h beh liáu, goá koh boē-oē chhut-khı̀ choè kang, kiaⁿ-liáu goá bô tı̄ ke-lāi, lí kap Kat-la-tí beh sí, hit sı̂ goá bat thoè lí ê lāu-pē chián thâu-mn̂g, khin-khin tùi i ê hı̄-á mn̄g i hit ê chı̂ⁿ hē tı̄ sím-mı̍h só͘-chāi, ai-ah, i put-kò sı̄ so-so goá ê saⁿ, i-i a-a kóng tām-po̍h ê oē, í-āu goá khoàⁿ Kat-la-tí chhin-chhiūⁿ beh sí, lí ê jia̍t-tō͘ koh khah seng koâiⁿ, goá sim-lāi hoat kip, chiū toā siaⁿ kiò, mn̄g hit siuⁿ-á lāi ê chı̂ⁿ hē tı̄ sím-mı̍h só͘-chāi, to̍k-to̍k chhin-chhiūⁿ tùi chio̍h-thâu hoah chı̍t-iūⁿ, chı̍t tiám ê ti-kak ia̍h bô ū.” I ê lāu-bú kóng kàu chit ūi, put-chí iu-būn, chiū khàu khí-lâi, Hêng-sū ia̍h lâu ba̍k-sái khǹg i ê lāu-bú kóng, “ A-bú ah, chit ê tāi-chı̀ í-keng kè-khı̀, hiān-chāi lán thang lâi chiong chit ê tāi-chı̀ boē-kı̀-tit, lí iā m̄-thang in-ūi goá kū-nı̂ ê phoà-pı̄ⁿ koh-chài lâi khàu, goá hiān-chāi sin-thé tióng-toā, koh ióng-kiāⁿ, Kat-la-tí léng-lı̄, koh sūn bēng-lēng, bô kú goán nn̄g ê tióng-sêng ke-lāi chiū beh heng-ōng, a-bú ah, goán nn̄g lâng lóng chêng-goān khoàⁿ lán ê ke-têng choè khoài-lo̍k, pí sè-kan só͘ ū ê chı̂ⁿ iáu khah hó.” Sûi-sı̂ ǹg Kat-la-tí mn̄g kóng, “Sı̄ m̄-sı̄ ?”
Kat-la-tí khàu kóng, “A-bú iā chai lí só͘ kóng ê oē bô chhò, lí koáⁿ-kín khı̀ boé peng-oê m̄-bián tı̄ chia koh chài thê-khí í-chêng ê sū, lâi hō͘ a-bú siong-sim.”
Pek-chím khoàⁿ-kı̀ⁿ i ê gín-ná chin chhin-ài i, sim-lāi cha̍p-hun ê hoaⁿ-hí, koh chek-pı̄ ka-kı̄ in-ūi ū ná chhin-chhiūⁿ hiâm tiōng-hu ê só͘-chāi, tùi án-ni chiong ba̍k-sái chhit-chhit, tùi i ê gín-ná kóng, “Hó, goá m̄ háu lah, kin-àm sı̄ Sèng-tàn choeh, lán chiah-ê eng-kai tio̍h khoài-lo̍k.” Hêng-sū beh khí-sin khı̀ boé peng-oê, i ê lāu-bú kiò i kóng “Koh thèng-hāu kúi hun cheng iáu ū nn̄g saⁿ chiam, chit siang be̍h chiū thang bêng-pe̍k, lí thang the̍h kàu koe-nı̍h khı̀ boē sı̀-kak gûn.” The̍h chit ê chı̂ⁿ khı̀ boé tām-po̍h mı̄ tò-lâi, chit lāi iáu ū chı̍t ê tâng-lui thang lâi thoè lí ê sió-bē boé chı̍t ê piáⁿ. Kat-la-tí thiaⁿ-kı̀ⁿ, tah-chhiú chin hoaⁿ-hí kóng, “Chit ê chin-chiàⁿ hó lah, a-ko ū peng-oê tāi-ke to ū mı̄ thang chia̍h, goá lēng-goā ū chı̍t ê mı̄-piáⁿ, a-bú, lí ka-kı̄ ū Sèng-tàn ê lé-mı̍h mah ?”
Pek chím chhiò kóng, “Goá ū chin hó ê lé-mı̍h, chiū-sı̄ goá tē-it pó-poè, tē-it ài thiaⁿ bēng-lēng ê gín-ná.”
Kat-la-tí kóng, “Chit ê lé-mı̍h chiū chin kàu-gia̍h mah ?”
I ê lāu-bú kóng, “Chit nn̄g ê gín-ná sı̄ Hô-lân kok tē-it hó ê gín-ná, choè goá ê kiáⁿ cha-bó͘-kiáⁿ, kiám bô kàu-gia̍h mah ?”
Hêng-sū kóng, “A-bú ah, lí chiū-sı̄ Hô-lân kok tē-it hó ê lāu-bú.” I ê lāu-bú kóng, “Taⁿ be̍h í-keng bêng-pe̍k, kín the̍h-khı̀, nā bô, thèng-hāu lí tò-lâi jı̍t chiū beh àm lah.”
To̍k-to̍k Hêng-sū iû-goân teh kóng, “Goá sui-jiân sı̄ hoaⁿ-hí boé peng-oê, nā-sı̄ goá ê ı̀-sù m̄ ta̍t-tio̍h chiong chit ê chı̂ⁿ khı̀ chhiáⁿ hit ê ū miâ ê Phok i-seng lâi, chit ê Phok i-seng sı̄ Hûn-thêng toā o̍h-tn̂g pit-gia̍p ê, hiān-sı̂ choè chit keng ê i-ha̍k-pō͘ tiúⁿ, pún-sū tē-it koâiⁿ, nā i lâi khoàⁿ lāu-pē ê pı̄ⁿ, kiám-chhái oē i-hó, iā bē thang chai.”
I ê lāu-bú kóng, “Chhiáⁿ Phok i-seng lâi, bô hō͘ i 50 kho͘ gûn, i it-tēng m̄ khéng lâi, goá thoè lí ê lāu-pē chhiáⁿ i-seng, í-keng ēng bô chió ê chı̂ⁿ, nā-sı̄ i-seng lō͘-bé boē-oē chiong i ê pı̄ⁿ i-hó, hō͘ i chhíⁿ-ngō͘ kiaⁿ-liáu sı̄ Siōng-tè ê ı̀-sù, lâng boē-oē chhai-chhek, lí khı̀ boé lí ê peng-oê, m̄-bián kóng choē-choē oē.” Hêng-sū iu-iu chhiû-chhiû chhut-lâi, chı̍t lō͘ siūⁿ-khí i ê lāu-bú kóng in nn̄g ê gín-ná sı̄ Hô-lân kok tē-it thang thiàⁿ, tē-it thiaⁿ bēng-lēng ê gín-ná, boē bián-tit bı̄n tài chhiò-iông, sim-lāi chin khoài-lo̍k, chhēng-tio̍h chı̍t siang chhâ-oê cháu peng-khoe-téng kè-khı̀, ia̍h cháu teh chin hó.
Tē 4 chiuⁿ
Lāu-bú siū gûi-hiám
Hêng-sū tú-tú teh kè peng-khoe ê sı̂, hn̄g-hn̄g khoàⁿ-kı̀ⁿ Phok i-seng tú-tú beh tùi peng-khoe keng-kè, i ê sim siūⁿ chit ūi ê Phok i-seng, chiū-sı̄ Hô-lân tē-it chhut-miâ ê toā i-seng, nā-sı̄ i ê bı̄n chı̄n kò͘-chip, chin kiau-gō, ta̍k lâng khoàⁿ liáu chin kiaⁿ i, chit sı̂ Hêng-sū chı̍t sim siūⁿ ài i-hó lāu-pē, chiū m̄ kiaⁿ i ê ui-giâm, àm-siūⁿ kóng Siōng-tè chhe-khián chit ūi thiⁿ-ē chhut-miâ ê toā i-seng lâi chia, tú-hó hō͘ goá khoàⁿ-kı̀ⁿ, goá chit tia̍p chiām-sı̂ bô boé peng-oê, chiū the̍h chit ê chı̂ⁿ chhiáⁿ i khı̀ i-tı̄ pē chhin. Chit ê lāu i-seng ê iūⁿ chin hiông-ok, Hêng-sū sim-lāi ū tām-po̍h kiaⁿ i, to̍k-to̍k nā bô koáⁿ-kín koat-tēng chú-ı̀ chhiáⁿ i, i liâm-piⁿ beh kè-khı̀, tùi án-ni toā siaⁿ kiò kóng, “ Phok i-seng, Phok i-seng ah.” Chit ê i-seng thiaⁿ lâng kiò i, chiū khiā teh, Hêng-sū cháu chı̀n-chêng khı̀, Phok i-seng siang-ba̍k thí-khui, lek ba̍k-bâi, choāi-chhùi, khoàⁿ Hêng-sū hiong-béng ê siaⁿ, kóng, “Lí beh sím-mı̍h tāi ?” Hêng-sū kiaⁿ kàu sim-thiàu bô soah, chiū kóng, “Toā i-seng ah, goá sı̄ lâi chhiáⁿ lí choè hó sū.”
I-seng thiaⁿ-kı̀ⁿ i kóng, koh khah hoat siū-khı̀, toā siaⁿ kóng, “Choè lí khı̀ ah, goá lóng m̄-bat ēng chı̂ⁿ hō͘ khit-chia̍h.” I tú kia̍h koáiⁿ-á beh phah Hêng-sū, Hêng-sū kóng, “Hó ê i-seng ah, goá m̄-sı̄ khit-chia̍h, lí khoàⁿ goá chhiú-nı̍h iáu ū the̍h chı̂ⁿ, goá kiû lí sı̄ in-ūi goá lāu-pē ê iân-kò͘, i tú-tio̍h chı̍t ê kı̂-koài ê pı̄ⁿ, chı̍t-jı̍t kàu àm, chē tı̄ ke-lāi, choân-jiân bô tín-tāng, chhin-chhiūⁿ bô pı̄ⁿ, nā-sı̄ bô ū su-sióng, iā boē oē kóng-oē, i chit ê pı̄ⁿ chiū-sı̄ in-ūi i hit mı̂ tı̄ tē-hoāⁿ téng, tùi chı̍t ê koâiⁿ ê kè-téng poa̍h-lo̍h-lâi ê sı̂ tit-tio̍h ê.”
I-seng thiaⁿ-kı̀ⁿ chiah-ê oē liân siaⁿ mn̄g kóng, “Sím-mı̍h ? Sím-mı̍h ? Lí koh siông-sè kóng chı̍t pái.” Hêng-sū chiū chiong i ê lāu-pē ê sū-chêng koh-chài tùi thâu kàu bé, sêng-sı̍t kiong-kèng, kiaⁿ-hiâⁿ kóng chı̍t pái, kóng liáu chiū kóng, “Chhiáⁿ i-seng khı̀ khoàⁿ i, goá chai chiah-ê chı̂ⁿ bô kàu-gia̍h, nā-sı̄ lí nā khéng kiù goá ê lāu-pē, goá kam-goān pún-sin thoè lí choè kang, bô the̍h poàⁿ ı̂ⁿ.” Chit sı̂ i-seng ê bı̄n hut-jiân kái-piàn, chin hô-khı̀, i ê bı̄n ê kng, chhin-chhiūⁿ jı̍t tùi o͘-hûn chhut-hiān, i ê ba̍k-chiu-lāi chhiong-moá ê thiàⁿ-sim, koh lı̂n-bín ê sim, pún-jiân kia̍h koáiⁿ beh phah Hêng-sū, taⁿ kia̍h chhiú hē tı̄ Hêng-sū ê keng-thâu téng, un-jiû ê siaⁿ kóng, “Goá bô beh tı̍h lí ê chı̂ⁿ, lí thang the̍h-khı̀, goá tek-khak beh khı̀ khoàⁿ lí ê lāu-pē.” Koh mn̄g i tú-tio̍h pı̄ⁿ ū kúi nı̂ lah.
Hêng-sū kóng, “Cha̍p nı̂ lah.”
I-seng chiū chin khó-lı̂n i kóng, “Kin-á-jı̍t goá boē oē khı̀, in-ūi goá beh kàu Hek-kun khı̀ khoàⁿ soè kong-chú, thèng-hāu goá tò-lâi ê sı̂ goá chiū kàu lí ê ke, lí tiàm sím-mı̍h só͘-chāi ?”
Hêng-sū hō͘ i-seng khoàⁿ kóng, “Tùi chit tiâu lō͘ lo̍h-khı̀ bô loā hn̄g saⁿ keng kū ê soè chháu-chhù chiū-sı̄, goā-bı̄n ê soè-hàn gín-ná, lóng chheng goá ê ke, choè am-khám lâng ê chháu-chhù, chin khoài chhē-tio̍h.” I-seng kóng, “Chin hó, goá tek-khak oē lâi.” Hêng-sū chiū cháu. I-seng ka-kı̄ thó͘-khùi kóng, “I ê lāu-pē ê pı̄ⁿ chiàu chit iūⁿ ê chêng-hêng sı̄ bô ǹg-bāng, goá khiok chin thiàⁿ hit ê gín-ná, i ū chha-put-to chhin-chhiūⁿ goá ê kiáⁿ La-jı̂n-su ê khoán, nā-sı̄ goá ê kiáⁿ ê choè lâng, toā bô chhin-chhiūⁿ i, goá chóng bô boē-kı̀-tit goá ê kiáⁿ ê pháiⁿ bô lé, í-kı̍p ta̍k hāng ê kiau-gō.” Sûi-sı̂ bô hoaⁿ-hí ê bı̄n-sek, lek ba̍k-bâi, chı̍t bı̄n siūⁿ, chı̍t bı̄n kiâⁿ.
Chit sı̂ Hêng-sū sim-lāi iáu-bē tiāⁿ-tio̍h, siūⁿ beh tāi-seng tò-lâi pò chit ê hó siau-sit, á-sı̄ khı̀ boé peng-oê kap sió-bē ê piáⁿ, āu-lâi siūⁿ goá tāi-seng khı̀ boé mı̍h, chiah tò-lâi pò boē oàⁿ, tùi án-ni chiong mı̍h boé hó, tò-lâi ke-nı̍h, chiū kā i ê lāu-bú kóng lō͘-nı̍h it-chhè só͘ tú-tio̍h, lāu-bú thiaⁿ-kı̀ⁿ sı̍t-chāi khoài-lo̍k sim, siūⁿ ông-hō͘ só͘ chhiáⁿ ê i-seng, iā beh lâi kàu goá ê ke, i nā boē-oē i-hó goá ê tiōng-hu, iáu-kú i khéng lâi, goá iā chin hoaⁿ-hí, hô-hòng i put-chí ū pún-sū, kı̀-jiân lâi, goá tiōng-hu chóng ū thang ǹg-bāng. In chit pái Sèng-tàn-choeh chin ū hèng-chhù, Kap-la-tí kap Hêng-sū in-ūi in nn̄g lâng ū sin ê peng-oê,koh khah khoài-lo̍k. Hit mı̂ ge̍h-kng koâiⁿ-koâiⁿ chiò chhin-chhiūⁿ jı̍t-sı̂ ê khoán, chiū kā lāu-bú kóng beh kàu peng-khoe téng, i ê lāu-bú chí-ū chún in thit-thô chı̍t tiám cheng, chiū tio̍h tò-lâi khùn, tùi án-ni nn̄g ê gín-ná khı̀, khoàⁿ-kı̀ⁿ ū chin choē lâm-lú gín-ná í-keng tı̄ hia liu peng, Cha-lı̍p iā tı̄ hia. Cha-lı̍p goân-lâi choè lâng bô hó, i khoàⁿ-kı̀ⁿ Hêng-sū kap Kat-la-tí pí pa̍t lâng liu-teh khah hó, chiū tùi pa̍t ê gín-ná kóng, “Goá m̄ goān hit ê tai ê gín-ná kap lán chiah-ê lâng liu-peng, nā án-ni, kàu chèng-sek pí-sài hit jı̍t, kiaⁿ-liáu i iā beh lâi kap lán saⁿ-kap pí-sài liu-peng, lán lâi kā Hek-tek sió-chiá kóng tek-khak m̄-thang hō͘ in tâng pí-sài liu-peng.”
Pí-tek kóng, “Goá koat-toàn m̄ án-ni kā Hek-tek sió-chiá kóng, in-ūi nā i ū hó ê liông-sim, tek-khak m̄ khéng in-ūi in sóng-hiong chiū bô hō͘ in khı̀ pí-sài liu-peng.”
Chit ê Pí-tek chiū-sı̄ the̍h chı̂ⁿ hō͘ Hêng-sū boé peng-oê ê, só͘-í i chin hoaⁿ-hí Hêng-sū. Cha-lı̍p khoàⁿ Pí-tek só͘ ı̀n ê oē, chı̄n giâm-chiàⁿ ê, chiū m̄ káⁿ koh kóng. Lēng-goā ū chı̍t ê gín-ná miâ kiò Thê-o-hui-lô-su, tùi pa̍t ê gín-ná kóng, “Lí khoàⁿ, Cha-lı̍p chin kiaⁿ Pí-tek.” Cha-lı̍p thiaⁿ-kı̀ⁿ oa̍t-thâu mē hit ê gín-ná kóng, “Lí chit ê soè niáu-chhú, lí chit ê soè-bé thâng, soè kâu lí ê miâ-jı̄ kàu chiah tn̂g ê, chhin-chhiūⁿ kâu-bé chı̍t iūⁿ.” Chit kûn ê gín-ná thiaⁿ-kı̀ⁿ Cha-lı̍p chit iūⁿ ê mē, lóng toā chhiò. Cha-lı̍p mē liáu, chiū liu-peng khı̀, tùi chit sı̂ Cha-lı̍p chai Pí-tek pó-hō͘ Hêng-sū in, nā-sı̄ Pí-tek tı̄ hia Cha-lı̍p chiū m̄ káⁿ kóng Hêng-sū, Kat-la-tí sím-mı̍h oē. Hêng-sū kap Kat-la-tí pêng-sò͘ m̄ ài kap hù-kùi lâng ê gín-ná óng-lâi, in-ūi kiaⁿ-liáu hō͘ in khoàⁿ-khin, só͘-í Cha-lı̍p kap Pí-tek só͘ kóng ê oē in m̄ chai. Kat-la-tí tùi i ê a-ko kóng, “Lí khoàⁿ chit pái ê Sèng-tàn sı̄ cháiⁿ-iūⁿ ê khoài-lo̍k, lán nn̄g lâng lóng ū peng-oê.” Kóng kàu chit kù hut-jiân thiaⁿ-kı̀ⁿ ū chı̍t ê soè-soè ê siaⁿ thoân kàu hı̄-á lāi, tı̄ peng-khoe thit-thô ê lâng bô ū chı̍t lâng thiaⁿ-kı̀ⁿ, chí-ū Hêng-sū kap Kat-la-tí, jı̄n-tit sı̄ in lāu-pē kap lāu-bú tı̄ hit lāi saⁿ phah, bı̄n lóng pı̀ⁿ pe̍h-pe̍h. Hêng-sū kap Kat-la-tí cháu tò-lâi kê-nı̍h, khoàⁿ-kı̀ⁿ in ê lāu-bú kūi tı̄ chı̍t tui sio ê chhâ ê bı̄n-chêng, khoàⁿ-kı̀ⁿ chit ê kong-kéng boē bián-tit toā kiaⁿ. Goân-lâi Hêng-sū ê lāu-pē pêng-sò͘ sı̄ hoaⁿ-hí khoàⁿ-kı̀ⁿ hé-ian, só͘-í i ê lāu-bú ta̍k pái bô tāi-chı̀ ê sı̂, chiū sio chhâ-hé, ēng chhùi pûn, hō͘ hé ê kng hoat, hō͘ i ê tiōng-hu hoaⁿ-hí. Chit sı̂ tú-tú teh pûn hé, bô phah-sǹg tiōng-hu hut-jiân khí-lâi chı̀n-chêng, hiông-hiông chiong i ê bó͘ lia̍h khı̀ hiat-lo̍h hé, chı̍t bı̄n hiat, chı̍t bı̄n chhiò, siang chhiú lóng bô pàng-sang, i ê lāu-bú ê la̍t boē iâⁿ i, kéng-jiân hō͘ i hiat kàu hé ê bı̄n-chêng í-keng chiong saⁿ sio-tio̍h lah. Hêng-sū chı̍t ē khoàⁿ, chı̍t bı̄n koáⁿ-kín phah hé, chı̍t bı̄n ēng chhiú chhia i ê lāu-pē, chhù-lāi koh bô chúi thang phoah hé, i ê lāu-pē koh gōng-chhiò bô soah. Hêng-sū siūⁿ bô hoat-tō͘, chí-ū chı̄n la̍t chiong i ê lāu-pē lia̍h khui, i ê lāu-pē iā ēng la̍t chhia Hêng-sū. Hit sı̂ i ê lāu-bú ê saⁿ sio-tio̍h, thong sin chhin-chhiūⁿ tı̄ ian-hé ê tiong-kan, nā-sı̄ i iû-goân kūi tı̄ ian-tiong kı̂-tó. Hêng-sū chit sı̂ chin koáⁿ-kip, m̄ chai tio̍h cháiⁿ-iūⁿ, Kat-la-tí kín-kín cháu kàu tû-pâng chiong chı̍t tè oáⁿ toé i ê lāu-pē só͘ hoaⁿ-hí ê piáⁿ, phâng kàu i ê lāu-pē ê bı̄n-chêng, hē tı̄ thô͘-kha, chhoā i ê lāu-pē lâi chia̍h, i ê lāu-pē chiah pàng i ê lāu-bú, chhin-chhiūⁿ soè-hàn gín-ná chı̍t iūⁿ, pê tı̄ thô͘-kha teh chia̍h, i ê lāu-bú kai-chài chí-ū sio-tio̍h saⁿ, lâng bô ū siū-siong, Hêng-sū kín-kín thoè i phah-hoa hé. Chit chı̍t mı̂ in-ūi i ê lāu-pē siang chhiú hû-thâu, jia̍t-tō͘ chin koâiⁿ, i ê lāu-bú kui mı̂ khoàⁿ-siú, tı̍t-kàu thiⁿ-kng, m̄ káⁿ lio̍h-á pı̂n-toāⁿ, kè jı̍t chá-khí, i ê lāu-bú mn̄g Hêng-sū kóng, “I-seng kin-á-jı̍t oē kàu mah ?” Hêng-sū thiaⁿ-kı̀ⁿ kóng, chiū khı̀ chhē i-seng. Kat-la-tí pang-chān i ê lāu-bú tı̄ ke-lāi ho̍k-sāi i phoà-pı̄ⁿ ê lāu-pē, chit sı̂ ke-tiong hui-siông léng-chēng, chin chhiⁿ-chhám, i ê lāu-pē tó tı̄ bı̂n-chhn̂g, tı̍t-tı̍t chhan bô soah, i ê lāu-bú tı̄ piⁿ-á sió-sim ho̍k-sāi, chêng i ê tiōng-hu cháiⁿ-iūⁿ lêng-jio̍k i it-khài bô khǹg siū-khı̀, ēng chhúi chhit i ê thâu kap chhùi-tûn, in-ūi i ê jia̍t oh thè, chı̍t bı̄n háu, chı̍t bı̄n kı̂-tó, kiû Siōng-tè bián hō͘ i sí. Chit sı̂ Kat-la-tí chiong thô͘-kha sàu hó, koh phoà-chhâ khí hé, koh chiong sng chhòng-iûⁿ, pı̄-pān i ê lāu-bú beh ēng, tāi-chı̀ choè oân, chiū chē, oá-kūn chhn̂g-piⁿ khoàⁿ i ê lāu-pē, koh kiû i ê lāu-bú khı̀ khùn, khin-khin kóng, “A-bú, lí chin ià-siān, tùi chā-àm kàu chit tia̍p bô ū khùn chı̍t khek kú, goá í-keng tı̄ lâu-téng pı̄-pān bı̂n-chhn̂g, téng-bı̄n chhu ta̍k hō nńg ê mı̍h, chin sóng-khoài, chit ê sı̄ lí ê khùn-saⁿ, thang chiong hó ê saⁿ oāⁿ-khí-lâi, goá thoè lí chih hó-sè, hē tı̄ toā siuⁿ-lāi, lí pàng sim khı̀ khùn.” I ê lāu-bú iô-thâu, ba̍k-chiu khoàⁿ i ê lāu-pē, thâu iā bô kia̍h-khí-lâi, Kat-la-tí koh kóng, “A-bú, goá thang thoè lí khoàⁿ-siú, nā-sı̄ lāu-pē tín-tāng khí-lâi, goá thang kiò lí, kín-kín khùn tām-po̍h kú, lí ê bı̄n chhiⁿ-pe̍h, ba̍k-chiu huih-âng.” Kat-la-tí sui-jiân un-khûn khǹg i ê lāu-bú, nā-sı̄ i ê lāu-bú m̄ khéng lı̄-khui i ê lāu-pē, Kat-la-tí khoàⁿ-tio̍h i ê lāu-bú chit iūⁿ, sim-lāi sui-jiân tio̍h-kip, iáu-kú oē an-chēng, ka-kı̄ siūⁿ chit sı̂ goá choan sim lı̂n-bín lāu-bú, bô lı̂n-bín lāu-pē, boē bián bô kong-pêng, iā koh sún-hoāi thian-liông, koh siūⁿ Hêng-sū tē-it thiàⁿ lāu-pē cháiⁿ-iūⁿ goá boē-oē, koh tò-tńg siūⁿ goá m̄-sı̄ bô thiàⁿ, put-kò Hêng-sū pí goá khah ū thiàⁿ lāu-pē, sı̄ in-ūi Hêng-sū nı̂-hè khah toā, bô kiaⁿ lāu-pē, goá khah soè-hàn khah kiaⁿ lāu-pē, goá khó-lı̂n ê lāu-bú chin ū thun-lún ê sim, bē bat hoat siū-khı̀, lóng bô chhin-chhiūⁿ goá. Siat-sú goá ê pē oē hiáu-tit thang kā lán kóng hit ê chı̂ⁿ hē tı̄ sím-mı̍h só͘-chāi, kı̂-û ê tāi-chı̀, goá lóng bô iàu-kín. Siūⁿ kàu chia hut-jiân koh khah kan-khó͘ sim, chiū kóng, “Siōng-tè ah, kiû lí hō͘ goá ê lāu-pē chhiat-chhiat m̄-thang sí.” Thoè i ê lāu-pē kı̂-tó, í-keng poàⁿ-jı̍t lah, koh siūⁿ Hêng-sū nā tı̄ chia, i chin oē hiáu-tit, tek-khak oē hō͘ lāu-pē an-chēng, bô ai-ai chhan boē tı̀-kàu kiáu-jiáu, koh thó͘-khùi kóng, “Goá ê pē nā kó-jiân boē kiù-tit, goá iā bô thang koh khı̀ peng-khoe liu peng lah, goá tio̍h chiong hit siang sin ê peng-oê sàng hêng Hek-tek sió-chiá, Hêng-sū kap goá nn̄g lâng, iā bô thang khı̀ khoàⁿ hit ê sài-hoē lah.” Kat-la-tí hit sı̂ ba̍k-sái koh-chài lâu-lo̍h-lâi.
I ê lāu-bú kóng, “Sim-koaⁿ kiáⁿ ah, lí m̄-thang háu, lí ê lāu-pē ê pı̄ⁿ boē kàu lán só͘ siūⁿ ê toē-pō͘. Khah chá ê sı̂ i chı̍t pái ū chhin-chhiūⁿ chit hō khoán, tek-khak bô iàu-kín.”
Kat-la-tí toā khàu kóng, “A-bú ah, lí m̄ chai goá phian-su ê sim, chhin-chhiūⁿ bô thiàⁿ lāu-pē chı̍t iūⁿ.”
I ê lāu-bú kóng, “Lí sı̄ chhang-miâ koh gâu thun-lún ê gín-ná, chin oē hiáu siūⁿ.” Kat-la-tí tio̍h i ê lāu-bú ê saⁿ, chhin-chhiūⁿ beh kóng-oē, tiû-tû bô tiāⁿ-tio̍h ê khoán, i ê lāu-bú chiū soè-siaⁿ kóng, “Lí m̄-thang choè siaⁿ, hō͘ lí ê lāu-pē an-chēng khùn tia̍p á-kú, nā bô án-ni, kiaⁿ-liáu i oē chhíⁿ.”
Kat-la-tí choāi-chhùi kóng, “Chā-mı̂ lāu-pē thoa lí jı̍p hé ê sı̂ goá giâu-gı̂ i m̄-sı̄ lāu-pē, taⁿ chai goá giâu-gı̂ chhò lah.”
I ê lāu-bú koh kín kóng, “M̄-thang choè siaⁿ, m̄-thang choè siaⁿ.” In-ūi khoàⁿ-kı̀ⁿ i ê tiōng-hu teh-beh sí ê khoán-sit, chiū khin-khin chiong bı̂n-chhn̂g iô-tāng, chhı̀-khoàⁿ sı̄ ū sí á-m̄-sı̄. Chit sı̂ Kat-la-tí iā bô choè siaⁿ, liâm-piⁿ chiong i ê lāu-bú sio-chhun ê saⁿ, khiú-chhàu-ta ê soàⁿ, koh kóng, “Chit niá kai-chài sı̄ mı̂ ê, nā-sı̄ pò͘ ê í-keng sio liáu lah.”
