Tē 8 chiuⁿ
Koh Tit-tio̍h Lāu-pē.
Hit chı̍t àm Hêng-sū ê lāu-pē hó chin choē, sim siūⁿ beh khí-lâi, chē tı̄ toā ê the-í, thang lâi hang hé. Chı̍t tiap-á-kú choân ke lóng hoaⁿ-hí kàu boē kò͘-tit. Hêng-sū in-ūi i ê lāu-pē sin-thé chin tāng, tio̍h khiàm-ēng chı̍t hāng chin kiân-kò͘ ê mı̍h hō͘ i khò, chiū the̍h chı̍t tè kian-tēng ê toā í, hē-tı̄ hé-lô͘ chêng; i-seng sui-jiân bô hoan-hù Pek chím chún i ê tiōng-hu khí-lâi chē, nā-sı̄ i ka-kı̄ chù-ı̀ chiong i ê tiōng-hu hû-khí-lâi, tí-tú teh hû ê sı̂, i ê tiōng-hu tùi i kóng, “Lí khiā oē chāi, goá án-ni oh khiā khí-lâi, sı̄ goá í-keng lāu lah, bô khùi-la̍t mah, á-sı̄ in-ūi hoat jia̍t, hō͘ goá bô la̍t mah ?”
Pek chím chhiò kóng, “Lí put-kò sı̄ in-ūi phoà-pı̄ⁿ hoat jia̍t hō͘ lí án-ni loán-jio̍k, chit ūi ū í, lí chē lo̍h-khı̀, lâi hang hé thang hoaⁿ-hí lán kin-á-jı̍t chı̍t choê thoân-chı̍p.”Pek chím kóng liáu, bān-bān pàng i ê tiōng-hu chē tı̄ í nı̍h, ná chhin-chhiūⁿ ū sià tàⁿ tı̄ í-téng. Hêng-sū iā chiàu i só͘ oē ê pang-chān i ê lāu-bú hû i ê lāu-pē chē lo̍h. Chit sı̂ Kat-la-tí cháu lâi cháu khı̀, chhē ta̍k hāng ê mı̍h the̍h hō͘ i ê lāu-bú, hō͘ i ê lāu-pē khò ka-chiah, koh chhē chı̍t tè soè tè í hō͘ i ê lāu-pē khoà kha, Hêng-sū chiong hé poah chı̍t ē hō͘ hé hoat iām, sio khı̀ kek-goē ê toā. I ê lāu-pē chē tı̄ í-téng, ba̍k-chiu khoàⁿ in, sim-lāi chin kı̂-koài, ka-kı̄ siūⁿ tú chiah teh hû goá ê ta-po͘ gín-ná chiū-sı̄ soè Hêng-sū mah, tú chiah the̍h chhéng-á teh sàu hé-lô͘ téng ê hé-hu, chı̍t ê sı̀ chhioh-koâiⁿ ê cha-bó͘ gín-ná, chiū-sı̄ i ê sió-bē mah, goá ê bó͘ ia̍h sı̄ chit hō súi ê bı̄n-māu, nā-sı̄ chhin-chhiūⁿ sim-lāi teh khoà-lū sím-mı̍h, pâng-lāi ê mı̍h-kiāⁿ chí-ū chı̍t tè chêng-chhâ ê toh, iáu sı̄ goá í-chêng sêng-chhin ê sı̂ boé ê, koh ū chı̍t pún Sèng-chheh iā iáu tı̄ kè-á-téng, in-ūi khoàⁿ-kı̀ⁿ chit hō ê kéng-hóng, boē bián-tit chı̍t tih chı̍t tih ê ba̍k-sái tih lo̍h-lâi. Kat-la-tí bat lâu ba̍k-sái kı̂-tó, taⁿ í-keng tit-tio̍h ún-chún, in-ūi Kat-la-tí taⁿ chai thiàⁿ i ê lāu-pē iâⁿ-kè sè-kan ê sū, i khoàⁿ-kı̀ⁿ lāu-pē khàu chiū lâi phō i ê ām-kún, chiong i ê bı̄n oá-tio̍h lāu-pē kiò kóng, “Chhin-ài ê pē ah, lí m̄-thang khàu, goán chiah-ê lóng tı̄ chia. Hêng-sū kap i ê lāu-bú sim-lāi iā chin oh kè, to̍k-to̍k bô choè siaⁿ, in khoàⁿ-tio̍h Kat-la-tí, khoàⁿ i ê lāu-pē thó͘-khùi, tùi i ê cha-bó͘ kiáⁿ kóng, “Siōng-tè chiok-hok lí.” Kia̍h-khí thâu lâi kóng, “Goá chhin-chhiūⁿ boē jı̄n-tit lí.” Koh khoài-lo̍k ê iūⁿ kā i ê bó͘ kóng, “Goá eng-kai tio̍h jı̄n-tit i.” Tùi án-ni ēng siang chhiú bong i ê cha-bó͘ kiáⁿ ê bı̄n, chin chù-ı̀ khoàⁿ, chhin-chhiūⁿ khoàⁿ-kı̀ⁿ i tióng toā ê khoán, kóng, “Goá eng-kai tio̍h jı̄n-tit i, chı̍t tùi lâm sek ê ba̍k-chiu kap âng ê chhùi-tûn hêng-māu, kap soè-hàn ê sı̂ chı̍t iūⁿ, goá oē kı̀-tit i boē-oē kiâⁿ ê sı̂, chhiùⁿ koa, chin hó thiaⁿ, nā-sı̄ lı̄-khui í-keng kú lah, hiān-chāi chit ê sū í-keng kè-khı̀ lah.”
Pek chím kín-kín kóng, “Iáu-bē kè-khı̀, lí siūⁿ goá khéng hō͘ Kat-la-tí boē-kı̀-tit soè-hàn ê sı̂ ê kong-kéng mah ?” Chiū kiò Kat-la-tí chhiùⁿ hit ê soè-hàn ê sı̂ só͘ chhiùⁿ ê si hō͘ i thiaⁿ, chit sı̂ i ê lāu-pē chē tı̄ í-téng, sin khò tı̄ í-poè, khoeh ba̍k-chiu, sûi chhiú, thiaⁿ i chhiùⁿ si, siaⁿ-im chin hó chhin-chhiūⁿ nn̄g hè ê sı̂ só͘ chhiùⁿ ê chı̍t iūⁿ, só͘-í kám-tōng i ê sim, chhùi-tûn lio̍h-á tín-tāng chhiò chhiò. Kat-la-tí chhiùⁿ si liáu, Hêng-sū iā lio̍h-á chhiò chı̍t ē, chiū the̍h chı̍t tè chhâ í, hē tı̄ i ê lāu-pē ê bı̄n-chêng, chiong gû-ni chiah-ê mı̍h hē tı̄ téng-bı̄n, chiū kí kóng, “A-tia ah, tı̄ chia ū gû-ni, koe-nn̄g, bah chiap, pe̍h ê mı̄-pau, lí thang lâi chia̍h.” So͘ Pek-hok chı̍t bı̄n chia̍h chı̍t bı̄n kap i kóng kúi-kù oē. Hêng-sū the̍h i soè-hàn ê sı̂ só͘ thit-thô chı̍t ê chêng-chhâ só͘ choè bē chiâⁿ ê soè chûn, hō͘ i ê lāu-pē khoàⁿ, mn̄g kóng, “A-tia, lí chai chit ê sı̄ sím-mı̍h ?” I ê lāu-pē kóng, “Goá chai sı̄ goá chā-jı̍t só͘ choè ê.” Koh kóng, “Ai-ah, m̄ sı̄ chā-jı̍t, sı̄ chá chin choē nı̂, choè iáu-bē chiâⁿ ê soè-chûn.”
Hêng-sū kóng, “Sui-jiân bē ū choè chiâⁿ, goá iáu-kú pó-sioh, thèng-hāu lí hó, chhiú ū la̍t, thang choè kàu bêng-pe̍k.”
I ê lāu-pē kóng, “Sı̄, goá thang chiong i choè hó, nā-sı̄ lí hiān-chāi í-keng sêng-jı̂n, m̄-sı̄ thoè lí, chiong-lâi thang hō͘ goá ê sun-á thit-thô.” Chiū mn̄g Hêng-sū kóng, “Lí chiah choē nı̂ ū pang-chān lí ê lāu-bú mah ?” I ê bó͘ tı̄ piⁿ-á kóng, “I chin ū pang-chān goá.”
So͘ Pek-hok koh mn̄g kóng, “Tùi hoat toā chúi hit nı̂ kàu kin-á-jı̍t ū loā-choē nı̂ lah ?”
Hêng-sū kóng, “Ū cha̍p nı̂ lah.”
I ê lāu-pē kiaⁿ kóng, “Cháiⁿ-iūⁿ í-keng ū cha̍p nı̂ lah ?” Pek chím kı̀-tit i-seng hoan-hù kóng, m̄-thang kek-tōng i hō͘ i têng-kám, só͘-í m̄ chai tio̍h cháiⁿ-iūⁿ ı̀n chiah hó, tùi án-ni kóng, “Lí hiān-chāi í-keng hó lah, tio̍h kám-siā Siōng-tè, taⁿ tio̍h tó chhn̂g hioh-khùn.”
I ê tiōng-hu kiò Hêng-sū kóng, “EN-á, lí lâi pang-chān goá, goá beh chiūⁿ chhn̂g khı̀ khùn lah.”
Hit-àm, Hêng-sū, bú, kiáⁿ, saⁿ lâng chia̍h àm-tǹg ê sı̂ Pek chím khoàⁿ-kı̀ⁿ i ê tiōng-hu an-ún khùn, sim-lāi chin hoaⁿ-hí, Hêng-sū kap Kat-la-tí teh chia̍h ê sı̂, chhin-chhiūⁿ sim-lāi ū teh siūⁿ sím-mı̍h chı̍t iūⁿ. Pek chím mn̄g Hêng-sū kóng, “Lí sim-lāi teh siūⁿ sím-mı̍h ?”
Hêng-sū kóng, “Goá siūⁿ hit chı̍t chheng gûn.”
Hut-jiân thiaⁿ-kı̀ⁿ chhn̂g-téng ū soè-á siaⁿ kóng, “Chı̍t chheng gûn mah ? Goá siūⁿ tı̄ goá phoà-pı̄ⁿ chit kúi nı̂ ê tiong-kan chit ê gûn tı̄ lín chin ū lō͘-ēng.”
Pek chím thiaⁿ-kı̀ⁿ chiah-ê oē siong-sim koáⁿ-kín mn̄g i ê tiōng-hu kóng, “Lí sı̄ chhíⁿ mah ?”
Ìn kóng, “Sı̄ ah, goá hiān-sı̂ hó choē lah, kai-chài goá ū chek-chū hit ê gûn, chit cha̍p-nı̂ lâi ū ēng liáu mah ?”Pek chím kóng, “Goá ê tiōng-hu ah, goá ê tiōng-hu ah, goá lóng m̄ chai hiah-ê chı̂ⁿ tı̄ tah-lo̍h, goá bô ū tit-tio̍h chı̍t ê chı̂ⁿ.”
Tú-tú siūⁿ beh chiong lóng-chóng ê sū kā i ê tiōng-hu kóng, Hêng-sū iô-chhiú kóng, “A-bú, lí boē-kı̀-tit i-seng hoan-hù m̄-thang kiáu-jiáu i.”
I ê lāu-bú chiū kē siaⁿ kóng, “EN-á, lí kap i kóng oē.”
Hêng-sū chiū chı̀n-chêng tùi i ê lāu-pē kóng, “A-tia, goá chin hoaⁿ-hí lí sin-thé ū khah hó lah, phah-sǹg bı̂n-á-jı̍t chiū oē ióng-kiāⁿ khí-lâi.”
I ê lāu-pē kóng, “Sı̄, goá iā phah-sǹg án-ni.” Koh mn̄g Hêng-sū kóng, “Hiah-ê gûn ēng liáu joā-kú lah ? Goá thiaⁿ bô bêng lí ê lāu-bú só͘ kóng ê oē.”
Pek chím koáⁿ-kín chı̀n-chêng kóng, “Goá sı̄ kóng lóng-chóng bô chı̍t ı̂ⁿ lah.”
I ê tiōng-hu kóng, “Bô chiū hó, lí m̄-thang ūi-tio̍h chit ê sū tio̍h-kip, chit cha̍p-nı̂ ê tiong-kan, chı̍t ke teh kè jı̍t,ia̍h beh poê-ióng soè-hàn gín-ná, ēng liáu chı̍t chheng gûn iā bô lia̍h-choè choē, chit kúi-nā nı̂ bat tú-tio̍h phoà-pı̄ⁿ mah ?”
Pek chím chek-sı̂ khàu-khí-lâi the̍h ûi-kûn chhit ba̍k-sái kóng, “Bô, bô.”
I ê tiōng-hu chhiò kóng, “Bô chiū hó lah, ūi-tio̍h siáⁿ-sū beh khàu nı̍h, goá ū la̍t thang lâi thàn chı̂ⁿ ê sı̂, chit ê tē-á koh beh moá-moá, kai-chài goá iáu-bē poa̍h-tó í-chêng ū kā lí kóng.”
Pek chím kín-kín mn̄g kóng, “Kā goá kóng sím-mı̍h ?”
I ê tiōng-hu kóng, “Ai-ah, chiū-sı̄ goá tâi hit ê chı̂ⁿ, tú chiah goá bāng-kı̀ⁿ chhin-chhiūⁿ goá bô ū kā lí kóng.”
Pek chím kín chı̀n-chêng beh koh-chài mn̄g i chit ê chı̂ⁿ bâi tı̄ tah-lo̍h, Hêng-sū kín kā i khiú-teh kóng, “Lí m̄-thang kip, thèng-hāu goá bān-bān thàm thiaⁿ i.” Pek chím chiū bô choè siaⁿ, nā-sı̄ sim-lāi hūn boē-oē liâm-piⁿ thiaⁿ-kı̀ⁿ i cháiⁿ-iūⁿ ı̀n, i ê tiōng-hu tı̍t-tı̍t chùn ê siaⁿ-im siūⁿ beh kóng-oē, Hêng-sū kóng, “Cháiⁿ-iūⁿ ēng che bāng kiáu-jiáu lāu-pē nı̍h. Lí oē kı̀-tit sím-mih sı̂ bâi hit ê chı̂ⁿ mah ?”
I ê lāu-pē kóng, “Goá kı̀-tit chin chheng chhó, goá siū siong ê chêng chı̍t jı̍t Tiuⁿ Hok-seng tùi goá kóng kúi kù oē hō͘ goá m̄ sı̀n-ho̍k i, in-ūi chí-ū i kap lí ê lāu-bú chai goá khǹg chı̍t chheng gûn, goá bô pàng sim, só͘-í goá hit mı̂ khí-lâi, chiong hit ê chı̂ⁿ tâi tı̄ toē-nı̍h.”
Hêng-sū chhiò hi-hi kóng, “Goá chin sı̀n goá lāu-pē só͘ kóng ê, a-tia lí oē kı̀-tit bâi tı̄ sím mı̍h só͘-chāi mah?”
I ê lāu-pē kóng, “Goá oē kı̀-tit, chit tia̍p í-keng oàⁿ, goá ū tām-po̍h ià-siān, lí khı̀ khùn goá iā beh khùn lah.”
Hêng-sū iā kiaⁿ-liáu kiáu-jiáu i ê lāu-pē, put-tek-í chiū kóng, “A-pē, an-bı̂n, goá ia̍h beh khı̀ lah.” Kiâⁿ kúi pō͘ oa̍t-bı̄n koh mn̄g i ê lāu-pē kóng, “A-tia, lí oē kı̀-tit hit ê chı̂ⁿ kiù-kèng bâi tı̄ sím-mı̍h só͘-chāi, goá hit sı̂ iáu soè-hàn, só͘-í m̄ chai chit ê sū.”
I ê lāu-pē kóng, “Tı̄ chhù-āu, oá-kūn liú-chhiū ê toē-hng.”
Hêng-sū kóng, “A-tia, sı̄ tı̄ liú-chhiū ê pak piⁿ mah?”
I ê lāu-pē kóng, “M̄-sı̄, tı̄ liú-chhiū ê lâm piⁿ.”
Hêng-sū kóng, “A-tia, iáu-kú kı̀-tit kàu chiah chheng-chhó ah.”
Chit sı̂ Hêng-sū hoaⁿ-hí kàu boē kò͘-tit, thiàu khí-lâi kóng, “A-tia, chhiáⁿ pêng-an khùn, goá ia̍h beh khı̀ lah.”Tùi án-ni bú kiáⁿ saⁿ lâng saⁿ-kap khı̀ khùn.
Hit àm ge̍h chhut-teh chin oàⁿ, Ka-la-tí kap i ê lāu-pē lóng khùn-khı̀ lah, kng-bêng ê ge̍h, chiò-jı̍p thang-á lāi, koh bô kiáu-jiáu in. Hêng-sū kap i ê lāu bú khin-khin khí-lâi, khoàⁿ-kı̀ⁿ ge̍h-kng chiò tı̄ toē nı̍h, thang khoàⁿ-kı̀ⁿ liú-chhiū chin bêng, in bú kiáⁿ nn̄g lâng chiū kia̍h tı̂-thâu beh ku̍t hit ê chı̂ⁿ, sui-jiân goā-bı̄n koâⁿ, hong jı̍p kut, peng sng chhim lâng, iā to bô kiaⁿ, só͘ kiaⁿ ê sı̄ kiaⁿ liáu chiong in nn̄g lâng phah chhíⁿ, só͘-í in nn̄g lâng chı̍t bı̄n ku̍t toē chı̍t bı̄n kiaⁿ sim, sı̂-khek lûn-liû khin-khin khı̀ thàm-khoàⁿ pē cha-bó͘ kiáⁿ nn̄g lâng, khoàⁿ ū chhíⁿ á bô. Pek chím chhiò kóng, “Nā-sı̄ chiong chı̂ⁿ ku̍t-tio̍h; lín lāu-pē chhíⁿ, chiong chit ê chı̂ⁿ hō͘ i khoàⁿ, i khoàⁿ-kı̀ⁿ chin choē ê chı̂ⁿ iáu tı̄-teh, oē cháiⁿ-iūⁿ ê hoaⁿ-hí nı̍h ?”
In nn̄g lâng tı̄ liú-chhiū ê lâm-piⁿ ku̍t liáu poàⁿ mı̂, í-keng ū chı̍t chhioh chhim, iā bô khoàⁿ-kı̀ⁿ ū chı̂ⁿ ê iáⁿ, m̄ chai hit ê chı̂ⁿ ū á bô, nn̄g lâng sim-lāi chin tio̍h-kip.
Pek chím kóng, “Ai-ah, lí ê lāu-pē chiong chit ê chı̂ⁿ bâi-teh chin chhim, chit ê thô͘ chin nńg, ge̍h kng koh toā, hiān-chāi niū goá lâi ku̍t ah, nā chiong liú-chhiū kun siong-tio̍h, goá chin m̄ kam, lí siūⁿ eng-kai ūi-tio̍h chit ê chı̂ⁿ siong-tio̍h chhiū mah?”
Hêng-sū khoàⁿ-kı̀ⁿ iáu-bē ū ku̍t-tio̍h chı̂ⁿ, sim-lāi chin iu-būn, sûi sı̂ ı̀n kóng, “Goá m̄ chai.”
Nn̄g lâng ku̍t liáu kúi-nā tiám cheng kú khui chı̍t khang chin toā, chin chhim, ta̍k só͘-chāi chhē kè lâi iû-goân bô khoàⁿ-kı̀ⁿ chı̂ⁿ, chit sı̂ thiⁿ-téng ê hûn í-keng pò͘-moá, ge̍h kng iā bô bêng, thiⁿ iā teh-beh kng lah, Pek chím kap Hêng-sū saⁿ khoàⁿ, chhin-chhiūⁿ bô ǹg-bāng.
Tē 9 chiuⁿ
Chhē Thâu-lō͘
Tē jı̄ chá khí, Cha-lı̍p cháu kàu Hêng-sū ê chhù, khoàⁿ-kı̀ⁿ hit ê thô͘ chhin-chhiūⁿ ku̍t sang ê khoán, chiū khiā teh, sı̀-ûi soè-jı̄ khoàⁿ, iā khoàⁿ boē chhut sím-mı̍h ı̀-sù, put-kò sı̄ thô͘ khah sang, kia̍h thâu khoàⁿ, khoàⁿ-kı̀ⁿ Hêng-sū chhù-téng ê ian-tâng-téng ū chı̍t chiah pe̍h-ho̍h. Hô-lân ê hong-sio̍k ho̍h hioh tı̄ chhù-téng, hit ê ke tek-khak heng-sēng. Cha-lı̍p khui-keng siā chı̀ⁿ, siā hit chiah ho̍h. Chit sı̂ Hek-tek sió-chiá tú-tú lâi Hêng-sū ê chhù-piⁿ, khoàⁿ-kı̀ⁿ Cha-lı̍p siā sí hit chiah ho̍h, sim-lāi siūⁿ kóng, “Chit ê chân-jím ê gín-ná chin khó-ò͘.” Cha-lı̍p khoàⁿ-kı̀ⁿ Hek-tek sió-chiá, sim siūⁿ Hek-tek sió-chiá tek-khak o-ló goá chit ki chı̀ⁿ chin chún ê, tùi án-ni chiū kóng, “Sió-chiá chin gâu chá ah,” thái oē chai Hek-tek sió-chiá siū-khı̀, khoàⁿ i kóng,“Chá nı̍h, lí chiū-sı̄ chân-jím put kham ê lâng, m̄ chún lí koh-chài kap goá kóng-oē.” Án-ni khı̀ pûn-pûn bô beh lí-chhái i chiū cháu. Goân lâi Hek-tek sió-chiá pèng m̄-sı̄ in-ūi Cha-lı̍p siā ho̍h chiah oàn-hūn i, pêng-sò͘ chiū chin bô hoaⁿ-hí i, in-ūi ū chı̍t jı̍t Cha-lı̍p kò͘-ı̀ chhòng-tı̄ Hek-tek ê sió-bē hō͘ i khàu, chiū mē kóng, “Lí pháiⁿ khoàⁿ koh gōng boē pí-tit Kat-la-tí hiah hó khoàⁿ, iā boē pí-tit i ê chhang-miâ,” nā-sı̄ i ê sió-bē pèng bô pháiⁿ khoàⁿ só͘-í mē kàu hō͘ i khàu. Hit sı̂ Hek-tek mē kóng, “Kai-chài goá ê hiaⁿ-tı̄ bô chhin-chhiūⁿ lí chit hō hiông-ok, koh lı̄-ek ka-kı̄ ê pháiⁿ nı̍h,” tùi án-ni Hek-tek sió-chiá kek-goē ê oàn-hūn i, taⁿ koh khoàⁿ-kı̀ⁿ i chit iūⁿ, kiám khéng beh lí-chhái i mah ?”
Kè bô joā-kú, Hek-tek sió-chiá tú-tio̍h Hêng-sū, saⁿ-kap kóng-oē, Hêng-sū kóng, “Goá kā lí kóng chı̍t hāng hoaⁿ-hí ê siau-sit, chiū-sı̄ goá ê lāu-pē í-keng chiām-chiām khah hó.” Hêng-sū in-ūi kap Hek-tek sió-chiá sı̄ ti-kí ê pêng-iú, só͘-í chiong ke-lāi bô chı̂ⁿ, kap ûi-lân ê chêng-hêng lóng kā i kóng, “Hiān-sı̂ chin khiàm-ēng chı̂ⁿ, goá beh khı̀ siâⁿ-lāi boē hit siang peng-oê, koh beh chhē kang thang choè.”
Hek-tek sió-chiá kóng, “Ai-ah, lí boē hit siang peng-oê--mah, iáu ū gō͘ jı̍t chiū beh sài liu-peng.”
Hêng-sū chiū kóng, “Goá chai, nā-sı̄ goá koat-ı̀ beh chiong hit siang sin ê peng-oê boē.”
Hek-tek sió-chiá sim siūⁿ i sı̄ chı̍t ê ū hàu ê gín-ná, kap hit ê chân-jím lı̄-kí ê Cha-lı̍p toā bô saⁿ-tâng, Hêng-sū kóng, “Chit sı̂ goá beh khı̀ boē peng-oê.” Án-ni chhin-chhiūⁿ chı̀ⁿ chı̍t iūⁿ cháu-khı̀, Hek-tek kiò kóng, “Hêng-sū kín lâi,” Hêng-sū thiaⁿ-kı̀ⁿ kiò chiū khiā teh. Hek-tek sió-chiá chiū kóng, “Lí nā sı̍t-chāi beh boē hit siang peng-oê, goá ū chı̍t ê pêng-iú beh boé.”
Hêng-sū kóng, “Sı̄ Cha-lı̍p beh boé mah ? goá m̄ goān boē hō͘ i.”
Hek-tek sió-chiá kóng, “Lí chin gōng lah, goá kiám khéng boē hō͘ i mah, i chit iūⁿ kiâm-siap ê lâng goá tē-it oàn-hūn i, hiān-chāi sı̄ goá ê pêng-iú beh boé, Cha-lı̍p iā m̄ sı̄ goá ê pêng-iú goá cháiⁿ-iūⁿ khéng boē hō͘ i nı̍h, goá tú-chiah khoàⁿ-kı̀ⁿ i siā-sí chı̍t chiah chiáu, chin sı̄ chân-jím, goá kek-goē hūn i, goá sı̍t-chāi ū chı̍t lâng beh boé chit ê peng-oê, lí m̄-bián the̍h-khı̀ koe nı̍h boē, nā-sı̄ the̍h kàu koe-nı̍h kè chı̂ⁿ, tio̍h sit chı̍t poàⁿ, lí chiong oê the̍h lâi hō͘ goá, goá kin-á-jı̍t ē-po͘ chiū thang chiong chit ê chı̂ⁿ the̍h lâi hō͘ lí.”
Hêng-sū chiū chiong peng-oê the̍h hō͘ i, koh kóng, “Nā-sı̄ lí ê pêng-iú m̄, chhiáⁿ lí ē-po͘ chiū tio̍h chiong oê the̍h lâi hêng goá, in-ūi goá kin-á-jı̍t boē i, iáu beh boé chhâ, boé mı̄-hún, pı̄-pān bı̂n-á-jı̍t tō͘ oa̍h ê.”
Hek-tek chhiò kóng, “Goá ê pêng-iú tek-khak beh.”Kóng soah Hek-tek the̍h peng-oê beh thoè i khı̀ boē, chı̍t bı̄n kiâⁿ chı̍t bı̄n siūⁿ, Hêng-sū choè lâng, chin sı̄ ióng-kám, hàu-sūn, ū châi-lêng ê, chı̄n i ê le̍k-liōng iúⁿ-chhı̄ i choân-ke, goá siūⁿ i koh beh hō͘ i-seng ê i-io̍h hùi, i ê lāu-bú chit-sı̂ beh chiàu-èng i ê pē-chhin, boē-oē choè pa̍t hāng ê sū, i sió-bē Kat-la-tí beh sàu toē chhit toh, chú chia̍h, soé oáⁿ,choè ke-lāi it-chhè ê cha̍p-sū, in chı̍t ke ê seng-oa̍h oân-choân sı̄ Hêng-sū chı̍t sin, ai-ah, i ê tàⁿ chin sı̄ bô khin,bô kı̂-koài i chit sı̂ it-tēng beh boē chit siang peng-oê, goá siūⁿ i í-āu kiaⁿ-liáu oh kàu o̍h-tn̂g tha̍k chheh, goá bat thiaⁿ-kı̀ⁿ i ê sian-siⁿ kóng, i só͘ ū ê ha̍k-seng, bô ū chı̍t ê chhin-chhiūⁿ Hêng-sū chit iūⁿ ê chhang-miâ.
Hêng-sū lı̄-khui Hek-tek, tı̍t ǹg siâⁿ kiâⁿ khı̀, teh siūⁿ beh chhē kang thang choè, i chı̍t lō͘ sim-lāi àm-siūⁿ kóng Hek-tek sió-chiá ê choè lâng, chin sı̄ jı̂n-ài hui-siông, sui-sı̄ chhut sin hù-kùi, to̍k-to̍k i pèng bô khoàⁿ-khin sòng-hiong lâng, chin-chiàⁿ hó chhin-chhiūⁿ sian-lí chı̍t iūⁿ. In nn̄g lâng ka-chiah-āu saⁿ o-ló nā-sı̄ in nn̄g lâng lóng bô ū thiaⁿ-kı̀ⁿ. Hêng-sū tùi téng-koe cháu kàu ē-koe, chhē chin kú, chhē bô chı̍t hāng ê thâu-lō͘ thang choè, sim-siūⁿ thoè lâng khoàⁿ mn̂g, á-sı̄ thoè lâng cháu-lō͘ iā hó, nā-sı̄ i ê i-chiûⁿ phoà-noā, lâng lóng bô beh, ū lâng kóng, hiān-chāi tang-thiⁿ ê thiⁿ-sı̂ chin té, m̄-bián ēng lâng, thèng-hāu mē-nı̂ chhun chiah ēng lâng. Hêng-sū kip-teh bô hoat, siūⁿ-lâi siūⁿ-khı̀, m̄ chai beh cháiⁿ-iūⁿ thang lâi iúⁿ-chhı̄ chit ê ke, khah hó tio̍h tò-lâi khı̀. Kàu Pí-tek ê mn̂g-kháu tú-tú sim kip chhin-chhiūⁿ hé chı̍t iūⁿ. Pí-tek khoàⁿ-kı̀ⁿ kiò kóng, “Hêng-sū, Hêng-sū, goá thiaⁿ-kı̀ⁿ kóng, lí beh chhē kang thang choè, ū iáⁿ bô ? Goá ê lāu-pē ài lí thoè goán tı̄ ı̄ⁿ lāi, khí chı̍t chō liâng-têng, lí oē choè ba̍k-chhiūⁿ ê chhiú-gē mah ?”
Hêng-sū kín ı̀n kóng, “Goá thang lâi choè khoàⁿ.”
Pí-tek kóng, “Án-ni goá thang chhiáⁿ goá ê lāu-pē lâi saⁿ-kap gı̄-lūn.”
Pí-tek ê lāu-pē, chit sı̂ í-keng thiaⁿ-kı̀ⁿ lah, chiū liâm-piⁿ chhut lâi, koat-ı̀ ài Hêng-sū khí chō, kiò i bı̂n-á-jı̍t chiū tio̍h lâi khí kang, koh tāi-seng chiong bı̂n-á-jı̍t ê chı̂ⁿ hō͘ i, koh mn̄g Hêng-sū kóng, “Lí ê lāu-pē ê pı̄ⁿ cháiⁿ-iūⁿ ?”
Hêng-sū kóng, “Kám-siā sian-siⁿ ê kı̀-liām, Hiān-chāi chı̍t jı̍t chı̍t jı̍t hó.”
Pí-tek ê lāu-pē kóng, “Chit ê Phok i-seng, i tı̄ lán Hô-lân kok lāi chin sı̄ chhut-miâ, nā-sı̄ i ê choè lâng bô hiông-ok chiū chin hó lah.”
Pí-tek chiap chhùi kóng, “I chit ê i-seng lóng bô ū siān-liông ê sim.”
Hêng-sū kóng, “Chhian-bān m̄-thang án-ni kóng, i tùi tı̄ goá chin ū jı̂n-ài, i ê goā-māu sui-jiân chin hiông-ok, sim-lāi khiok chin ài-sim.”
Pí-tek ê lāu-bú cháu chhut lâi kóng, “Hêng-sū kóng bô chhò.” Chiū tùi i ê tiōng-hu kóng, “Goá tú-chiah thiaⁿ-kı̀ⁿ lí kap Pí-tek kóng ê oē sı̄ chhò lah.” Koh tùi Pí-tek kóng, “Pí-tek lí m̄ eng-kai án-ni gı̄-lūn lâng ê, goá m̄ ài lí o̍h chit hō bô kui-kú ê kóng-oē.”
Pí-tek kóng, “A-bú, chhiáⁿ lí goân-liōng goá, lí só͘ kóng ê chū-jiân tio̍h, nā-sı̄ Phok i-seng sui-jiân sǹg sı̄ Hô-lân tē-it pún-sū ê lâng, i m̄ eng-kai bô lūn tùi sím-mı̍h lâng, sûi-piān hoat-chhut siū-khı̀ mē lâng.”
I ê lāu-bú kóng, “Pí-tek, nā-sı̄ lí oē chai Phok i-seng sim-lāi ê oh-chhù, lí bô beh kóng chit hō oē. I khah chá ū chı̍t ê kiáⁿ chin hó ê, put-kò sı̄ sò-sèng, ū chı̍t tiám kiau-gō, chá kúi nı̂ cháu chhut khı̀, kàu hiān-sı̂ iáu bô tò-lâi, i ê kiáⁿ iáu-bē cháu chhut-khı̀ ê í-chêng, chit ê Phok i-seng sı̄ chin hô-khı̀ ê, goá chiong-lâi bē bat khoàⁿ chit hō hó koh hô-khı̀ ê lâng, put-kò hiān-sı̂ in-ūi sim-su bô sūn, só͘-í sı̂-siông hoat siū-khı̀.”
Hêng-sū kóng, “Sian-siⁿ-niû ê oē bô chhò.” Án-ni Hêng-sū to-siā Pí-tek kap i ê lāu-pē, kóng, “Kám-siā lí ê thiàⁿ-thàng, kiò goá choè kang, goá chin kám-kek ê.” Kóng soah oa̍t-thâu beh khı̀, Pí-tek sàng kàu mn̂g-kháu, tùi Hêng-sū kóng, “Ē lé-pài beh sài-liu peng, lí tek-khak tio̍h ū-pı̄, lí pit-tēng beh tit-tio̍h siúⁿ.”
Hêng-sū kóng, “Hit chı̍t jı̍t goá boē-oē sài peng.”
Pí-tek kóng, “Sı̄ sím-mı̍h iân-kò͘ mah ? Cha-lı̍p oàn-hūn lí, chó͘-tòng lí lâi mah, lí m̄-bián lí-chhái i.”
Hêng-sū kóng, “M̄ sı̄ chit ê iân-kò͘.” Kóng ê sı̂ bı̄n hián-chhut chhiû-khó͘ ê iūⁿ, Pí-tek m̄ káⁿ koh-chài mn̄g, chiū kóng, “Chài-hoē, bı̂n-á-jı̍t lâi choè kang,” koh kóng, “Tùi put-chū. Tú chiah kóng Phok i-seng chiah-ê oē, chhin-chhiūⁿ chin bô kèng-tiōng i, nā koh oat-jı̍p chhù ê sı̂ goá chai lāu-bú oē koh mē goá.” Kóng soah nn̄g lâng choè chı̍t ê chhiò, Hêng-sū chiū khı̀. Pí-tek tò-lâi jı̍p mn̂g iô-thâu kóng, sı̄ sím-mı̍h iân-kò͘ i m̄ koh sài peng nı̍h ?
