Gē-su̍t káng-tâi Gē-su̍t khài-liām

Papora Thiāu káng, Bûn-eng kı̀-lio̍k Siáⁿ-mı̍h kiò-chò gē-su̍t? Beh jı̄n-sek siáⁿ-mı̍h kiò-chò gē-su̍t í-chêng, lán seng thàm-thó chı̍t-ê būn-tê: Ū lâng kā gē-su̍t kiò-chò bí-su̍t, nā án-ne, “súi” kiám sı̄ gē-su̍t ê te̍k-chit? Sı̄ m̄ sı̄ súi ê chok-phín tio̍h sǹg sı̄ gē-su̍t? Tap-àn eng-kai sı̄: bô it-tēng! Ū chin chē ê gē-su̍t chok-phín tı̄ gē-su̍t-sú ū chin tiōng-iàu ê hūn-liōng, éng-hióng āu-tāi ê lâng chin chhim. Chiah ê chok-phín khiok m̄-sı̄ “súi--ê”. Phı̀-jū Bûn-gē-ho̍k-heng sı̂-tāi, Germanic（日耳曼）ê gē-su̍t-ka Grunewald tı̄ se-goân 1515 nı̂ ê kia̍t-chok ”Isenhein Altar(埃森罕姆祭壇畫)”, Michelangel(米開蘭基羅) ê “Choè-āu ê sím-phoàⁿ”, kap Picasso(畢卡索)ê “A-boe-long ê ko͘-niû”. Chêng nn̄g pak ê chok-phín m̄-nā bô súi, sı̄m-chı̀ koh hō͘ lâng kám-kak chin khióng-pò͘. Tē-jı̄ ê būn-tê: Hàn-jı̄ ê “gē-su̍t” ū “術“ chit-jı̄, piáu-sı̄ gē-su̍t sı̄ ū kı̄-su̍t-sèng--ê? Sı̍t-chè-siōng, che mā bô it-tēng. Tı̄ hiān-tāi í-chêng ê gē-su̍t ē-tit kóng lóng ū kı̄-su̍t-sèng, m̄-kú hiān-tāi ê “Koan-liām gē-su̍t” tio̍h bô thoân-thóng só͘-kóng ê kı̄-su̍t--lo͘h. Tē-saⁿ--ê beh thàm-thó--ê sı̄, beh phoàⁿ-toān sı̄ m̄ sı̄ gē-su̍t-phín ê phiau-chún tı̄ tó-ūi? Siáⁿ-mı̍h sı̄ gē-su̍t, siáⁿ-mı̍h m̄ sı̄ gē-su̍t? Kı̂-sı̍t gē-su̍t ê piau-chún it-tı̍t toè sı̂-tāi kap siā-hoē ê piàn-tōng teh kái-piàn. Tı̄ gē-su̍t-sú tiong, óng-óng ū sı̍t-giām-sèng ê chok-phín poē-lı̂ thoân-thóng, soà hō͘ siā-hoē tāi-chiòng bô hoat-tō͘ chiap-siū, liân gē-su̍t-kho͘-á ê lâng mā chin tiû-tû giâu-gı̂. M̄-kú toè tio̍h sı̂-kan chiām-chiām teh kái-piàn, chiah ê sı̍t-giām-sèng chok-phín sı̄m-chı̀ chiâⁿ-choè chú-liû, éng-hióng āu-tāi chin toā chin chhim. Siōng hó ê lē tio̍h sı̄ “Ìn-siōng chú-gı̄ (Impressionism)”. Koh chı̍t-ê lē sı̄ Bí-kok ê “Christo”, i kā kúi-ê hái-hoāⁿ lóng pau--khí-lâi. Beh oân-sêng chit hāng tāi-chı̀ sı̄ chin bô kán-tan, pau-koat: (1) i seng ū kò͘-sióng (2)kā chèng-hú sin-chhéng, tit tio̍h èng-ún, ē-tit sú-iōng hái-hoāⁿ (3)siōng tiōng-iàu--ê, ài cháu-chhoē goān-ı̀ chhut chı̂ⁿ ê chi-chhı̂-chiá (4) ài soeh-ho̍k khoân-pó thoân-thé kap tong-tē ê chū-bı̂n, hō͘ in chai-iáⁿ i ê lí-liām koh chàn-sêng i piáu-hiān chhut--lâi. Khó-kiàn, beh sêng-kong chı̍t-hāng tāi-chı̀ ài kái-koat goā-chē ho̍k-cha̍p ê būn-tê. Tı̄ hit tong-sı̂, khó-lêng chin chió ū lâng ē kóng he tio̍h sı̄ gē-su̍t. M̄-kú kúi-nı̂ āu ê chit-má, it-poaⁿ ê gē-su̍t-kài í-keng chiap-siū he chiū sı̄ gē-su̍t. Lán chı̍t-lō͘ kóng--lo̍h-lâi, ē-tit hoat-kak, beh chiàⁿ-bı̄n tēng-gı̄ gē-su̍t sı̄ chin bô iông-ı̄ⁿ. Nā án-ne, lán tùi lēng-goā chı̍t hong-bı̄n chhı̀ khoàⁿ māi--leh; gē-su̍t tàu-té ē-tit hun-sek chhut siáⁿ-mı̍h siau-ke̍k-sèng ê te̍k-chit? 1.Gē-su̍t it-tēng sı̄ jı̂n-ûi--ê. It-tēng ū lâng kài-jı̍p, m̄-kú hong-sek bô hān. Phı̀-jū thoân-thóng ê gē-su̍t it-tēng sı̄ lâng chè-chō--ê, hiān-tāi ê “Hêng-tōng gē-su̍t” khiok sı̄ tı̄ lâng ê hêng-tōng tiong oân-sêng chok-phín. Ū-lâng mn̄g kóng, chū-jiân-phín sı̄ m̄ sı̄ gē-su̍t-phín? Chhin-chhiūⁿ chū-jiân hong-kéng chin súi, Siōng-tè chhòng-chō ê jı̂n-thé chin súi, sı̄m-chı̀ kok-chióng ê seng-bu̍t ū in chin súi ê hêng-thé....... Chiah--ê lóng bô sǹg sı̄ gē-su̍t. M̄-kú, keng-koè lâng ê ba̍k-chiu só͘ khoàⁿ, thâu-khak só͘ siūⁿ, kā chiah--ê piáu-hiān tı̄ oē-pò͘, á-sı̄ iōng chio̍h-thâu bo̍k-châi téng châi-liāu tiau-khek chò chok-phín. Chit-chióng keng-koè lâng chè-chō--ê ū khó-lêng ē-tit sǹg sı̄ gē-su̍t. Sui-jiân án-ni, pēng bô tāi-piáu lâng chò--ê só͘-ū mı̍h-á lóng sı̄ gē-su̍t. Só͘-í kóng, “jı̂n-ûi--ê” mā kan-taⁿ ē-tit sǹg sı̄ siau-ke̍k-sèng ê te̍k-chit nā-tiāⁿ. 2.Gē-su̍t tùi lâng ū chı̍t-chióng khip-ín-la̍t, hó chhin-chhiūⁿ “mô͘-hoat”. Sui-jiân lâng bô gē-su̍t ē-tit oa̍h--lo̍h-khı̀, m̄-kú ū chē-chē ê lâng khiok hō͘ gē-su̍t khip-ín, kam-goān chı̍t-sı̀-lâng cháu-chhoē gē-su̍t, hiàn i ê sèⁿ-miā hō͘ gē-su̍t. Kóng--khí-lâi, chong-kàu, chèng-tı̄ mā ū chit-chióng khip-ín ê le̍k-liōng. Só͘-í, chit-tiám iā kan-taⁿ ē-tit sǹg sı̄ siau-ke̍k-sèng ê te̍k-chit nā-tiāⁿ. Kóng kàu chia, lán siūⁿ beh hō͘ gē-su̍t chı̍t-ê bêng-khak ê tēng-gı̄ sı̍t-chāi ū khùn-lân. M̄-kú tı̄ lán thó-lūn gē-su̍t bô chin bêng-khak ê tiong-kan, kı̂-sı̍t gē-su̍t tio̍h í-keng pau-hâm tı̄ lāi-té--ah. (Tâi-oân-jı̄ Cha̍p-chı̀ tē 4 kı̂, 2000 nı̂ 11 ge̍h)