Gōng Thng

Chiú chò hāi chiū-sı̄ kó͘-chá kap hiān-kim ê lâng só͘ bêng chai. Hiān-kim ê lâng ta̍k-ê ē hiáu a-phiàn chò hāi, ē hō͘ lâng kheng-ka tōng-sán, ē hō͘ lâng ê jı̂n-keh chhu-hā. Khoàⁿ a-phiàn chò kiû-siû mı̍h kap to̍k-io̍h saⁿ-tâng. Sū-put-ti chiú ê chò-hāi kap a-phiàn put-su siōng-hā. Hiān-sı̂ lâng kiò chiú chò gōng-thng, bô m̄ sı̄ chai lâng nā chia̍h chiú, sui-jiân lêng-ta̍t, iáu-kú hō͘ chiú-sèng ap-chè ê sı̂ chiū pı̀ⁿ-chiâⁿ gû-chhún, bô liâm-thí, chho͘-sio̍k, só͘-í chiah hō chiú chò gōng-chiú. M̄-kú lâng teh kiò i chò gōng-thng, hoán-tńg siông-siông kap gōng-thng pun bē lı̄. Nā-sı̄ án-ni kiám sı̄ chiú teh gōng, gû-kiàn phah-sǹg sı̄ lâng gōng. In-ūi chiú nā-sı̄ gōng-thng, chiū chia̍h ê lâng tek-khak sı̄ gōng lâng. Taⁿ ūi-tio̍h chiú ê sū, chiàu phí-jı̂n só͘ chai kap tùi pa̍t ūi só͘ tit-tio̍h ê tāi-lio̍k kià kúi-kù tı̄ ē-té, ǹg-bāng khoàⁿ-tio̍h ê kun-chú bô khı̀ hiâm lâi saⁿ-kap chim-chiok tàu-siūⁿ, chiū tùi án-ni kiám-chhái ū thang tāi-ke sio bián-lē, iā ē êng-kng Chú, chiū chin-chiàⁿ sı̄ só͘ ǹg-bāng kap êng-hēng. Jı̂n-lūi chia̍h chiú ê Goân-in. Lâng àn-cháiⁿ ài chia̍h chiú? Chit hāng mn̄g-tê sı̍t-chāi oh ké-bêng. Chū-lâi lūn chia̍h chiú ê chheh chin-chiàⁿ chē, chóng-sı̄ tı̄ chit ê kán-kán iàu-kín ê mn̄g-tê, hoán-tńg boē bat kóng-tio̍h. Kàu tı̄ kı̄n-lâi lūn hò͘ⁿ chiú ê in-iû, iáu-kú ū bô bêng-pe̍k ê ké-bêng, sı̍t-chāi kàu-gia̍h thang kı̂-koài. Cha-khó lim chiú ê chiú phiah, sı̄ chò thong sè-kài jı̂n-lūi só͘ saⁿ-tâng ū. Sè-kan ta̍k khoán ê bı̂n-cho̍k to̍k-to̍k Pak A-bí-lı̄-ka chiu Ài-su-ki-mô͘ ê jı̂n-chéng, tùi in ê tē bô gō͘-kak, koé-chí, thang chò kek-chiú ê goân-liāu, só͘-í bē hiáu chia̍h chiú. Chit-ê í-goā chiū-sı̄ chhin-chhiūⁿ kó͘-chá chhut-goā chhı̄ cheng-siⁿ ê lâng, kàu kin-ná-jı̍t khiā-khí siâⁿ-chhı̄ ê lâng bô m̄ ta̍k lâng lia̍h chiú chò sı̀ⁿ-miā. Só͘-í chiú ê hoat-bêng kap èng-iōng, tı̀-kàu chiú tı̄ moá sè-kài, sı̍t-chāi m̄-sı̄ lâng khı̀ thoân-pò, sı̄ tùi sè-kài ta̍k pō͘-hūn, kok lâng hoat-seⁿ. Án-ni chiú kap lâng ū iân-hūn, i ê chhin kàu chhin-chhiūⁿ chit khoán, chóng-sı̄ lán hò͘ⁿ-chiú ê goân-in hoán-tńg m̄ chai. Kiám bô thang lia̍h-chò kı̂-koài mah? Chiàu Pí-tek-lia̍t-khek ēng kho-ha̍k ê hong-hoat lūn hò͘ⁿ-chiú ê goân-in, i kóng lâng tû chiú í-goā, i só͘ ı̀-ài-ê iáu ū chin chē. Chhin-chhiūⁿ sio̍k-gú kóng, "Sı̍t-sek sèng-iá," só͘-í lâng in-ūi chia̍h ê in-toaⁿ ín-khí chē-chē tio̍h-boâ ê būn-tê. Chhin-chhiūⁿ koân-kē mn̄g-tê, sı̍t-bu̍t chhut-sán kap hun-phoè ê mn̄g-tê. Iā bat in-ūi hò͘ⁿ-sek ín-khí chéng-chéng mn̄g-tê, m̄-kú chit nn̄g hāng nā beh ké-bêng i ê goân-lí sı̄ lóng bô oh-tit. To̍k-to̍k hò͘ⁿ-chiú sèng sè-le̍k ê toā, liû-hêng ê khoah, sı̍t-chāi m̄ sı̄ sió-khoá. Ài kiû i àn-cháiⁿ ài chia̍h chiú ê goân-in chiū chin-chiàⁿ oh-tit-tio̍h. Chia̍h chiú ê chéng-lūi sı̄ chiàu só͘-chāi ê sı̍p-koàn só͘ hàuⁿ. Ū lâng hàuⁿ kúi-nā khoán ê chiú, i só͘ ài ê bı̄-sò͘ phang, chhàu, sui-jiân bô saⁿ-tâng, chóng-sı̄ só͘ chia̍h ê chiú-cheng sı̄ siāng chı̍t-iūⁿ. (Chiú-cheng ê hāi khoàⁿ téng goe̍h ê Pò). Pêng-siông lâng siông-siông kóng chiú-cheng ū hùn-heng chok-iōng ê lêng-le̍k, só͘-í lâng ài chia̍h. Chóng-sı̄ chiàu hiān-sı̂ ê ha̍k-chiá só͘ khe-khó, chiú-cheng sı̍t-chāi sı̄ chò tı̀m-chēng-chè, m̄ sı̄ chò hùn-heng-chè. Chiū siat-sú ū-sı̂ thang chò hùn-heng ê lō͘-ēng iā-sı̄ kan-ta thang èng-iōng tı̄ ta̍k chéng ê chêng-hêng; kiù-kéng bē-ē chí chò hò͘ⁿ-chiú ê goân-lí. Koh ū lâng kóng chiú-cheng ē thang cheng-chı̀n lâng ê thé-la̍t kap hó-táⁿ-la̍t. Sui-jiân i ê lō͘-ēng bē-ē chò chin-kú ê lō͘-ēng; m̄-kú tı̄ tia̍p-á-kú ê tiong-kan, sı̍t-chāi ū hui-siông ê kong-hāu, kóng che thang chò hò͘ⁿ-chiú ê goân-in. Chóng-sı̄ chit khoán nā chiàu seng-lí ha̍k-ka ê gián-kiù, chiū i só͘ kóng-ê chek-sı̂ hō͘ lâng phah-phoà. In-ūi chiú-cheng m̄-nā bē-ē cheng-chı̀n lâng ê thé-la̍t kap hó-táⁿ la̍t nā-tiāⁿ, hoán-tńg kàu-gia̍h hō͘ lâng tı̀-sek ê la̍t kiám chió, chai bat ê châi-tiāu o͘-àm, kı̀-ek sim soe-jio̍k, lí sèng siau-sı̍h, i ê hāi kóng bē liáu. Kó͘-chá ū chı̍t ê toā chhut miâ ê i-seng, miâ Hái-bó-ho̍k-chu, bat kóng, "Goá pêng-seng só͘ gián-kiù ê ha̍k-su̍t, lóng ū iâⁿ-koè pa̍t lâng só͘ chai bat-ê í-goā, chóng-sı̄ goá nā kiàn lim chı̍t tih-á chiú, chiū chı̍t chéng chhang-miâ chai bat ê la̍t sûi-sı̂ bô liáu-liáu." Chhin-chhiūⁿ án-nı̄ lūn-kàu chiú--jı̄ chit hāng mı̍h sui-jiân thang chò lâng chāi-siⁿ kau-poê pêng-iú, pò-tap sı̄-toā ê lō͘-ēng, m̄-kú i ê hām-hāi, chin-chiàⁿ sǹg bē chı̄n. In-ūi tùi kó͘-chá í-lâi, tùi lim chiú ê iân-kò͘, lâi tı̀-kàu phoà ke tōng-sán, hām-lo̍h lu̍t-hoat ê lô-bāng, ka-sū lo̍h-po̍h ê hām-hāi--ê, i ê siàu-gia̍h m̄ chai ū loā-nı̍h chē lah! Án-ni chiú-cheng ê to̍k sı̍t-chāi pí to̍k-choâ, to̍k-giat koh-khah to̍k; iáu-kú lâng ài chia̍h i khah iâⁿ-koè ka-tı̄ ê sı̀ⁿ-miā. Che chin-chiàⁿ hō͘ lâng bô lō͘ thang chhai chhut goân-in lah! Ū lâng kóng chiú chit hāng mı̍h kàu-gia̍h hō͘ lim ê lâng siⁿ-khí chı̍t-sı̂ ê khoài-lo̍k, hoat-khí an-ia̍t ê moá-chiok, só͘-í lâng siông-siông chioh chit ê chiú lâi chò siau-soàⁿ iu-chhiû ê hó pêng-iú: lâng ài chia̍h chiú ê goân-in, chiū-sı̄ án-ni. Chit khoán ê oē, nā hut-jiân-kan thiaⁿ-tio̍h, ná-chún lio̍h-á oá tı̄ lí-khı̀; chóng-sı̄ nā koh siông-sè kā i siūⁿ chı̍t-ē chiū ū chı̍t chéng ê ké-soeh, m̄-nā hō͘ lâng bô moá-ı̀, hoán-tńg siⁿ-khí chē-chē khoán giâu-gı̂ oh ké-bêng ê mn̄g-tê. Chóng-sí chiàu i só͘ kóng-ê, siat-sú chia̍h chiú sı̄ sı̍t-chāi ūi-tio̍h beh chò ké iu-būn ut-chut ê lō͘-ēng, chiū lán thang kóng, chia̍h chiú ê lâng lóng sı̄ ūi-tio̍h i ū kan-khó͘ iu-būn bô lō͘ thang ké, chiah chhoē chit ê chiú lâi chia̍h, ǹg-bāng tı̄ chiú tiong chhoē khoàⁿ ū khoàⁿ-oa̍h, pêng-an ê pêng-iú. Che sǹg sı̄ lia̍h chia̍h-chiú chò kiû khoài-lo̍k ê goân-in. Chhin-chhiūⁿ chit khoán ê soeh iā sı̄ m̄ tio̍h, in-ūi tùi kó͘-chá kàu hiān-kim, lâng tiàm sè-kan khoài-lo̍k ê lō͘ ū chē-chē khoán. Chhin-chhiūⁿ Au, Bí chiu ê lâng, in ê khoài-lo̍k tùi ū le̍k-sú í-lâi só͘ boē bat ū in-ūi kàu-io̍k ê thêng-tō͘ hoat-ta̍t, lâm lú bô chhim hoān. Ang-bó͘ pı̂ⁿ koân, ke-lāi pē-kiáⁿ hiaⁿ-tı̄ ê tiong-kan bô thiaⁿ-tio̍h pháiⁿ siaⁿ-im, ta̍k jı̍t kau-chè ê giân-gú, chhin-chhiūⁿ kúi cha̍p nı̂ kú koh sio kı̀ⁿ-bı̄n ê hó pêng-iú. Peh-sı̀ⁿ ta̍k jı̍t só͘ chò ê kang, khah chē sı̄ kong-kiōng sū-gia̍p ê kang-chhiúⁿ, sı̂-kan tiāⁿ-tio̍h; thāi-gū chin hó. Peh-sı̀ⁿ ū siū kàu-io̍k; ta̍k jı̍t sè-kan ê sū, bô lūn hn̄g kı̄n ta̍k lâng thang tùi sin-bûn cha̍p-chı̀ lâi chai. Kı̀ⁿ-nā kó͘-chá ê lâng, in iáu-boē bat siūⁿ-tio̍h khoài-lo̍k ê sū, bô m̄ hō͘ in hiān-sı̂ ê lâng tit-tio̍h. In ê khoài-lo̍k kàu án-ni, cha-khó hiān-sı̂ in ū teh chia̍h chiú á-bô? Pêng-iú teh siūⁿ kóng káⁿ bô, in-ūi in ū hiah hó ê ki-hoē thang khoài-lo̍k. Chóng-sı̄ koh cha-khó sı̍t-chāi ū teh chia̍h chiú. In-ūi chiàu hiān-sı̂ Bí-kok chı̍t chéng ê chiú-cheng, ta̍k nı̂ chō chhut jı̄-cha̍p bān-bān gı̂n. Án-ni nā-sı̄ chia̍h chiú sı̄ chò khoài-lo̍k ê goân-in, in mih-sái tio̍h koh chia̍h chiú leh! Koh chı̀n chı̍t pō͘ lâi kóng. Siat-sú chia̍h chiú sı̍t-chāi sı̄ chò khiàm khoài-lo̍k ê in-toaⁿ, chiū àn-cháiⁿ lú-chú pí lâm-chú ū chia̍h chiú-ê khah chió, in-ūi lú-chú i ê kan-khó͘ khah siông pí lâm-chú khah chē. Ū lâng kóng lú-chú pí lâm-chú khah khoàⁿ-oa̍h, beh thài ū pí lâm-chú khah kan-khó͘. Sū-put-ti lú-chú ū siū lâm-chú chè-ap, bô chū-iû ê an-lo̍k; ū-sı̂ siū lâm-chú ê chè-ap khún-pek, kek-khı̀ tı̀-kàu sim-sı̂n bô chı̍t-sı̂ ê chheng-chhun, i ê ut-chut bô an-lo̍k sı̍t-chāi chē. Àn-cháiⁿ in hoán-tńg khah bô chia̍h chiú, iā lâm-chú hoán-tńg chia̍h chiú-ê khah chē? Koh lán lâng teh kóng-khí khoài-lo̍k chit nn̄g-jı̄ ê ki-chhó͘, sı̍t-chāi sı̄ chāi-tı̄ lán ê seng-khu ióng-kiāⁿ, sim-sı̂n kiông-chòng chò iàu-kín. Chiú-cheng sı̄ tē it hāi seng-khu kap lán ê sim-sı̂n ê mı̍h hoán-tńg khı̀ chia̍h hit hō, kóng sı̄ beh kiû khoài-lo̍k. Chit khoán ê lâng tú-tú sı̄ chhin-chhiūⁿ chia̍h to̍k-io̍h, beh kiû pêng-an, chin-chiàⁿ sı̄ gōng. Koh ū lâng kóng, Chiú-cheng ū mō͘-chùi-sèng; lâng nā chia̍h ē hō͘ sı̂n-keng mō͘-chùi, seng-io̍k ná chhin-chhiūⁿ tùi án-ni tit-tio̍h hoán-tōng chok-iōng; só͘-í nā lim chiú thang tû iu-būn kiám kan-khó͘. Jı̂n-lūi teh ài chia̍h chiú tāi-khài chiū-sı̄ ūi-tio̍h chit khoán. Kı̂-sı̍t chit khoán ê soeh iā sı̄ bô ha̍p tı̄ chêng-lí; tú-tú sı̄ kap lim-chiú kiû pêng-an ê sio-siāng. Kiám bô siūⁿ hó-gia̍h lâng kap hù-jū ê kok-ka pí sàn-hiong lâng kap soe-bı̂ ê kok, i ê chia̍h chiú sím-mı̍h lâng khah tāng? Hó-gia̍h lâng khoàⁿ-oa̍h khah chē, chiú chia̍h khah chē. Hù-jū ê kok, i ê peh-sı̀ⁿ khah khoàⁿ-oa̍h, i ê peh-sı̀ⁿ hoán-tńg chia̍h chiú khah chē. Nā chiàu án-ni ê khoán lâi sio-pí sı̍t-chāi sı̄ tú-tú saⁿ tùi-hoán. Téng-bı̄n só͘ kóng chiah-ê, lóng bô chı̍t hāng thang kóng sı̄ lâng ài chia̍h chiú ê goân-in. Keng-koè Pí-tek Lia̍t-khek gián-kiù liáu-āu, chiah chiām-chiām tit-tio̍h jı̂n-lūi hò͘ⁿ-chiú ê in-iû. Chiàu i ê ı̀-sù kán-lio̍k lâi kóng: Sè-kài ê chı̀n-pō͘, choan-choan sı̄ oá-khò lâng ē-hiáu hān-chè i ê sim-sı̂n, ap-chè sim-sı̂n hō͘ i ē chiàu tiāⁿ-tio̍h ê hong-bı̄n lâi kiâⁿ. In-ūi lâng khah koh-iūⁿ tı̄ khı̂m-siù, bûn-bêng ê lâng khah koh-iūⁿ tı̄ iá-bân ê lâng sı̄ àn-cháiⁿ cheng-chha? Tāi-khài sı̄ in-ūi i ê sim-lêng ê chok-iōng, ē-hiáu ap-chè jio̍k-thé ê chok-iōng ê iân-kò͘ nā-tiāⁿ. Chhin-chhiūⁿ bûn-bêng ná chı̀n-pō͘, chiū i ê cheng-sı̂n su-siúⁿ ná-chhim; m̄-kú su-siúⁿ ê cheng-sı̂n bē-ē put-sı̂ ēng; só͘-í chiū kè-bô͘ siat hioh-khùn ê hoat-tō͘. Tı̄ hioh-khùn ê tiong-kan ū hun nn̄g pō͘-hūn. Chhin-chhiūⁿ an-bı̂n sı̄ chò cheng-sı̂n oân-choân ê hiu-sek, chhéⁿ-chhéⁿ bô chò kang sı̄ kiò-chò sió pō͘-hūn ê hioh-khùn. Nā beh khah chai sió pō͘-hūn ê hioh-khùn, chiū-sı̄ pêng-siông teh kóng siau-khián sàn-pō͘. Che sı̄ àn-cháiⁿ kóng? Chiū-sı̄ lâng tı̄ siau-khián sàn-pō͘ ê sı̂, ē hō͘ ko-siōng su-siúⁿ ê chok-iōng chiām-sı̂ hioh-khùn, iā soà hō͘ khah hā-téng sim-tı̀ ê su-siúⁿ chok-iōng chiām-sı̂ chı̄n i ê tio̍h-boâ. Só͘-í lâng nā tng i ê cheng-sı̂n ià-siān ê sı̂, chiū siông-siông siūⁿ ài kap pêng-iú iû-hı̀, kiâⁿ-iû, chok-ga̍k ūn-tōng, phah-kiû chiah-ê, chiū-sı̄ tiâu-kang hō͘ cheng-sı̂n hioh-khùn ê bêng-chèng; iā-sı̄ tı̄ hioh-khùn tiong soà siu-ióng sim-sı̂n ê khí-kiàn. Lán lâng khiā-khí bûn-bêng ê sı̂-tāi; kap kó͘-chá iá-bân ê lâng saⁿ lı̄ chin hn̄g, seng-hoa̍t ê hoat-tō͘ kap kó͘-chá lâng iā toā-toā bô saⁿ-tâng. Só͘-í náu-la̍t ê ūn-iōng iā ū toā koh-iūⁿ. M̄-kú ū-sı̂ lán nā in-ūi ià-siān náu-la̍t khùn-khó͘, chiū khah-siông ài o̍h iá-bân lâng ê khoán-sit, lâi hō͘ lán ê sim-sı̂n hoaⁿ-hí. Phı̀-lūn chhin-chhiūⁿ hiān-tāi chò kàu-oân ê hoat-lu̍t-su, ha̍k-chiá, á-sı̄ kàu-sū, chit téng-hō ê lâng, múi tú-tio̍h cheng-sı̂n khùn-hoa̍t ê sı̂-chūn, chiū tiâu-kang hoaⁿ-hí khı̀ lı̂m-iá soaⁿ-kan ê só͘-chāi, phah la̍h, ū-ê khı̀ hô-hái siû chúi sé-e̍k téng-téng, lia̍h chiah-ê chò hoaⁿ-hí. Chóng-sı̄ chit khoán choan-choan sı̄ iá-bân lâng ê khoán-sit, iáu-kú hiān-tāi bûn-bêng ê lâng ēng lâi chò khoài-lo̍k. Kiám m̄-sı̄ in-ūi ko-siōng ê sim-sı̂n, khùn-hoa̍t kàu-ke̍k, chiū ēng iá-bân lâng ê tāi-chı̀ lâi chò siau-khián hiu-ióng cheng-sı̂n ê hó kè-tı̀. Chóng-sı̄ lâng tı̄ chit khoán ūn-tōng siau-khián ê hó hoat-tō͘ í-goā, iáu ū chı̍t chéng hāu-giām ê io̍h-phín, lâng nā chia̍h chiú ē hoat-chhut hāu-le̍k kap siau-khián ūn-tōng bô cheng-chha, chit khoán ê mı̍h chiū-sı̄ chiú-cheng. In-ūi chiú-cheng chit hāng mı̍h ē hō͘ lâng ê sı̂n-keng mō͘-chùi, tı̀-kàu ko-téng ê cheng-sı̂n thêng-chí i ê chok-iōng; iā hō͘ hā-téng ê cheng-sı̂n théng-chhut oa̍h-tāng. Só͘-í lâng chia̍h chiú sı̍t-chāi sı̄ lia̍h che chò siau-khián hiu-sek sı̂n-keng ê hó io̍h-hng. Sè-kài tùi iá-bân kàu bûn-bêng ê lâng lia̍h chiú chò sèⁿ-miā, toā-bı̄n sı̄ chit ê iân-kò͘ lah! Só͘-í lâng nā ū sió-khoá sū tı̂ⁿ-sin, iu-chhiû peh-pak, chiū ài chia̍h chiú. Án-ni thang chai lâng àn-cháiⁿ ài chia̍h chiú. Sím-mı̍h goân-in? Thang kóng tú-tio̍h iu-būn ê sı̂ chiú chò hó pêng-iú, pó͘ cheng-sı̂n ê sı̂, chiú chò hó io̍h; chiah-ê chiū-sı̄ chia̍h chiú ê pı̀-koat goân-in lah! Chiàu án-ni siūⁿ-khí-lâi, chiú ê lō͘-ēng chin-chiàⁿ sı̄ toā, kong-hāu ē thang kap ūn-tōng siau-khián, cháu-bé thé-chho hiah-ê chò pêⁿ. M̄-kú koh siūⁿ chia̍h chiú kap ūn-tōng siau-khián nn̄g hāng ê lı̄-ek, kàu boé kiat kó tó-lo̍h chı̍t hāng khah iú-ek? Lâng tı̄ ūn-tōng siau-khián ê hong-hoat i ê lı̄-ek chiū-sı̄ ē hō͘ thé-la̍t ná hoat-ta̍t, su-siúⁿ bô that-gāi, bô lūi-tio̍h bêng-ū kap chu-keh, hoán-tńg hō͘ lâng kiong-kèng, chit khoán ê lı̄-ek sı̄ sè-kài só͘ bêng-jı̄n. Chia̍h chiú bô lı̄-ek, hoán-tńg ē liân-lūi lâng it-seng ê phoàⁿ-toàn la̍t, piān-lūn la̍t, thiu-siōng, koan-liām, ū-sióng, kong-chèng-sim, kı̂ bōng-sim, liâm-thí, kiong-kèng kap kı̂-thaⁿ chéng-chéng ê chı̀-khı̀, it-chı̄n siau-sit. Iū-koh ē hō͘ lâng hā-téng ê sı̂n-keng oa̍h-tāng; in-ūi án-ni chiū hoat-chhut chē-chē m̄-tio̍h lām-sám ê oē, hó-chhiò, chho͘-sio̍k, bô kiàn-siàu ê sim, kap siáu-jı̂n ê só͘ chò chiah-ê khoán-sit, ta̍h-jı̍p hui-hoat ê só͘ kiâⁿ. Chiàu án-ni khoàⁿ chùi-hàn hò͘ⁿ-chiú ê lâng, siông-siông bê-sit ko-siōng ê su-siúⁿ, chiām-chiām pı̀ⁿ iá-bân, soà kiâⁿ in teh kiâⁿ ê lō͘-kèⁿ, hām-hāi kóng kàu tı̄-sı̂ chiah ē-tit liáu leh! Chiàu án-ni lâi phah-sǹg, sui-jiân nn̄g-hāng lóng sı̄ ūi-tio̍h cheng-sı̂n sı̂n-keng ê hó hoat, chóng kóng m̄ ta̍t-tit thàn ūn-tōng ê hoat-tō͘, ū-ek bô-sún, lı̄-ek hiān khoàⁿ--tio̍h, hām-hāi ún-tàng bô? Nā-sı̄ án-ni chiú kám chin-chiàⁿ thang chia̍h? Goān ài kiû lı̄-ek ê lâng, tio̍h chhoē sı̍t-chāi ū lı̄-ek ê lō͘, m̄-thang siūⁿ beh pó͘ lán sin-thé, tiâu-ióng sı̂n-keng soà khı̀ chia̍h to̍k-io̍h, kám m̄-sı̄ èng-giām gōng thng-ê só͘ kóng mah? (Tâi-oân Kàu-hoē-pò tē 389 koàn,1917 nı̂ 8 ge̍h)