Gio̍k-lí sı̄ Tang-pō͘ iàu-kín ê tē. Kı̄n-lâi in-ūi thó͘-tē ê khai-khún, kau-thong ê lı̄-piān, só͘-í ū chiām-chiām teh chín-heng, lâng-gia̍h iā ná ke-thiⁿ. Lán ê káng-gı̄-só͘ chhòng-siat tı̄-chia kàu chit-tia̍p, thâu boé oá 3 nı̂; jı̂n-sò͘ iā ū 40 goā lâng. Kū-nı̂ ê nı̂-boé ū gı̄-lūn beh kiàn-tiok sin ê pài-tn̂g. Pún ke ê sı̀n-chiá í-goā, ū tùi chêng-soaⁿ ê kàu-hoē kap Tang-pō͘ ê kàu-hoē, í-kı̍p chèng chû-siān-ka tê oá 900 goā kho͘; iā ū bé chı̍t keng chhù chò siok-sià, khai 400 kho͘; soà tùi koaⁿ-thiaⁿ chhéng khí pài-tn̂g ê tē. Tú-tio̍h Gio̍k-lí chhı̄-khu kái-chèng ê goân-in, só͘-í só͘ chhéng-ê, iân-oān kàu chit-tia̍p iáu-boē tit-tio̍h hí-khó.
Tı̄ Tāi-chèng 9 nı̂ 12 goe̍h 30 jı̍t ē-po͘ chı̍t tiám cheng hut-jiân tı̄ Gio̍k-lí ê lâm-pêng hoan-jı̂n ê chhù hoat hoé. Hit-sı̂ tú-tú khí toā lâm-hong, hoé tı̍t-tı̍t chiūⁿ pak, soà kàu Gio̍k-lí ke. Lóng-chóng sio 4 tiám cheng kú, kè-kiōng sio 178 hō͘. Sui-jiân ū siau hông-cho͘, lio̍k-kun, chòng-teng, í-kı̍p kéng-chhat-tūi lóng lâi phah hoé, m̄-kú hong kap hoé chin lia̍t, tı̀-kàu bô hoat thang kái-kiù. Kàu 5 tiám cheng hit-tia̍p hong khah sè, tāi-ke chiū thiah hoé-lō͘ lâi chiat-tn̄g i ê chı̀n-hêng chiah phah hoa.
Hoé tng tio̍h ê sı̂, ke-lō͘ ê peh-sı̀ⁿ, in ê mı̍h poaⁿ bô-lō͘ thang tô-siám, chē-chē lâng ê mı̍h-kiāⁿ í-keng chhiúⁿ chhut hoé-âu, iáu-kú koh hō͘ iām-hoé sio-khı̀. Kai-chài chhı̄-ke ê nn̄g-pêng ū khoah ê chhân-iûⁿ, só͘-ū ê mı̍h-kiāⁿ chò kúi-nā hoê ūn-poaⁿ chiah tit-tio̍h kái-kiù. Hit-sı̂ Gio̍k-lí ê chi-thiaⁿ-tiúⁿ, ūi-tio̍h chit-chân cha̍p-hun iu-būn, pún-sin thè peh-sı̀ⁿ giâ chin tāng ê mı̍h-kiāⁿ.
Hoé koè hit mı̂, khí pak-hong lo̍h-hō͘,ū lâng bô chhù thang toà; ū lâng tio̍h tı̄ chhân-iûⁿ kò͘ in ê mı̍h-kiāⁿ, só͘ chhun khah bô chı̍t-poàⁿ ê chhù, ha̍k-hāu biō-ú lóng sı̄ lâng. Chi-thiaⁿ phài kéng-koaⁿ koāⁿ pn̄g hō͘ lâng chia̍h, chhám-kéng sı̍t-chāi hō͘ lâng khoàⁿ-tio̍h phı̄ⁿ ē chhut sng-chúi. Lán ê káng-gı̄-só͘ kap siok-siā iā lóng hō͘ hoé sio-khı̀; sı̀n-chiá sio 4 hō͘. Sı̍t-chāi sı̄ put-chhek ê chai-hō.
Hit mı̂ Hoe-liân-káng thiaⁿ-tiúⁿ chiap-tio̍h tiān, sûi-sı̂ chē chhia lâi. Thiⁿ-kng liâm-piⁿ hoē-gı̄ kiù-chè kap chhı̄-ke ho̍k-hoê ê siān-hō͘. Chiū koat-gı̄ beh khí ê lâng, koaⁿ thiaⁿ te̍k-pia̍t pó͘-chō͘ chhâ-liāu 15 ki, tek 50 ki, hm̂-chháu chı̍t chheng kin; í-goā iáu ū tı̂n beh hú-khó chhut-chāi lâng khı̀ thiu.
(Tâi-lâm-kàu-hoē-pò tē 431 koàn, 1921 nı̂ 2 goe̍h)
