Sè-hàn ê sı̂ ka-têng sàn-chhiah, chia̍h han-chı̂ chia̍h kah oē khí-kiaⁿ. Chı̀ⁿ--ê, chú--ê, hang--ê, pû--ê, lí nā siūⁿ oē tio̍h ê, goá chiū chia̍h ū hūn, iau-kàu--té--á liân phoê mā soà thun. Oē kı̀-tit chia̍h siōng thiám ê, sı̄ Phı̂ⁿ-ô͘ kià--lâi pha̍k-ta ê han-chı̂-chhiam, ū-sı̂ chham tı̄ pn̄g, ū-sı̂ kûn chò thng, bô mı̍h thang phoè chheng chia̍h mā teh koè chı̍t-tǹg.
Chóng-sı̄ sàn bóng sàn, sàn liáu koàn-sı̀ tō ā bô siáⁿ-mı̍h thang oàn-thàn, siōng bô kha ta̍h-ê sı̄ ka-kı̄ ê tē, chhùi kóng-ê sı̄ pē-bú ê oē, tû liáu chia̍h khah bái í-goā, chhio̍k-thô͘-oân-á pān-kong-ke-hoé, that-tâng-kóng-á kiam am-kok-ke ê gín-á-nı̂, koè liáu tō ā khùiⁿ-oa̍h, khùiⁿ-oa̍h.
Chiām-chiām toā-hàn, chiām-chiām piàn khoán, jı̄ lú bat lú choē, sim lú lâi lú e̍h, chhù lú khí lú koân, chêng lú lâi lú choa̍t, chhù-piⁿ-kè-piah chin oh chò-hoé, seng-oa̍h soà lú lâi lú hó-koè, m̄-nā toh-téng siông-siông kiⁿ, hı̂, bah, liân goā-kok liāu-lí sam-put-gō͘-sı̂ iā ū thang chı̍t-tǹg kah, chia̍h à chia̍h, chia̍h kah chhùi-piⁿ choân chho-hiàn, kha-chhng thoa-sái-liân, chı̍t-lia̍p pak-tó͘ lú lâi lú toā-khian.
Téng chı̍t-chām, a-bú lâi Tâi-lâm, ta̍k-jı̍t thàu-chá khí lâi, to kûn chı̍t-oe han-chı̂ moâi, choân-ke chia̍h kah chhiò hai-hai. A-bú chı̍t-ē tńg--khı̀, goán soà oē siūⁿ han-chı̂. Chhàu-khám chı̍t-ê hoē-iú sàng-lâi kúi-tiâu i ka-kı̄ chèng ê han-chı̂, goá gı̄m nn̄g tiâu tı̄ chhiú--nih, ba̍k-chiu khoàⁿ han-chı̂, nâ-âu chı̍t-chūn tiⁿ, siūⁿ tio̍h chia̍h pn̄g-khaⁿ tiong-hng ê gín-á-nı̂, m̄-chai ı̂ⁿ, m̄-chai píⁿ, m̄-chai han-chı̂ chı̍t-kin loā-choē chı̂ⁿ, m̄-chai han-chı̂ goân-lâi pō͘ tio̍h chiah ū bı̄.
Ki-liân-chhiū, chhiū-liân-ki, koh khah toā-châng--ê tō tùi thô͘-kha siⁿ, goá koat-sim beh lâi chèng han-chı̂, hái-kháu gín-á, ti-thâu giâ-boē-khí, ka-chài chhiú tiong iáu-ū chı̍t-ki pit, ēng pit lâi chò-sit, kı̂-thāi kin-nı̂ hó-nı̂-tang, hō͘ goán han-chı̂ kín-kín lâi toā châng.
(Tâi-oân Kàu-hoē Kong-pò tē 2064 kı̂, 1991 nı̂, 9 goe̍h)
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
