Goá m̄-ēng sok-ka-tē-á

e̍k Ì-tāi-lı̄ tēng chı̍t ê bo̍k-phiau, kàu 1990 nı̂ ê sı̂, chiū choân-kok m̄ seng-sán iā m̄ sú-iōng sok-ka-tē-á, sı̄ sè-kài siōng tē-it-ê kong-khai piáu-sı̄ kū-choa̍t sok-ka-tē-á ê kok-ka. Sok-ka-tē-á ū sok-ka só͘-ū ê būn-tê, chè-chō ê koè-thêng giâm-tiōng ù-jiám, sú-iōng āu, chiâⁿ-chò siōng giâm-tiōng ê pùn-sò. Kiám-chió sú-iōng sok-ka-tē-á, ū chı̍t-koá hong-hoat: 1.Bé mı̍h-kiāⁿ, ka-kı̄ chah ē-té--tit ê mı̍h-kiāⁿ, sı̄m-chı̀ chhài-nâ-á. Chı̄n-liōng kiám-chió bô-pit-iàu ê sok-ka-tē-á, iā khó͘-khǹg tiàm-thâu-ke khah-chió hō͘ kò͘-kheh sok-ka-tē-á. 2.Soán-te̍k sú-iōng-choá-tē ê siong-tiàm, kiàn-gı̄ sú-iōng-sok-ka-tē-á ê siong-tiàm kái-ēng choá-tē-á. 3. M̄-thang ēng sok-ka-tē-á té chia̍h-mı̍h, iû-kı̂ sı̄ té sio-thǹg-thǹg--ê, ē cháu to̍k chhut--lâi. 4.Chı̍t ê sok-ka-tē-á, èng-kai ke ēng kúi-pái. 5. Chheng-khı̀ ê sok-ka-tē-á siu khí--lâi, ē-tàng sàng hō͘ bē bó͘ chı̍t-koá mı̍h-kiāⁿ ê seng-lí-lâng, chhin-chhiūⁿ té ē-tàng pak phoê ê chúi-kó, á-sı̄ the̍h tńg--lâi ài koh sé ê chhài-se, iā m̄-thang kū-choa̍t seng-lí-lâng hō͘ lí m̄-sı̄ choân sin, tān-sı̄ chheng-khı̀ ê sok-ka-tē-á. 6. Pó-sián-mo̍͘h iā sǹg sı̄ sok-ka-tē-á. Beh lok toà peng-siuⁿ ê chia̍h-mı̍h, chı̄n-liōng ēng ū a̍p-á-koà ê mı̍h-kiāⁿ té--lè. 7. Pó-sián-mo̍͘h iā chı̄n-liōng m̄-thang khàm sio, ū-to̍k. 8. Bē-tàng koh ēng ê sok-ka-tē-á, chún-kóng beh hiat-ka̍k, iā kā lok chò kui tē, hō͘ siu hoê chài-chè ê lâng ē-tàng kui-ê the̍h--khı̀. Chit-chūn kiò lán kiám-chió sú-iōng sok-ka-tē-á chū-jiân sı̄ chin thòng-khó͘ ê tāi-chı̀, tān-sı̄, lán khoàⁿ-kı̀ⁿ sok-ka-tē-á pùn-sò hiah-nı̄ choē, that toà pâi-chúi kháu, chō-sêng chúi-chai, kap kı̂-thaⁿ ta̍k-chióng ê chai-hāi, boē-sái-tit bô koan-sim. Tong-jiân, siōng thiat-té ê hong-hoat, iû-goân sı̄ chèng-hú èng-kai lı̍p-hoat, tēng kı̂-hān, kı̀m-chí seng-sán kap hoàn-bē sok-ka-tē-á, chı̄n-liōng ēng kı̂-thaⁿ ê mı̍h-kiāⁿ tāi-thè, iā kiám-chió bô-pit-iàu ê pau-chong. (Hong-hiòng Tē 1 kı̂, 1989 nı̂ 11 goe̍h)