e̍k
Bí-kok bat chò koè iú-koan pùn-sò būn-tê ê tiau-cha, hoat-hiān pùn-sò chiàm siōng choē ê, kèng-jiân sı̄ boē-tàng siu-hoê chài-sú-iōng ê ím-liāu iông-khı̀ (Té ím-liāu ê mı̍h-kiāⁿ), chiū chè-tēng hoat-lu̍t kui-tēng só͘-ū ê ím-liāu iông-khı̀ lóng ài siu hoê, á-sı̄ kui-tēng ài sú-iōng ē-tàng ēng liáu koh ēng ê po-lê-koàn.
Kok lāi chū chiông goā-kok ê lū-po̍h-pau (Goā-bı̄n sı̄ choá-pau, lāi-bı̄n sı̄ chı̍t-têng ê lū-po̍h) kap Pó-te̍k-koàn (Chı̍t-chióng sok-ka-koàn-á, phó͘-thong té khı̀-chúi) chiūⁿ-chhı̄ liáu āu, in-ūi chin lı̄-piān, chiū chin choē lâng ài ēng. Bó͘ chı̍t keng sı̍t-phín kong-si kong-khai kóng, in í-keng bē-chhut 10 ek ê lı̄-po̍h-pau, koh kun-kù thóng-kè, kok-lāi múi nı̂ ēng tiāu chı̍t-ek nn̄g-chheng-bān ki Pó-te̍k-koàn. M̄-nā chin lōng-hùi, koh, hiah-nı̄ choē bē-noā ê pùn-sò, beh án-choáⁿ?
Bo̍k-chiân lán pùn-sò ê chhú-lí, tāi-pō͘-hūn kan-nā ē-tàng ēng tâi--ê, chiàm só͘-chāi, koh boē-noā. Chún-kóng ēng sio--ê, sio sok-ka-lūi ê mı̍h-kiāⁿ ē sán-seng chin to̍k ê to̍k-khı̀. Lū-po̍h-pau sio boē tiāu, koh bô-hoat-tō͘ siu hoê sú-iōng, sı̄ chin lōng-hùi chu-goân.
Sı̄m-chı̀, chin choē lâng chiong lū-po̍h-pau kap Pó-te̍k-koàn o͘-pe̍h-tàn, tı̄ chúi-kau, lō͘-piⁿ, chúi-khò͘, hong-kéng-khu, chhim-soaⁿ......phò-hoāi lán ê chū-jiân khoân-kéng, koh, sı̀-koè-lâu, that toà chúi-kau, hā-chúi-tō, jı̍p-chúi-kháu téng téng, chō-sêng chúi-chai, kap chúi-goân chhú-lí siōng chin toā ê khùn-jiáu.
Bo̍k-chiân iú-koan sı̍t-phín pau-chong ê hoat-lēng, kin-pún bô khó-lū kàu chit chióng pau-chong só͘ toà lâi ê hiō-hoān, só͘-í, siūⁿ beh khò lı̍p-hoat lâi kı̀m-chí chit lūi ê sán-phín chha-put-to sı̄ bô khó-lêng. Nā-sı̄ ài seng-sán-chiá hòng-khı̀ lı̄-ek mài koh ēng hit chióng pau-chong, sı̄ koh khah bô khó-lêng. Î-it ê ǹg-bāng sı̄, siau-hùi-chiá liân-ha̍p khí lâi, tí-chè chit lūi gûi-hāi khoân-kéng phín-chit ê sán-phín, lán ê bı̄-lâi chiah ū ǹg-bāng.
(Hong-hiòng Tē 1 kı̂, 1989 nı̂ 11 goe̍h)
