Goá só͘ toà ê siâⁿ-chhı̄ Ko-hiông sı̄ Tâi-oân lâm-pō͘ siōng-toā ê to͘-chhı̄. Mā sı̄ chı̍t-ê hái-káng. I ê pak-pêng ū Siū-san kap poàⁿ-pêng-soaⁿ sio-liâm. Siū-san-kha chiū-sı̄ Se-á-oân hái-piⁿ. Siū-san-téng kàu-taⁿ iáu ū ta-chio̍h kap lê-á-khak. Tùi che oē tit thang chai, kú-kú í-chêng chia sı̄ chı̍t-phiàn ê toā-hái. Bô-tiāⁿ kui-ê Ko-hiông-chhı̄ éng-koè mā sı̄ tı̄ hái-té. Siū-san ê tē-lí, tē-chit í-kı̍p sı̍t-bu̍t kap khún-teng--ê chin chhin-chhiūⁿ. Ta̍t-tit chhı̄-bı̂n hó-hó pó-chûn kap jı̄n-bat. Nā chē tō͘-lûn iû-káng tō ē kám-kak tio̍h káng-to͘ ê khı̀-bı̄. Ko-hiông ê lāi-hái sui-bóng lâ-sâm, m̄-kú liâm-laı̂m ê hái-hong lām tio̍h kiâm-kiâm ê hı̂-á-bı̄, phı̄ⁿ-tio̍h te̍k-pia̍t phang. Nā chē-chûn kàu Kı̂-āu, káng-piⁿ tō ū lâng teh bē hái-sán. Ū chē-chē hi-kı̂ ê chióng-lūi, hán-tit tı̄ chhı̄-á khoàⁿ--tio̍h-ê. Kı̂-āu ê ke-lō͘ tn̂g-tn̂g, oan-oan, e̍h-e̍h. Chhia bô chin chē. Lō͘-piⁿ iáu ū âng-chng-á-chhù. Ín-lâng hoê-sióng kó͘-chá Ko-hiông ê bı̄n-māu.
(“Goá ū chı̍t-ê Bāng”, Tēⁿ Ngá-ı̂ chok-phín-chı̍p)
