Goá soán-ēng pe̍h-se̍k ê oē-seng-choá

E̍k Ha̍h tı̄ seng-thāi goân-chek ê seng-oa̍h, pēng m̄-sı̄ ài lí tio̍h hòng-khı̀ só͘-ū bí-lē ê mı̍h-kiāⁿ. Sı̄ kóng: tio̍h-ài ū soán-tek-sèng. Tı̄ bé saⁿ-á-khò͘, bé bí-su̍t-teng iah sı̄ lim-chia̍h ê hûi-khı̀, poe-á téng chiah-ê ē-tàng sú-iōng khah kú, koh ē-tàng ēng-liáu koh-chài ēng ê mı̍h-kiāⁿ, bû-hóng khó͘-í khah káng-kiù chı̍t-tiám-á, chù-tiōng in ê sek-chhái khoán-sek téng-téng. Oē-seng-choá oân-choân sı̄ 1-chióng bı̂n-seng pit-su-phín, jı̂-chhiáⁿ ēng 1-pái tō tàn-tiāu. Nā soán ēng ū sek-chhái ū hoe-iūⁿ--ê, oân-choân sı̄ chū-ngó͘ hi-êng-sim ê koan-hē, nô jı̄n-hô sı̍t-chit ê ı̀-gı̄, sı̄m-chí tùi khoân-kéng iū-hāi. Pe̍h-sek í-goā ê oē-seng-choá, bô-lūn ah-hoe ı̀n-hoe iah sı̄ ní-sek, lóng su-iàu ke 1-ê chhiú-sio̍k, it-tēng ài ēng chı̍t-koá lêng-goân lâi oân-sêng chit-ê chhiú-sio̍k. Koh ēng tiāu ní-liāu, phang-cheng, put-lūn in sı̄ jı̂n-kang ha̍p-sêng iah sı̄ thian-jiân--ê, lóng sı̄ bô ı̀-gı̄ ê chu-goân lōng-hùi. Pe̍h-sek ê oē-seng-choá chún-kóng piàn-sêng pùn-sò liáu-āu, in sı̄ ē-thang chū-jiân hun-kái kap hiú-noā ê pùn-sò. Jû-kó in ê téng-bı̄n ū ní-liāu iah sı̄ phang-cheng, chiah-ê hoà-ha̍k bu̍t-phín tō ē u-jiám thô͘-jióng iah sı̄ chúi-goân. Hô-hóng, ū-sek ê oē-seng-choá khah kùi. Tān-sı̄, in-ūi oē-seng-choá ê kè-siàu boē-tàng bē kah chin koân. Só͘-í tō bô khó-lêng ēng ko-kip ê thian-jiân ní-liāu iah sı̄ phang-cheng. Mài kóng chiah-ê hoà-ha̍k bu̍t-phín tùi jı̂n-thé sı̄ m̄-sı̄ ū-hāi; chı̀-chió in ê sek-chhái kap phang-bı̄ lóng sı̄ hui-siông chho͘-sio̍k, put-jû soán ēng pe̍h-sek ê oē-seng-choá, keng-chè koh an-choân, koh tùi khoân-kéng iú-e̍k. （Hong-hiòng tē 1 kı̂, 1989 nı̂ 11 goe̍h）