(Hiàn hō͘ goá ê sı̀-kū Tiuⁿ Bûn-kı̂. I sı̄ Tâi-oân To̍k-lı̍p Liân-bêng tē-it ê choan-chit jı̂n-oân, keng-koè 424 Sū-kiāⁿ. Iā hiàn hō͘ i ê sè-tāi.)
Goá tò--lâi lah, Tâi-oân,
Jı̄-gō͘-nı̂ boē-bat kı̀ⁿ--tio̍h ê kò͘-hiong,
Bāng-tiong ta̍uh-ta̍uh tò--khı̀ ê ka-hn̂g,
Tng lí chhiⁿ-chhùi ê hêng-iáⁿ lō͘-hiān tı̄ khong-tiong,
Goá ê ba̍k-chiu chek-sı̂ khí-bông.
Kú-nı̂ ê sim-būn chhin-chhiūⁿ toā-lâu-chúi,
Tùi ba̍k-kho͘ ek kàu ām-kún-piⁿ.
Goá tò--lâi lah, Tâi-oân,
Toà moá-pak lí-sióng,
Jı̄-gō͘-nı̂ chêng kap lí hun-khui,
Tú tùi Kim-mn̂g thè-ngó͘,
Lo̍h toā-hō͘ ê chhiu-thiⁿ chá-khí,
Hoe-lêng-ki poe-lı̄ kò͘-hiong ê káng-piⁿ,
Siàu-liân ê sim poe-chiūⁿ-thiⁿ,
“Thèng-hāu goá tò-tńg,”
Goá khin-siaⁿ kap lí saⁿ-sı̂,
Ǹg sin-tāi-lio̍k chhut-hoat,
Cháu-chhoē chū-iû ê khong-khı̀,
Liû-ha̍k seng-gâi iáu-boē soah,
Goá khı̀-sak ha̍k-ūi ê bián-liû,
Ka-jı̍p toē-hā cho͘-chit.
Goá tò--lâi lah, Tâi-oân,
Choan-chit kek-bēng ê seng-oa̍h,
Hō͘ chhin-lâng ê im-sı̀n tn̄g-soàⁿ,
Goá tùi ı̄-hiong ê tang-hoāⁿ phiau-lōng kàu se-hoāⁿ.
Kng toā-sam iā bat soé-oáⁿ,
Siang-chhiú âng koh phòng-phā.
Hit-sı̂ goá hoaⁿ-hí hiàn-chhut ka-kı̄:
Chheng-chhun, chiân-tô͘ kap tām-po̍h ê kim-chı̂ⁿ,
Tùi lí ê thiàⁿ, pang-chān goá lún--koè,
Iau-ki lo̍h-seh ê àm-mı̂.
Tı̍t-kàu Sù-jı̄-sù ê chhèng-siaⁿ,
Sat goá kàu sí-choa̍t ê chhim-khiⁿ.
Goá tò--lâi lah, Tâi-oân,
It-kiú-chhit-it, New York ê chho͘-chhun,
“Hō͘ goá chhin-chhiūⁿ chı̍t-ê lâng khiā--khí-lâi.“
Poe̍h-chhèng ê N̂g Bûn-hiông,
Hoah-chhut hō͘ lâng sı̍t-bı̂n ê pi-siaⁿ.
To̍k-chhâi-chiá bô sí,
Tông-chı̀ kā ki-bı̍t làu-siap.
FBI piàn-chhiau goá ê pâng-keng,
Toà-cháu só͘-ū ê bûn-kiāⁿ.
Goá ǹg pak tô-bông, bùn-koè pian-kài.
Choè-āu tō͘-koè chhim-khoah khoàⁿ-bô-té ê Tāi-se-iûⁿ.
Tı̄ giân-gú boē-thong ê soaⁿ-lāi chhut chhia-hō,
Sí-sı̂n lâi lòng-mn̂g, kúi-nā-pái,
Hūn-bê-tiong chhin-lâng iā lı̄ goá hn̄g-hn̄g.
Kan-ta ı̄-kok ê ài-chêng kiò goá cheng-sı̂n,
Toà-goá kàu chhiⁿ-hūn ê Pak-Au.
Goá tò--lâi lah, Tâi-oân,
Un2-ku tı̄ bí-lē sin ka-pang,
Bô chı̍t-khek boē kı̀-tit lí ê khó͘-thàng.
Tng gín-á tı̄ siông-chhiū-kha sio-jiok,
Goá siūⁿ-tio̍h kò͘-hiong hái-piⁿ ê bo̍k-moâ,
Am-ko̍k-ke ê chhiò-siaⁿ, thong-jı̍t bô soah.
Poe kàu Hiong-káng, poe kàu Tang-kiaⁿ,
Chha chı̍t-pō͘ chiū kàu lí ê mn̂g-tiâⁿ,
Ūi-tio̍h beh tam chı̍t-chhùi
Kap lí saⁿ-liân ê hái-chúi,
Tháu-pàng goá thong-nı̂ ê su-loân.
Kiâm-siap ê chu-bı̄ m̄-chai sı̄ iâm?
Á-sı̄ ba̍k-sái ê siàu-liām?
Goá tò--lâi lah, Tâi-oân,
Tng goá ê pı̀n-piⁿ piàn pe̍h,
Hiaⁿ-ché ê gín-á iā lâi Bí-kok tha̍k-chheh.
Chı̍t-sè-tāi ê thèng-hāu,
Hoán-hiong ê sı̂-khek,
Chiong-kui-boé lı̂m-kàu.
Goá tò--lâi lah, Tâi-oân,
Mo͘h tı̄ lāu-pē ê hûn-bōng thâu-chêng,
Ba̍k-sái tih-lo̍h bōng-pâi ê sı̍p-jı̄-kè téng.
Thâu-chı̍t-pái chhut-kok,
Chiâⁿ-choè pē-kiáⁿ éng-pia̍t.
Boē-hù tán goá tò-tńg ê chı̀-chhin,
Kut-hu í-keng hō͘ chhiⁿ-tı̂ am-ba̍t,
Te̍k-bū mı̂-jı̍t khún-pek,
Chhui-koáⁿ i toā chhau-hoân lo̍h im-hú.
Taⁿ ngiâ-chih goá--ê kan-ta léng-ki-ki ê chio̍h-thâu
Hō͘ goá tûi sim-koaⁿ ê khui-khiàm.
Goá tò--lâi lah, Tâi-oân,
Kūi tı̄ ka-hō͘ pı̄ⁿ-pâng,
A-bú ê bı̂n-chhn̂g-piⁿ,
Khin-siaⁿ kóng “A-kı̂ lâi khoàⁿ--lí lah.”
Chóng-sı̄ a-bú boē koh ı̀n goá,
Boē koh thí-khui ba̍k-chiu,
Khoàⁿ i jı̍t-jı̍t su-liām ê soah-boé-kiáⁿ.
Tı̄ i chhoán-khùi tāng-tāng ê khùn-bı̂n,
Boē koh ū kau-chiàn ê kiaⁿ-hiâⁿ.
Thài-pêng-iûⁿ Chiàn-cheng choè-āu chı̍t-nı̂,
Goá iáu-boē tn̄g-ni,
A-bú chhoā gín-á so͘-khai kàu An-pêng chó͘-chhù,
Bih tı̄ hông-khong-hô ê àm-mı̂,
I kā goá lám ân-ân tı̄ heng-chêng.
Chia̍h-pn̄g ê sı̂, i kā oáⁿ-lāi ê bah géng-chhùi chhı̄ goá,
Kā han-chû-kho͘ lâu hō͘ ka-kı̄.
Goá ê ba̍k-sái chı̀m-tâm a-bú ê phoē-toaⁿ.
Chin-chiàⁿ ǹg-bāng i oē hō͘ goá chhá-chhíⁿ,
Oē chhun-chhut ko͘-tâ ê chhiú, so goá ê bı̄n,
Á-sı̄ chek-hoa̍t goá ê put-hàu.
Goá tò--lâi lah, Tâi-oân,
Chhia-hoa kheh-chia̍h lí ê seng-khu kap lêng-hûn.
Gín-á-sı̂ ê tâng-phoāⁿ teh sái biàn-jù,
Boē jı̄n-tit goá,
Chhin-chiâⁿ bô-êng thàn-chia̍h,
Boē kò͘-tit goá.
Tı̄ chhut-sı̀ toā-hàn ê thó͘-toē,
Goá sit-lo̍h khoeh thâu-khak ê chhù-the̍h.
Àm-mı̂ nāu-jia̍t ê koe-thâu,
Siáⁿ-lâng thiaⁿ-tio̍h chheh-sim ê thı̂-khàu?
Chı̍t-siaⁿ chı̍t-siaⁿ, chha̍k-jı̍p goá ê sim-koaⁿ.
Goá tò--lâi lah, Tâi-oân,
Sui-bóng choē-choē lâng tio̍h-kip lı̄-khui,
Sui-jiân bat ta̍h-thu̍t, poa̍h-tó sit-chı̀,
Goá iû-goân kı̀-tit, chho͘-hun-khui ê sè-giân:
“Thèng-hāu goá tò-tńg.”
Thèng-hāu goá i-tı̄
Lí tūi-lo̍h ê khang-chhùi.
Sui-bóng hoán-hiong ê lō͘,
Tùi siàu-liân kiâⁿ kàu thâu-mn̂g-pe̍h,
Kiàn-kok ê kha-pō͘.
Tio̍h poâⁿ-koè koân-soaⁿ, liâu-koè chhim-khe,
Goá iû-goân hoaⁿ-hí tò--lâi,.
Hoaⁿ-hí kap lí tı̄-teh,
Chı̄n goá chı̍t-sı̀-lâng ê bêng-sè.
