Goán bô-ài koh háu

 Goán bô-ài koh háu! 
  Sui-jiân “Jı̄-jı̄-pat” hō͘ a-pa ê hoeh-chúi moá-ke sı̀-koè lâu. 
  Goán bô-ài koh háu! 
  Sui-jiân “Jı̄-jı̄-pat” hō͘ a-bú ê ba̍k-sái siàu-liân kō kàu lāu. 
 Sı̀-cha̍p-kúi nı̂ lâi, 
  bô-ū ang-sài ê jı̍t-chí; o͘-hûn ta̍k-jı̍t koà thiⁿ-piⁿ. 
  Sı̀-cha̍p-kúi nı̂ lâi, 
  Bô-ū a-pa ê àm-mı̂; ia̍h-chiáu ta̍k-àm ūi goán thı̂. 
 M̄-sı̄ goán boē-hiáu chhùi-khí poê chhùi-khí. 
  Sı̄ goán chai-iáⁿ oan-oan-siong-pò bô-liáu-sı̂. 
  M̄-sı̄ goán m̄-ài chiong i pàng-boē-kı̀, 
  Sı̄ in-ūi goán kàu taⁿ iáu-boē khoàⁿ-tio̍h sı̀-chiàⁿ ê kong-gı̄. 
 Hêng goán chin-sı̍t ê le̍k-sú, 
  Hō͘ goán poat-khui kú-kú tah-tı̄ sim-thâu ê àm-bū. 
  Hêng goán jı̂n-sèng ê chun-giâm, 
  Hō͘ goán sim-kam-chêng-goān hiat-lo̍h chhiū tiong ê to-kiàm. 
 Goán bô-ài koh háu! 
  Nā-ē-tàng; goán beh chiong a-pa ê hoeh-chúi hoà-chò pûi-liāu, iā tı̄ kò͘-hiong ê chhân-thâu. 
  Goán bô-ài koh háu! 
  Nā-ē-tàng; goán beh chiong a-bú ê ba̍k-sái ēng hō͘ lâi kiáu, tò jı̍p Kò͘-hiong ê khe-kau.
 Goán bô-ài koh háu! goán bô-ài koh háu! 
  Tı̍t-kàu chit-tè thó͘-tē khui-phiàn bı̂n-chú, chū-iû, hô-pêng ê hoe-chháu. 
  Tı̍t-kàu goán ê kiáⁿ-sun m̄-bián koh liû-lōng, tı̄-chia khí-chō in éng-oán ê tau.
 (Tâi-oân Kàu-hoē Kong-pò tē 2033 kı̂, 1991 nı̂, 2 goe̍h) 
 (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)