(Hō͘ goá Chho͘-tiong ê Tō-su, Chiu Lêng-Lêng)
Chı̍t-ê cha̍p-peh-nı̂ m̄-bat kı̀ⁿ-bı̄n ê tông-ha̍k,
Kā goá kóng, lí
Í-keng sí.
Tı̄ New Jersey
Tó tı̄ àm-àm ê thô͘-kha-toé,
Éng-kiú thiaⁿ boē-tio̍h,
Chhun-thiⁿ peng-seh pit-khui ê siaⁿ,
Iáu-boē gō͘-cha̍p-nı̂ ê sı̀ⁿ-miā,
Hō͘ gâm ê sè-pau thun-chia̍h.
Chá-chêng goá choè ê bāng,
Kèng-jiân chiâⁿ-choè sū-sı̍t.
Choè-āu kı̀ⁿ-tio̍h lí,
Í-keng tı̄ cha̍p-it-nı̂ chêng,
Tı̄ Ko-hiông-chhı̄ kau-goā ê liān-chhia-tiûⁿ,
Chhut-jı̍t koh thàu-hong ê koâⁿ-thiⁿ,
Sı̀-nı̂ bô kı̀ⁿ-tio̍h lí,
Hoaⁿ-hí iā ū tām-po̍h ùi-ùi,
Koh àm-àm hoâi-gı̂,
Lí ná oē kā o͘-sı̀m-sı̀m ê tn̂g thâu-chang lu té-té?
Āu-lâi chiah chai
Lí í-keng ēng hoà-ha̍k tı̄-liâu,
Kap gâm kau-chiàn kúi-nā-pái.
Chho͘-jı̄ lí choè goá ê tō-su.
Hit-sı̂ lí āu-khok pa̍k chı̍t-ki lı̂-boé-á,
Iáu-boē saⁿ-cha̍p-hoè.
Lia̍h-chún thang choè lí ê sió-bē,
Siáⁿ chai seng-ha̍k-pan ê lāu-su chhiah-pê-pê.
kàu taⁿ iáu oē kı̀-tit,
Tē-it-chiat khò lí chiū soan-pò͘ “saⁿ-tiâu-kài“:
Bo̍k-tit khó-chhı̀ thau-khoàⁿ.
Bo̍k-tit hō͘ thâu-mn̂g sàm-iāⁿ-iāⁿ.
Bo̍k-tit kau cha-po͘-phoāⁿ.
Kò-pia̍t tâm-oē ê sı̂,
Goá kò͘-ı̀ kek lí siū-khı̀,
Ēng chheng-chhun-kı̂ ê poē-ge̍k,
Hō͘ lí ê ba̍k-bâi gia̍h-koân koh kiat kui-oân.
Tı̍t kàu chhut-gia̍p-chêng chiah kap lí “hô-hó“,
Hit-sı̂ goá phah-sǹg khı̀ Tâi-pak tha̍k ko-tiong,
Siūⁿ beh thoat-lı̄ pē-bú ê “koán-hat“.
Lí poàⁿ kiông-pek poàⁿ khó͘-khǹg,
Kiò goá lâu tı̄ Ko-hiông.
Ko-tiong ta̍k ha̍k-kı̂ soah,
Chiū khı̀ khoàⁿ lí.
Kiâⁿ poàⁿ-tiám-cheng ê âng-chng-á lō͘,
Keng-koè chhàu-ko͘ⁿ-ko͘ⁿ ê ūn-hô,
Jı̍t-kng siám-sih tı̄ o͘-lô ê chúi-bı̄n.
Kàu-tı̄ lí ê soè-soè ê kheh-thiaⁿ,
Kui ē-po͘, lí thiaⁿ goá hun-sò͘,
Chheng-chhun-kı̂ choè-āu ê poē-poān,
Sı̄m-chı̀ chū-sat ê ı̀-goān,
Khó-tio̍h tāi-ha̍k ê sı̂, lí sàng hō͘ goá chı̍t-pún si-chı̍p,
Tagore siá--ê, âng-âng ê chheh-phoê,
Kàu-taⁿ iáu pâi tı̄ chheh-tû--nih,
Hō͘ goá tha̍k-koè choē-choē-pái,
Lāi-ia̍h hoán-n̂g, jı̄ iáu goân-chāi,
Chóng-sı̄ lí í-keng bô tı̄ chit-ê sè-kài.
Lí tı̄ ı̄-kok ê thô͘-toé, kiám bat thiaⁿ--koè,
Lán chho͘-chho͘ kò-pia̍t tâm-oē ê kàu-sek,
Í-keng hō͘ lâng thiah-húi, têng-khí kàu-ha̍k toā-lâu.
Un7-hô iû-goân chhàu koh lô,
M̄-kú khoe-piⁿ ê chhiū-ńg,
Ná hoat ná ba̍t, ná chhun ná khui-khoah.
Keng-koè bû-sò͘ ê hong-éng,
Goá it-tı̍t pó-sioh,
Sim-koaⁿ-toé ū chı̍t-tè chhiū-nâ,
Bat lâu-koè chı̍t-tiâu soè-soè, chheng-khı̀ ê hô,
Ū lí kap goá saⁿ-kiâⁿ ê chúi-iáⁿ,
Jı̄-cha̍p-nı̂ āu, iáu phû tı̄ goá ê kı̀-tı̂.
Tı̄ bô ba̍k-sái ê àm-mı̂ ,
Chí-ū ēng hoê-sióng siàu-liām lí.
Goān lí an-hioh,
Goá ê lāu-su, goá ê pêng-iú,
Goān lí an-bı̂n tı̄ thiⁿ-téng,
Boē koh ū pı̄ⁿ-thiàⁿ ê lo̍k-hn̂g--nih.
