3
Phàu-á tı̄ tiâⁿ-lāi piak--khui, pò͘-phâng chiong chhiah-iām ê jı̍t-thâu cha̍h--khí-lâi, lâng-kheh chı̍t-toh chı̍t-toh chē kah moá-moá, hái-lâng chin lo̍k-thiòng, toā-siaⁿ tih kóng-oē, mài-khù chiàⁿ tih hòng-sàng lāu-jia̍t ê lâm-koán, âng-lı̂ kah hiuⁿ-kho͘ koà tı̄ thiaⁿ-mn̂g-kháu.
Goá hō͘ an-pâi chē tı̄ in chhin-tông hit toh, tı̄ in hô-māi ê chhiò-siaⁿ lāi-toé, goá khoàⁿ-tio̍h sè-kan ê súi kah chin-sêng.
“Ah.” Chı̍t-ê chhoā-thâu ê lāu chhin-tông chin khiam-hi: “Chiâ sı̄ kán-tan ê só͘-chāi, sian-siⁿ m̄-thang kheh-khı̀--o͘.”
Goá tı̀m-thâu, tap-siā in chhin-chhiat ê hó-ı̀. Tiong-tàu sı̂-á jı̍t-thâu tng iām, sui-jiân hái-siōng hn̄g-hn̄g ê só͘-chāi tà-tio̍h bū-bū ê chúi-khı̀, m̄-koh káng-kháu kah chhun-lo̍h ê kéng-tı̀ iû-goân khoàⁿ kah chin hun-bêng.
Iàn-hoē khai-sí--a, in chiàu lûn lâi hoah-kûn, kóng-khí tio̍h chin choē tāi-chı̀.
“Gún chek-peh-sun-á chit chân hun-sū sı̍t-chāi chin bô kán-tan.” Chı̍t-ê thâu-mn̂g choân pe̍h, tāi-khài sı̄ a-kong hit tē ê lāu-hè-á kóng: “Che mah siàu-liân-lâng khı̀ pak-toē, chı̍t khı̀ tō sı̄ cha̍p-goā-tang, bô lâng tńg-lâi kè-chhoā--a. Chiau-bí chit piàn tńg--lâi, ūi lán hái-phı̄ⁿ ê lâng lı̍p chı̍t-ê bô͘-hoān, piáu-sı̄ iah-koh liām-tio̍h lán kò͘-hiong.”
Kóng ah kóng, lâi chham-ka ê lāu-hè-á lóng chhiò--a.
“Thiaⁿ kóng cha-po͘--ê sı̄ koān-gı̄-oân ê hāu-siⁿ.” Chı̍t-ê kah sin-niû tı̄ pak-toē thó seng-oa̍h ê lú-phoāⁿ kóng: “Chiau-bí ū tāi-chı̀ lóng kā lâng siong-moâ, i sı̄ gún lāi-toé siōng súi--ê, èng-kai kè hō͘ chı̍t-ê iân-tâu koh ū châi-chêng ê sin-lông chiah tio̍h, nā bô, ia̍h bô koài gún chit koá lú-phoāⁿ ē siū-khı̀.”
“Mh.” Tiong-liân ê chhun-tiúⁿ tı̀m-thâu, kóng: “Chiàu-bí chū sè tō chin tit lâng thiàⁿ.”
Thiaⁿ ah thiaⁿ, in-ūi chiú-cheng ê chhı̀-khek, sı̂n-keng hui-siông ê oa̍h-tōng. In ê o-ló, hō͘ goá chiok siūⁿ beh kín lâi khoàⁿ-tio̍h chit ê chhun-lāi siōng súi ê sin-niû. Goá siūⁿ, múi chı̍t-ê lâng it-seng tiong lóng ē ū siōng súi, siōng kiau-ngō͘ ê hit ba̍k-nih-á, khiā tiàm hun-lé siōng hit ba̍k-nih-á. Chong-giâm ê cheng-kó͘-siaⁿ tı̄ goá sim-lāi hiáng-khí.
Tu̍t-jiân-kan, phàu-á-siaⁿ koh khah toā--a, chı̍t-pâi kiau-chhia thêng tı̄ mn̂g-kháu, chhia-thang iōng bí-lē ê hoe-sek lâi chng-pān. Sin-niû kah sin-lông ùi thiaⁿ-mn̂g-kháu kiâⁿ--chhut-lâi, sin-lông chhēng chı̍t-su chhim-nâ-sek ê se-chong, sin-niû chhēng pe̍h-sek lé-ho̍k, chiòng chhin-tông tè tı̄ āu-piah. Sin-niû chiàⁿ chún-pı̄ beh lı̄-khui chit ê siⁿ-ióng jı̄-cha̍p-kúi-tang ê niû-ke, i khiā toà thiaⁿ-mn̂g-kháu, tiû-tû, liû-liân.
Kó-jiân sı̄ chı̍t-ê súi-tang-tang ê sin-niû, i khiā tiàm hiâ, ba̍k-kho͘ chhim, chhùi-tûn kāu, chı̍t-ē chhiò tō lō͘ chhut chin-chêng, bı̄n-iông chheng-siù, àn lé-ho̍k, iah ē-tàng khoàⁿ chhut i tàu-tah ê thé-thài, chhiūⁿ chı̍t-châng bō͘-sēng ê hoe-chhiū, tài-tio̍h bí-lē ê soaⁿ-chhoan hong-chu, i khiā tiàm hiâ.
ta̍k-ke sio-chiⁿ phah pho̍k-á o-ló.
Tu̍t-jiân-kan, chı̍t-ê chhin-tông kóng: “Lí khoàⁿ, sin-niû koà nn̄g-koāⁿ phoā-liān!”
In-ūi hit ê chhin-tông ê oē, ta̍k-ke chiong sı̄-soàⁿ soá tùi sin-niû bí-lē bı̄n-iông ē-kha soat-pe̍h ê ām-kún, tı̄ ām-kún-á téng-koân, gún khoàⁿ-tio̍h sin-niû koà chı̍t-koāⁿ bí-lē ê pe̍h-chu phoā-liān, m̄-koh pe̍h-chu phoā-liān lāi-toé koh khah oá ām-kún ê só͘-chāi, iah ū chı̍t-koāⁿ kim-n̂g-sek ê phoā-liān, tı̄ jı̍t-chiò kah kim-phoā-liān ê poê-chhı̀n, pe̍h-chu-á piàn-tit koh khah soat-pe̍h, kim-phoā-liān ia̍h piàn-tio̍h koh khah kim-n̂g. Chit ê bı̂-soè ê hoat-hiān, tō chhin-chhiūⁿ hut-jiân-kan chhin-ba̍k-chiu khoàⁿ-tio̍h sè-kan bí-lē ê pı̀-bı̍t, hō͘ lâng chàn-thàn.
“Ô͘!” Hut-jiân-kan sin-niû ê lú-phoāⁿ kóng: “He m̄-sı̄ kim-phoā-liān.”
Ta̍k-ê lâng thiaⁿ--tio̍h, chùn chı̍t-ē.
“Hèⁿ ah, he m̄-sı̄ phoā-liān.” Tiong-liân ê chhun-tiúⁿ ia̍h tı̀m-thâu: “Lín chim-chiok kā khoàⁿ, he m̄-sı̄ kim-phoā-liān, chit ê pı̀-bı̍t í-keng chin kú--a.”
Ta̍k-ke koh chùn chı̍t-ē, m̄-koh chim-chiok kā khoàⁿ hit koāⁿ kim-phoā-liān, iah sı̄ khoàⁿ boē chhut chı̍t-sut-á phoà-chām, hit khoán thiap-chhiat, iù-khá ê bô͘-iūⁿ, nā chún m̄-sı̄ phoā-liān, tō m̄ chai-iáⁿ ū siáⁿ-mé thang hó tāi-thè--a.
“Sı̄ chı̍t-tō pa-hûn.” Tu̍t-jiân-kan a-kong hit tē hit ê chhin-tông mā kóng-oē--a: “Chiàⁿ chhin-chhiūⁿ chhoan-tiúⁿ sian-siⁿ kóng--ê, chit kiāⁿ tāi-chı̀ í-keng chin kú--a, goá chiông-lâi m̄-pat koh chài thê-khí--kè.”
Chit ê lāu chhin-tông kóng liáu, ta̍k-ke koh chùn chı̍t-ē, hoat chhut “ah” chı̍t-siaⁿ, liáu-āu tō lóng tiām--khı̀.
Kè ba̍k-nih-á, hit ê pe̍h-thâu-mn̂g ê lāu-hè-á koh gia̍h-thâu, in-ūi chiú, i kui-lia̍p bı̄n âng-kòng-kòng, tāi-khài sı̄ siūⁿ-tio̍h siáⁿ-mé, hoan-thâu kā tú-chiah kóng-oē ê sió-chiá kah chhoan-tiúⁿ kóng: “Ū-iáⁿ, chit ê pı̀-bı̍t í-keng chiâⁿ kú--a, sı̄ kóng lín nn̄g-ê nah ē chai-iáⁿ--leh? Goá soah siūⁿ beh thiaⁿ khoàⁿ-māi-á, lín sı̄ án-choáⁿ chai-iáⁿ hit koāⁿ kim-phoā-liān ê tāi-chı̀.”
Chit sı̂-chūn ta̍k-ke lóng tiām--a. Chit chân siūⁿ boē kàu ê tāi-chı̀, chı̍t-ē-á hō͘ lâng tńg boē kè--lâi, soah hiông-hiông kám-kak thâu-khak ē gông. Káng-kháu iû-goân tı̄ chhiah-iām ê jı̍t-thâu hā.
Kóng-oē hit ê sin-niû ê lú-phoāⁿ tām-po̍h-á tih tiû-tû, m̄-koh ta̍k-ke lóng tiām-tiām, gán-sı̂n lāi-toé chhiong-boán tio̍h hò͘ⁿ-kı̂. I káⁿ-ná thè sin-niû kám-kak úi-khut, lō͘-bé chiah ûn-ûn-á lâi kóng-khí:
“Sı̄--lah, goá sı̄ saⁿ-tang chêng koâⁿ--lâng sı̂-chūn ham i se̍k-sāi, hit chūn gún tè lâng khı̀ kàu pak-toē ê tiān-chú kang-chhiúⁿ choè-kang. Gún toà tı̄ sok-siā lāi, chı̍t-kò͘-ge̍h soè-kim gō͘-pah-kho͘, sin-niû tō toà gún keh-piah. In-ūi siōng-hā-pan ê koan-hē, bé iā gún nn̄g-ê piàn choè siōng hó ê pêng-iú. Sin-niû ê súi sı̄ thong lâng chai, gún lóng chai-iáⁿ i sı̄ àn lâm-pō͘ hái-piⁿ lâi ê cha-bó͘ gín-á, só͘-í chiah ū chiah-nı̄ siù-lē ê bı̄n-iông kah tàu-tah ê sin-toān. Hit sı̂-chūn, gún kang-chhiúⁿ ū chı̍t-ê ki-su, chiah jı̄-cha̍p-kúi-hoè, sı̄ chı̍t-keng chhut-miâ ê tāi-ha̍k pit-giap--ê, iân-tâu, m̄-koh kan-khiáu á kan-khiáu.
“In siong-ài--a. Tō án-ni, ta̍k-ke lóng ē ê, ia̍h bô lâng kám-kak kı̂-koài, him-siān sı̄ it-tēng--ê. Gún tiāⁿ-tiāⁿ beh kah i kóng-sńg-chhiò, khó-pí kóng thè Chiau-bí siūⁿ chı̍t-koá phiat-pō͘ lâi kā hit ê ngō͘-bān ê ki-su tiau-lân chı̍t-ē, m̄-koh, Chiau-bí sı̄ hiah-nı̄-á hiân-hūi, siān-liông, i chiông-lâi m̄-pat hō͘ chit ê ki-su kám-kak ûi-lân.
“Ū chı̍t-kang, gún kā kóng: Chiau-bí ah, lí chit khoán loān-ài hong-sek ē chia̍h-khui--o͘, i sı̄ tāi-ha̍k-seng, koh sı̄ ûi-it chı̍t-ê hong-liû ê ki-su, m̄-koh cha-bó͘ gín-á soah ū chheng pah ê. Chiau-bí thiaⁿ liáu-āu chhiò-chhiò, kóng: m̄-thang khoàⁿ goá bô-khí--o͘, goá m̄-sı̄ chı̍t-ê hiah-nı̄ gâu hoán-hoé kah loán-jio̍k ê cha-bó͘ gín-á!
“Keng-kè chı̍t-toāⁿ jı̍t-chí liáu-āu, kang-chhiúⁿ ê lâng siūⁿ kóng in beh kiat-hun--a, i ê hēng-hok piàn choè chèng-lâng him-siān ê tùi-siōng. M̄-koh bô goā kú, gún thiaⁿ kóng, hit ê ki-su koh kah lēng-goā chı̍t-ê lú chit-oân siong-hó--a.
“Chiau-bí iû-goân chhiò-chhiò, kóng: ah! Goá m̄-sı̄ chı̍t-ê chiah-nı̄ loán-jio̍k ê cha-bó͘ gín-á!
“M̄-koh, tı̄ chı̍t-ê bô ka-pan ê lé-pài-jı̍t, goá chiong i kuiⁿ-tiâu-tiâu ê mn̂g phah--khui, hoat-hiān Chiau-bí tó tı̄ bı̂n-chhn̂g téng, ām-kún-á lóng sı̄ huih, chı̍t-ki to-á hē tiàm bı̂n-chhn̂g piⁿ.
“Goá chai-iáⁿ i kiâⁿ té-lō͘, koáⁿ-kín sàng i khı̀ pı̄ⁿ-ı̄ⁿ.
“Bé--á i hoe-ho̍k chá-chêng ê lo̍k-koan oa̍h-phoat, khoàⁿ boē chhut pat siū-kè siáⁿ-mé chhòng-siong.
“M̄-koh gún khai-sí khoàⁿ-tio̍h i tiāⁿ-tiāⁿ koà-tio̍h phoā-liān ê ām-kún-á, téng-koân hit tō pa-hûn.”
Chit ê sin-niû ê lú-phoāⁿ kóng liáu--a, ba̍k-chiu kim-kim tih khoàⁿ lāu-jia̍t ê hun-lé, chin pi-siong ê khoán, bô koh chài chia̍h siáⁿ-mé mı̍h-kiāⁿ. Ta̍k-ke mā káⁿ-ná siū-tio̍h i ê kám-jiám, tiām-tiām-á sio-tùi-siòng, oáⁿ-tı̄ khia̍k, khia̍k, khia̍k ê siaⁿ-im mā piàn khah soè-siaⁿ--a.
“Ô͘, kám sı̄ án-ni?” Chhoan-tiúⁿ thiaⁿ liáu-āu chhiò-chhiò, mā bô pa̍t-lâng ê ai-chhiû, kóng: “Goá chai-iáⁿ--ê m̄-sı̄ án-ni.”
“Ô͘?” Ta̍k-ke koh chùn chı̍t-ē.
“Lín kám siūⁿ beh thiaⁿ goá kóng goá só͘ chai-iáⁿ, iú-koan sin-niû ām-kún-á hûn ê kò͘-sū?”
Tiong-liân ê chhoan-tiúⁿ chiong tı̄ khǹg--lo̍h-lâi, tiám chı̍t-ki hun, jiân-āu ûn-ûn-á lâi kóng-khí:
“He sı̄ cha̍p-tang chêng ê tāi-chı̀--a, hit sı̂-chūn lán Lōng-pe̍h hái-phı̄ⁿ iah bô chhin-chhiūⁿ chit-má chiah-nı̄ hoat-tián, sàn-chhiah gín-á pit-su ài khı̀ hái-piⁿ-á ê soan-ô͘-chio̍h hiâ khioh lê-á-khak, boē chı̍t-koá chı̂ⁿ tàu thiap chhù-lāi. Chhun-lāi ê lâng ūi-tio̍h beh chó͘-chí in kiâⁿ jı̍p chhim-hái, tō tı̄ gûi-hiám ê ta-chio̍h tiong-ng, iōng chha̍k--lâng ê thih-soàⁿ ûi--khí-lâi.
“Hit tang-chūn, chhiūⁿ gún chit tē ê lâng khióng-kiaⁿ leh bô lâng ē-tàng boē kı̀-tit hit pái tó-siōng siōng béng ê hong-chai. Hong ùi lâm-pêng ê hái-kiap teng-lio̍k, chin kín tō kàu lán chit ê hái-phı̄ⁿ. Hái-phı̄ⁿ ê lâng pēng bô siūⁿ-tio̍h hong ē lâi chiah kín, chı̍t-koá tek-pâi, hı̂-chûn lóng iah tı̄ goā-hái. Hun-thiⁿ àm-toē chi-tiong chhun-lāi-lâng koáⁿ beh chiong chûn thoa jı̍p káng, toā hong-éng chin kín tō lâi kàu káng goā, hong-ú chi-tiong, chı̍t-koá tek-pâi, chûn-chiah hō͘ bô-chêng ê hong-éng tài-cháu.
“Hong-chai kè liáu, ta̍k-ke chiah hiông-hiông siūⁿ-khí hit chūn tı̄ soan-ô͘-chio̍h tiong khioh lê-á-khak ê gín-á. In chhit-kha peh-chhiú koáⁿ--koè-lâi, m̄-koh gín-á chá tō hō͘ hái-éng kńg-cháu--a, ta-chio̍h tiong kan-na chhē-tio̍h chı̍t-ê, i ê thâu-khak tú-á-hó giap tı̄ ta-chio̍h tiong-ng, kui-ê lâng phak tı̄ tı̂ⁿ-poàⁿ ê thih-soàⁿ téng-koân, tı̄ o͘-sek ê hái-éng tiong poàⁿ-phû poàⁿ-tı̂m. In chiong chit ê gín-á tháu--khui, tō khoàⁿ-tio̍h chha̍k--lâng ê thih-soàⁿ-bāng tı̄ i seng-khu téng oē liáu chiok choē sûn--ê, ām-kún-á mā ū chı̍t-tiâu chhim-chhim, tn̂g-tn̂g ê siong-hûn, keng-kè hái-chúi ê chı̀m-phàu, bah hoán pe̍h--a, ûn-ûn-á tih lâu-huih.
“Koh koè liáu kúi-kang, hong-éng thêng--a, jı̍t-thâu koh chài chhut-hiān tı̄ chit tè bí-lē ê hái-phı̄ⁿ, i tài-tio̍h sió-khoá chhang-pe̍h, chiah tú hoe-ho̍k ê bı̄n-iông, kè-sio̍k tı̄ ta-chio̍h tiong-ng chin kut-la̍t tih khioh lê-á-khak.
“Goá siūⁿ, chit tō pa-hûn tō sı̄ hit pái hái-lān só͘ lâu--lo̍h-lâi chhám-thòng ê ı̀n-kı̀.”
Tiong-liân chhoan-tiúⁿ kóng soah, chiong tài ū sng-khó͘-bı̄ ê siāu-heng lim lo̍h pak, chāi-chō ê lâng lóng tı̀m-thâu lâi be̍k-jı̄n, chhin-chhiūⁿ siūⁿ-khí chı̍t-piàn koh chı̍t-piàn ê hái-lān.
“Che chin chhù-bı̄.” Thiaⁿ liáu chhoan-tiúⁿ kóng ê kò͘-sū liáu-āu, a-kong hit tē hit ê chhin-tông iōng hoâi-gı̂ ê gán-kong khoàⁿ ta̍k-ke, kóng: “Goá só͘ chai--ê, kah lí ê koh bô-kâng.”
“Ô͘!” Ta̍k-ke thiaⁿ-tio̍h, ba̍k-chiu piàn chiok toā-lúi--ê.
“Tong-jiân.” Lāu-hè-á kóng: “Lí só͘ chai-iáⁿ ê pı̀-bı̍t lóng sı̄ chin choē lâng ū khoàⁿ--tio̍h, jı̂-chhiáⁿ ē-tàng chhē-tio̍h chèng-jı̂n--ê, m̄-koh goá só͘ kóng ê pı̀-bı̍t, tû-liáu goá í-goā, tō bô lâng thang lâi chò-chèng--a.”
Lō͘-bé, chit ê lāu-hè-á iōng sau-siaⁿ á sau-siaⁿ ê kó͘-chá khiuⁿ-kháu, kóng-khí i só͘ chai-iáⁿ ê kò͘-sū.
“Lín chai-iáⁿ, sin-niû Chiau-bí in tau, it-hiòng lóng sı̄ lâng-teng heng-ōng, tı̄ gún hit iân, hiaⁿ-tı̄ chí-bē lóng-chóng káu-ê, goá ū la̍k-ê hāu-siⁿ; sin-niû in chit pâng, hiaⁿ-tı̄ chí-bē ū peh-ê, lâng-teng heng-ōng. Pún-chiâⁿ che sı̄ hó tāi-chı̀, m̄-koh ah, sin-niû ām-kún-á siong-hûn ê pı̀-bı̍t tō pit-su ài ùi chit tiám lâi kóng-khí.
“Jı̄-cha̍p-gō͘-tang chêng hit ê sè-tāi, khó-lêng chāi-chō ta̍k-ke, bô kúi-ê pat keng-kè hit khoán ê sin-sng, he choân-jiân sı̄ chı̍t-ê te̍k-pia̍t ê sı̂-tāi, lán ka-cho̍k kúi-ê chōng-teng chiàn sí tı̄ hái-goā, lâu--lo̍h-lâi ê lâng, tō tı̄ chit ê hái-phı̄ⁿ chhoā-bó͘ siⁿ-kiáⁿ. Ī-kok thóng-tı̄-chiá lı̄-khui--a, chiong chit tè sàn-chhiah ê só͘-chāi lâu--lo̍h-lâi, hái-phı̄ⁿ ê jı̂n-kháu ia̍h chin chió, m̄-koh, lâng ê sàn-chhiah, ū-sı̂-á m̄-sı̄ iōng jı̂n-kháu ê choē-chió lâi koat-tēng, hit chūn, hái-phı̄ⁿ tāi-khài iah bô kah chı̍t-pah-hō͘ ê jı̂n-ke, soah lóng chia̍h boē pá. Lán sin-sin khó͘-khó͘ lia̍h--lâi ê hı̂-á kan-na ē ēng-tit khı̀ tı̀n-siōng oāⁿ chı̍t-si-á han-chû kah tāu-á, kè-tio̍h kiáu iâm phè bê ê jı̍t-chí.
“M̄-koh keng-kè kan-lân ê khoân-kéng, chéng-cho̍k ê sı̀ⁿ-miā ū-sı̂-á ia̍h ē kè-sio̍k lo̍h--khı̀. Tō sı̄ tı̄ hit nı̂, gún chek-peh-sun-á chiong chit-má ê sin-niû siⁿ--lo̍h-lâi, iah i í-keng sı̄ tē peh-ê gín-á--lo͘h.
“Kè-tāng ê jı̂n-kháu ap-le̍k, hō͘ kui-ke-kháu-á hām jı̍p o͘-àm, kan-khó͘ ê sè-kài, ia̍h bô lâng thê-khí siu-ióng ê tāi-chı̀, ta̍k-ke khoàⁿ-tio̍h gín-á tō boē su khoàⁿ-tio̍h sàn-chhiah-sı̂n. Sè-kan siōng pi-siong ê tāi-chı̀, khióng-kiaⁿ ê tō sı̄ ba̍k-chiu kim-kim khoàⁿ-tio̍h ka-kı̄ ê kiáⁿ-jı̂, ūi-tio̍h bô mı̍h-kiāⁿ thang chia̍h soah lâi thı̂-khàu.
“Ū chı̍t-ê àm-mı̂, thiⁿ-téng ê chhiⁿ lân-lân-san-san, ū chı̍t-ê lâng lâi kàu hái-phı̄ⁿ siōng kài chiam-tu̍t ê só͘-chāi, i phāiⁿ chı̍t-ê pau-ho̍k, lâi kàu chiâ khin-khin-á hē--lo̍h-lâi. Thàn-tio̍h chhiⁿ-kng, ē-sái khoàⁿ chhut hit ê lâng hè-sò͘ í-keng chin toā--a, i seng khoàⁿ sı̀-chiu, jiân-āu ēng siang-chhiú khı̀ chhı̍h hit ê pau-ho̍k, tiām-chēng ê hái thiⁿ chi-kan hiáng-khí âng-iⁿ-á ê thı̂-khàu-siaⁿ. Chit ê lâng chı̍t-ē kip, ùi io-chiah-kut piⁿ iā thiu chhut chı̍t-chat hong-lāi ê thih-phiáⁿ, chin kiaⁿ-hiâⁿ tı̄ tih kù pau-ho̍k téng-koân ê mı̍h-kiāⁿ. I sı̄ hái-phı̄ⁿ chı̍t-ê khí-siáu ê lâng, tı̄ chiâ choè chhut ûi-ge̍k thiⁿ-lí ê choē-ok. Chit ê sı̂-chūn, ū chı̍t-ê lâng thiàu lo̍h-khı̀ hit ê só͘-chāi, chiong hit ê khí-siáu ê lâng phah tó chāi tē, i chiong pau-ho̍k hian--khí-lâi, hoat-hiān lāi-toé tó chı̍t-ê âng-iⁿ-á, ām-kún-á í-keng hō͘ hong-lāi ê to-kháu tāng-tāng oē chı̍t-sûn, i chim-chiok kā khoàⁿ, chiah khoàⁿ chhut tō sı̄ ka-kı̄ sun-á ê cha-bó͘-kiáⁿ, lō͘-bé-á i hui-siông ê siū-khı̀, lia̍h-kông--khí-lâi tāng-tāng-á phah hit ê tian-kông ê kúi-koài.
“Chū-jiân,” Lāu-hè-á in-ūi kóng liáu siuⁿ kín, sió-khoá tih chhoán: “Chū-jiân, chit ê khí-siáu ê lâng í-keng sí--khı̀ tih beh jı̄-cha̍p-tang--a, bô lâng ē kı̀-tit i kiò siáⁿ-mé miâ, kiù-kèng sı̄ siáⁿ lâng chiong gín-á kau hō͘ pa̍t-lâng khı̀ bia̍t-kháu, che sı̄ goá m̄ goān-ı̀ lâi kóng--ê, só͘-ū ê m̄-tio̍h, nā chún beh koài, tō ài koài hit ê khó͘-lān ê sè-tāi. Chit-má lín tong-jiân chai-iáⁿ âng-iⁿ-á sı̄ siáⁿ lâng, kiù--i-ê iū koh sı̄ siáⁿ lâng.”
Kóng liáu, lāu-hè-á chiong i chhun--ê ê poàⁿ-poe chiú thun lo̍h pak, hoan-thâu--kè-khı̀, tiām-tiām-á tih khoàⁿ lāu-jia̍t ê hun-lé, bô koh chài kóng poàⁿ-kù oē.
4
Beh-àm-á sı̂-chūn, chân-iông koà se-thian, chhái-hê hûiⁿ thiⁿ-téng, pho-kong hoán-chiàu, kui-ê hái-phı̄ⁿ chhin-chhiūⁿ chı̍t-liap n̂g-kim-tó, goá chiong chháu-bō-á tı̀--khı̀-lâi, koāⁿ chı̍t-kha hêng-lí, ùi hái-phı̄ⁿ kiâⁿ tńg sió-tiàm lâi chē chhia. Goá ê pêng-iú kiâⁿ tı̄ goá piⁿ--á, chin lo̍k-thiòng, put-sı̂ kóng-khí lâm-pō͘ ê hong-thó͘ kah kéng-tı̀:
“Lēng-kang, goá chiah chhoā lí iân hái-piⁿ ê kong-lō͘ se̍h chı̍t-lı̀n, ùi Pang-liâu, Hong-káng kàu Tâi-tang, àm-sı̂ ê lō͘-tô͘ m̄ chiah sı̄ chán! Tih, tih, tah, tah, lō͘-teng to̍h--a, àm-lâu lâi--a, lí iû-mn̂g kā chhui--lo̍h, tō ná-chhiūⁿ chiong chhia sái tı̄ bô chó͘-lân ê hái-bı̄n, hit khoán ê sóng-khoài, lí it-tēng m̄-pat keng-giām--kè.”
Jiân-āu i koh kóng-khí hong-bu̍t tùi jı̂n-chéng ê éng-hióng.
“Ki-pún siōng,” I kóng: “Lâng ia̍h sı̄ hong-thó͘ ê chı̍t-chióng kiat-kó kah sêng-chiū.”
“Sı̄--lah.” Goá tiām-tiām-á tih tı̀m-thâu, chóng-sǹg ē-tàng liáu-kái pêng-iú kóng ê oē, jı̂-chhiáⁿ goá tih siūⁿ, bô-lūn ta̍k-ke tùi sin-niû ām-kún-á téng-koân ê pa-hûn ū goā choē khoán kóng-hoat, i khak-khak sı̍t-sı̍t í-keng chhim-chhim khek tı̄ hái-phı̄ⁿ múi chı̍t-ê lâng ām-kún-á téng-koân, put-koán i sı̄ khoàⁿ ē tio̍h--ê iah sı̄ khoàⁿ boē tio̍h--ê. Goá siūⁿ, che ia̍h sı̄ oa̍h tı̄ hái-phı̄ⁿ ê múi chı̍t-ê lâng bô èng-kai kā pàng boē kı̀--ê.
Gún kiâⁿ kàu tiàm-á thâu-chêng, chhia tú-tú lâi. Goá tı̄ chhia-thang ia̍h-chhiú kā pêng-iú tı̀-siā. Chhia āu chiām-chiām siau-sit ê oē-bı̄n kám-tōng tio̍h goá, bô tiuⁿ-tı̂ sió-khoá chùn chı̍t-oē, koh khin-khin-á tiám chı̍t-ki kin-chio-hun.
Sòng Te̍k-lâi goân-tù
Iûⁿ Un2-giân e̍k
