Hô͘-tô͘ Kàu-siū Goá sı̄ Lâng-kheh

Chı̍t ê hô͘-tô͘ toā kàu-siū, ū chı̍t ki toā kia̍p-chhùi, chiok kāu-oē. Ū chı̍t piàn khı̀ hō͘ lâng chhiáⁿ. Chia̍h pá āu kap chú-lâng khai-káng kàu chiok oàⁿ iáu m̄ soah. Lú chú-lâng thiau-tı̂ tı̄ i ê bı̄n-chêng peh-ha, àm-sı̄ í-keng chiâⁿ oàⁿ. I soà ké bô khoàⁿ--tio̍h. Kı̂-sı̍t i mā chin thiám--ah. Lâm chú-lâng mā it-tı̍t tı̄ hia hah-hı̀, àm-sı̄ sı̂-kan ū-iáⁿ chin oàⁿ--lò͘. Put-kò toā kàu-siū iû-goân kek bô khoàⁿ--tio̍h. Soà boé in ko͘-put-jı̄-chiong kā kàu-siū kóng:“Chin sit-lé, goán bı̂n-á-chài ài chhut-mn̂g, kàu-siū lí hó thang tńg--khı̀-ah.” Chit sı̂ chit ê toā kàu-siū chin tio̍h-kiaⁿ, ba̍k-chiu toā-toā lúi, kā ı̀n kóng: “Hâⁿ? Goá tńg--khı̀? Chia m̄ sı̄ goán tau--ò͘?”