Hô-iok ê Tiâu-khoáⁿ
Tiong-Jı̍t só͘ lı̍p ê hô-iok hiah-ê tiâu-khoáⁿ í-keng ū ı̀n tı̄ goán ê Sin-bûn-pò; taⁿ m̄-bián lóng-chóng hoan-e̍k, kan-ta tiah-chhut ta̍k-tiâu ê tāi-lio̍k lâi ı̀n tı̄ ē-té:
1.Ko-lê-kok thang chū-chú, m̄-bián koh chı̀n-kòng Tiong-kok.
2.Tiong-kok Liâu-tang beh koah chı̍t-tè hō͘ Jı̍t-pún. (Āu-lâi chit khoáⁿ sı̄ bián.)
Tâi-oân tio̍h hō͘ i.
Phêⁿ-ô͘ tio̍h hō͘ i.
3.Lióng-pêng tio̍h phài lâng khı̀ hun-pia̍t kài-chí.
4.Tiong-kok tio̍h poê-gı̂n nn̄g bān bān niú. (In-ūi Liâu-tang bô hō͘ i, ke-thiap chı̍t bān bān niú). Tio̍h chò 8 pang kiáu chheng-chhó. Thâu-pang hān 6 goe̍h jı̍t tio̍h kiáu 5 chheng bān. Jı̄-pang koh 6 goe̍h jı̍t koh kiáu 5 chheng bān. Kı̂-û hun-chò 6 pang kau, chı̍t-nı̂ koh kiáu chı̍t-koè. Thêng kàu 6 goe̍h liáu-āu só͘ boē kau ê gı̂n lóng tio̍h sǹg lı̄-sek hō͘ in, múi-nı̂ chı̍t pah kho͘ beh siⁿ 5 kho͘ lāi. Saⁿ nı̂ lāi. nā ē-tit kau chheng-chhó, in chiū m̄ siu lāi, liân tāi-seng the̍h ê lāi-chı̂ⁿ iā beh the̍h-chhut lâi hêng.
5.Tâi-oân kap Phêⁿ-ô͘ ê peh-sı̀ⁿ nā beh lı̄-khui poaⁿ-koè pa̍t-ūi khiā, in thang bē in-ê chhân-hn̂g chhù-the̍h chò in khı̀. Hān nn̄g nı̂ lāi hō͘ lâng hoat-lo̍h. Kàu nn̄g nı̂ moá iáu toà-teh--ê sı̄ chhut-chāi Jı̍t-pún lâng beh lia̍h chò in-ê peh-sı̀ⁿ á-bô. Hô-iok khàm-ı̀n bêng-pe̍k lióng-kok beh chhe koaⁿ-oân lâi Tâi-oân kau-poâⁿ; hān nn̄g goe̍h-jı̍t lāi tio̍h kau in-ê chhiú.
6.Chit-khoáⁿ lóng sı̄ kóng-khí chò seng-lí ê sū, m̄-bián hoan-e̍k. Chiông-tiong ū ke siat 4 ūi thang chò thong-siong ê cho͘-kài. Chiū-sı̄ Ô͘-pak ê Sa-chhı̄, Sù-chhoan ê Tiông-khèng, Kang-so͘ ê So͘-chiu, Chiat-kang ê Hâng-chiu.
7.Hān 3 goe̍h jı̍t Jı̍t-pún tio̍h thè peng lı̄-khui Tiong-kok.
8.To̍k-to̍k Ui-hái-oē thang hō͘ Jı̍t-pún peng toà hia siú-hāu, khoàⁿ ū chiàu iok bô. Kàu thâu jı̄ pang ê gı̂n kiáu koè-liáu, Ui-hái-oē iā tio̍h hêng Tiong-kok. Kı̂-û boē hêng ê gı̂n Tiong-kok tio̍h kam-goān chiong Hái-koan ê khoáⁿ chò chún-tǹg. Siat-sú bē-tit hó-sè, Jı̍t-pún peng tio̍h tiàm Ui-hái-oē, tán kàu lóng kau chheng-chhó, chiah tò--khı̀.
9.Lióng-pêng só͘ lia̍h ê peng tāi-ke tio̍h hiàn hêng; Tiong-kok iā bē-sái-tit pān in-ê choē. Lēng-goā hiah-ê só͘ lia̍h tio̍h lâng kóng sı̄ sı̄-choh á-sı̄ ūi Jı̍t-pún ê lâng lóng tio̍h tháu-pàng bô pān-choē.
10.Iok lı̍p hó āu-lâi bô koh-chài chiàn.
11.Tiong-kok kap Jı̍t-pún ê Hông-tè tio̍h ín-chún bô-iok. kàu kong-sū 21 nı̂ 4 goe̍h 14, chiū-sı̄ Bêng-tı̄ 28 nı̂ 5 goe̍h chhe 8, lióng-pêng ê toā-koaⁿ tio̍h the̍h-lâi Ian-tâi tùi-oāⁿ.
(Tâi-lâm Hú-siâⁿ kàu-hoē-pò tē 122 koàn,1895 nı̂ 4 ge̍h)