Húi-pòng ê lı̄-ek

Lūn chit-ê húi-pòng ê ı̀-sù lán chai sı̄ sím-mı̍h khoán ; chiū-sı̄ lán sı̀n Chú ê lâng siông-siông ài hō͘ sè-sio̍k húi-pòng; ū-sı̂ só͘ húi-pòng--ê sı̄ ū-iáⁿ , lán ū hit-hō chhò-gō͘ lâi-hō͘ in húi-pòng ; chóng-sı̄ ū-sı̂ khah-chē sı̄ bô-iáⁿ ê sū, in iā húi-pòng. Chiàu goá só͘ bat thiaⁿ-kı̀ⁿ ê húi-pòng chiū-sı̄ kóng lán jı̍p-kàu ê lâng bô-kong bô-má ; á-sı̄ ǹg-bāng khah-séng só͘-hùi ; á-sı̄ kóng jı̍p-kàu ê lâng lóng bē-sí, Siōng-tè ē tō͘ i chiūⁿ thian-tông ; á-sı̄ khò hoan-á-sè. Iā goá chhut-khı̀ pò͘-tō bat hō͘ lâng kóng lán sı̄ ūi-tio̍h goā kok-lâng ê gı̂n thang niá só͘-í chiah beh chhut-lâi kóng. Tāi-khài kóng án-ni chiū-hó, lūn-kàu lâng só͘ húi-pòng--ê kóng bē tit chı̄n .

Taⁿ goá tú-á teh kóng lâng húi-pòng ê lı̄-ek , lūn hō͘ lâng húi-pòng khiok sı̄ chin kan-khó͘ thiaⁿ ê sū , iā sı̄ pháiⁿ miâ-siaⁿ ; sui-jiân sı̄ pháiⁿ miâ-siaⁿ , m̄-kú lán nā siông-sè siūⁿ , sı̍t-chāi ū thang tùi tı̄ hō͘ lâng húi-pòng ê sı̂ lâi tit-tio̍h lı̄-ek. Taⁿ chhiáⁿ lín siông-sè siūⁿ goá só͘ teh-beh kóng ê lı̄-ek , chiū-sı̄ sè-sio̍k m̄-chai-iáⁿ lām-sám húi-pòng lán ê lı̄-ek, m̄-sı̄ kóng lán chò chhò-gō͘ lâi hō͘ lâng húi-pòng ū lı̄-ek ; chhiáⁿ-lín siông-sè siūⁿ .

Taⁿ ū sím-mı̍h lı̄-ek thang-kóng? Chhin-chhiūⁿ tú-á teh-kóng, ū lâng keng-thé lán bô-kong , bô-má ; nā-sı̄ lán thiaⁿ-kı̀ⁿ án-ni chiū tio̍h tò-hoán-siūⁿ, khoàⁿ lán só͘-chò só͘-kiâⁿ ū khah tùi-tiōng pē-bó jı̂n-lûn ê sū, ū khah iâⁿ-koè sè-sio̍k lâng á-bô ? Nā-ū, sui-jiân hō͘-i án-ni húi-pòng, lán iáu-kú thang an-sim ; m̄-bián kiaⁿ kiàn-siàu . Nā-sı̄ lán thiaⁿ tō-lí liáu-āu iáu-kú put-hàu pē-bó hùi-tūi jı̂n-lûn, lán tek-khak tio̍h ké-oāⁿ hit-hō ê m̄-tio̍h . Iā koh kóng khah séng só͘-hùi ; lán tio̍h siūⁿ khoàⁿ lán tı̄ boē thiaⁿ tō-lí ê sı̂ kam-goān liáu-chı̂ⁿ kap pháiⁿ-kúi kau-poê , nā sı̀n tō-lí liáu-āu , lán hiàn hō͘ Siōng-tè ê sū, chit-hō ū koh-khah pí pài-pu̍t khah kam-goān á-bô ? Nā-bô tio̍h tùi chit-hō lâi siū kéng-kài. Á-sı̄ hiâm lán khò-sè, lán iā-tio̍h ka-tı̄ séng-chhat khoàⁿ lán chin-chiàⁿ ū iáⁿ oá chit-hō ê sè lâi hia̍p-chè lâng á-bô ? Nā ū chit-hō sim-chı̀ ka-tı̄ tio̍h kiàn-siàu, ka-tı̄ tio̍h chek-pı̄. Nā thiaⁿ-kı̀ⁿ chit kúi-hāng, thiaⁿ tō-lí ê lâng tek-khak tio̍h ka-tı̄ séng-chhat ; tùi án-ni thang tû-khı̀ lán-ê pē-pēng , tùi án-ni chū-jiân ē tit-tio̍h lı̄-ek .

Iā teh kóng lâng bat kóng lán ta̍k-goe̍h-jı̍t thang niá-gı̂n só͘-í kam-goān chhut-khı̀ kóng tō-lí; taⁿ lán tio̍h chiong che ka-tı̄ lâi séng-chhat khoàⁿ bāi-teh . Khiok lán niá kong-hoē ê gı̂n sı̄ chhut tùi ko͘-put-chiong, in-ūi lán ài choan-sim chò chit-hō ê kang, bô thang chò-kang thàn-chia̍h; iā bē tit o̍h Pó-lô ê khoán lâi chò, m̄-bián the̍h lâng ê chı̂ⁿ . Lán ê ı̀-sù khiok ū chûn-ài kiù-lâng ê sim; sui-jiân niá lâng ê chı̂ⁿ hō͘ lâng húi-pòng m̄-bián kiàn-siàu. Sui-jiân sı̄ án-ni, goá ka-tı̄ bat teh siūⁿ, lâng án-ni teh kóng goá ū chı̂ⁿ thang niá chiah kam-goān kóng tō-lí , goá ka-tı̄ an-ùi kóng , goá ūi-tio̍h ài kiù-lâng iā bē thang thàn chia̍h ê iân-kò͘ . Iā bat tò-siūⁿ kóng, sui-jiân niá lâng ê gı̂n sı̄ bô thang hiâm , m̄-kú goá nā pı̂n-toāⁿ pò͘-tō bô chûn kiù-lâng ê sim, iā nā ū chhut-khı̀ pò͘-tō put-kò sı̄ kiaⁿ sian-siⁿ hiâm, iám lâng ê ní-bo̍k nā-tiāⁿ, kan-ta sek-chek liáu-sū nā-tiāⁿ, nā ū chit-hō khoán, tú-tú ha̍p sè-sio̍k lâng só͘ hiâm, m̄-nā tı̄ sè-sio̍k lâng ê bı̄n-chêng tio̍h kiàn-siàu, iā tı̄ Siōng-tè ê bı̄n-chêng bô thang hun-sò͘ ; iā sı̄ sio̍k tı̄ si-ūi sò͘-chhan ê lâng , iā chin-chiàⁿ sı̄ ūi-chı̂ⁿ , m̄-sı̄ ūi kiù-lâng lah .

Taⁿ ǹg-bāng lín goá thiaⁿ chit-hō húi-pòng ê oē, lâi chū-séng put-tı̀ tiòng sè-sio̍k lâng só͘ ge̍k-liāu. Chhin-chhiūⁿ lán bat tha̍k-tio̍h chı̍t-kù “têng-keng chhui-che” chiū-sı̄ kóng, “Bat hō͘ sio-keⁿ thǹg-tio̍h, āu-pái tú-tio̍h beh chia̍h hit-hō léng chhang-thâu ùn bí-chiùⁿ, iā pûn kàu hih-hu̍h-kiò; nā ē-hiáu tùi án-ni lâi sè-jı̄, kàu āu-lâi sè-sio̍k-lâng m̄-nā m̄-káⁿ húi-pōng nā-tiāⁿ, iā soà ē o-ló Siōng-tè.” Che sı̄ í Pí-tek 2: 12 só͘ kóng ê oē teh kà-sı̄ hiah-ê sı̀-soàⁿ ê hiaⁿ-tı̄, chò chhut-goā tı̄ sè-sio̍k-lâng ê tiong-kan tio̍h hó só͘ kiâⁿ, khí-thâu ē húi-pōng lín, kàu āu-lâi tō m̄-káⁿ, khoàⁿ lín ê hó só͘ kiâⁿ, tō kui êng-kng Siōng-tè. Lâng nā lām-sām húi-póng lán, lán nā ē-hiáu tı̂-hông, sè-jı̄ tı̀ kàu bô ha̍p in só͘ hiâm, chin-chiàⁿ sı̄ ū-iáⁿ tùi húi-pōng tit-tio̍h lı̄-ek; nā tú-tio̍h húi-pōng m̄ sè-jı̄, tō-sı̄ toā sún-hāi.

(Tâi-oân Hú-siâⁿ Kàu-hoē-pò tē 167 koàn, 1899 nı̂ 2 ge̍h)