Hı̂-bah

Chhoe hı̂-á “Hı̂-bah hó-chia̍h--bô?” Chit-kù oē chin chē lâng lóng ū thiaⁿ--koè, sı̄ 1-ê teh kóng kúi-á-kó͘ ê tiān-sı̄ chiat-bo̍k kóng kah chin khióng-pò͘ ê kò͘-sū: ū kúi-ê lâng tı̄ khe-á-piⁿ hang hı̂-á chia̍h, hit-boé sí--khı̀ ê hı̂-á khui-chhùi mn̄g: “Siàu-liân--ê, hı̂-bah hó-chia̍h--bô?” Chit-ê kò͘-sū hāi chin chē lâng bô siáⁿ káⁿ koh chia̍h hı̂-á, goá thiaⁿ liáu mā ū 1-chām-á m̄-káⁿ chia̍h hı̂-bah, kiaⁿ hı̂-á kā goá kóng: “Goá to sí--a, lí koh beh chia̍h goá ê bah!” Boé--á, tòng-bē-tiâu hı̂-á-giàn, soah khı̀ tú-tio̍h soe-siâu-tāi. Hı̂-á bô chhiùⁿ-koa hō͘ goá thiaⁿ, mā bô thiàu Disco hō͘ goá khoàⁿ, hı̂-á mā bô būn-tê, án-ne, sı̄ hoat-seng siáⁿ-mih tāi-chı̀--leh? Goá tauh-tauh-á kóng hō͘ lí thiaⁿ. Kā lân khau chheng-khı̀, so̍h iâm, khǹg tı̄ tiáⁿ--nih keh-koân, chhiat kiuⁿ-si khǹg--lo̍h-khı̀, thı̂n 2-oáⁿ-kong kún-chúi mài im-koè hı̂-á, hoé khui-lo̍h kún, tán chúi kún, hoé kı̀m sè-pha hō͘ bān-bān-á chhoe, tán 5-hun-cheng khí-tiáⁿ, iōng súi-súi ê poâⁿ-á té, téng-thâu sàm chı̀n-chêng chhiat-hó ê chhang-á, siōng hó-chia̍h ê chhoe-hı̂-á, bah iù thng tiⁿ, chiok hó-chia̍h--ê! Goá kā chhoe hı̂-á phâng-khı̀『陽台』ê toh-á-téng, siūⁿ-kóng tiàm goā-kháu chia̍h chin ū khı̀-chit, ngeh jı̍p-khı̀ chhùi--nih, pe̍h-pe̍h ê hı̂-bah-si tı̄ chhùi lāi-té soàⁿ--khui, kam-tiⁿ ê hı̂-á-bı̄ uÌ na-âu thàng kàu phı̄ⁿ-khang, goā-nı̄-á sóng--leh! Chia̍h kah tng hoaⁿ-hí, 1-ê beh 2-bí ê o͘-iáⁿ ùi lâu-téng lak--lo̍h-lâi, tı̄ ba̍k-chiu-bāng thêng bô 1-bió, m̄-koh soah pí 1-nı̂ khah tn̂g, hit-ê o͘- iáⁿ ai kah chiok toā-siaⁿ--ê, hit-siaⁿ tı̍t-tı̍t chǹg-jı̍p-khı̀ goá ê hı̄ⁿ-khang-té, koh koè bô poàⁿ-bió, 1-sian chiok tāng ê mı̍h-kiāⁿ tǹg tı̄ âng-bûn-thô͘ téng. Hit sian mı̍h-kiāⁿ ū thâu, ū sin-khu, ū kha, koh ū chhiú, kán! Nah ē ū lâng kā Ma-the-lu khian--lo̍h-lâi? Ma-the-lu tǹg tı̄ thô͘-kha, chiok toā-siaⁿ--ê, goá hō͘ un-un ê chúi phoah kah kui sin-khu, bı̄ chhàu-chho chhàu-chho, sek âng-kòng-kòng, ná ke-noā-á hông thâi ām-kún pàng--chhut-lâi ê huih hiah âng. Ma-the-lu nah ē lâu-huih? Sı̄ siáⁿ-lâng teh o͘-peh-lâi? Tng teh tū-lān ê sı̂, lâu-kha kèng-chhat-chhia o͘ⁿ-o͘ⁿ-kiò, m̄-chai teh chhá siáⁿ-hoè. Siūⁿ beh koh chia̍h hı̂-á, poâⁿ-á-té soah âng-kòng-kòng, bı̄ pí hı̂-á koh khah chhàu-chho, sı̄ siáⁿ-lâng chiah ok-chit? Tán goá chheng hó-sè, it-tēng beh 1-keng 1-keng khı̀ mn̄g! Goā-kháu ū lâng kā mn̂g lòng kah pı̀n-piàng-kiò, goá kín cháu-khı̀ khui-mn̂g, mn̂g khui 1-phāng, 5~6-ê kèng-chhat hiān chhiong--jı̍p-lâi, 2-ê kā goá teh tı̄ thô͘-kha, sūi kā phāiⁿ tı̄ khò͘-thâu ê 90-á pui--chhut-lâi, toā-siaⁿ hoah:『不要動!』 Goá mn̄g in beh chhòng siáⁿ, in kóng ū lâng pò-àn, kóng goá chia ū lâng hông thâi--sí. Chhun--ê 3~4-ê cháu-khı̀『陽台』, khoàⁿ-tio̍h tú-á lak--lo̍h-lâi hit-sian Ma-the-lu, huih, náu-chhé, tn̂g-á-tō͘ lâu kah kui thô͘- kha, kut-thâu ùi bah chhah--chhut-lâi, tiāⁿ-tio̍h sı̄ siak kah siuⁿ toā-la̍t, chiah ē liān kut-thâu to khoàⁿ-hiān-hiān. Kèng-chhat kóng si-thé sı̄ toà tı̄ 12-lâu ê Tân Chheng-chúi, koh mn̄g goá kám bat--i, goá kóng tı̄ toā-lâu koán-lí úi-oân-hoē khui-hoē ê sı̂, bat thiaⁿ i kóng sı̄ teh chò lāu-su--ê, mā bat tı̄ tiān-thui tú--tio̍h, koh ū hō͘-siōng Hai-sah-chuh, kan-taⁿ án-ne niâ, mā bô siáⁿ-mih lí-iû ē-sái sio-chhoē. In koh mn̄g goá hit-chūn tı̄『陽台』chhòng-siáⁿ? Goá tō kóng: “Goá chú 1-boé chiok hó-chia̍h ê hı̂-á, bē-hù péng-pêng i tō lâi tàu-lāu-jia̍t--a, hō͘ i phùn kah kui sin-khu chhàu-chho-huih, hı̂-á m̄-tāⁿ bô chia̍h--tio̍h, koh ài hō͘ lín the̍h- khı̀ chò chèng-kù, koh tio̍h hō͘ lín tı̄ chia teh kô-kô-tı̂ⁿ!” Boé--á, in kā goá chhoā tńg phài-chhut-só͘, the̍h 1-su ūn-tōng-saⁿ hō͘ goá oāⁿ, kóng goá ê saⁿ ài the̍h-khı̀ giām, koh kiò goá ài tı̄ phài-chhut-só͘ toà 2-kang, in beh chò tiau-cha. Goá saⁿ oāⁿ hó, toè hêng-sū-cho͘--ê tńg gún chhù khoàⁿ, mn̂g-chhùi jı̍p--khı̀ tō khan n̂g-pò͘-tiâu-á, n̂g--ê kap âng--ê ka--khí-lâi chin chha̍k-ba̍k, koh khoàⁿ-tio̍h hit-boé hı̂-á tō iàn-khı̀, ū lâng beh kéng chit-chūn sí, bô lâng ū i hoat-tō͘. Sı̍t-chāi chiok kı̂-koài--ê, Tân Chheng-chúi toà 12F-4, sı̄ goá tùi-bı̄n hit-pêng--ê, nah ē thiàu lâi goá ê『陽台』? I siak--lo̍h-lâi to bô 5-hun-cheng kú, hêng-sū-cho͘--ê tō kàu-ūi--a, Chi-na-bı̂n-kok ê chèng-hú m̄-bat chiah-nı̄ ū hāu-lu̍t--leh. Goá cháu-khı̀ 12-lâu, 12F-4 mn̂g khui-khui, lāi-té cha̍t-thóng-thóng, chin lāu-jia̍t ê khoán, Tân Chheng-chúi hit-ê súi-bó͘ hông ûi tı̄ thiaⁿ--nih teh mn̄g-oē. In bó͘ Ia̍p Hūi-jû kāng-khoán sı̄ lāu-su, kap Tân Chheng-chúi tàu-tı̄n tı̄ gún toā-lâu piⁿ--á hit-keng Chi-na-kok-hāu teh kà-chheh. I ná khàu ná kóng in ang ùi cho̍h--jı̍t tō bô tńg--lâi-a, khà chhiú-ki-á mā bô chiap, m̄-chai-iáⁿ in ang sı̄ cháu-khı̀ toh-ūi. Lâng sı̄ “bē seⁿ khan-thoa chhù- piⁿ” , Tân Chheng-chúi soah “beh sí khan-thoa lâu-kha” , goá hit-chūn nā chē khah goā-kháu--tām-po̍h-á, m̄ tō ē kap hit-ê bē bah-chàng--ê kāng-khoán hông teh--sí? Goá cháu-khı̀ chhù-boé-téng 14-lâu ê hong-chhù-á, kui chhù-téng lóng sı̄ kàm-sek-cho͘--ê tı̄ hia bong-lâi bong- khı̀. Goá sô-chhut-khı̀ se̍h-se̍h khoàⁿ- khoàⁿ--leh, bô khoàⁿ-tio̍h ū lâng tı̄ chia sio-phah ê jiah, kā thâu chhun- chhut-khı̀ khoàⁿ goá hit-keng『陽台』, âng-âng 1-jiah, tah tı̄ pe̍h-Thai-luh téng-thâu, siōng bái ê Jı̍t-pún kok-kı̂ khó-lêng mā pí che khah súi. Ùi lâu-boé-téng kàu goá toà ê 8-lâu, ta̍k-hō͘ lóng chng thih-thang, m̄-koh bô tı̄ thih-thang-téng khoàⁿ-tio̍h khò--tio̍h ê hûn, mā bô kap Tha-ma-tok kāng-sek ê huih-tih-hûn, tō sı̄ bô lo̍h-hō͘, goá chiah ē siáu-siáu cháu-chhut-lâi goā-kháu, tán Tân Chheng-chúi thiàu- lo̍h-lâi tàu chia̍h hı̂-á. Chit-má ê lâng kiaⁿ chhù--nih ê mı̍h-kiāⁿ hông thau the̍h--khı̀, ta̍k-ê lóng chng thih-thang kā ka-tı̄ kuiⁿ--khí-lâi, koh kiaⁿ hoé-sio-chhù iah-sı̄ tē-tāng chhù pang--khı̀ cháu bē chhut--khı̀, thih-thang ē ke khui 1-khang hō͘ lâng tú-á-hó peh ē chhut--khı̀. Tân Chheng-chúi kám ē sı̄ ùi hit-ê káu-khang siak--lo̍h-khı̀-ê? Án-ne sı̄ ùi toh 1-lâu--leh? Aih~kap goá bô tı̄-tāi, chhap hiah-nı̄ chē nā hông khan-thoa--tio̍h tō chin hāi--a. Hō͘ sí-lâng khan-thoa--tio̍h sı̍t-chāi chiâⁿ mâ-hoân, lú siūⁿ lú siān, ūn-tōng--1-ē khah bē siān. Goá ùi lâu-boé-téng kiâⁿ lâu-thui lo̍h--khı̀, siūⁿ beh lâi-khı̀ lim 1-au-á ka-pi, kā chhàu-chho-bı̄ ah--lo̍h-khı̀, mā ē-sái hō͘ ka-tı̄ khah sóng-khoài--leh, ka-pi ê phang-bı̄ ē-sái kā chia--ê lóng pàng hō͘ m̄-chai lâng. Hı̂-á siû-chúi Tân Chheng-chúi bē kı̀ ê the̍h khó-chhı̀-choá, nā sı̄ kin-á-jı̍t bô kái hō͘ hó, bı̂n-á-chài ha̍k-seng-á ê sêng-chek tō kau bē chhut--khı̀, chhia khiā beh kàu chhù chiah koh phe-tńg-lâi ha̍k-hāu the̍h. Jı̍p hāu-mn̂g khoàⁿ-tio̍h séng-tiong Kang-kàu-koaⁿ ê kiau-chhia thêng tı̄ mn̂g-kháu, hit-ê Kang-kàu-koaⁿ in lāu-pē sı̄ 49-nı̂ toè Kok-bı̂n-tóng làu-phâu lâi Tâi-oân ê “à-soaⁿ--ê” , i sı̄ tē-2-tāi, koàn-chhun-kái-kiàn thàn chheng-goā-bān, thio-liáu chin sóng, toà tı̄ goá hit-keng toā-lâu 13-lâu-boé 2 hō. I tiāⁿ-tiāⁿ lâi Chi-na-kok-hāu chhoē siàu-liân hāu-tiúⁿ Tiuⁿ Bêng-chı̀, thiaⁿ kóng Tiuⁿ Bêng-chı̀ in lāu-pē sı̄ “poàⁿ-soaⁿ” , Jı̍t-pún sı̂-tāi cháu-khı̀ Chi-na kap Kok-bı̂n-tóng tauh, koh kóng sı̄ chêng-pò-kio̍k--ê, bat tı̄ Jı̍t-pún peng-iâⁿ iōng Tâi-oân-lâng ê sin-hūn, kā Kang-kàu-koaⁿ in lāu-pē pó--chhut-lâi, kui-lō͘ kā pó kàu hit-sı̂ Chi-na siú-to͘『重慶』, chiah ē 2-ê tē-2-tāi tiāⁿ-tiāⁿ teh sio-chhoē. Tân Chheng-chúi chông-jı̍p-lâi lāu-su pān-kong-sek, gû-phoê-choá lok-á chhio̍k--leh tō beh piàⁿ tńg chhù--nih, khoàⁿ-tio̍h hāu-tiúⁿ-sek ê tiān-hoé koh to̍h--leh, siūⁿ kóng khı̀ kā hāu-tiúⁿ Ai-sah-chuh--1-ē chiah tńg--khı̀, iáu-boē kàu mn̂g-kháu tō thiaⁿ-tio̍h in 2-ê teh kóng-oē, “Tiuⁿ-hāu-tiúⁿ! Goá í-keng tit-tio̍h téng-thâu ê chí-sı̄, kóng beh tı̄ 520 2-chiu-nı̂ hit-kang, hoat-tōng jiáu-loān kè-oē, goá hia--ê 65-á chhèng-kóng kái--1-ē tō ē-sái phah--a......” In 2-ê khoàⁿ-tio̍h ū lâng lâi sūi tiām--khı̀, Tân Chheng-chúi hàm-hàm kiâⁿ--jı̍p-khı̀: “Kóng siáⁿ-mih pı̀-bı̍t kiaⁿ lâng chai?” Tiuⁿ-hāu-tiúⁿ kap Kang-kàu-koaⁿ 2-ê, 1-ê kóng bô-tāi-chı̀, 1-ê hoe kóng beh pān liân-ha̍p hāu-khèng, Tân Chheng-chúi kóng beh kín tńg-khı̀ kái khó-chhı̀-choá, chài-hoē kóng-liáu tō thâu oat--leh tō kiâⁿ--chhut-khı̀. 2-ê Chi-na-lâng siūⁿ kóng in kap Chi-na-jı̂n-bı̂n-kiōng-hô-kok hit-pêng ê kè-oē hō͘ Tân Chheng-chúi thiaⁿ-- tio̍h, nā khı̀ hō͘ Tâi-oân ê chêng- pò-kio̍k chai-iáⁿ tō pháiⁿ-oa̍h--a! Tiuⁿ Bêng-chı̀ kap Kang-kàu-koaⁿ kín khı̀ sái-chhia, àn-sǹg beh tı̄ Tân Chheng-chúi kā tāi-chı̀ kóng-- chhut-lâi chı̀n-chêng chhú-lí hó-sè. Kang-kàu-koaⁿ kóng i kap Tân Chheng-chúi toà kāng-tòng toā-lâu, tńg chhù ê lō͘--nih, ū 1-chat àm-thâu-á lóng bô lâng kiâⁿ ê chhân-hoāⁿ-lō͘, Tân Chheng-chúi ge-siâu that-chhia, lóng ē khiā Ou-to͘-bai kiâⁿ hit-tiâu sè-tiâu-lō͘, ē-sái tı̄ hia kā tng. In 2-ê chhia sái--leh kiâⁿ, kui-lō͘ teh chù-ı̀ chhoē Tân Chheng-chúi ê Ou-to͘-bai. Chhia phe-kàu chhân-hoāⁿ-lō͘, sūi tō khoàⁿ-tio̍h 1-tâi pe̍h-sek ê Ui-su-pa tı̄ thâu-chêng pı̀n-piàng-kiò, Kang- kàu-koaⁿ iû-mn̂g chhui--lo̍h, Ian-jin- koà tùi Ui-su-pa āu-lián chim--lo̍h-khı̀, Tân Chheng-chúi kui-sian lâng poe-- chhut-khı̀, siak tı̄ chhân--nih, khó- chhı̀-choá soàⁿ kah kui-chhân-hoāⁿ. 2-ê lâng kā Tân Chheng-chúi chhùi that--leh pa̍k--khí-lâi, iōng pò͘-tē lok--khí-lâi, khng-jı̍p-khı̀ chhia āu-táu, chài-tńg-khı̀ in toà--ê hit-keng toā-lâu, chhia tı̍t-chiap sái lo̍h tē-hā-sek ê thêng-chhia-tiûⁿ. Kang-kàu-koaⁿ seng chē tiān-thui khı̀ khui in tau ê mn̂g, sı̄n-soà khoàⁿ 13-lâu ū lâng--bô, khoàⁿ bô lâng koh chē tiān-thui khı̀ tē-hā-sek, kap Tiuⁿ Bêng-chı̀ chò-hoé kā Tân Chheng-chúi khng-jı̍p-khı̀ tiān-thui lāi-té, 2-ê lâng sim-koaⁿ phı̍h-pho̍k-thiàu, kiaⁿ tı̄ tiong-hng ē ū lâng beh chē tiān-thui. Tân Chheng-chúi tı̄ pò͘-tē lāi-té ngiú-lâi ngiú-khı̀, in soah koh khah kín-tiuⁿ. Tiān-thui kàu 1-lâu “Tiang!” 1-siaⁿ, mn̂g khui--khui, in 2-ê siūⁿ kóng “Hāi--a, hông khoàⁿ-tio̍h tō chóng khı̀--a.” 1-ê sè-hàn gín-á koāⁿ 1-koàn tāu-iû kiâⁿ--jı̍p-lâi, kā in kóng: “Goá ji bē tio̍h, kám ē-sái thè goá ji 5-lâu?” chit-ê gín-á khoàⁿ--khí-lâi ke̍k-ke 6-hoè, hō͘ in lāu-bú kiò-khı̀ bé tāu-iû. Chit-ê sè-hàn gín-á ba̍k-chiu kā tiān-thui lāi-té hit-ê toā-pò͘-tē tèng-tiâu-tiâu: “Lín teh poaⁿ-chhù chiok thiám--ê-ho͘ⁿh?” Kang-kàu-koaⁿ kiaⁿ-1-ē soah kā kiāu: “Gín-á-lâng chhap hiah chē chhòng-siáⁿ?” 5-lâu kàu--a, hit-ê gín-á tāu-iû moh--leh, tuh--leh tuh--leh kiâⁿ-- chhut-khı̀, thâu put-sı̂ oat tńg-lâi khoàⁿ pò͘-tē, ná kiâⁿ ná liām: “Tē-á ē tín-tāng, chin hó-sńg!” Kàu 13-lâu, tiān-thui mn̂g khui-- khui, Tiuⁿ Bêng-chı̀ tı̄ tiān-thui lāi-té kā “Khui” chhı̍h-ân-ân, kiaⁿ tiān-thui koh sái-kiâⁿ, Kang-kàu-koaⁿ chhut- khı̀ sûn bô lâng, tō tàu-tı̄n kā hit-kha pò͘-tē khng-jı̍p-khı̀ 13F-3. Tân Chheng-chúi hō͘ 2-ê Chi-na tē-5-tūi tı̄ Tâi-oân ê loē-èng pa̍k- tiâu-tiâu, kan-taⁿ ū-hoat-tō͘ tı̄ thô͘-kha noá, án-choáⁿ noá soh-á to bē khui. Sı̄ án-choáⁿ tú-á hō͘ chhia lòng-liáu bô sí, chit-má soah hông pa̍k tı̄ chia, i siūⁿ lóng bô. Tiuⁿ Bêng-chı̀ khui-chhùi: “Siáng kiò lí o͘-pe̍h-chông, koh thiaⁿ-tio̍h bô èng-kai chai ê tāi-chı̀.” , Tân Chheng-chúi koáⁿ-kín poé-hoē: “Goá kan-taⁿ sı̄ beh the̍h khó-chhı̀-choá tńg--khı̀, bô thiaⁿ-tio̍h lín teh kóng siáⁿ-mih......” Kang-kàu-koaⁿ èng kóng: “To kā lí lòng kah án-ne--a, chhú-lí hō͘ chheng- khı̀ khah an-choân!” Goá m̄-chai-iáⁿ hāi goá hı̂-á chia̍h bô poàⁿ-pêng ê Tân Chheng-chúi, hông khian--lo̍h-lâi chı̀n-chêng koh ū hō͘ chhia lòng--tio̍h. Hı̂-á thiàu-chúi Goá ùi 14-lâu kiâⁿ--lo̍h-lâi, kiâⁿ kàu 13-lâu tō kám-kak lâu-thui tı̀n chiok chē mı̍h-kiāⁿ chiok pháiⁿ kiâⁿ--ê, pı̄n-toāⁿ-sèng giâ--khí-lâi, tō kiâⁿ-khı̀ beh chē tiān-thui. Kiâⁿ kàu tiān-thui mn̂g-chhùi, ji lo̍h--khı̀ ê『按鈕』tán tiān-thui lâi, 13F-3 ū 2-ê 40-goā-hoè ê cha-po͘-lâng khui-mn̂g chhut--lâi, khiā tı̄ goá piⁿ--á mā teh tán tiān-thui. Goá siūⁿ kóng, in kap goá toà kāng-pêng, khó-lêng mā ū khoàⁿ-tio̍h hit-ê giàn chia̍h hı̂-á, ùi lâu-téng thiàu-loh-lâi kā goá thó hı̂-á ê Tân Chheng-chúi. “Tú-á chin lāu-jia̍t neh!” Hit 2-ê lâng thiaⁿ-tio̍h bı̄n-sái-sái lóng bô kóng-oē, goá siūⁿ kóng koh lā khoàⁿ mài--leh: “Àm-thâu-á ū lâng thiàu-lâu, lín kám chai-iáⁿ?” kóng--khí-lâi, án-ne kā lâng mn̄g chin sam-pat, m̄-koh hit-chūn mā bô siūⁿ hiah chē, kan-taⁿ beh chai-iáⁿ ū lâng kap goá chha-put-to soe--bô. Chhēng kàu-koaⁿ-saⁿ hit-ê bı̄n chiok chhàu--ê, lēng-goā hit-ê sêng kong-bū-goân ê cha-po͘-lâng kóng i ū thiaⁿ--tio̍h, koh kóng ai kā chiok toā-siaⁿ--ê, i mā khı̀ hō͘ kiaⁿ--tio̍h. Tiān-thui kàu 5-lâu, 1-ê siàu-liân ma-ma chhoā 1-ê sè-hàn gín-á jı̍p--lâi, hit-ê siàu-liân ma-ma khoàⁿ--khí-lâi bē chhiau-koè 30-hoè, ū siàu-liân cha-bó͘ ê chheng-chhun bí-lē, koh ū chò ma-ma ê sêng-se̍k, hō͘ lâng khoàⁿ kah sim-koaⁿ-íⁿ-á ngiau--leh ngiau--leh. Goá him-sióng hit-ê siàu-liân ma-ma iáu-boē teh-giàn, hit-ê m̄-chiâⁿ gín-á tō chhoah in bú--á ê chhiú: “Goá tú-á ū khı̀ lâu-kha bé tāu-iû......” Chiok un-jiû ê siaⁿ ùi siàu-liân ma-ma ê chhùi--nih kóng--chhut-lâi: “Me-me chiok gâu--ê, ma-ma bé thn̂g-á hō͘--lí.” Goá thiaⁿ kah kui sin-khu ē so͘--khı̀. Hit-ê me-me koh soà--lo̍h: “hit 2-ê a-peh teh poaⁿ-chhù, in ê pò͘-te-á chiok hó-sńg--ê, chiok toā-kha, koh ē tín-tāng--ô͘...” Un-jiû ê siaⁿ koh tı̄ goá hı̄ⁿ-khang-piⁿ chhut-hiān, m̄-koh goá í-keng bô teh chù-ı̀ siàu-liân ma-ma teh kóng siáⁿ--a. “Toà 13-lâu hit 2-ê lâng teh poaⁿ-chhù, toā-pò͘-tē koh ē tín-tāng?” Tiān-thui kàu 1-lâu, siàu-liân ma-ma chhoā me-me kiâⁿ-chhut toā-lâu, goá toè in āu-piah chhut--khı̀, siūⁿ beh toè un-jiû ê kha-pō͘, kiâⁿ-kàu koán-lí-sek, thâu oat-koè khoàⁿ tiān-thui, tiān-thui mn̂g kuiⁿ oá--lâi, í-keng lo̍h-khı̀ tē-hā-sek--a, sim-koaⁿ-thâu hiông-hiông siūⁿ kóng hāi--a, koáⁿ-kín mn̄g khoàⁿ tē-hā-sek kám ū koán-lí-goân, i kóng bô, kan-taⁿ ū tiān-tōng-mn̂g, ū『遙控』tō ē-sái khui-mn̂g lo̍h--khı̀. Pêng-siông-sı̂-á goá lóng pō͘-lián, khiā Ou-to͘-bai--ê liān tē-hā-sek tùi toh-ūi lo̍h--khı̀ mā m̄-chai, kàu-taⁿ mā bô sı̂-kan koh siàu-liām siàu-liân ma-ma--a. Goá kā koán-lí-goân chioh tiān-oē khà hō͘ hêng-sū--ê, kā in kóng hit 2-ê lâng chin kı̂-koài, hêng-sū--ê kóng í-keng kiat-àn--a, kóng sı̄ Tân Chheng-chúi chū-sat. Goá sūi kā chhò--lo̍h: “Lín-niâ--leh, lâng sí tı̄ gún tau『陽台』, lín kā goá khah choan-sim pān--leh!” Un-jiû ê siàu-liân ma-ma thâu oat--koè-lâi, khoàⁿ goá sı̄ teh toā-siaⁿ siáⁿ, goá soah pháiⁿ-sè pháiⁿ-sè, chhiú giâ-khí-lâi kā pí--1-ē piáu-sı̄ sit-lé, i tùi goá chhiò--1-ē, tō khan hit-ê me-me kiâⁿ tùi toā-lō͘ khı̀. Goá kè-sio̍k kap hêng-sū--ê sio-lióng, 2-pêng pí tauh toā-siaⁿ--ê: “Goá kā lí kóng, ū 1-ê sè-hàn gín-á khoàⁿ-tio̍h in thoa Tân Chheng-chúi......” “Hit-ê gín-á bat Tân Chheng-chúi? Kap i ū siáⁿ-mih koan-hē?” “Kháu-pē! He sı̄ lín ài khı̀ chhâ--ê, goá sı̄ siū-hāi-chiá neh, lí nah ē siáⁿ-mih tāi-chı̀ lóng mn̄g--goá? Án-ne hêng-sū-cho͘-tiúⁿ oāⁿ goá chò--lah!” “Bô, lí khı̀ chhoē hit-ê gín-á lâi, án-ne goá tō koh pān, nā bô, tō sı̄ chū-sat kiat-àn.” “Kán! Lín chia--ê sí-chha̍t-thâu, lâng sí tı̄ gún tau, goá ē soe-siâu 1-sı̀-lâng neh, àm-sı̂-á i nā lâi chhoē goá kā i pò-siû, goá tō khı̀ lín phài-chhut-só͘ sí hō͘ lín khoàⁿ......” Kiāu iáu-boē soah, hit-ê siàu-liân ma-ma khan hit-ê me-me jı̍p--lâi, goá kín cháu-khı̀ kā tâu, kóng ū lâng ùi lâu-téng thiàu--lo̍h-lâi, sí tı̄ gún tau『陽台』, in me-me khó-lêng ū khoàⁿ-tio̍h chng lâng ê toā-pò͘-tē. Siàu-liân ma-ma gāng--khı̀, bı̄n--nih piáu-chêng m̄-chai beh án-choáⁿ, m̄-koh iû-goân chiok súi--ê. Hit-ê me-me giú in bú--á ê chhiú: “Ma-ma, tú-á hit 2-ê a-peh poaⁿ-chhù, pò͘-tē chiok toā-kha--ê, koh ē ngiau-ngiau-soan--ô͘!” Siàu-liân ma-ma un-jiû ê siaⁿ: “Mài o͘-pe̍h-kóng, ū-iáⁿ chiah thang kóng, sı̄ siáⁿ-mih sı̂-chūn?” “Bé tāu-iû tńg--lâi hit-chūn-á, in koh ū kā goá ji tiān-thui kong!” Goá kín chiap-lo̍h mn̄g: “Hit-kha tē-á seⁿ kah siáⁿ-khoán?” Goá mn̄g kah chiok kín-tiuⁿ--ê, siàu-liân ma-ma kiaⁿ--tio̍h, kā me-me chhiú khan--leh tō kiâⁿ tùi tiān-thui khı̀, ná kiâⁿ ná kóng: “Kiâⁿ, lâi tńg! Bē-sái o͘-pe̍h-kóng--ê!” Me-me soah toā-siaⁿ khàu--chhut-lâi: “Goá bô o͘-pe̍h-kóng--lah!” “Ou-pe̍h-kóng” hō͘ me-me kám-kak ma-ma bô beh siong-sı̀n--i, tō tı̄ tiān-thui mn̂g-chhùi it-tı̍t khàu, bô beh jı̍p--khı̀. Chit-chūn, hêng-sū-cho͘--ê koáⁿ kàu-ūi, chông--jı̍p-lâi, khoàⁿ goá khiā tı̄ hia, kā goá hoah, kóng tı̄ toā-kiô-thâu lı̂m-kiám tio̍h Tiuⁿ Bêng-chı̀ kap Kang-kàu-koaⁿ sái ê chhia, lı̂m-kiám ê『霹靂小組』chhoā--khı̀ ê kèng-chhat-káu phı̄ⁿ-tio̍h āu-táu koài-koài, siūⁿ kóng chit-pái koh chhâ-tio̍h cháu-su to̍k-phín--a, khui--khui soah kan-taⁿ 1-kha toā-pò͘-tē, téng-thâu ū huih-tih ê hûn, tùi tē-chí chiah chai Kang-kàu-koaⁿ toà tı̄ 13F-3, chit-má beh lâi chhâ khoàⁿ ū siáⁿ-mih soàⁿ-soh--bô. In mn̄g goá ū beh chò-hoé khí--bô, goá pí siàu-liân ma-ma, kóng in kiáⁿ ū khoàⁿ-tio̍h Tiuⁿ Bêng-chı̀ kap Kang-kàu-koaⁿ thoa 1-kha toā-pò͘-tē chē tiān-thui, hêng-sū--ê hiān kā pò͘-tē the̍h--chhut-lâi, goá pài-thok siàu-liân ma-ma ài tàu-saⁿ-kāng, i thâu tı̀m kah chiâⁿ bián-kióng. Goá kóng beh chhiáⁿ i lim ka-pi, i chiah khah chhiò-bı̄n...... “Me-me, lí kám bat khoàⁿ-koè chit-kha tē-á? Ài khah chim-chiok khoàⁿ--ô͘!” Hêng-sū--ê kek gín-á-khùi kā mn̄g. Me-me kóng bô khoàⁿ--koè, goá kā pò͘-tē-á the̍h-khí-lâi phı̄ⁿ-phı̄ⁿ khoàⁿ-khoàⁿ--leh, ū khoàⁿ-tio̍h huih-tah, koh ū huih ê chhàu-chho-bı̄. Goá kiò hêng-sū--ê chng-jı̍p-khı̀ pò͘-tē chò Tân Chheng-chúi, koh kóng tō sı̄ bô tè mı̍h-kiāⁿ, me-me chiah jı̄m bē chhut--lâi. “Hit-ê khiú pò͘-tē ê a-peh ū thè goá chhı̍h tiān-thui!” Goá kā me-me hām siàu-liân ma-ma soeh to-siā, sı̄n-soà chio siàu-liân ma-ma khı̀ lim beh pó͘-sióng--i ê ka-pi. Goá toè hêng-sū--ê piàⁿ-khı̀ 13F-3 hiān-tiûⁿ chhoē chèng-kù, chhoē kui-po͘ lóng bô, thang-á-mn̂g kap thih-thang mā lóng bô bak-tio̍h siáⁿ-mih koài-hûn, thih-thang-téng ê káu-á-khang mā só-ân-ân. Chit-chūn, hêng-sū--ê chhiú-ki-á teh kaiⁿ, kàm-sek-cho͘ khà-lâi kóng pò͘-tē téng ê huih sı̄ ti-huih, m̄-koh ū khioh-tio̍h 4-ki-mo͘, 2-ki sı̄ Tân Chheng-chúi--ê, 1-ki sı̄ Tiuⁿ Bêng-chı̀--ê, koh ū 1-ki sı̄ Kang-kàu-koaⁿ--ê, si-thé mā ū giām-tio̍h chhia kàu--koè ê hûn, sı̄ thiàu-lâu chı̀n-chêng bô joā kú tio̍h--ê. Goá thiaⁿ-liáu sūi kóng ū chèng-jı̂n, koh ū chèng-bu̍t, bô goá ê tāi-chı̀--a, kiò in kā gún tau chheng-lí hó-sè, koh ài hâiⁿ goá 1-boé hı̂-á, goá Khi-mo͘ chiah ē giàn, kóng kah in chin pháiⁿ-sè, it-tı̍t kā goá hoē sit-lé, chhùi--nih liām-kóng ē koáⁿ-kín kā phò-àn. Koè 1-lé-pài, goá kap hit-ê siàu-liân ma-ma khı̀ lim ka-pi, goân-lâi hit-ê me-me m̄-sı̄ i--ê, sı̄ in pêng-iú--ê, jı̄m i chò khè-bú chiah ē kiò i ma-ma, siūⁿ--tio̍h tō lâi kap i toà......kám-kak chiâⁿ hoaⁿ-hí, hit-chūn tiān-sı̄ tú-á-hó teh pò sin-bûn, ká-ná ū kóng-tio̍h Tân Chheng-chúi ê àn phò-àn--a, koh lia̍h-tio̍h Chi-na-jı̂n-bı̂n-kiōng-hô-kok tı̄ Tâi-oân siat ê kang-chok-chām...... Che lóng bô goá ê tāi-chı̀, siōng iàu-kín--ê sı̄, ài kín chio siàu-liân ma-ma tàu-tı̄n chia̍h hêng-sū-cho͘ poê--goá ê hit-boé hı̂-á, ǹg-bāng chit-pái mài koh chhut tāi-chı̀--a! (TGB Thong-sı̀n tē 12~15 kı̂, 2000 nı̂ 9~12 goe̍h)