“Hō͘-siong liáu-kái”
Kūn-tāi Au Bí ê hong-sio̍k chiām-chiām thoân kàu Oán-tong, tı̀-kàu ū lâng tùi hó ê hong-sio̍k mı̄ m̄ khı̀ chhái-chhú. Chóng-sı̄ tùi pháiⁿ ê hong-sio̍k; chhin-chhiūⁿ thiàu-bú, lâm-lú kè-thâu ê kau-poê téng-téng, chin liû-hêng tı̄ lán ê siā-hoē tiong. Kàu-hoē hū-lú, tùi tı̄ kái-liông siā-hoē ê hong-sio̍k, eng-kai tio̍h hū-khí tiōng-tāi ê chek-jı̄m. Só͘-í kūn-lâi ū ke̍k-le̍k thê-chhiòng Ki-tok-hoà ka-têng kap hun-in chí-tō. Tùi tı̄ hun-in chí-tō, lán ài kiông-tiāu pē-bú kap kiáⁿ-jı̂ tiong ê “Hō͘-siong liáu-kái.” In-ūi ū chin-choē pi-ke̍k lóng-sı̄ tùi gō͘-hoē só͘ tı̀-kàu.
Teng-tiûⁿ ê jı̂n-bu̍t:
Lí (A-lí só): Sı̀-cha̍p goā hè ê koáⁿ-hū.
Chu (Pó-chu): Cha-bó͘-kiáⁿ, jı̄-cha̍p goā hè.
Ḿ (Chı̀n-châi Ḿ): Hm̂-lâng, chin gâu kóng-oē.
Thàm-hóng tūi-oân kah kap it (í-goā koh 2 lâng chò-hoé khı̀ iā khó-í).
Pò͘-kéng: Chı̍t keng chin kán-tan ê thiaⁿ, tiong-ng ū chı̍t-tè toh kap sı̀ tè í. Chá-khí sı̂ iáu chá ê sı̂, A-lí-só chiū chin bô êng ê khoán teh chhit í-toh, chiong chı̍t tiâu toh-kun chhu tı̄ toh téng, koh the̍h koá hoe chhah tı̄ hoe-kan lāi. Ná piàⁿ lāi-bı̄n ná kóng.
A-lí só: (Ka-kı̄ teh kóng) Ah! Taⁿ goá chhut thâu-thiⁿ lah, kan-khó͘ chit cha̍p goā nı̂, chhiâⁿ-tı̂ A-chu ah kàu kin-á-jı̍t. Taⁿ i ē-po͘ tāi-ha̍k beh chhut-gia̍p lah! Goá lāi-bı̄n khah chá piàⁿ-sàu chheng-khı̀, lâi khı̀ boé khah choē chhài, pān koá chheⁿ-chhau lâi chhiáⁿ A-chu ê pêng-iú lâi chia̍h àm. Ē-po͘ goá thang lâi khı̀ hù A-chu ê pit-gia̍p tián-lé (goā-bı̄n phah-mn̂g ê siaⁿ).
Ḿ: A-lí só ū tı̄-teh bô?
Lí: Ū oh! (koáⁿ-kín khui mn̂g ê khoán) oh! Chı̀n-châi Ḿ, chin kú bô khoàⁿ-kı̀ⁿ lí. Chiah nih chá sı̄ hō͘ sím-mı̍h hong kā lí chhe lâi leh?
Ḿ: Hō͘ toā hong-thai kā goá chhe lâi......Oà-ah! Lí chiah léng-lı̄! Chiah chá lāi-bı̄n chiū piàⁿ kàu chiah chheng-khı̀.
Lí: To goán hit ê A-chu ah, ē-po͘ tāi-ha̍k beh pit-gia̍p, goá chá-khí beh khah chá chhut-khı̀ boé koá-chhài thang chhiáⁿ i ê tông-ha̍k lâi chia̍h àm.
Ḿ: Kiong-hí! Kiong-hí! M̄-nā án-ni nā-tiāⁿ, A-lí só, iáu ū chı̍t hāng koh-khah thang kiong-hí ê sū, lí nā thiaⁿ liáu tek-khak beh koh-khah chin hoaⁿ-hí.
Lí: Sím-mı̍h hoaⁿ-hí ê sū leh, chhiáⁿ lí kóng.
Ḿ: A-lí só, lí teh beh hoat-châi lah! Lí chai-iáⁿ lín chit tiâu koe tē-it lō͘-bé keng hit chō toā iûⁿ-lâu ē thâu-ke ê toā hāu-siⁿ Kán Tek-kùi, i hiān-sı̂ teh koán in lāu-pē ê bō͘-e̍k-hâng, seng-lí kúi-nā pah bān. M̄-nā án-ni, in lāu-pē iā sı̄ lú-koán ê thâu-ke, koh ū chin choē iûⁿ-lâu teh cho͘ Bí-kim. Taⁿ Kán Sian-siⁿ ū pài-thok goá lâi choè lín A-chu hō͘ in toā hāu-siⁿ.
Lí: In sı̄ hiah hó-gia̍h ê lâng, lán chit hō sàn-chhiah ê lâng kám kap in phoè oē kè?
Ḿ: Che lóng bô būn-toê, in sı̄ kan-ta beh ài lí ê cha-bó͘-kiáⁿ nā-tiāⁿ, it-chhè ê kè-chng, hùi-iōng téng-téng, lóng sı̄ kiáⁿ-sài hit pêng beh hū-tam, In koh kóng, nā lí khéng tah-èng chiong cha-bó͘-kiáⁿ choè hō͘ in hāu-siⁿ, iā beh chiong chı̍t keng lâu-á-chhù hō͘ lí siu chhù-soè. Lí chı̍t-sı̀-lâng tio̍h-boâ kan-khó͘, taⁿ beh khoàⁿ-oa̍h lah.
Lí: Lán to iā bô ài tham lâng ê chı̂ⁿ-châi kap chhù-the̍h. Put-kò ū chı̂ⁿ lâng ê kiáⁿ-jı̂ siông-siông ài jiám-tio̍h bô hó ê sı̍p-koàn, chhin-chhiūⁿ phiâu, tó͘, ím téng-téng; thiaⁿ-kı̀ⁿ kóng, Kán Tek-kùi ê hāu-siⁿ m̄-sı̄ hó kiáⁿ.
Ḿ: I sı̄ teh choè seng-lí ê lâng, ū sı̂ á kap lâng tām-po̍h èng-siû; lim koá chiú, thiàu-thiàu bú, poa̍h che bâ-chhiok, che ū siáⁿ iàu-kín?! Lí tio̍h khah khai-hoà leh, iā tio̍h siūⁿ khah hn̄g leh. Lán cha-bó͘-kiáⁿ kè khı̀ chı̍t-sı̀-lâng ū thang chia̍h, chhēng, hó-miā kè jı̍t sı̄ tē-it iàu-kín. Iā koh lí ka-kı̄ mı̄ chı̍t nı̂ pí chı̍t nı̂ khah lāu, ū chı̍t ê kò͘-tēng oē oá-khò ê siu-jı̍p, kiám m̄-sı̄ chin iàu-kín. Goá khoàⁿ lí tio̍h sûi-sı̂ tah-èng i khah hó, in-ūi ki-hoē nā sit-lo̍h, chiū boē thang koh tit-tio̍h lah.
Lí: Lí kóng ê oē goá thiaⁿ liáu to iā chin ū lí-khı̀. M̄-kú goán A-chu ah í-keng tāi-ha̍k pit-gia̍h, iā hit ê ta-po͘ gín-ná ê kàu-io̍k thêng-tō͘ káⁿ m̄ ta̍t-tio̍h goán no͘h?
Ḿ: He kiám ū iàu-kín? I teh choè seng-lí, Eng-gú, Kok-gú kóng kah lù-lù kiò. Lí nā ài, kiò in nn̄g lâng kiat-hun liáu chiah saⁿ chhoā khı̀ liû-ha̍k mā sı̄ khó-í. A-lí só, taⁿ m̄ thang koh tiû-tû, goá só͘ pò ê bô chhò, kín-kín tah-èng goá. Chia ū chı̍t tùi gō͘ niú ê kim chhiú-khoân, lí soà siu khí-lâi.
Lí: Taⁿ chhiáⁿ khah bān leh no͘h, mā tio̍h hō͘ goá kap goán A-chu ah chham-siông chı̍t ē leh.
Ḿ: Lí chú-ı̀ chiū oē sái-tit, mih-sái tio̍h chham-siông? Lí chı̍t-sı̀-lâng thoa-boâ kan-khó͘, kā i chai-poê kàu toā-hàn; kā i chú-ı̀ chı̍t ê chhin-chiâⁿ mā sı̄ eng-kai ê, choè lí kā i tiāⁿ lo̍h-khı̀.
Lí: Goá tú-á koh siūⁿ-tio̍h chı̍t hāng: Lán tùi kúi-nā tāi chiū sı̀n Chú. A-chu tı̄ kàu-hoē iā chin chhut-la̍t; taⁿ Kán Sian-siⁿ, chı̍t ke sı̄ sè-sio̍k lâng, beh kiò A-chu kiat-hun liáu, tè i sè-sio̍k khoán i káⁿ boē koàiⁿ-sı̀ ò͘.
Ḿ: Lí kiám hiah tiâu-tı̍t? Lán tio̍h tāi-seng kap i kóng tiâu-kiāⁿ, kiò kiáⁿ-sài bē kiat-hun í-chêng tio̍h kap lán sı̀n Siōng-tè. I hiah ài lín A-chu, kiò i ê thâu chām hō͘ lín mā hoaⁿ-hí; hô-hòng chit chūn kiò i niá soé-lé jı̍p kàu, i tek-khak khéng no͘h.
Lí: Nā chiàu lí só͘ kóng ê tiâu-kiāⁿ ta̍k hāng chiah nih hó, goá mā bô būn-toê.
Ḿ: Sı̄! Taⁿ lí chhin-chhùi tah-èng, chū án-ni tiāⁿ-tio̍h, chhiú-khoân soà siu jı̍p-khı̀.
Lí: Taⁿ mā hō͘ gín-ná chai-iáⁿ liáu chiah lâi sàng tiāⁿ, goá chhùi ín lí chiū hó.
Ḿ: Hó, án-ni kóng chiū chún-siàu. Taⁿ lí chhiáⁿ, goá bô-êng, bı̂n-á-chài goá chiah koh lâi. (Peh khí-lâi kiâⁿ chhut-khı̀).
Lí: Sit-lé. (Tē 1 kéng oân).
(Hm̂-lâng kiâⁿ chhut-khı̀ liáu, A-lí só chin hoaⁿ-hí ê khoán-sit ka-kı̄ kóng).
Lí: Kin-á-jı̍t sı̍t-chāi sı̄ goá chı̍t-sı̀-lâng tē-it hoaⁿ-hí ê jı̍t. A-chu beh pit-gia̍p, koh ū chiah hó ê chhin-chiâⁿ. Che sı̍t-chāi sı̄ hō choè siang-hí. (Pó-chu jı̍p-lâi).
Chu: Ma-ma goá tńg-lâi lah.
Lí: Lí kiám chiah chá chiū ū thang tńg-lâi.
Chu: Goá chı̍t-ē khó-chhı̀ soah chiū tńg-lâi. Ē-pó͘ thang kap ma-ma lí saⁿ-kap khı̀ hù pit-gia̍p sek.
Lí: A-chu kiáⁿ ah! Kin-á-jı̍t sı̍t-chāi sı̄ goá chhut-sı̀ í-lâi choè hoaⁿ-hí, choè khoài-lo̍k ê chı̍t jı̍t. Ma-ma chı̍t-sı̀-lâng thoa-boâ kan-khó͘ lâi chai-poê lí, taⁿ í-keng chhut-thâu thiⁿ lah. Lí ē-pó͘ beh pit-gia̍p, che sı̄ thâu chı̍t chân ê hoaⁿ-hí. Iáu-kú ū koh khah thang hoaⁿ-hí ê sū leh...!
Chu: Ū-iáⁿ nih? Chhiáⁿ ma-ma kín kā goá kóng.
Lí: Tú-chiah Chı̀n-châi ḿ-ah lâi chhē goá kóng, chı̍t ê chin hó ê chhin-chiâⁿ beh kā lí chò, goá iā ín i lah, A-chu che kiám m̄-sı̄ siang-hí?
Chu: (Chin khı̀ ê khoán), Ma-ma lí kiám oē bô hō͘ goá chai, chiū ín lâng. Kiat-hun sı̄ jı̂n-seng ê toā-sū, m̄-sı̄ boé-boē, lí boē ēng-tit sûi-piān chú-ı̀.
Lí: (Iā ēng siū-khı̀ ê siaⁿ-im), A-chu, ma-ma chı̍t-sı̀-lâng thoa-boâ, chai-poê lí kàu chiâⁿ lâng, taⁿ ū hó ê chhin-chiâⁿ beh lâi chò lí, thang hō͘ ma-ma khùiⁿ-oa̍h kè jı̍t, chóng-bô liân che goá iā boē chú tit-ı̀?
Chu: Ma-ma, goá í-keng ū chı̍t ê pêng-iú lah, goá siūⁿ bô kú, chiū beh kap i tēng-hun.
Lí: Aih! Lí chit ê cha-bó͘ gín-ná kiám chiah hó-táⁿ, ka-kı̄ toā chú toā ı̀. Liân beh tēng-hun ê sū iā ún teh m̄ hō͘ goá chai, chit ê ta-po͘ gín-ná tàu-tí sı̄ sím-mı̍h khoán ê lâng?
Chu: I sı̄ kap goá tâng-pan ê Ông Chı̀-oán. I sı̄ chı̍t ê chin chhang-miâ ê lâng. Ta̍k tang lóng khó thâu miâ. Sui-jiân in tau sàn-chhiah, i iā poàⁿ kà, poàⁿ tha̍k, khó͘-ha̍k kàu pit-gia̍p sêng-kong.
Lí: I hiah-nih sàn-chhiah, chhı̄ chı̍t ê bó͘ mā boē pá beh kap i kiat-hun? Lâng Chı̀n-châi ḿ siāu-kài chit ê sı̄ lán chit tiâu koe tē it hó-gia̍h, koh beh chı̍t keng lâu-á chhù hō͘ goá. Kè-chng kap it-chhè ê hùi-iōng lóng sı̄ in beh kā lán chhut. Goá taⁿ ín i liáu lah, sı̄ beh chiàu án-ni kiâⁿ.
Chu: Ma-ma lí nā beh kiông kiò goá choè goá m̄-ài ê sū, goá beh choè goá chhut-khı̀, m̄ koh tò-tńg lâi. Goá lâi khı̀ khoán mı̍h. (Beh kiâⁿ khı̀).
Lí: (Toā siū-khı̀) Ài-ah, lí chit ê cha-bó͘ gín-ná, goân-lâi chiah put-hàu, bô siūⁿ lín lāu-bú chai-poê ê un, kin-á-jı̍t káⁿ kap goá tùi-te̍k. Taⁿ chhı̄ lí toā, chai-poê lí sêng-kong, lí chiū beh kiâⁿ lí ê lō͘ lah......(Goā-bı̄n phah-mn̂g ê siaⁿ tit teh kiò).
Hóng kah: Ū lâng tı̄-teh bô? Ū lâng tı̄-teh bô? (A-chu chhut-khı̀ khui-mn̂g) Lín bú-kiáⁿ sı̄ teh saⁿ jióng sím-mı̍h? Hō͘ goán tı̍t-tı̍t phah-mn̂g iā bô lâng lâi khui. Lín bú-kiáⁿ pêng-sı̂ to͘ chin saⁿ-thiàⁿ, iā m̄-bat thiaⁿ lín teh oan-ke ê siaⁿ.
Lí: To͘ sı̄ goá chit ê lāu pháiⁿ-miā ê; Chiú-koáⁿ 10 goā nı̂, kā lâng soé saⁿ, pó͘-thı̄ⁿ, thoa-boâ kan-khó͘, lâi chai-poê chit ê kiáⁿ, chhiâⁿ-tı̂ i kàu kin-á-jı̍t beh pit-gia̍p. Taⁿ i m̄-tı̍h lán lah, kóng beh choè i chhut-khı̀, m̄ koh tńg-lâi.
Chu: Sı̄ ma-ma pek goá tio̍h chhut-khı̀ ê.
Hóng it: Goá khoàⁿ lín nn̄g lâng lóng tio̍h ēng léng-chēng ê thâu-náu lâi chhú-lí tāi-chı̀, nā ū ı̀-kiàn boē ha̍h ê só͘-chāi, iā tio̍h ēng chham-siông ê thài-tō͘, kóng kàu pí-chhú oē “Hō͘-siong liáu-kái”. Taⁿ chhiáⁿ lín N̄g lâng kóng tām-po̍h tú-chiah chhiong-tu̍t ê sū hō͘ goán choè chham-khó, kiám-chhái goán oē-thang pang-chān lín.
Lí: Goá chá-khí chin chá chiū khí-lâi piàⁿ-sàu lāi-bı̄n, ūi-tio̍h cha-bó͘-kiáⁿ kin-á-jı̍t beh pit-gia̍p, siūⁿ-ài khah chá khı̀ boé chhài, chú kúi oáⁿ chheⁿ-chhau thang chhiáⁿ kúi ê A-chu ê pêng-iú saⁿ-kap hoaⁿ-hí. Āu-lâi Chı̀n-châi ḿ ū lâi chē, beh kā A-chu choè hō͘ thong lán chit choā koe tē-it ū chı̂ⁿ ê lâng, lán chiah sàn-chhiah ê lâng, ū chiah hó ê chhin-chiâⁿ beh kā lán choè, thàu-mı̂ mā tio̍h ín--lâng. Tú-chiah A-chu tńg-lâi ê sı̂, goá chiong chit chân sū kā i kóng, i sûi-sı̂ kap goá pı̀ⁿ bı̄n, kóng beh choè i chhut-khı̀, m̄ koh tńg-lâi.
Hóng kah: A-chu, lí pêng-sò͘ sı̄ hàu-sūn ê cha-bó͘ gín-ná, kin-á-jı̍t kiám oē tùi ma-ma chiah bô lé-sò͘. Lí nā ū sím-mı̍h ı̀-kiàn choè lí kā ma-ma kóng, hō͘ i oē lí-kái lí, m̄-sı̄ ēng kiông ê hoat-tō͘.
Chu: Goá tāi-seng mā sı̄ hó-hó kap ma-ma kóng. Āu-lâi i kóng beh kiông-kiông kā goá choè hō͘ Kán Sian-siⁿ in hāu-siⁿ, goá chiah ū kap i hoán-khòng.
Hóng it: Lí hoán-khòng ê lí-iû sı̄ sím-mı̍h?
Chu: Goá bô chàn-sêng ēng choan-chè ê chhiú-toāⁿ kā kiáⁿ-jı̂ chú-ı̀ hun-in ê sū. Jı̂-chhiáⁿ ma-ma chí-ū thiaⁿ hm̂-lâng ê oē, chiū ta̍k kù sı̀n i. Goá kā i kóng ê oē, i lóng bô kā goá thiaⁿ poàⁿ kù.
Lí: A-chu kóng sím-mı̍h i ka-kı̄ khı̀ kau chı̍t ê sàn-chhiah ê tâng-o̍h, iā ka-kı̄ toā-chú toā-ı̀ chiū beh kap i tēng-hun; goá chū-jiân bô ài thiaⁿ i. Goá ài i kè chı̍t ê hó-gia̍h lâng, mā sı̄ ūi i ê hó, ài i chı̍t-sı̀-lâng hó-miā.
Hóng kah: Chóng-sı̄ lí tû chit ê gín-ná ê ke-têng hó-gia̍h í-goā, iáu oē chai i kı̂-û ê tāi-chı̀ bô?
Lí: He sı̄ bô siáⁿ chai.
Hóng kah: Nā án-ni chiū m̄-tio̍h. Lán chai kiat-hun sı̄ chiong-sin ê toā sū, tek-khak tio̍h sı̄n-tiōng soán-te̍k, m̄-thang bông-bo̍k chò sū. Koh sui-jiân cha-bó͘-kiáⁿ sı̄ lán ê sı̄-soè, lán sū-sū iû-goân ài chun-tiōng i ê ı̀-kiàn, kap i soè-jı̄ siong-liông, m̄-sı̄ ēng to̍k-chhâi ê chhiú-toāⁿ.
Hóng it: Sı̄, iā koh kiat-hun tû kim-chı̂ⁿ í-goā, iáu ū chin-choē koh-khah iàu-kín ê tiâu-kiāⁿ, lán m̄-thang bô khó-lū. Chhin-chhiūⁿ hit ê lâng pún-sin ê kiān-khong būn-toê, tō-tek būn-toê, kàu-io̍k kap hèng-chhù, lóng tio̍h siông-sè tiau-cha. Koh chı̍t hāng, tē-it iàu-kín chiū-sı̄ lán sı̀n Chú ê lâng só͘ kéng ê tùi-siōng, tek-khak tio̍h pı̂ⁿ-pı̂ⁿ sı̄ Ki-tok-tô͘ chiah sı̄ ha̍p tı̄ Chú ê kà-sı̄.
Chu: Ma-ma só͘ kóng hit ê sı̀ⁿ Kán ê, kui ê lóng sı̄ sè-sio̍k lâng.
Hóng kah: Nā án-ni, A-chu lí só͘ kéng ê tùi-siōng sı̄ sím-mı̍h khoán, chhiáⁿ kóng tām-po̍h hō͘ goán chai.
Chu: I kap goá tâng-pan sı̀ nı̂ kú. Tùi tı̄ ha̍k-būn chin ū sı̍t-le̍k, ta̍k pái sı̄ choân pan khó tē-it miâ. Koh tı̄ kàu-hoē Chheng-liân-hoē, Sèng-koa-tūi lóng chin chhut-la̍t tàu pang-chān. Sui-jiân i sı̄ sàn-chhiah, i iā teh choè ka-têng kàu-su, ka-kı̄ kiong-kip ha̍k-hùi, sı̄ chı̍t ê bô͘-hoān chheng-liân.
Hóng it: Goán oē thang thoè lí thàm-thiaⁿ lín ha̍k-hāu ê lāu-su kap bat i ê lâng, nā chit ê gín-ná chiâⁿ-sı̍t sı̄ chiah hó ê chheng-liân, goá siong-sı̀n lín lāu-bú tek-khak oē tông-ı̀. Chóng-sı̄ lí í-āu tek-khak tio̍h tāi-seng hō͘ lāu-bú chai, tit-tio̍h i tông-ı̀, m̄-thang to̍k-toàn to̍k-hêng.
Hóng kah: A-lí só, sè-kan m̄-sı̄ kan-ta kim-chı̂ⁿ chiah oē hō͘ lâng khoài-lo̍k; siong-hoán, kim-chı̂ⁿ ū sı̂ oē toà chin-choē chai-hō. Siat-sú chit ê Kán Sian-siⁿ ê hāu-siⁿ nā in-ūi ū chı̂ⁿ hoān-tio̍h phiâu, tó͘, ím ê pháiⁿ sı̍p-koàn, sı̄m-chı̀ koh chhoā kúi-nā ê soè-ı̂, lí siūⁿ kan-ta chı̂ⁿ oē hō͘ lí kap lí ê cha-bó͘-kiáⁿ khoài-lo̍k á boē? Hô-hòng chı̂ⁿ-gûn ná hái-éng, ek-lâi ek-khı̀, kin-á-jı̍t sı̄ lán ê, bı̂n-á-jı̍t sı̄ pa̍t lâng ê. Só͘-í kiat-hun ēng kim chı̂ⁿ choè phiau-chún sı̄ tē-it gûi-hiám ê sū, chhiat-chhiat tio̍h kái. Hô-hòng hm̂-lâng chhùi hô͘ lùi-lùi, m̄-thang siong-sı̀n i.
Lí: Goá thiaⁿ lí kóng chiah ê oē, kám-kak chin ū lí-khı̀, hō͘ goá tit-tio̍h chin choē kà-sı̄. Taⁿ goá í-āu khah chai-iáⁿ lah.
Hóng kah: A-chu, lí pêng-sò͘ hiah hàu-sūn lín ma-ma. Kin-á-jı̍t sui-jiân i tùi lí khah kiông, lí iā m̄ eng-kai tùi i hiah bô lé, káⁿ kóng beh choè lí chhut-khı̀, m̄ tò-tńg lâi. Taⁿ kín-kín kā ma-ma hē sit-lé.
Chu: (Cháu lâi phak tı̄ ma-ma ê kha-thâu-u). Ma-ma, tú chiah tùi lí chin m̄-tio̍h. Í-āu m̄-káⁿ koh án-ni choè lah. Chhiáⁿ ma-ma goān-liōng, sià-bián.
Lí: Gōng kiáⁿ, ma-ma iā sı̄ ài lí hó, chı̍t-sı̂ siūⁿ bô thò-tòng, lí iā bo̍h-tit lia̍h goá ê oē choè oē.
Hóng it: A-lí só, lí chin kú bô lâi lán Lú Soan-tō-hoē. Chit kúi lé-pài tú teh gián-kiù Hun-in chí-tō, ǹg-bāng lí oē poah kang lâi chham-ka, oē-thang tit-tio̍h chin toā lı̄-ek.
Lí: Hó, goá āu-pái tek-khak beh lâi, kin-á-jı̍t chin to-siā lín jı̄-ūi lâi goán tau, pang-chān goán chin choē pó-poè ê kà-sı̄. Lín nā bô lâi, kiám-chhái goán bú kiáⁿ soà hun-lia̍t iā káⁿ.
Chu: Chin to-siā lín jı̄-ūi.
Kah, It: Taⁿ lín chhiáⁿ.
Lí, Chu: (Sàng in chhut khı̀) sūn kiâⁿ.
(Lú-soan Ge̍h-khan tē 17 kı̂, 1961 nı̂ 5 ge̍h)
